Tag: Hafeez Tabassum

پیڑ کا ادھورا خواب

لہلاتے کھیت کے درمیان
جب شام سنہری لباس پہنے اترتی ہے
پگڈنڈی کے پاس سوکھا شیشم
احساس سے کروٹ لیتا ہے
جیسے نیند میں اونگھتا کوئی خواب

وہ شام سے اسی طرح نفرت کرتا ہے
جیسے دن سے عمر رسیدہ طوائف

وہ دور اُجلے راستے پر نگاہ ٹکائے
گاگر اٹھائے لڑکیاں دیکھتا ہے
جن کی چھاتیاں
ناشپاتی معلوم ہوتی ہیں
جو خواب میں آکر منہ چڑاتی ہیں

کاش! انسان کے قبیلے میں کتا ہی ہوتا
وہ سوچتا ہے
اور اداسی کی اوس میں بھیگ جاتا ہے

اگلی شام قہقہوں کی بارش میں
بہار کے گیت گاتی لڑکیوں نے دیکھا
درمیان سے ٹوٹ کے گرا شیشم
پگڈنڈی پر راستہ رو کے کھڑا ہے
ّؔ
خوف کے لفافے میں لپٹا ہوا خط

جب تاریخ کی کتاب سے جملے چرا کر
عجائب گھر میں رکھے گئے
ادب کے دربار سے فرمان جاری ہوا
باغیوں کو دیوار میں چننے کی بجائے
تاریک کنویں میں رکھا جائے
اور پیشہ ور ادیبوں سے لکھوائی گئی
تاریخ کی نئی کتاب
جو نصاب میں شمولیت کی منظوری کے لیے
سنسر بورڈ کو بھیجا گیا
خوف کے لفافے میں لپٹا ہوا خط

کتاب گھر سے ناپسندیدہ کتابیں
فحاشی کے الزام میں جلا دی گئیں
اور کوک شاستر کے مصنف کو پھول پہنا کر
عقیدت سے ہاتھ چومنے کی رسم ایجاد کی گئی

باغیوں نے حلف نامے میں عہد کیا
شہر کی دیوار پر مرثیے لکھنے کا
اور اساطیری جنگل کی تلاش میں پھرتے
ایک مندر میں پناہ گزین ہوئے
جس کا ذکر
نئی تاریخ میں نہیں ملتا

بدھ کا اونچا نام

بدھ کے نام پر مانگنے کی روایت
صدیوں پرانی ہے
اور چیلے پر بھونکتے کتے کی بھی
اس لیے کہ دونوں دھتکارے جانے کی حد تک
گھٹیا سوال ہیں
اور دونوں پر حلال ہوتی ہے
ہر وہ چیز
جس کا ذائقہ بدبودار ہو

دنیا کی تمام مہذب گالیاں
اور پتھر مارنے کی رسم
بھوک کے گیت سے شروع ہوئی
اور تاریخ منسوب کرتی رہی
مقدس لوگوں کے نام

اگر اب اکیسویں صدی کا حمل نہ ٹھہرا
تو آخر ایک دن
دنیا کے تمام مسخرے اڑائیں گے
بدھ کا مذاق بھی

پرندے بے وقوف نہیں ہوتے

گمنام جزیرہ ہے
اور تنہا آدمی
جس کے چاروں طرف
پرندے نت نئی آوازیں نکال رہے ہیں

وہ یاد کرتا ہے
فاختہ کے قدیم گیت
اور عقاب کی درندگی کا مرثیہ
جب جنگل اور انسان
رشتے میں بھائی لگتے تھے
اور ایک ہی رنگ کے کپڑے پہنتے تھے

وہ قدیم روایت کے احساس تلے
جماہی لیتا ہے
اور تاریخ دہرانے کے لیے
پرندوں کے قبیلے میں شمولیت کی درخواست دیتا ہے

درخواست
جنگل کے دل میں محفوظ ہے
اور پرندوں کا اجلاس جاری
شاید انہیں یاد ہے
“شکاری کسے کہتے ہیں”

روش ندیم!
تمہارے ٹشو پیپر پر لکھے دکھ پڑھ کر
ہماری نیندیں خدا کے دروازے پر دستک دیتی ہیں
مگر دروازہ کُھلنے سے انکار کر دیتا ہے

تم دہشت کے موسم کی خبر سُن کر
اپنے سارے خواب اس بوڑھے برگد کی کھوہ میں چھپا آتے ہو
جہاں بدّھا کو نروان ملا تھا
لیکن وہاں کی بوڑھی چمگاڈریں انہیں لے اڑتی ہیں

روش ندیم!
تم ابر کی آہٹ پہ کان لگائے بیٹھے ہو
اور منٹو کی عورتیں سہاگ راتوں کو کوٹھوں پر فروخت کر دی جاتی ہیں
جن کے سہاگ سپنے مسلسل شہر کے بازاروں میں چلے جا رہے ہیں
خودکشی کے اجتماع میں

روش ندیم!
تم تہذیب کی کالی شاموں میں
تاریخ کی سڑک پر چلتے
انکار کے فلسفے سے بھرے سگریٹ پھونکتے ہو
اور جب تھک جاتے ہو
تو فٹ پاتھ کے کنارے بیٹھ کر لکھتے ہو
کڑک چائے کے کپ پر

تم خاموشی سے ڈال دیتے ہو
لنگڑے انقلابی کے کاسے میں
فیض کی کوئی نظم
جس میں چیخوں کا جنگل آباد ہے
وہ کھردرے ہاتھ کی انگلیوں سے وکٹر ی کا نشان بناتے ہوئے کہتا ہے
’’ منسوب ہوجائے آج کا یہ لمحہ ، یہ دن
یہ سال ، یہ صدی آپ کے نام‘‘
تم جواباً قہقہہ لگاتے ہو’’
کیوں۔۔۔۔۔۔۔؟
کیسے۔۔۔۔۔۔۔۔؟
اور تم ووڈکا کے تلخ ذائقے میں کارٹون بنانے لگتے ہو
اندھے لوگوں کے
جو نہیں جانتے سات رنگوں کی کہانی

سرما کی یخ ہوائیں کپڑے اڑاتی گزرتی ہیں
وہ بغیر روح کے بھٹک رہاہے
(دوسرے جنم میں)
ماچوپچو کی چوٹیوں پر
جہاں اب انسان نہیں سائے رہتے ہیں

وہ صنوبر کے سوکھے پیڑوں سے ہاتھ ملاتے
سوال کرتا ہے
جب ٹہنیوں سے ہزاروں پتے جدا ہوئے
جڑوں کے دل میں آخری خواہش کیا تھی
پیڑ مسلسل خاموش ہیں
وہ نہیں جانتے یہ انسان
کاغذ،قلم اٹھائے کس راز کی تلاش میں ہے

وہ جواب نہ ملنے پر
شدید غصے کی حالت میں بڑبڑاتا ہے
میں وہ شاعر ہوں
جس کی نظمیں سرحد پر ،سپاہی بیگ میں سنبھال رکھتے ہیں
خشک راشن ،پانی اور بندوق کے ساتھ
میں وہ شاعر ہوں
جس کے گیت عورتوں کی زبان پر زندہ ہیں
گرم بوسے کی جگہ
مگر پیڑ چِلی کی مادری زبان نہیں جانتے

وہ دکھ کے سناٹے میں سوچتا ہے
کئی سوسال پہلے کی داستان
جب قدیم پتھر نفرت کی کدال سے توڑے گئے
اور گرجا گھر کی گھنٹی
جو آثار قدیمہ کے ماہرین کو کھدائی کے دوران نہیں ملی
جس کی ٹن ٹن کی آواز
شہر کی موت کے کئی دن بعد تک زندہ رہی
جب پرندے غیر اعلانیہ ہجرت کے دوران
پیڑوں سے نظریں ملائے بغیر آبدیدہ لہجے میں گارہے تھے
اے ماچوپچو!
سلام آخری ی ی ی
جارہے ہیں تم سے دور
بہت دور۔۔۔۔۔۔۔۔۔

وہ اداس ہوجاتاہے
اور ایک پتھر اٹھائے دعا کرتا ہے
ماچو پچو کے ایصالِ ثواب کے لیے
تیز ہوائیں
ٹکراکے گزرتی رہتی ہیں
اور وہ زندہ ہونے کے خلاف کھڑا ہے
۔۔۔۔۔۔۔۔۔۔۔۔۔۔۔
٭لا طینی امریکہ کے ملک پیرو (Peru) میں واقع اندلس کے پہاڑی سلسلے پر واقع قدیم شہر کا نام
ؔپابلو نیرودا کی طویل نظم ’’ ماچو پچو کی چوٹی ‘‘
((The Height of machu pisshu سے ماخوذ

[vc_row full_width=”” parallax=”” parallax_image=””][vc_column width=”2/3″][vc_column_text]

[/vc_column_text][vc_column_text]

[/vc_column_text][/vc_column][vc_column width=”1/3″][vc_column_text]
[/vc_column_text][/vc_column][/vc_row][vc_row][vc_column][vc_column_text]

[/vc_column_text][/vc_column][/vc_row]