Tag: تالیف حیدر

کسی کے متعلق کچھ لکھنے کے لیے ضروری نہیں کہ اسے پوری طرح جانا جائے، لکھنے کے لیے تو بس ذرا سی تحریک کی ضرورت ہوتی ہے اور قلم خود بہ خود چلنے لگتا ہے۔ میں کئی روز سے اپنے ایک دوست یا یوں کہیے کہ دوست نما شخص کو بغور دیکھ رہا ہوں،اس لیے نہیں کہ ان کو دیکھنے سے مجھے کسی طرح کی کوئی خوشی نصیب ہو رہی ہے، بلکہ اس لیے کہ ان کے عادات و اطوار مجھے کاغذ اور قلم کی طرف مستقل دھکیل رہے ہیں۔ میں حالاں کہ ان پر کچھ نہیں لکھنا چاہتا ہوں،کیوں کہ ابھی نئے نئے تعلقات ہیں اور اتنی زیادہ بے تکلفی بھی نہیں کہ ان سے کوئی بہت گہرا مذاق کا رشتہ استوار ہو گیا ہو۔ پھر بھی کیا کیا جائے کہ ان کی ذات کے عجیب و غریب حالات مجھے پریشان کئے دے رہے ہیں۔ میری اور ان کی ملاقات کو ابھی صرف چند روز ہی گزرے ہیں اور وہ بھی ایک حادثاتی نوعیت کی ملاقات ہے کہ جناب ایک نازنین کے ہاتھوں تازہ تازہ قتل ہو کر دوستوں کے ساتھ کے لیے پریشان ہیں اس لیے میرا کندھا کبھی کبھی مستعار لے لیتے ہیں۔ عشق کی تفصیل میں نہیں جاوں گا کہ بہت سے احباب و شناسا اس سے واقف ہیں، صرف ان کا ذکر خیر کچھ یوں کرنا مناسب ہے کہ موصوف بلا کےمزیدار انسان ہیں۔ حالاں کہ ہر وقت پریشان رہتے ہیں، نہ دن میں کھانے کا ہوش ہے،نہ رات کو سونے کا، کوئی ایسی اچھی عادتیں بھی نہیں کہ کسی کو انہیں دیکھ کر بہت کچھ سیکھنے کا حوصلہ ملے، اردو ادب کے طالب علم ہیں اور اس کا بھی مطالعہ فکشن کو چھوڑ کر چہار جانب مشکوک ہے۔

یہ تو ان کے ظاہری کوائف ہیں، مگر جو لوگ ان کو ذرا دنوں سے جانتے ہیں وہ اس بات کی تائید کریں گے کہ کسی بھی صلاحیت کے نا ہونے کے باوجود انسان کس طرح دلچسپ ہو سکتا ہے۔ صلاحیتوں سے میری مراد تخلیقی صلاحیت نہیں ہے کیوں کہ آں جناب کے بقول وہ افسانہ نگار ہیں اور یہ بات خود میں بھی جانتا ہوں کہ ان کے چند ایک افسانے اردو کے مختلف ادبی جریدوں میں شائع ہو چکے ہیں،میرے نزدیک صلاحیت سے تو انسان کی پوری شخصیت مراد ہوتی ہے۔جس میں اس کے ہاو،بھاو سے لے کر اس کا سراپا، اٹھنا بیٹھنا، چلنا، پھرنا، ہنسنا، بولنا اور جملہ بشریاتی حرکات و سکنات کا شمار ہوتا ہے۔ آں جناب کو اس تناظر میں میں گزشتہ کئی روز سے سمجھنے کی کوشش کر رہا ہوں۔ عشق کا جو تذکرہ میں نے اوپر کیا اس کے حوالے سے اتنا کہنا تو جائز ہے کہ اس کم بخت جذبہ پر شوق میں بری ناکامی کے بات آدمی بے انتہا عجیب الخلقت ہو جاتا ہے اور اگر حضرت کے ساتھ ایسا کچھ ہوا ہے تو وہ اتنا غیر منطقی بھی نہیں کہ علامہ تو پہلے ہی سے اتنے عجیب الخلقت تھے کے نو عمر خواتین اور بچے انہیں کسی طور انسان کی اولاد ماننے کو ہی تیار نہ ہوتے تھے۔ ماں، باپ اگر مار کوٹ کر اپنے تجربات کی بنیاد پر انہیں یہ باور کرا دیں تو کرادیں کہ انسان ایسے بھی ہوا کرتے ہیں تو اور بات ہے۔مگر بچوں کو کسی طور یقین نہ آتا تھا۔ بزرگوں کا معاملہ اس امر میں ذرا مختلف تھا کہ وہ ایسے ہی کسی شخص کو انسان ماننے پر مصر رہتے ہیں جو بلا کا بے ضرر ہو۔

بہر کیف قبلہ سے پہلی ملاقات مجھے اچھی طرح یاد ہے، حضرت مجھ سے بڑے تکلفات سے ملے تھے، علیک سلیک کے بعد میں نے ان سے کافی دیر تک تجاہل عارفانہ کا مظاہرہ کیا، دیکھنے میں تو نہیں لگے تھے مگر انسان ذہین نکلے اور جلد بھانپ گئے، جلد مجھے اس بات کی اطلاع دے دی کہ میں آپ کے متعلق کافی کچھ جانتا ہوں، لہذا یہ پینترا مجھ پر نہ آزمائیں۔ اس ملاقات کے بعد مجھے لگا کہ انسان خواہ مسکین صورت اور نہ تراشیدہ صفات ہےمگر عقل رکھتا ہے۔ اگلی دو ایک ملاقاتوں میں انہوں نے مزید اپنے اسی امر کا ثبوت دیا۔ سحر اس وقت ٹوٹا جب حضر ت ایک نشست میں کسی بات پر ذرا کھل کھلا کر ہنسے۔ میں تو آج بھی اس ہنسی کو یاد کرتا ہوں تو رواں رواں لرز اٹھتا ہے کہ علامہ ہنسے کیا تھے خود کو ایک مصیبت میں گرفتار کر بیٹھے تھے۔ ہنسنے کی حالت چونکہ زمین پر کھڑے کھڑے طاری ہوئی تھی لہذا ایسا معلوم ہوتا تھا کہ اب گرے اور تب گرے۔اس وقت تو میں بہت حیران ہوا کہ اللہ رحم یہ بھی کوئی ہنسی ہے، مگر مزید دو چار ملاقاتوں میں اس بات کا علم ہو گیا کہ حضرت خواہ ہنستے وقت خود پر سے مکمل اختیار کھو بیٹھیں، مگر گرنے کی سعی ہمیشہ ناکام ہی رہتی ہے، در اصل اس ارتعاش مسلسل میں کچھ ان کا بھی قصور نہیں کہ بدن میں سوائے رگوں کے بے ترتیب جال کے خدا نے کچھ رکھا ہی نہیں ہے،جس کے باعث اوپر کا بدن ہنستے وقت الجھی ہوئی ڈور کے گچھے کی طرح نیچے کی طرف گرنے لگتا ہے، چونکہ ٹانگوں کی جگہ دو عدستلی نما ہڈیاں موجود ہیں اس لیے حضرت زمین پہ بکھر نے میں ناکام ہو جاتے ہیں۔ ایک آدہ مرتبہ تو میں نے بڑھ کر سہارا بھی دینے کی کوشش کی مگر جب تک میں سہارا دوں دوں حضرت عالم خندہ شوری سے پھر اسی جذبی حالت پر لوٹ چکے ہوتے ہیں جس میں انہیں استقال ہے۔ وہ طبعیتاً ذرا کم گو واقع ہوئے ہیں،ایسا کہنے کی وجہ یہ ہے کہ جن مستند ذرائع سے مجھے ان کے حوالے سے معلوم ہوا تھا اس کے پیش نظر یہ ہی رائے بنتی ہے، مگر میرا ذاتی تجربہ یہ ہے کہ علامہ کم گو صرف مجمع عام اور مردوں کے بیچ ہی واقع ہوئے ہیں، جوان اور خوبصورت لڑکیوں کے درمیان تو ان کی چیچاہٹ دیکھنے سے تعلق رکھتی ہے کہ میں جب کبھی اکیلا ان کے ساتھ ہوتا ہوں تو اس بات پر یقین ہی نہیں کر پاتا کہ یہ وہ ہی شخص ہے کہ لڑکیوں کے ساتھ تو شعر شور انگیز معلوم ہوتا ہے اور اکیلے میں آتے ہی میر کے ان زخم خردہ بہتر نشتروں کی مانند نظر آنے لگتا ہے جن پر کبھی بہارکے آنے کا گمان ہی نہیں بنا۔بہت ہوا تو بات کا جواب ہوں، ہاں میں دے دیا اور پھر وہ ہی قبرستان سی خاموشی۔ بعض اوقات تو یوں لگتا ہے کہ منہ میں زبان ہی نہیں ہے، صرف ماتھے پر آنکھیں چپکی ہیں جن سے ہر سوال کا جواب حاصل کیا جا سکتا۔ ان کی ہئیت کا من جملہ بیان تو نا ممکن ہے اور اس عہد میں اس کی کچھ خاص ضرورت بھی محسوس نہیں ہوتی کہ تصویر اتروانے کا فن بہت ترقی کر گیا ہے۔ پھر بھی اگر ان کی ذات کو جملوں میں بیان کرنے کی کوشش کی جائے تو کچھ یوں ہی بنتا ہے کہ ایک اکھڑی اکھڑی صورت، جس پر زمانے بھر کی مصیبتوں اور پریشانیوں کا بوجھ۔ اکہرا بدن اور اتنا اکہرا کہ اکہریت بھی اپنی معنیاتی ترسیل میں اس سے منکر ہو جائے کہ اس کو اکہرا نہیں کہا جا سکتا۔ذرا کچھ دودھ ملائی کھائے تب کہیں جا کر اکہرا ہو۔ الجھے الجھے بال اور اس پر غضب کی بے چارگی۔ سر میں ایک ایک ہاتھ تیل کھڑا کر کے بالوں کی دو طرفہ جڑوں کو اس میں گلے گلے تک ڈبو کر اس طرح دور سے آتے دکھائی دیتے ہیں کہ ان کی چال پر آدھے سارس اور آدھے شتر مرغ کا گمان ہوتا ہے۔ پیچھے سے دیکھو تو بالائی بدن گردن سمیت نیچے کی دنیا سے بے خبر معلوم ہوتا ہے۔ ٹانگیں پتلی اور لمبی، کمر اردو غزل کے معشوق کی مانند، بازو اور سینہ کمزوری کے سبب کمان کی طرح آدھے گول اورکناروں پر سے آگے کی جانب نکلے ہوئے اور پاوں کے پنجے ایسے کہ مور بے مایہ بھی شرما جائے۔میں اکثر ان سے کہتا ہوں کہ قبلہ اس جہان فانی میں آپ اپنی شکل کے تنہا ہیں۔ اس پر وہ مسکرا کر شرما سے جاتے ہیں، کیا پتہ ان تک میرے حقیقی جذبہ اظہار کی ترسیل ہوتی ہے یا نہیں، لیکن میرے دو ایک دیگر احباب جوہم دونوں کے مشرکہ دوست ہیں ان کو اس جملے کی زیریں ساخت کا علم بخوبی ہو جاتا ہے۔ ویسے تو اللہ کی بنائی ہر صورت موہنی مورت ہے،لیکن خدا کی پناہ کہ وقنا ربنا عذاب النار بھی تو کوئی چیز ہے۔اگر ایسی خناس صفت اشیا اس دنیا میں نہ ہوتیں تو کسی کو اس کے قہار ہونے پر کیوں کر یقین آتا اور یہ کیا کوئی کم بڑی بات ہے کہ ایک انسان میں کئی ایک چرند، پرند ایک ساتھ جمع ہو جائیں، جس کا تصور بھی باندھنا پکاسو و مانی جیسےتخلیق کاروں کی قدرت صنعائی سےبعید ہو۔ اس میں بھی ایک طرح کا حسن ہی مضمر ے کہ ماتھا بن مانس کا، آنکھیں مرغی کی، گال چمگادڑ کے اور ناک طوطے کی، کانوں کی بناوٹ ہاتھی جیسی مگر اس سےکچھ چھوٹے اور بال اس ڈری ہوئی سیائی کے مانند جس نے عالم خوف میں اپنے کانٹے پھیلا دیے ہوں۔ چہرے کی ہئیت نہ دبی ہوئی نہ لمبی نا گول نہ کھڑی نہ مربع نہ مستطیل نہ مثلث نہ چاندہ نہ پرکار نہ ڈوائڈر ایک بالکل ہی نئی طرح کا زاویہ تھا،جسے فیثا غورث اگر دیکھ لیتے تو ان کی دریافت میں مزید اضافہ ہو جاتا۔

ان کی کچھ باتیں تو ایسی تھیں کہ اگر مجھے کوئی سوتے سے اٹھا کر پوچھ لیتا کہ یہ اوصاف کس میں پائے جاتے ہیں تو میں اسی عالم استغراق میں ان کا نام نامی پکار اٹھتا۔ مثلا ً کبھی اگر کوئی ایسی بات کہتے جس پر وہ آپ کا اتفاق چاہتے ہوں، یا داد وصول کرنے کے خواہاں ہوں یا پھر تصدیق ہی چاہ رہے ہوں تو جملہ مکمل کر کے اپنی ریڑھ کی ہڈی کو آخری حد تک گول کر کے آپ کی آنکھوں میں آنکھیں ڈالیں گے اور اپنی گردن اس طرح سے ہلکے ہلکے گھمائیں گے جیسے گویا ان کے سر پر کسی نے منوں وزنی پتھر رکھ دیا ہو۔اس پر مستزاد یہ کہ آنکھوں پر جوایک عددعینک نہایت موڑے گلاسوں کے ساتھ چڑھی ہوتی ہے وہ اس گردش بےہنگم کی وجہ سے کھسک کر ناک پر اتر آتی۔ اس وقت ایک عجیب مضحکہ انگیز صورت پیدا ہو جاتی ہے کہ آں جناب کی بات کی تصدیق کرو، داد دو یاصورت حال سے محظوظ ہوتے رہو۔ میں تو اس امر کو بھی اپنی ایک عزیز کے بتلانے پر ہی جان پایا کہ جس موقع پر حضرت اپنے مخصوص انداز میں آ پ کی آنکھوں میں آنکھیں ڈال کر دیکھیں اور اپنی گردن کو اس جلالی مرغے کی مانند ہلائیں جو ابھی میدان جنگ میں اترا ہو تو سمجھ لیجیے کہ آپ سے اپنے جملے کی دا د چاہ رہے ہیں۔

میں ان کو بعض اوقات گھنٹوں گھورتا رہتا ہوں۔ جس کے رد عمل میں وہ بھی مجھے گھورنے لگتے ہیں۔ جب ذرا دیر ہو جاتی ہے تو میں ان کی نظروں کی تاب نہ لا کر خود اپنی آنکھیں ایک آدھا منٹ کے لیے ادھر ادھر ہٹا لیتا ہوں، مگر شوق نظر ہے کہ پھر جلد ہی اسی راہ پر لگا دیتا ہے۔ ایک روز کا واقعہ ہے کہ میں اسی عالم حیرانی میں انہیں تک رہا تھا جس میں اکثر تکا کرتا تھا کہ مجھ سے استفسار کر بیٹھے کہ کیا گھور رہے ہو۔ میں نے دبے ہوئے لہجے میں کہا کہ آپ میں گھورنے جیسا تو بہت کچھ ہے مگر فی الحال آپ کے افکار کا جائزہ لینے کی کوشش کر رہا ہوں کہ آخر دنوں دنوں خاموش رہ کر آپ سوچتے کیا ہیں۔ کہنے لگے تمہیں کیا لگتا ہے۔ میں نے کہا کہ ایک اچھا افسانہ نگار اس کے علاوہ اور کیا سوچ سکتا ہے کہ تخلیق کے نئے پیرائے کیا ہو سکتے ہیں، نئے کردار کیوں کر وضع ہوں اور کہانی کے جدید سوتوں کا سراغ کیسے ہاتھ آئے۔ کہنے لگے غلط میں ہمہ وقت ان سب بیکار کی باتوں میں ڈوبنے کو فضول جانتا ہوں۔ اس پر میں نے پوچھا کہ پھر کیا سوچتے ہیں۔ کہنے لگے سوچ رہا ہوں بریلی جا کر کارچوبی کا کام سیکھ لوں تاکہ اگر کوئی کام نہ ملے تو اپنا اڈا لگا کر آرای کا کار خانہ ہی کھول لو۔ میں نے لاحول پڑھی کہ اس میں اتنا غور کرنے کا کیا ہے، حد ہے کہ اگر آری، زردوزی ہی کرنی تھی تو اردو سے ایم۔اے کیوں کیا۔ کہنے لگے پہلے تو یہ ہی لگتا تھا کہ اردو سے ایم۔اے کر کے نوکری مل جائے گی، مگر اب میں کچھ امید نہیں رکھتا، کیوں کہ اردو میں اب صلاحیت کو تسلیم کرنے والے اور سراہنے والے ختم ہوتے چلے جارہے ہیں۔میں نے کہا کہ ایسا بھی کوئی قحط نہیں ہے آپ اپنی پڑھائی جاری رکھئیے اور اللہ کی رحمت سے پر امید رہیے۔ابھی میں انہیں دلاسا ہی دے رہا تھا کہ اچانک زور سے چھینک دئیے او ر چھینک کے ساتھ منہ سے رال کی ایک لکیر بہہ کر ان کی داڑھی پر لٹکنے لگی۔ میں نے اپنا منہ دوسری جانب پھیر لیا اورچپ چاپ وہاں سے اٹھ گیا۔ شام کو دوبارہ ان کی طرف گیا تو دیکھا اسی عالم میں بیٹھے ہیں اور خلا میں گھورے جارہے ہیں۔ صبح کی رال داڑھی پر لٹکے لٹکے سوکھ چکی تھی اور اس درمیان میں ان کے بدن سے جتنا پسینا نکلا تھا اس سے کمرے کی فضا معطر ہو رہی تھی۔

نہانے کا انہیں ذرا شوق نہ تھا۔ میں نے آخری بار نہانے کی تاریخ معلوم کی تو پتہ چلا کہ اس کو گزرے ایک عرصہ ہو گیا ہے۔ بدن پر میل کی کئی پرتیں جمع ہو گئیں تھی جس کی وجہ سے صحت نکل آئی تھی۔ بدن پر جگہ جگہ جالے لگے تھے، اور ہاتھ پاوں کا یہ عالم تھا کہ

دیوار و در پہ بن گئیں شکلیں عجیب سی
کچھ راز تھے جو آپ اگلتے رہے مکاں

پسینہ روز اتنی مقدار میں لباس میں جذب ہوتا تھا کہ پیرہن کاغذی ہو چلا تھا۔ بد بو تو اب دور کی خبر ہو گئی تھی، عالم یہ ہو چلاتھا کہ کومہ کے مریض کو اگر ان کے حجرئے مبارک سے آٹھ میل دور لٹا دو تو وہ قے کرتا ہوا اٹھ کھڑا ہو۔ مرگی کے مریض تو بس خبر سن کر ہی ٹھیک ہوجایا کرتے تھے۔ ان کے پسینے کی مہک اتنی کھٹی اور زہر آلودہ تھی کہ جہنم کا آخری درجہ یاد آجاتا تھا۔ میں نے ایک روز بالاصرار ان سے نہانے کا عزم لے لیا کہ محلے کے بچے طاعون کا شکار ہو رہے تھے اور علاقے کے قبرستان کی زمین مہنگی ہوتی چلی جا رہی تھی۔ وہ یہ خبر سن کر غسل خانے تک گئے اور یہ کہہ کر الٹے پاوں واپس آگئے کہ موسم سرمہ چل رہا ہے مئی تک رک جاو کہ ذرا دھوپ نکلے تو نہانہ ٹھیک لگے۔

کاہل بھی بہت اعلی درجے کے ہیں۔ جگر کے تعلق سے سنا ہے کہ دار الکہلا کے صدر تھے، اگر یہ صاحب جگر کے معاصر ہوتے تو مجھے یقین ہے کے جگر صاحب بخوشی اپنی نشست خالی کرنے میں لمحہ ضائع نہ کرتے۔ مجھے اس بات کا علم ان کے روز مرہ کے معمولات سے ہوا ہے۔ مثلا ً صبح صادق سے شام تک اورشام سے رات دیر تک ان کا معمول یہ کہ رات بھر جگ کے آرام کرتے ہیں اور صبح میں چھ بجے سونے لیٹتے ہیں، شام کو چار بجے نیند سے بیدار ہوتے ہیں اور دوسرے دن صبح تک بستر پہ پڑے پڑے اس بات کا شکوہ کرتے رہتے ہیں کہ جب سے وہ حادثا ہوا ہے نیند تو جیسے آنکھوں سے اوجھل ہو گئی ہے۔ میں نے ایک روز مشورہ دیا کہ آپ شام کوحجرے سے باہر نکل آیا کریں اور دیر تک سیر و تفریح میں رہیں۔بدن خود اتنا تھک جائے گا کہ بستر پر پیٹھ لگاتے ہی نیند آ جائے گی۔ میری تجویز سے خوش ہوئے اور اگلے روز سے اس پر عمل کرنے کا وعدہ بھی کیا، مگر تین روز تک نہ چائے خانے پر نظر آئے نہ سیر کے میدان میں۔ میں نے معلوم کیا تو پتہ چلا کہ حجرے سے باہر نکلنے کی کوشش میں بخار نے آ گھیرا ہے، میں عیادت کو گیا تو کہنے لگے کہ یہ سب تمہارا قصور ہے نہ تم تبدیلی ہوا کا مشورہ دیتے اور نہ میں بیمار پڑتا۔ میں نے حیران ہو کر کہا کہ کیا کمرے سے باہر قدم رکھنے کو تبدیل ہوا کا عمل کہتے ہیں۔ اس پر مزید بپھر کے کہنے لگے ڈاکٹر تو یہ ہی کہتا ہے کہ پچھلے کئی روز سے اس کمرے میں بند رہنے سے باہر کی آب و ہوا آپ کے لیے اجنبی ہو چلی ہے۔ لہذا اگر اب کی باہر جانے کا ارادہ ہو تو پہلے چھتری اور گرم کپڑوں کا انتظام کر لیجیے گا، کیوں کہ اند ر پڑے پڑے آپ نے کمرے کا درجے حرارت اتنا گرا دیا ہے کہ باہر جاتے ہی ٹھنڈ لگنے کا خدشہ ہے۔

اس روز سے میں انہیں کسی بھی طرح کا کوئی مشورہ دینے سے پہلے سو مرتبہ غور کرتا ہوں۔ان کی شخصیت باغ و بہار کی ضد اور چہار درویش کا مرکب ہے۔میرے تعلقات ابھی ان سے نئے ہیں مگر میں کوشش کر رہا ہوں کہ ان کی حالت میں سدھار پیدا ہو۔ اگر مئی تک یہ رشتہ بنا رہا تو اس کے دور تک چلنے کے امکان ہیں۔

میں نے اپنے آپ کو اس وقت بہت بے بس محسوس کیا، جب میں زبیر صاحب کے سامنے بیٹھا ان کی عجیب و غریب باتیں سن رہا تھا۔ یہ عجیب و غریب منفی معنی میں نہیں، بلکہ سراسر مثبت ہے۔ وہ ایک شام کا واقعہ تھا کہ میں اتفاق سے اکیلا ہی ان کے پاس کسی کتاب کے سلسلے میں پہنچ گیا تھا، انہوں نے ہمیشہ کی طرح بڑی محبت اور خلوص سے مجھے خوش آمدید کیا اور اپنے باہری کمرے میں جہاں نہ جانے کتنے مختلف النوع موضوعات پر کتابیں کچھ مرتب اور کچھ غیر مرتب انداز میں رکھی ہوئی تھیں بٹھایا۔ میں نے یہ بات اکثر محسوس کی تھی کہ زبیر صاحب اپنے مہمانوں کو خود پانی اور چائے سرو کرتے ہیں، اس لیے میں جب کبھی ان کے یہاں جاتا تھاتوان کے اس عمل سے ذرا سی بے چینی محسوس کرتا تھا کہ وہ ہاتھ میں پانی سے سجی ٹرے لیے چلے آرہے ہیں، اس لمحے میں میں بے چین ہو کر اٹھ کھڑا ہوتا اور وہ اپنے مخصوص انداز میں مسکرا کر مجھے بیٹھنے کو کہتے۔ زبیر رضوی میرے نزدیک ایک معمہ رہے۔ میں ان کو اکثر دیکھتا تھا کہ وہ کس طرح ذہن جدید کے لیے تگ و دو کرتے ہیں، کتنی مشقتوں سے پرچہ تیار کرتے ہیں اور کتنے جتن سے اسے چھپوا کر اپنے قارئین تک پہنچواتے ہیں۔ ایک سچا تخلیق کار جس نے دنیا جہان کی اچھی اور اچھی سے اچھی نظمیں کہیں ہوں، جس کا مطالعہ مختلف میدانوں میں اتنا وسیع رہا ہو، جس نے گردش پا جیسی معرکہ آرا کتاب تخلیق کی ہو، وہ ایک پرچے کے لیے اتنی بھاگم دوڑ کیسے کر سکتا ہے۔ کیا اردو میں پرچہ نکالنے والا ہر مدیر اتنی ہی پریشانیا ں جھیلتا ہے، کیا وہ اتنے ہی مصائب کا سامنا کرتا ہے اور اگر کرتا بھی ہے تو کیا ان میں سے کوئی زبیر رضوی بھی ہے۔

اپنےوالد یا غالبا چھوٹے چچا سے میں نے زبیر صاحب کی جوانی کے دو ایک واقعات سنے تھے، ان کی شراب نوشی کے۔اس وقت تک میں نے زبیر صاحب کو ٹھیک سے دیکھا تک نہیں تھا۔ لہذا میرے ذہن میں ان کے تعلق سے ایک بے وقعت انسان کی شبیہ پائی جاتی تھی، میں چونکہ بچپن سے چند ایک اردو ادیبوں کے عجیب وغریب واقعات سنتا آیا ہوں اور وہ بھی منفی عجیب و غریب اس لیے انہیں اصل میں جاننے سے پہلے تک بے وقعت محض ہی تصور کرتا رہا، مثلا ً ندا فاضلی، قمر رئیس، خلیق انجم، رشید حسن خاں،فکر تونسوی، رفعت سروش اور اسی قسم کے دو چار اور ادیب۔ انہیں میں ایک نام زبیر صاحب کا بھی ہے، چونکہ ان تمام لوگوں سے میرے والد اور دونوں چچاوں کے پرانے اور دوستانہ تعلقات تھے اس لیے جس بے تکلفی سے ان حضرات کا ہمارے گھر میں ذکر ہوتا تھا اس کے باعث میں انہیں بالکل ناکارہ سمجھنے لگاتھا۔

پہلی مرتبہ میں نے زبیر صاحب کو ٹھیک سے اور غور سے 2012 میں دیکھا جب ہم ان کے پڑوس میں آباد ہوئے۔ایک روز جب میں اپنی نوکری کی تلاش میں گھر سے نکل رہا تھا تو زبیر صاحب ہمارے گھر میں داخل ہو رہے تھے، انہیں دیکھ کر میں کچھ دیر کے لیے رک گیا۔ وہ اس وقت والد صاحب سے ملنے آئے تھے، میں ان کو دیکھ کر اندر گیا اور امی سے یہ کنفرمیشن لیا کہ یہ زبیر صاحب ہیں، امی نے حامی بھری تو دوبارہ باہر والے کمرے میں آ کر انہیں دیکھنے لگا، اس وقت وہ ابا کے ساتھ بیٹھے گفتگو کر رہے تھے اور مجھے نہ جانے کیوں اس بات پر خوشی محسوس ہو رہی تھی کہ میں نے آج پہلی بار زبیر صاحب کو ٹھیک سے دیکھ لیا۔ ابا سے ان کی بے تکلفی پر مجھے کچھ حیرت نہ تھی، بس یہ سوچ سوچ کر ایک مسکراہٹ بار بار میرے ہونٹوں پر بکھر جاتی تھی کہ ذہن جدید کا مدیر ہمارے گھر میں بیٹھا ہے۔ میرے سامنے، میرے ابا کے ساتھ۔ اس کے بعد تو زبیر صاحب چار پانچ مرتبہ ہمارے گھر آئے اور ان سے کچھ کچھ میری بھی رسم و راہ ہونے لگی۔ وہ بہت کم بولتے تھے، آہستگی جیسے ان کے مزاج کا حصہ ہو۔ میرے باپ اور چچا نے خواہ انہیں کبھی چیختے پکارتے یا جلال کے عالم میں دیکھا ہو، لیکن میں نے جب جب انہیں دیکھا مجھے ہمیشہ یہ محسوس ہوا کہ زندگی کے تمام اضطرابات کو زبیر صاحب کی تسکین نے زندہ نگل لیا ہے۔ ان کے چہرے پر بلا کی متانت تھی، کبھی کبھی کچھ سوچتے اور گفتگو کے دوران خاموش ہوتے تو متانت کے اثرات مزید گہرے ہو جاتے۔ جتنے لوگوں سے زبیر صاحب کے ملاقاتیں رہیں ہیں وہ اس بات سے بخوبی واقف ہیں کہ زبیر صاحب اپنی بات کہنے میں ذرا بھی ہچکچاتے یا جھجھکتے نہیں تھے۔ بے تکلفی سے اپنی بات کہتے تھے، خواہ وہ کسی بھی نوعیت کی کیوں نہ ہو۔ ان کی باتوں میں سنجیدگی رچی ہوتی اور ساتھ ہی لطیف مزاح بھی، جس کو وہ ہر کسی پر آشکار نہیں کرتے تھے۔ زبیر صاحب کا تصور ادب، اردو کے سنجیدہ ادیبوں سے خاصہ مختلف تھا۔ کبھی کبھی جب وہ کسی ادبی، علمی موضوع پر بات کرتے یا زندگی کی الجھی ہوئی سچائیوں پر بولتے تو ایسا محسوس ہوتا کہ الفاظ ان کا ساتھ نہیں دے پا رہے ہیں، ان کے اندر ایک قسم کا ابال تھا جس سے وہ ذرا سے مایوس نظر آتے تھے، اپنے اظہار میں وہ بعض اوقات وقت سے بہت آگے نکل جاتے تھے اور اپنی تہذیب اور معاشرت سے نالاں ہو کر سنجیدہ اور ساکن جھڑکیوں کا سہارا لینے لگتے تھے۔

زبیر صاحب کو عمریں بڑی کھلا کرتی تھیں وہ کسی بھی بات کے اظہار میں عمروں کا عمل دخل بے کار سمجھتے تھے، ایک روز مجھ سے کہنے لگے کہ ہم لوگ جس وقت لکھنا سیکھ رہے تھے اس وقت دنیا مختلف تھی، لیکن آج کا سیکھنے کا عمل اس سے یکسر تبدیل ہو چکا ہے، پھر کچھ کہتے کہتے رک گئے اور دو چار ہندی کے ادیبوں کا نام لے کر پوچھنے لگے کے کیا آپ ہندی پڑھتے ہیں، میں نےانکار کیا تو برا سا منہ بنا کر پہلو بدلا اور ہنسنے لگے۔ میں اپنی کم علمی کے باعث زبیر صاحب سے کم ہی ملتا تھا، اس لیے نہیں کہ ان سے مل کر کسی طرح کی الجھن یا پریشانی کا احساس ہوتا ہو، بلکہ اس لیے کیوں کہ ان کا میدان علم و عمل اتنا وسیع تھا کہ ان کا شریک گفتگو ہونا ناممکن ہو جاتا تھا۔ پھر وہ ایسے مزاج کے شخص بھی نہیں تھے کہ اپنے سے نہایت چھوٹوں سے بھی پند و نصائح کی باتیں کرتے رہیں۔ مجھے نہیں یاد کہ انہوں نے مجھے کبھی کسی کتاب کو پڑھنے کا مشورہ دیا ہو، وہ کبھی اس طرح سے پیش ہی نہیں آتے تھے کہ ان کے بزرگ ہونے کا خیال دل میں گھر کر جائے۔ ایک روز اچانک جنسیات پر گفتگو کرنے لگے، اورمسلم معاشرے میں جنسی خوف پر بے تکان بولتے رہے۔ اسی دوران ان کی ایک نواسی جو غالبا چار، پانچ برس کی رہی ہو گی کھیلتی کودتی باہری کمرے میں آ گئی تو اس کی طرف دیکھ کر مجھ سے کہنے لگے۔ آپ ذرا غور کیجیے کہ ہم اپنے بچوں کو جنسی اعضا کے تعلق سے بتاتے ہوئے بھی اتنا خوف زدہ رہتے ہیں کہ شعوری عمر تک ان کا خیال جنسی اعضا کی جانب سے ہٹاتے رہتے ہیں، مگر میں اس کا ذرا بھی قائل نہیں، پھر اس بچی کی جانب اشارہ کر کے کہنے لگے کہ یہ اگر کبھی میرے پاس آکر اپنے مخصوص مقام کی جانب اشارہ کر کے مجھ سے پوچھتی ہے کہ نانا یہ کیا ہے تو میں اسے بتاتا ہوں کہ یہ کیا ہے۔ جب انہوں نے اپنی بات ختم کی تو میں کچھ دیر تک ان سے نظریں نہیں ملا سکا، مجھے ایک قسم کی جھجھک محسوس ہو رہی تھی، مگر زبیر صاحب اس وقت بھی بالکل پر سکون تھے، وہ اکثر مجھ سے کہا کرتے تھے کہ اردو زبان میں Virginکے لیے اتنا پیارہ لفظ ہے باکرہ،لیکن اس کا استعمال کرتے ہوئے مسلم گھرانوں کی تہذیب یافتہ عورتوں اور مردوں کی کان کی لوئیں گرم ہو جاتی ہیں۔میں ایسی باتوں میں زبیر صاحب کا کچھ خاص ساتھ نہیں دے پاتا تھا، جس کی وجہ سے وہ بولتے بولتے خود گفتگو کا موضوع تبدیل کر دیتے تھے۔

میں نے ہمیشہ زبیر صاحب کے اندر ایک متحرک ادیب، ایک علم دوست انسان اور ایک نہایت سلجھا ہوا شخص دیکھا۔ ان کی گفتگو بتاتی تھی کہ وہ اپنے موضوعات کے حوالے سے کتنا زیادہ غور کر چکے ہیں اور اس غور و فکر کی بنیاد پر انہوں نے ایک موقف قائم کر لیا ہے۔ میں نے انہیں کبھی ہنگامی حالات میں زور و شور کی گفتگو کرتے نہیں دیکھا اور نہ ہی انہیں تکلفات میں گھرا پایا۔ اکثر وہ ذاکرنگر کی گلیوں میں نائٹ ڈریس پہنے سڑکوں پر ٹہلتے نظر آ جاتے تھے، کبھی راستے پر ملاقات ہو جاتی تو واجبی بات کر کے آگے بڑھ جاتے۔ ایک روز میں اے ٹی ایم کی لائن میں کھڑا اپنی باری کے آنے کا منتظر تھا کہ اچانک مجھے پیچھے جانی پہچانی آواز سنائی دی، میں نے مڑ کر دیکھا تو زبیر صاحب کسی سے محو گفتگو تھے، میں اسی وقت قطار سے ہٹنے لگا تو انہوں نے میرا کندھا پکڑ لیا، بات کر چکے تو میں نےکہا کہ انکل آپ آگے آجائیں، مگر انہوں نے مسکرا کر انکار کر دیا اور حال احوال طلب کرنے لگے۔ زبیر صاحب کی شخصیت میں بلا کی کشش تھی، جو عام طور پر اردو کے ادیبوں میں مفقود ہوتی ہے۔ وہ اپنی تمام تر مشقتوں اور محنتوں کے بعد بھی ابتر یا ہراساں نظر نہیں آتے تھے، بلکہ ان کو ہر بار دیکھ کر ایسا لگتا تھا کہ اردو کے مکمل ادیب کو اگر کسی طرح ہونا چاہیے تو زبیر رضوی کی طرح۔ میں نے جتنے ہی ادیبوں کو اپنی اب تک کی زندگی میں دیکھا ہے، پھرخواہ ان میں علی امام نقوی ہوں یا ندا فاضلی، شمس الرحمان فارقی ہوں یا باقر مہندی، سید محمد اشرف ہوں یا شمیم حنفی،شجاع خاور ہوں یا سلام بن رزاق ہر کسی میں کوئی نہ کوئی کجی نظر آئی ہے۔ بحیثیت ادیب زبیر صاحب مجھے ہمیشہ مکمل معلوم ہوئے۔ کردار، گفتار، فہم وفراست، بے تکلفی، سنجیدگی، علم اور حلم اور اخلاق اور بے باکی میں زبیر صاحب عدیم المثال تھے۔ نئے لوگوں سے ان کی وابستگی دوسروں کے مقابلے کم تھی، لیکن پھر بھی جو لوگ اچھا لکھتے تھے انہیں زبیر صاحب ہمیشہ تذکرے میں رکھتے تھے۔ گردش پا میں انہوں نے بعض باتیں ایسی لکھیں ہیں جس سے ان کی شخصیت کے وہ پہلو نمایاں ہوتے ہیں جس کا تذکرہ کرنا بھی ہمارے ادیب اپنی بے عزتی اور کسر شان تصور کریں گے، مگر زبیر صاحب ہر بات کو پوری صداقت سے بیان کر گیے ہیں اور یہ ہی ان کی ذات کا سب سے اہم پہلو ہے۔ مجھے زبیر صاحب کے معاصرین کا ان کے ساتھ رویہ کچھ زیادہ اچھا نہیں لگتا تھا، میں نے دو ایک مرتبہ اس بات کو محسوس کیا کہ ان کے معاصرین ان سے کچھ خفا معلوم ہوتے ہیں۔ وہ خفگی کس بات پر تھی اس کا مجھے ذرا بھی علم نہیں، لیکن ایک روز جب میں غالب انسٹی ٹیوٹ میں ایک طالب علم کی حیثیت سے زبیر رضوی، کشور ناہید، ندا فاضلی، فیاض رفعت اور مولانا یعقوب کے ہمراہ بیٹھا تھا تو ندا فاضلی نے کسی بات پر زبیر صاحب سے اختلاف کیا، زبیر صاحب ابھی اس کا جواب دینے کے لیے منہ ہی کھول رہے تھے کہ ندا فاضلی نے تحکمانہ لہجے میں کہا کہ زبیر تم چپ رہو، تم جاہل ہو، اس پر کشور ناہید چراغ پا ہو گئیں اور زبیر صاحب کی طرف سے کچھ کہنے کے لیے آگے بڑھیں تو ندا فاضلی نے ان کو چپ کراتے ہوئے مزید ایک مرتبہ اسی لفظ کا استعمال کرتے ہوئے کہا کہ تم تو چپ ہی رہو کہ تم زبیر سے بڑی جاہل ہو۔اس پر کشور ناہید بکھر سی گئیں، مجھے ندا فاضلی کا وہ رویہ اس وقت بڑا عجیب لگا، لیکن میں زبیر صاحب کا رویہ دیکھ کر اور زیادہ متعجب ہوا کہ زبیر صاحب اس جملے کے بعد بحث سے بالکل لاتعلق سے ہو گئے۔ یہ ان کی ذات کا ٹھہراو تھا کہ وہ کسی بھی بات پر اپنی بات کو سچ ثابت کرنے کے لیے بحث و مباحثے میں نہیں پڑتے تھے اور اس کی وجہ ان کے پر سکون چہرے کو دیکھ کر یہ معلوم ہوتی تھی کہ ان کو اپنی بات کے درست ہونے کا آخری حد تک ادراک ہوتا تھا۔ علمی، ادبی مباحث انہیں علمی ادبی رویوں کے ساتھ بھلے لگتے تھے۔

میری زبیر صاحب سے جتنی ملاقاتیں رہیں، اس میں میں نے ان سے بہت کچھ سیکھا، لیکن سب سے بڑی چیز اگر وہ کچھ سکھا گئے تو وہ اپنی ذات کا ٹھہراو اور منطقی طرز استدلال ہے۔ جس کے سہارے انہوں نے اردو زبان و ادب کی تخلیقی اور تہذیبی تاریخ میں اپنا ایک مقام متعین کیا۔ اب زبیر صاحب ہمارے درمیان نہیں ہیں، لیکن جب کبھی میں تنہائی میں بیٹھ کر ان کی دلچسپ باتیں یاد کرتا ہوں تو محسوس ہوتا ہے کہ وہ کہیں آس پاس ہی ہیں اورمجھے دیکھ کر اپنے مخصوص انداز میں مسکرا رہے ہیں۔

تصنیف کے لیے اکثر لوگ مجھ سے کہا کرتے ہیں کہ یہ شخص مذہب کے تعلق سے جیسی باتیں کرتا ہے ا س سے سوائے غیر ضروری جھگڑوں ، لڑائیوں اور تنازعات کے اور کچھ حاصل نہیں۔ کبھی بھی کچھ بھی کہہ دیتا ہے، مذہب کو گالی دیتا ہے اور ننگی ننگی عورتوں کی تصویروں کو پوجتا ہے۔ایک روز ایک صاحب نے تو یہاں تک کہہ دیا کہ معاف کیجیے گا ، بھلے سے وہ آپ کا بھائی ہے ، لیکن جس دن وہ میرے ہاتھ لگا میں اس کی گردن مار دوں گا۔ ایسی باتیں میں تصنیف کے تعلق سے اکثر سنتا رہتا ہوں ، اس کی ایک وجہ یہ بھی ہے کہ میرے تعلقات مذہبی لوگوں سے ذرا زیادہ ہیں ۔ میں تصنیف کو کبھی ان باتوں کے متعلق کچھ نہیں بتاتا ، نہ اس سے اس بات کی تلقین کرتا ہوں کہ تم اپنے خیالات بدل لو کیوں کہ دنیا والے تمہیں اچھی نگاہ سے نہیں دیکھتے۔ میں کہوں بھی تو کس منہ سے کیوں کہ میں تصنیف اور اس کے اطراف میں بسی اپنی دنیا کو بہت اچھی طرح جانتا ہوں ، مذہب کے منہ لگے اور اس سے اپنی عقیدت کا اظہار کرنے والوں کے اعمال سے بھی واقف ہوں اور تصنیف کی زندگی کےبدلتے ہوئے رنگوں سے بھی۔ آج سے تقریبا ً سولہ ، سترہ برس قبل کی بات ہے کہ رمضان کے مہینے میں میں ایک روزاپنے ایک دوست کے گھر مغرب کی اذان سے کچھ پہلے پہنچا چونکہ میں روزوں کے معاملے میں شروعات سے بڑا بے نیاز واقع ہوا ہوں اس لیے بڑے دھڑلے سے اس سے پانی مانگ بیٹھا اس نے مجھے دو چارموٹی موٹی گالیاں دی اور کہا ابے تنو تجھ سے کہیں زیادہ کمزور ہے پھر بھی پورے روزے رکھتا ہے اور ایک تو ہے کہ ایک دن بھی کھائے پیئے بنا نہیں رہ سکتا۔ کیا تجھے اللہ سے ڈر نہیں لگتا؟ اس نے مجھے پانی دینے کے بجائے اللہ سے ڈرانا شروع کردیا، مگر میں نے اس دوران کبھی اس بات پر غور ہی نہیں کیا کہ کیا اللہ سے ڈرنا چاہیے ؟ کیا روزے رکھنا واقعی میں فرض ہیں ؟ فرض ؟ تصنیف رکھتا تھا روزے ، پورے تیس ، میں تو آج بھی اس کے اس جذبے کے بارے میں سوچتا ہوں تو حیران رہ جاتا ہوں ۔ کیا تصنیف کو اللہ سے ڈر لگتا تھا؟ بچپن میں تصنیف نے اللہ کو جیسے اپنی زندگی کا محور بنا رکھا تھا، یہ وہ ہی شخص سے جس کی ایک وقت کی نماز قضا نہیں ہوتی تھی ، نہ فجر نہ عصر نہ عشا ۔ دنیا جہان کے وظیفے ، اللہ ہو کی صدائیں ، تسبیح کے دانوں پر آیت کریمہ کا ورد ، درود تاج ، دعائےگنج العرش، سور یسین ، صوفیہ کے قصے ، تاریخ اسلام اور اقبال کی شاعری ، بس یہ ہی سب تو ہمارا معمول تھا، میرا سب سے بڑا بھائی ساحل جو ہمیشہ سے ایک متوسط ذہن کا شخص رہا ہے اس نے ہمیں اللہ کے قریب ہونے کی طرح طرح کی ہدایات کیں ، اسی نے ہمیں ، قوالیوں سے محظوظ ہونا سکھایا اور اسی نے ہمیں غوث اعظم اور خواجہ اجمیری کے مراتب کا احساس دلایا ، وہ تصنیف کا مذہبی معاملات میں پیر ومرشد تھا۔ اب تو ان باتوں پر ہم چاروں پانچوں بھائی بہن ایک کمرے میں بند ہو کر ہنستے ہیں ، پر ہماری ہنسی کمرے سے باہر آتے آتے ختم ہو جاتی ہے ، پھر ایسا کیا ہوا کہ وہ سارے واقعات تصنیف کے دل میں ناسور بن کے پکنے لگے ۔ اس کا اللہ سے رسول سے قرآن اور مذہب سے گیتا اور بائبل سے سارے معتقدات پر سے یقین ہی اٹھ گیا۔ ہم نے تو بچپن میں ساتھ پرورش پائی ، ساتھ ہنسے کھیلے ، ساتھ مذہب سیکھا، ساتھ دہرئیے بنے ، مگر اللہ کا انکار کرنے اور اسلام کو گالی دینے میں تو تصنیف ہم سے کہیں زیادہ آگے نکل گیا جس کو ہم لوگ ہمیشہ گھر کا سب سے ذہین اور سمجھدار ، سیدھا اور شریف لڑکا کہتے تھے۔ اسکول ، گھر، محلے ، پڑوس میں اگر کبھی مجھے کوئی برا بھلا کہتا تو میرے بھائی کی مثال دیتا۔ تصنیف پڑھائی میں اتنا اچھا اور اس کو دیکھو ، نرا گاودی ، نہ ہندی آئے نہ مراٹھی نہ انگریزی اور نہ اردو ۔ وہ تو نماز روزہ بھی کرتا ہے اور محلے کے گھروں میں گھوم گھوم کر میلا د شریف بھی پڑھتا ہے ۔ ایک بار ایک عورت نے تصنیف کے میلاد پڑھنے پر یہ اعتراض گڑھ دیا تھا کہ یہ میلاد اکبر کی تما م حمدیں ، نعتیں ، منقبتیں اور مناجاتیں ایک ہی انداز میں پڑھتا ہے ۔ تصنیف کو اس میں بڑا مزا آتا تھا، قصص الانبیا پڑھنا ، عیسی ، موسی کے واقعات سنانا، انیس کے مراثی پڑھنا ، اعلی حضرت کا سلام گنگنانا اور مولی علی کے خطبے ابا کی کتابوں والی الماری سے چھپ چھپ کے نکال کر پڑھنا ۔ میں جو ہمیشہ سے گھر میں دوسرے درجے کی اولاد رہا اس کو تصنیف کی مذہبیت نے بڑا نقصان پہنچا یا ، ذلیل کیا اور کسی کی آنکھوں کا تارا نہیں بننے دیا۔ باپ نے اس کی ادب فہمی پر اسے گلے سے لگایا ماں نے اس کی مذہب پرستی اور صوفیہ شناسی کی وجہ سے ۔ خانقاہ قادریہ کے سالم میاں کا ہمارے گھر میں بڑا اثر تھا ، کبھی وہ سلمہ منزل آتے تو اپنے پورے لاو لشکر کو پہلی منزل پر حسین بھائی کے گھر چھوڑ کے دو پانچ منٹ کے لیے ضرور ہمارے چھوٹے سے گھر میں براجتے ، سب کو شفقت بھری نگاہوں سے دیکھتے اور بچوں کے سروں پر پیار سے ہاتھ پھیر کر انہیں دعائیں دیتے۔ ان کی دعائیں تصنیف کے لیے کچھ تو معنی رکھتی ہوں گی اسی لیے تو اس نے سالم میاں کی شان میں آٹھ ، دس برس کی عمر میں ہی ایک عدد قصیدہ رقم کر دیا تھا ۔ میں نے تصنیف کو مذہبی دنیا میں نورانی اور چمکتی ہوئی آنکھوں سے گردش کرتے دیکھا ہے ، ادب سے تو اس کا تعلق بعد میں مستحکم ہوا اولیت تو اس کے یہاں مذہب کو ہی حاصل تھی ۔ ایک مولوی کی طرح وہ اپنے پورے خاندان کے سامنے کھڑا ہو کر تقریر کرتا تھا ، کربلا کے واقعات کو رو رو کر بیان کرتا تھا ، عزیز میاں کی قوالیوں پر جھومتا تھا ، یہ تصنیف ہی تھا کہ اس نے اپنی بمبئی کی پوری اٹھارہ سالہ زندگی میں کبھی مذہب کے تعلق سے کوئی الٹی سیدھی بات نہیں کی ۔ پھر وہ آج مجھ سے بات کرتے ہوئے امام اعظم کو جاہل کیسے کہہ سکتا ہے ، قرآن میں غلطیاں کیسے نکال سکتا ہے ، رسول کی احادیث کا مذاق کیسے اڑا سکتا ہے ۔ لوگ صرف ایک حقیقت جانتے ہیں اور اس حقیقت کو سچ کے ترازو میں تو ل کر اپنا فیصلہ سنا دیتے ہیں ۔ تصنیف کی تخریب کا حال اتنا زیادہ پیچیدہ ہے کہ اس کو مذہبی جذبات سے جڑا سیدھا سادہ اور ذہن کو ذرا بھی تحریک نہ دینے والا شخص کبھی سمجھ ہی نہیں سکتا ۔ جو سچ کی تلاش کرتا ہے وہ افکار میں الجھتا ہے ، عقل کے پتھریلے راستوں سے گزرنے کی سعی کرتا اوراپنے اندر کانٹوں بھرے جنگلا ت کی سیر کر نے کا حوصلہ پیدا کرتا ہے ۔ ایسا عمل کرنے والا لہو لوہان بھی ہوتا ہے ، منہ کے بل بھی گرتا ہے اور اصل راستے سے کبھی کبھی بہت دور بھی نکل جاتا ہے ۔ تصنیف نے مذہب کو گالی دینا مذہب کوماننے کے بعد شروع کیا ہے ، اس لیے اس کے مذہب پہ وہ شخص سوال قائم کرنے کا اہل نہیں جو لکیر کا فقیر ہو جو مذہب کی دنیا میں ایک عقیدے سے جڑ کر اس کے ساتھ پوری زندگی گزار کر جنت حاصل کرنا چاہتا ہو۔ مذہبی فرقہ پرستی میں الجھنے والے اس سفرکے صرف ایک پہلو سے واقف ہیں ، اسلام کے ماننے والوں کی ایک بڑی جماعت ایسے فرقہ پرستوں سے بھری پڑی ہے ، اہل حدیث،کچڑیلوی ، دیوبندی ، سنی ، معتزلی، ماتریدی ، حنفی ، شافعی، مالکی ، حنبلی یہ سب انہیں بھٹکی ہوئی دنیاوں کے ناکام مسافر ہیں ۔ کوئی ائمہ کی تفریق میں پھنسے تو اس کا مذہب جس طرح ایک دائرہ اعتقاد میں مشکوک ہوجاتا ہے یا جو فقہا اور صوفیہ کے جھگڑوں میں دائرہ مذہب سے باہر ہو جاتا ہے ، تصنیف بھی اسی طرح مذہب کی دنیا سے دور ہوا ہے ۔ تصنیف کا مذہب ایک طویل مسافت کے بعد غیر مذہبی دنیا تک پہنچا ہے ۔ آج جب اس کی لا مذہبیت پہ لوگوں کے پیٹ میں درد ہوتا ہے اور اس کے خیالات سے ان کو اپنا مذہب خطرے میں نظر آتا ہے تو مجھے تعجب ہوتا ہے کہ اس پورے سفر سے لاعلم مذہب کو ماننے والے یہ آنکھوں پر پٹی باندھے لوگ کتنے معصوم ہیں کہ انہیں کسی شخص کے نفسیاتی سفر سے کچھ علاقہ ہی نہیں ہوتا۔ مجھے تصنیف سے اختلاف ہوتا ہے ، میں اس کو مذہب سے انحراف پر کبھی کبھی ٹوکتا بھی ہوں ، اس سے بحث بھی کرتا ہوں ، مگر اس کے اس سفر کو کبھی فراموش نہیں کرتا جو مسنون دعاوں سے شروع کر ، پنچ سورہ، تہجد کی نماز ، نوافل ، فرائض ، روزہ، زکوۃ اور بہجت الا سرار جیسی موٹی موٹی مذہبی کتابوں کا سفر کرتے ہوئے اوشو کی نیم مذہبی دنیا تک پہنچا ہے اور رسوم و رواج کے جنگلات سے گزر کر بے یقینی کی مسحور کن وادیوں تک آیا ہے۔ محرم کے تازیوں ، شعبان کے حلووں ، رجب کی نیازوں اور گیارویں کی دیگوں تک جن کا مذہب قید ہوتا ہے وہ اس سفر کی ذہنی معراج کے بارے میں کیا خاک تصور کریں گے ۔ تصنیف کا مذہب اور اس کا جنون اللہ سے صرف اقبال جیسے جرات رندانہ کا مظاہرہ نہیں کرتا ہے یا اس کا مذہب لوگوں کی چیخوں میں چھپی خدا کی مجبوریوں پر سوال قائم نہیں کرتا اس کا عقیدہ عقیدت کی دنیاوں سے حقیقت کا مطالبہ کرتا ہے۔تصنیف کا مذہب صرف عقل پرست نہیں حسن پرست بھی ہے اور ہر وہ تصور اس کے مذہب میں حرام ہے جو حسن پرستی کی ممانعت کرتا ہے۔ میں تصنیف کے مذہب کو اس کی مجبوریوں کا حاصل نہیں سمجھتا اس کی فکری بلندیوں کا مصداق تصور کرتا ہوں جس میں کہنے سے نا چوکنے کا حوصلہ ہے ، جس میں سچ کی کڑواہٹ کا مزا چکھنے کی جرات ہے اور جس میں دوسروں سے عقیدے کی جذباتی دنیا سے اوپر اٹھ کر مکمل آزادی کی فضا میں آنکھ ملا کر بات کرنے کی قوت ہے۔ میں تصنیف کو مذہب کی دنیا سے آزاد نہیں سمجھتا ،لیکن اس کو دنیا کے مذہب سے بالا تر جانتا ہوں کیوں کہ میں نے اس جیسا اڑیل انسان اپنی زندگی میں کبھی نہیں دیکھا جو اپنے موقف سے پوری طرح واقف ہے۔ یہ ہی وجہ ہے کہ دنیا کی کوئی بھی دلیل اس کو اپنے مذہب سے منحرف نہیں کر سکتی اور نہ ہی اس کے پائے استقال میں جنبش پیدا کر سکتی ہے۔