Tag: محمد عباس

بے بے کی انگلیوں کا لمس زہریلی تاثیر رکھتا تھا۔ کسی بھی قسم کے پھول ہوں، بے بے کے ہاتھ میں آتے ہی مرجھاجاتے تھے۔ کتنے ہی مہکتے ہوئے کیوں نہ ہوں، ایک پل میں سوکھے سرکنڈے بن جاتے۔ ابھی تازہ اور زندہ خوشبو سے نہائے ہوئے ننھے بچوں جیسے معصوم اور دلکش لگتے اور اگلے ہی لمحے وہ کسی ٹھنٹھ بوڑھے جیسے چمڑیس ہو جاتے۔ بچپن میں یہ بات ہمارے لیے حیران کن تھی اور ہم بار بار اس کا تجربہ بھی کرتے تھے۔ جہاں سے کوئی پھول ملتا، تو ڑ کر ہاتھوں میں لیے بے بے کے پاس جاتے اور اسے تھما دیتے۔ بے بے پھول کو ہاتھ میں لیے جانے کس مسموم نظر سے دیکھتی کہ پھول جھلس کر رہ جاتا۔ اس کا چمکتا چہرہ روکھ جاتا۔ ساری خوشبو نچڑ جاتی اورتازہ پھول سڑی ہوئی لاش بن جاتا۔ اور تو اور جو پھول بے بے نے اپنے ہاتھوں سے سینچ کر ویہڑے میں لگا رکھے تھے، وہ بھی بے بے کے ہاتھوں کا لمس نہ سہہ پاتے۔ سرخ سرخ گلابوں کے درجنوں پودے تھے جو بے بے نے ایک بڑی سی کیاری میں سلیقے سے اگا رکھے تھے۔ ان پھولوں میں بے بے کی جان تھی۔ جانے کب بے بے نے یہ کیاری بنائی تھی اور یہ پودے لگائے تھے۔ ہم نے تواپنے بچپن کی پہلی نظر سے ہی ان پھولوں کو دیکھ رکھا تھا۔ بے بے جس نظر سے ان پھولوں کو دیکھتی تھی، ایسی نظر سے تو کوئی ماں اپنے اکلوتے بچے کو بھی نہیں دیکھتی۔ دیوتا کے سامنے کھڑے کسی عقیدت مند پجاری کی نظروں سے پھولوں کو نہارتی تھی۔ میری بہن نے تو ایک دفعہ کہہ دیا تھا کہ بے بے کوہم سے زیادہ ان پھولوں سے پیار ہے۔ اس بات پر اسے بے بے سے جھڑکیاں بھی پڑی تھیں لیکن ہم جانتے تھے کہ بات ایسی غلط بھی نہیں تھی۔ لگتا تھا کہ بے بے ان پھولوں کی وجہ سے ہی زندہ ہے۔ ہر نیا پھول کھلتا دیکھ بے بے کے چہرے پر جواں جذبے دمکنے لگتے تھے۔ البتہ اس سب کے باوجود بے بے ان پھولوں کے قریب نہیں جاتی تھی۔ یہ بھی نہیں کہ ان پھولوں کی طرف سے بے پروا ہو۔ صبح شام اسے ان پھولوں کی فکر ہوتی تھی لیکن خوداپنے ہاتھوں سے کچھ کرنے کی بجائے ہم بہن بھائیوں سے ان کی دیکھ ریکھ کرواتی تھی۔ خود کبھی کام نہ کرتی۔ صبح پانی دو، شام پانی دو۔ کبھی گوڈی کرنے پر بٹھا دیا، کبھی شاخیں تراشنے پر لگا دیا۔ اُس پودے کی جگہ نیا لگانا ہے، اِس کی نئی قلمیں لگانی ہیں۔ روز ہی کوئی نہ کوئی کام اس کیاری میں نکل آتا تھا۔ ان سب لاڈیوں کے باوجود یہ پھول بھی بے بے کے ہاتھوں کی مار نہیں سہہ پاتے تھے۔ ادھر ہاتھ لگا، ادھر پھول کا بدن ٹھنڈا پڑ گیا۔ کسی اور کو بتائیں تو کوئی یقین ہی نہ کرے لیکن ہم نے ہرے بھرے پودوں کے اوپر بھی یکدم مرجھاتے پھول دیکھے ہیں۔ پودا، ٹہنیاں اور پتیاں ہری رہیں جب کہ پھول وہیں کا وہیں سوکھ گیا۔ یہ تھا بے بے کا لمس۔

بے بے کہتی تھی کہ اس میں سارا قصور تمہارے بابے کا ہے۔ اس نے میرے وجود میں ایسا زہر رکھ چھوڑا ہے کہ کوئی پھول میری قربت سہہ ہی نہیں سکتا۔ بے بے کی اس بات پر ہم بہت حیران ہوتے کیوں کہ اس ایک بات کے علاوہ جب بھی وہ بابے کا ذکر کرتی تواس کے منھ سے چھتے سے تازہ اترا خوشبو دارشہد ٹپکنے لگتاتھا۔ میں اور میری بہنوں نے بابے کو بالکل دیکھا ہی نہ تھا بلکہ ہمارے ابا جی نے بھی نہ دیکھا تھا۔ صرف ان کا نام سنا تھایا ذکر سنتے رہے تھے۔ ہم سب بے بے کی زبانی سنی باتوں سے جانتے تھے کہ بابا کیا تھا اور اس میں کیا گُن تھے۔ بے بے بتاتی ہے کہ بابے جیسا جوان پورے گاؤں میں کیا، پورے علاقے میں نہ ہو گا۔ طاقت میں کوئی اس کا ثانی نہ تھا۔ دن بھر گاؤں کے مختلف لوگوں کا بلاواآیا رہتا تھا جنہیں طاقت سے کرنے والا کام درپیش ہوتا۔ لوہے کے پھال بنانے کو وزنی ہتھوڑے کی زور دار ضرب چاہیے ہوتی تو سبھی کو ایک ہی شخص یاد آتا۔ دور دراز کے گاؤں دیہاتوں تک جب کسی کنویں کے ستونوں پر کانجن رکھنے کا وقت آتا تو میرے بابے کو ضرور بلایا جاتا۔ کہا جاتا ہے کہ ایک طرف سے چارچار آدمی کندھا دے کے کانجن اٹھاتے تھے اور دوسری طرف سے اکیلا بابا کانجن کو رکھ دیتا تھا۔ کسی کی بارات دوسرے گاؤں جائے تو داخلی راستے پر وزنی مگدر رکھا ہوتا، سبھی جانتے ہوتے کہ یہ مگد ر بارات میں کا کوئی بندہ اٹھائے گا تو بارات آگے جا سکتی ہے۔ ایسے موقع کے لیے میرے بابے کو آواز دی جاتی۔ خیر، بے بے کے بیان تو چلیں محبت کے مبالغے پربھی مبنی ہو سکتے تھے لیکن بابے کی جسمانی طاقت کے قصے میں نے اُن کے کئی ہم عمروں سے بھی سُن رکھے ہیں۔ چار دن کی جوانی میں جانے انہوں نے کتنے کام ایسے کیے تھے کہ ان کے ہم عمر انہیں بھولتے ہی نہ تھے۔ سبھی کے پاس کوئی نہ کوئی نیا قصہ ہوتا تھا اور ان سبھی قصوں کو سن سن کر مجھے یہی لگتا تھا کہ میرا بابا اپنے زمانے کا ہرکولیس ہو گا۔ بے بے کا کرنل بھائی میری کمزور صحت پر مسکرا کر کہتا تھا کہ بھائی صاحب اگر زندہ ہوتے تو اس بڑھاپے میں بھی تم جیسے دو جوانوں کو گھٹنوں تلے دبا کر آرام سے کھانا کھاتے رہتے۔ البتہ ان سب باتوں میں وہ رَس نہ تھا جو بے بے کی تصویر کشی میں ہوتا تھا۔ اُس نے بابے کو جن والہانہ نظروں سے دیکھا تھا، ویسے پُر شوق لفظوں میں اس کو بیان بھی کرتی تھی۔ اُچا لما قد،بھرا بھرا پینڈاجثّہ،مگدر جتنا چوڑا پتھریلا سینہ، چوڑے ہاڈ پیر، سوہنا لشکتا چہرہ، ہونٹوں کے اوپر بھاری بھاری مونچھیں، آنکھوں میں پہاڑوں پر اڑتے باز جیسی چمک، کوری تختی جیسا چکنا ماتھا۔ چارپائی پر لیٹا ہوتا تو چارپائی چھوٹی لگتی۔ جب چٹے تہمد پر چٹا کرتہ اور کندھے پر رانگلا پَرنا رکھے گلیوں سے گزرتا تو اُس کی ٹَور دیکھنے والی ہوتی، لگتا تھا کہ جوانی کا دیوتا اپنا اَصلی روپ دکھانے دھرتی پر اتر آیا ہے۔ اسے گلی سے گزرتے دیکھ گاؤں کی کنواری لڑکیوں کے سانس ان کے سینوں میں اٹک اٹک جاتے۔ جانے کتنی لڑکیوں نے اس کو دکھانے کے لیے نت نئے انداز کے کپڑے سلوائے تھے، وَن سونّی گُت بندھوائی تھی اور رنگو رنگ پراندے پروئے تھے۔ وہ کسی شادی بیاہ میں جاتا تو اُسے دیکھ کر کنواریوں کے دل بے تاب جھانجھروں کی طرح چھنکنے لگتے تھے۔ مگر، بے بے بتاتی تھی کہ وہ نگاہ کا ایسا پاک اور نظر کااتنا سُچا تھا کہ کسی لڑکی کی طرف آنکھ اٹھا کر بھی نہ دیکھتا۔ اس کی ایک مسکراہٹ پر جانے کتنے دل پگھل کر اس کی طرف بہنے کو تیار ہوتے مگر اس کا دل اس کی اکڑی مونچھوں سا سخت تھا اور کسی لڑکی کو کبھی اس کے سرد ہونٹوں پر مسکراہٹ کی گرمی محسوس نہ ہوئی۔

میرے ہوش سنبھالنے سے لے کر آج چالیس سال کی عمر تک میں نے بے بے کے منھ سے ایک ہی شخص کا ذکر سنا۔ بابا۔ دوسرے کسی شخص کا ذکر کرنا بھی پڑے تو حتی الامکان بابے کے ساتھ رشتہ جوڑ کر بتاتی، تمہارے بابے کا باپ، تمہارے بابے کی ماں۔ بابے کابھی نام نہ لیتی تھی بلکہ تمہارا بابا کہہ کر ذکر کرتی مگر کون سی گھڑی نہ تھی جب اس نے یہ ذکر نہ کیا ہو۔ بابا لہوبن کر تمام زندگی بےبے کے انگ انگ میں شامل رہا۔ بے بے کا ہر عمل بابے کے خیال سے نمو پاتا تھا۔ ایسے بابے کے متعلق بے بے کا یہ شکوہ عجیب لگتا تھا۔ ہم نہ سمجھ پاتے کہ اپنے محبوب سے گلہ کس وجہ سے ہے۔ میں نے تو کئی بار پوچھا تھا مگر بے بے یوں ٹال جاتی جیسے سوال سنا ہی نہ ہو۔

جس دن میری بہن کی شادی ہوئی۔ ڈولی رخصت ہو کر گھر سے چلی گئی۔ پورا گھر اداس تھا۔ اماں اور ابا چپ سے تھے۔ میرا دل بھی ہلکا پڑا ہوا تھا لیکن بے بے کی آنکھوں میں خوشی کے دیے ٹمٹما رہے تھے۔ بہن کی تازہ جدائی کے صدمے سے بے حال دل یہ دیکھ کر رہ نہ سکا۔ نم آنکھوں نے بے بے سے پوچھ لیا:’تم اتنی خوش کیوں ہو؟میری پھولوں کے پنگھوڑے میں پلی بہن کو غیر لے گئے اور پتا نہیں اب اس کی زندگی سرکنڈوں کے جنگل میں گزرتی ہے یا تپتے تھلوںمیں۔ اس کی آئندہ زندگی کا سوچ سوچ کر میرا دل پھٹنے کو آ رہا ہے اور تم بیٹھی کھِل رہی ہو۔ تمہاری آنکھوں میں خوشیوں کی لَو چمک رہی ہے۔ کیا تمہیں پوتی سے لگاؤنہ تھا۔‘ یہ سوال کرتے وقت میں جانتا بھی تھا کہ پوتی میں اس کی جان تھی۔ بے بے نے جواب دیا:’پتر! تم عورت نہیں ہو نا، اس لیے تم نہیں جانتے۔ بہن بیٹی کو گھر سے ودیاہ (وداع) کر کے یہی دعا کرتے ہیں کہ اس کا نصیب اچھا ہو۔ اس کے بخت کبھی مرجھائیں نہیں۔ عورت کے نصیبوں میں برا نہ ہو تو اس کا جیون سسرال میں ہی ہوتا ہے۔ سہاگ سے عورت زندگی کے رنگ دیکھتی ہے۔ اکیلی جندڑی چِٹّے لٹھے کی طرح روکھی پھیکی ہوتی ہے۔ ‘بے بے کی آنکھیں بھیگنے لگیں تو میں نے جھٹ کہہ دیا:’بابا یاد آرہا ہے کیا؟ ‘ بے بے کی آنکھوں میں بابے کا تصورسرخ لاچا باندھے رقصاں تھا، آج قصہ چھیڑ بیٹھی۔ ’وہ بھولتا ہی کب ہے۔ زندگی اسی کے ساتھ گزری ہے۔ سار ی خوشیاں، سارے غم اسی کے سانجھے میں گزرے ہیں۔ ‘ برسوں سے مچلتا تجسس بول اٹھا:’ تو پھر بابے سے گِلہ کیوں کرتی ہو؟‘بے بے کی آنکھوں میں دُکھ کے سائے لہرانے لگے۔ ’تمہارے بابے سے مجھے دو ہی گِلے ہیں۔ ایک یہ کہ مجھے اتنا جلدی کیوں چھوڑ کے چلا گیا تھا۔ دوسرا گِلہ جو بے بے نے سنایا تھا، وہ تفصیل طلب ہے۔ بے بے کے الفاظ کی بجائے میں اپنے انداز میں بتاتا ہوں۔ یہ ان دنوں کی بات ہے جب بے بے ابھی نئی نئی جوان ہوئی تھی، عمرپندرہ یا ساڑھے پندرہ ہو گی۔ دودھ مکھن کی پلی، گورا چٹا رنگ تھا۔ نزاکت میں اپنی مثال آپ تھی۔ گاؤں میں اس جیسی حسین بھی کوئی کم ہو گی، اس پر مستزاد ملکانی تھی اور اونچے نخرے والے گھر کی لڑکی تھی۔ حسن کی دولت فرواں تھی مگر کاجل کے بوجھ سے جھکی آنکھوں میں ایسی معصومیت تھی کہ زمانے بھر کی گناہ گار نظریں بھی حیا سے شرما جائیں۔ بے بے اپنی مست جوانی کے نشے میں جانے کب میرے بابے کی بے پروا اَکھ پر فدا ہو گئی جو اسے کبھی دیکھتی بھی نہ تھی۔ اس بے طرح آگ کی تپش نے بے بے کو یہ بھی دیکھنے نہ دیا کہ وہ ملکانی ہے اور بابا ایک عام واہک جس کے پاس محض چودہ بیگھے زمین ہے۔ وہ سوہنا ہے،تنو مند ہے لیکن اس کے پاس زندگی گزارنے کے وہ وسائل نہیں ہیں جو اسے باپ کے گھر میسر ہیں۔ عشق کا غبار اسے یہ حقیقت دیکھنے بھی نہ دیتا تھا کہ وہ زندگی میں دوبارہ اِس سُکھ کے خواب بھی نہ دیکھ سکے گی جو ابھی اس کے چاروں طرف رقص کرتا ہے۔

بے بے کی کسی نے نہ سنی تھی لیکن بے بے اپنی ضد پر قائم رہی۔ اس کی ہَٹ پر والدین کو ہار ماننی پڑی اور رشتہ طے ہو گیا۔ بے بے شادی سے پہلے خاصی شوخ مزاج اور چاؤ چونچلوں والی تھی۔ ملکانی ہونے کی وجہ سے اس کا نخرہ بنتا بھی تھا۔ بابے کے ساتھ محبت بھی اور شادی بھی اپنی مرضی سے کی تھی۔ اسے بابے سے کچھ درکار نہ تھا۔ البتہ شادی سے پہلے اس نے بابے سے اپنی اس خواہش کا اظہارکیا تھا کہ جب ان کے وصل کی رات ہو تو مسہری پھولوں سے سجی ہونی چاہیے، اصلی گلابوں سے جن کی مہک سے پوری رات اس کے حواس پر مستی چھائی رہے اوراس مہکتی رات کا نشیلا خمار کبھی اس کی یادوں سے محو نہ ہو پائے۔ بے بے نے اپنی ایک مسیر کی مسہری دیکھی تھی۔ اس پر اپنے سہاگ کے انتظار میں بیٹھی نئی نویلی دلہن کا نظارہ بے بے کے خیا ل میں کسی بھی لڑکی کی زندگی کا سب سے حسین اور یادگار نظارہ تھا۔ بے بے کے دل میں بھی یہ حسرت تھی کہ اس کی مسہری بھی پھولوں سے لدی ہوئی ہو اور وہ اسی طرح وصل کے خیال سے مہکتی ہوئی اس پر بیٹھی اپنے محبوب کا انتظار کرے۔

لڑکے والوں نے بارات سے پہلے بھی اور بارات کے دن بھی شادی کی رسومات کچھ زیادہ نہ کروائی تھیں اور ہر پل یہی لگتا کہ اس خوشی کے موقع پر بھی انہیں بچت کی سوجھ رہی ہے۔ دولہے والوں کا یہ رویہ بے بے کے گھر میں سب نے محسوس کیا تھا اور ایجاب و قبول سے پہلے ہی بے بے تک چہ میگوئیاں پہنچ گئی تھیں لیکن بابے کی محبت میں شرابور وہ ان فضول باتوں کو خاطر میں نہ لائی۔ اس کا ذہن تو آنے والی رات کے پھولوں بھرے گلنار تصورسے مخمور تھا لیکن جب بے بے سہاگ کی مسہری تک پہنچی تو وہاں عجب منظر تھا۔ نواڑ کا پلنگ بچھا تھا جس پر پلاسٹک کے پھولوں کی چند لڑیوں سے برائے نام سجاوٹ کی گئی تھی۔ وہ جب مسہری پر بیٹھی تو ارد گرد لٹکتے بے جان پھول اس کے کومل احساس پر چبھنے لگے۔ بابا سادہ جٹ آدمی تھا، ملکانی کی دلار بھری خواہش کی نزاکت نہ سمجھ پایا اور بھلا بیٹھا تھا۔ بے بے کا دل جو اپنے محبوب کی بانہوں میں سمٹنے کے لیے بے تاب تھا، اپنے ارمانوں کی یہ بے جان صورت دیکھ کر بجھ گیا۔ بابے نے بھی اس فاصلے کو محسوس کیا اور اپنی عاشق بیوی سے اس بے رخی، بے نیازی کا سبب پوچھا۔ بے بے نے،جس کے گال جواں جذبوں کی آگ سے دہکتے تھے، بجھ کر بابے کو سبب بتایا۔ بابے نے شرمندہ ہوکروقتی عذر پیش کیا اور پھر کبھی موقع دیکھ کر مسہری سجوا کر اس پر بیوی کو بٹھانے کا وعدہ کیا۔ بے بے کا دل یہ سن کر بہل تو گیا مگر بابے کا ہو نہ سکا۔ یو ں تو یہ دل دھڑکتا بابے کے لیے ہی تھا لیکن اس حسرت میں ایسا دھواں تھا کہ بے بے کے دل میں بابے کے نام کا دیا جلنے نہ پایا۔ دُکھ کی سواہ اس کے وجود کی تہہ میں بیٹھ گئی اور وہیں جمتی رہی۔

بابے کے اس وعدے کے انتظار میں بے بے بیٹھی رہی۔ پورا وجود بابے کو سونپ چکی تھی لیکن دل کبھی بابے کو نہ دے پائی۔ یہ دل منتظر رہا کہ کب بابا پھولوں سے بھری مسہری لگوائے گا،کس دن وہ اس کے وصال کی مہکتی ہوئی دولت سے مالا مال ہو گی اور تب دل پوری طرح اس کاہو جائے گا۔ ادھر بابا جٹ آدمی تھا،لطیف جذبات سے عاری،مشقتوں تلے دبا ہوا، اوپر سے غربت پاؤں جکڑ لیتی تھی، اس وعدے کو پورا کرنے میں کبھی سنجیدہ نہ ہوا۔ اگر پورا کرنا چاہتابھی تو کرتا کیسے۔چودہ بیگھے کی ہل واہی صرف اشد ضرورتیں پوری کرتی تھی۔ پیٹ بھر جاتا تھا، تن ڈھک جاتا تھا اور گاؤں کی پنچایت میں چٹا صافہ باندھ کر بیٹھنے لائق ہو جاتا تھا۔ اس کے پاس نقد روپیہ تو کبھی آیا ہی نہیں تھا۔ بے بے خود بتاتی ہے کہ بیاہ کے ڈیڑھ سال میں اس نے صرف دو دفعہ روپے کا سکہ ہتھیلی پردیکھا تھا ورنہ لین دین ہمیشہ گندم کے بدلے ہی ہوتا تھا۔ بے چارہ بابا پندرہ سے سترہ روپے خرچ کر کے مسہری لگواتا کیسے۔ بے بے اسی مسہری کے انتظار میں مرجھائی رہی مگر مسہری نے سجنا تھا نہ ہی سجی۔

بے بے کو اپنی زندگی کی ہر خوشی حاصل تھی مگراس نے بتایا کہ مسہری کا دکھ ایک دفعہ بھی اس کے دل سے نہ نکلا تھا۔ کانٹے سا چبھتا تھا۔ خوشیوں بھرے پل گزرتے رہے۔ بابے کا پیار بے بے کے وجود کی گہرائیوں میں اتر کر نمو پا نے لگا اور شادی کے ایک سال بعد بیٹے کی پیدائش ہوئی۔ یہ میرے ابا جی تھے۔ اس تحفے کو پا کر دونوں خوش تھے۔ بابا خود اکیلا بھائی تھا، پھولے نہ سماتا تھا کہ اتنی جوان عمر میں بیٹا مل گیا۔ بھائی کی طرح ساتھ کھڑا ہو ا کرے گا۔

ہمارے ابا جی ڈیڑھ سال کے ہوئے تھے اور بے بے کے بیاہ کو تین سال ؛ بے بے کی عمر بیس سال ہوگی اور بابے کی چوبیس کہ بابا دنیا سے رخصت ہوگیا۔ چلتا پھرتا ایک دن چارپائی پر لیٹا اور پھر اٹھ نہ سکا۔ اس کی چارپائی لے کر برادری کے لوگ شہر تک بھاگے مگر اس کے سانس پورے ہو چکے تھے۔ جو علامتیں بتائی جاتی ہیں،ان سے میرا اندازہ ہے کہ شاید بابے کی اپنڈکس پھٹ گئی تھی۔ بے بے بھری جوانی میں رانڈ ہو گئی۔ ابھی دھان کی طرح نِسری تھی، لچکیلی، مہکتی، ہری کچور اور ابھی باجرے کا ٹانڈہ ہو گئی، سوکھی، سڑی اور پھیکی۔ ساس سسر کا ایک ہی بیٹا تھا، ان کا دکھ اپنی جگہ لیکن انہیں زیادہ افسوس بے بے کا تھا۔ اگر ان کا کوئی اور بیٹا ہوتا تو شاید اس کے ساتھ بہو کو بیاہنے کا سوچا کرتے لیکن صرف جوان بہو کواکیلے گھر میں بورائی پھرتی دیکھ دیکھ گھُلتے تھے۔ انہوں نے بارہا بے بے سے کہا کہ ماں باپ کے گھر لوٹ جائے اور دوبارہ شادی کر لے، ابھی اس کی عمر ہی کیا ہے۔ مگر بے بے نے،جو اس وقت بے بے تو نہ تھی، جوانی کی تپش سے دمکتی، امنگوں سے چھلکتی ہو گی، کسی اور کا ہونے کا سوچا بھی نہیں۔ بابے کی ہو گئی تھی، اب اسی کی تھی۔ بیٹے کو سینے سے لگائے کہ اب وہی اسے بابے کی جگہ لگتا تھا، سا س سسر کے پاس ٹھہری رہی۔ اپنے ماں باپ، سبھی بھائی اصرارکرتے رہے کہ واپس آ جاؤ،ایک دفعہ زبردستی بے بے کا سامان بھی اٹھا کے لے گئے لیکن بے بے اپنی محبت پر جمی رہی۔ کوئی آندھی، کوئی طوفان اسے اکھاڑ نہ سکا۔ ملکانی تھی، گاؤں میں ان کی خاصی جاگیر تھی۔ ماں باپ کے پاس زندگی کی ہر سہولت موجود تھی۔ اکیلے رہتی تب بھی ٹھاٹھ کرتی اور کسی اپنے جیسے گھرانے میں شادی ہو جاتی تو پھر بھی راج کرتی۔ لیکن اسے اپنے رانجھن کا گھر چھوڑنا گوارا نہ تھا۔ ساس سسر غریب تھے، صبح سے شام محنت، مشقت کرتے تب جا کر روکھی سوکھی کھانے کے قابل ہوتے تھے۔ اس گھر میں کوئی فرد فارغ بیٹھ رہے تو گھر کی بنیادیں بیٹھ سکتی تھیں لیکن پھر بھی انہوں نے بہو کو انگلی کا چھالہ بنا کے رکھا۔ ملکانی ہونے کا مان رکھا اورکسی کام کو ہاتھ نہ لگانے دیا۔ اسے کبھی گھر سے باہر پاؤں نہ رکھناپڑا۔ کھیتی، زمینداری، مال ڈنگر اور گھر کی ذمہ داریاں انہوں نے خود سنبھالے رکھیں۔ بہو اونچے گھر کی تھی، اسے خود سے اونچا ہی بٹھائے رکھا۔ بے بے کو کچھ بھی نہ کرنا پڑتا۔ بس یکسوئی سے اپنے بچے کا خیال رکھتی تھی۔ فکر نہ پریشانی۔ اُڑتا پٹولہ بن کر عمرگزاری تھی۔ کھیتی کے سہارے اور وہ بھی چودہ بیگھوں کا مالک،کیسے جی سکتا ہے۔ ان سب نے مشکل سے بسر کی۔ جب ساس سسر رخصت ہوئے تب زمین ٹھیکے پردینی پڑی مگر تب تک بیٹا جوان ہو کر دبئی چلا گیا تھا اور زندگی کے دن آسان ہو گئے تھے۔

بے بے نے بابے کے بعد تریسٹھ سال گزارے تھے۔ میں بابے کے مرنے کے تیئس سال بعد پیدا ہوا تھا۔ مجھے نہیں معلوم کہ وہ تیئس سال بے بے نے کیسے گزارے۔ مجھے تو آخر ی چالیس برسوں کا حال معلوم ہے۔ یہ چالیس سال گویا مجھ پر بھی بیتے ہیں۔ بچہ تھا تو اس نے میرے اُس بابے کی محبت میرے دل میں ڈال تھی جسے میں نے دیکھا ہی نہیں تھا۔ بابے کا حلیہ، بابے کی عادتیں، اس کی ایک ایک ادا؛بے بے نے اتنی دفعہ سب بتایا تھاکہ مجھے لگتا ہے میں نے سنا نہیں، دیکھ رکھا ہے۔ بابا بیلوں کے پیچھے چلتا زمین میں ہل گڑوتا تو اس کی طاقت کے آگے بیل بھی عاجز آنے لگتے۔ گھر میں داخل ہوتا تو چوکھٹ سے جھک کے گزرنا پڑتا تھا۔ کمرے کے دروازے میں کھڑا ہوتا تو روشنی کو بھی درز نہ ملتی تھی۔ بابا جب کھانے بیٹھتا تو پاس بیٹھا شخص روٹیوں کی گنتی بھول جاتا تھا۔ لسّی کا پورا دَور ایک سانس میں پی مارتا تھا۔ اسے بھنڈیوں کی لیس زہر لگتی تھی اور بینگن کا رنگ آنکھوں کو کاٹتا تھا۔ جب کبھی لوہار نے درانتی، کھرپے، کسّی، بیلچے کے نئے پھال بنانے ہوں تو سارا دن وزنی بدان چلانے کے لیے اسے گاؤں میں ایک ہی آدمی ملتا تھا، بابا۔ برادری کی پنچایت میں بابے کے بغیر فیصلہ نہ ہوتا تھا۔ بیلوں کو، بھینسوں کو کاڑھا پلانا ہو تو یہ اس کے بائیں ہاتھ کا کام تھا۔ پھلہ لگانا ہو، سمیٹنا ہو، گندم کا پسّا لگانا ہو، سبھی کاموں میں اس جیسا سلیقہ کسی میں نہ تھا۔ رفتہ رفتہ بابے کی محبت میرے دل میں اپنی جگہ بنانے لگی تھی۔ جوان ہونے تک میں اپنے ان دیکھے بابے کی محبت میں پوری طرح گرفتار ہو چکا تھا۔ سو بے بے جب کبھی بابے سے جدائی کے دکھ میں جلتی ہوتی تو مجھے اپنی ہڈیاں بھی اسی آگ سے تڑختی محسوس ہوتیں۔ بابا اپنی خوبیوں کی بنا پر نہیں بلکہ اس لیے اچھا لگتا تھا کہ وہ میری بے بے کا محبوب تھا۔ میری بے بے، جس نے مجھے وہ انمول محبت دی جس کا بدل دنیا میں کوئی اور ہستی نہیں دے سکتی۔ ماں نے زندگی دی، باپ نے زندگی کا مان سمجھالیکن بے بے نے جو پیار دیا، وہ مجھے کہیں اور سے نہ مل سکتا تھا۔ بے بے نے مجھے اسی پیار میں سے حصہ دیا جو ابدی شکل میں اسے بابے کے ساتھ تھا۔ بے بے کی ایک چمی میں مجھے تین پیار ملتے تھے۔ ایک تو میں بے بے کا پوتا تھا، دوسرے اکلوتا تھا اور تیسرے میری صورت میرے بابے سے ملتی تھی۔

بے بے کی حالت دیکھ کر میں تصور کر سکتا ہوں کہ بابے کی وفات کے بعدبے بے کے دن کیسے اُجڑ گئے ہوں گے۔ جس عمر میں ہاتھوں پر خوشیوں کی شوخ رنگ مہندی لگتی ہے، اس عمر میں بے بے کے سینے میں ارمانوں کا خون ہو گیا تھا۔ امڈتی جوانی جو بابے کی توانا بانہوں کی چھاؤں میں ٹھنڈے ٹھار گزر جانی تھی، یک دم تپتی دھوپ میں آ گئی تھی۔ ا س عمر میں فیصلہ کرنا مشکل تھا کہ زندگی اکیلے گزاری جائے لیکن بے بے نے ذرا پروا نہ کی تھی۔

بے بے ہمارے بابے کا نام نہیں لیتی تھی لیکن زندگی اس نے بابے کے نام پر ہی گزاری۔ نہ کسی غیر مرد کی طرف دیکھا نہ کسی غیر کا سایہ اس کے سایے کے قریب سے گزر سکا۔ بابے کے ذکر سے اس کی صبح ہوتی تھی، بابے کو یاد کرتی تو دن گزرتا تھا اور اسی کے روشن خیالوں سے اس کی اکیلی تاریک راتیں جگمگاتی تھیں۔ بے بے پانچ وقت نماز کی پابند تھی۔ قضا کرتے کبھی نہ دیکھا۔ ہر نماز کے بعد بہت دیر تک دعا کرتی رہتی۔ سب کہے بغیر جانتے تھے کہ یہ بابے کے لیے تھیں۔ بے بے بتاتی تھی کہ ہمارا بابا نمازی نہ تھا۔ شادی کے بعد تین سال اکٹھے گزرے مگر بابے نے کبھی نماز نہ پڑھی۔ جوانی کے اندھے نشے میں اس کا سر جھکتا ہی نہ تھا۔ کہتا تھا کبھی جب بوڑھے ہوں گے، ہاتھ پیر کام نہ کریں گے،کمر جھک جائے گی تب لاٹھی ٹیکتے مسجد کے چکر لگایا کریں گے۔ ابھی جوانی اور طاقت کام کرنے کے لیے ہے، سو کام ہی کرتے ہیں۔ دعاؤں کے علاوہ بابے کے نام پر ہفتہ وار’ختم‘ بھی پورے اہتمام سے ہوتا تھا۔ ہر جمعرات کی شام مغرب کی آخری رکعت کے سلام پھیرتے ہی بے بے امیدانہ رسوئی کی طرف دیکھنے لگتی۔ پہلے میری اماں ا ورمیری شادی کے بعد میری بیوی ’ختم‘ کا سامان لیے تیار ہوتی تھیں۔ سامان زیادہ کچھ نہ ہوتا لیکن اتنا ضرورہوتا کہ جوان آدمی اگر کھاتا تو پیٹ بھر کے اٹھتا۔ بے بے کہتی تھی کہ ’جمعرات کی شام ہوتے ہی گزری روحیں گھر کی منڈیر پر آ بیٹھتی ہیں اور آخرت کی دنیا کے لیے زادِ راہ سمیٹ لے جاتی ہیں۔ جس گھر سے مل جائے، وہاں سے روحیں خوش خوش جاتی ہیں اور جس گھر سے کچھ نہ ملے، وہاں سے روتی ہوئی جاتی ہیں۔ جو ثواب انہیں یہاں سے ملتا ہے، وہ آخرت کی دنیا میں جا اپنے کھاتے میں جمع کراتی ہیں۔ ‘ بے بے کی وضع داری کا کمال ہے کہ تریسٹھ برسوں میں ایک دفعہ بھی بابے کی روح خالی ہاتھ نہ لوٹی ہو گی۔ آخرت کی دنیامیں اس کی کمائی بڑھتی گئی ہو گی۔

قبرستان جاتے رہنا بے بے کا معمول تھا۔ کچھ دن اور تہوار مخصوص بھی تھے۔ جمعہ کی صبح قبرستان جانا اور بابے کی قبر پر پنج سورۃ پڑھنا بے بے کے لیے لازم تھا اورہر خاص اسلامی دن پر پورے اہتمام کے ساتھ جاتی تھی۔ محرم، شب برات، شب معراج، شب قدر، عید میلاد النبی، حج اور عیدین کوئی دن بابے کے بغیر آغاز نہ کر تی تھی۔ تغاری میں کھرپا، درانتی لے کر بابے کی قبر پر پہنچ جاتی۔ خاص لگاؤ سے اُس کی صفائی کرتی۔ جھاڑ جھنکار صاف کر کے تازہ مٹی ڈالتی۔ اگر کوئی جھاڑی یا پودا اُگے ہوتے تو رکھوالے سے کٹوا دیتی۔ پھراُس پر اگر بتیاں لگاتی جِن کا دھواں پھیلنے سے ماحول گاڑھی خوشبو سے بوجھل ہو جاتا۔ کوئی اچھا موقع ہوتا تو اس دن صبح سب سے پہلے بابے کے پاس جا کے حاضری دیتی۔ ہزار خوشی ہو،لاکھ مصروفیت ہو،بے بے صبح صبح ضرور قبرستان جاتی اور وہاں ہمارے بابے کے ساتھ پتا نہیں کیا کیا باتیں کر کے روتی رہتی۔ وہاں رو کر آتی تو خوشی میں شامل ہو پاتی تھی۔ ہمیں کبھی معلوم نہیں ہوا کہ بے بے کیا باتیں کر کے روتی تھی لیکن سمجھ تو سکتے تھے۔ میرا خیال تھا کہ یقینا بے بے کے اتنے دُکھ بھرے آنسو دیکھ کر قبر کے اندربابا بھی رو پڑتا ہو گا۔ کہتی تھی کہ تمہارے بابے کے بغیر میری کوئی خوشی ہے ہی کدھر۔ اُس کا نام نہ لوں، اس کے سرہانے جا کر نہ بیٹھوں تو خوشی پر نحوست چھاجاتی ہے۔ خوشی پھر بھی بے بے سے برداشت ہو جاتی تھی، دُکھ کی ہلکی سی چھایا بھی آتی تو بے بے سے رہا نہ جاتا۔ بابے کے پاس جا کے پناہ لے لیتی۔ کسی فکر، پریشانی کا سامنا ہو تو بابے کی پائینتی بیٹھ کر پہروں ڈسکورے بھرتی رہتی۔ وہ بے بے کی زندگی میں ابھی تک پوری طرح شامل تھا۔

ان سب معمولات کے ساتھ بے بے ایک ایسی رسم بھی باقاعدگی سے نبھاتی تھی جو ہمیں بہت حیران کرتی تھی۔ ویہڑے میں بنی بےبے کی کیاری میں سدا بہار گلاب تھے۔ بے بے اِن کی بہت دیکھ بھال کرتی تھی۔ بہار کے موسم میں ان پھولوں پر جوبن ہوتا۔ اس کے علاوہ بھی سارا سال اس میں گلاب کھِلے رہتے تھے۔ سیج کے سرخ اور سدا بہارگلاب۔ بے بے قبرستان جانے سے پہلے ہمیں کہہ کر جتنے پھول لگے ہوتے، سبھی اتروا کے تھیلے میں ڈلوا کرساتھ لے جاتی۔ جب خوب خوب رو چکتی، جی بھر کے دعا مانگ لیتی تو پھولوں کو اپنے ہاتھوں سے پتی پتی کر کے بابے کی قبر پر پیار سے بکھیرنے لگتی۔ پھول جو چند لمحے پہلے خوشبو سے ماحول کو مہکائے ہوتے تھے، بے بے کے ہاتھوں کے لمس سے یک دم مرجھا کرمردہ ہو جاتے، خوشبو کا نام تک نہ رہتا۔ بابے کی قبر پر پڑے یہ پھول یوں لگتے جیسے پھول نہ ہوں، پھولوں کی لاشیں ہوں۔ جیسے بے بے نے قبر پر پھول نہ بکھیرے ہوں، مردے کو کنکریاں ماری ہوں۔ بے بے کی رگوں میں بابے کی وعدہ شکنی نے جانے کیسا زہر بھر دیا تھا۔ ہم اکثر بے بے کو کہتے کہ پھول ہم پھینک دیا کریں گے، اگر مرجھا کر ہی پھینکنے ہیں تو پھر پھینکنے کا فائدہ کیا۔ بے بے کی جلتی آنکھیں بتاتی تھیں کہ ایسے مرجھائے پھول قبر پر ڈال کر وہ بابے کو یاد دلاتی ہے کہ پھولوں بھری سیج کا وعدہ ابھی تک پورا نہیں ہوا۔ ابھی بھی خوشبوئوں سے لدی سیج پر لیٹ کر اپنا دل، اپنی سلگتی جوانی بابے کو سونپنے کا خواب اس کی آنکھوں میں رڑکتا ہے۔ اگر اسے خوشبو والے پھول ملنے لگے تو بیوی کے سینے کا سینک اُس تک کیسے پہنچے گا۔

مجھے بے بے کے ساتھ قبرستان جانے کااکثرموقع ملتا تھا۔ کئی دفعہ بے بے نے مجھ سے اپنی ایک خواہش کا اظہار کیا تھا۔ خواہش عجیب تھی اور ہمارے گاؤں کے قبرستان کے حالات دیکھتے ہوئے ناممکن۔ ہمارے قبرستان کے گرد،شہرکے قبرستانوں کی مانند، چاردیواری نہیں تھی۔ کھلے میں قبروں کا ایک بہت بڑ اجھنڈ تھا جہاں گزشتہ دو سو سال کے مردے دفن تھے۔ قبرستان کی کوئی حد بندی نہیں تھی۔ بس اتنا تھا کہ جہاں تک قبریں ہیں، وہ قبرستان ہے۔ اس کے چاروں طرف کھیت تھے جہاں فصلیں کاشت ہوتی تھیں۔ اگر قبرستان میں کوئی مردہ مزید نگلنے کی گنجائش نہ رہے تو کوئی نہ کوئی زمین دار اپنی متصل زمین قبرستان کے لیے وقف کر دیتا یا قبرستان کمیٹی اپنے جمع کردہ چندے سے جگہ خرید کر ساتھ شامل کر دیتی۔ اس میں کوئی ترتیب نہ ہوتی اور قبرستان کوچاروں طرف سے جدھر بھی جگہ ملتی، ادرک کی طرح ادھر سے پھیلنے لگتا۔ قبریں بہت گنجان تھیں، لوگوں کی یہی خواہش ہوتی کہ ایک کرم جگہ بھی خالی نہ رہے۔ جہاں کوئی خالی جگہ نظر آتی، وہاں کسی نہ کسی مردے کو ٹھونس دیا جاتا۔ قبرستان کے مرکز میں جہاں شاید ڈیڑھ دو سو سال پہلے کوئی مردے دفنائے گئے تھے، وہاں سے لے کر قبرستان کے بیرونی سروں تک کوئی جگہ خالی نہ تھی۔ قبر کے ساتھ جوڑ کر دوسری قبر کھودی گئی تھی۔ اگر کہیں خالی جگہ رہ بھی جائے تو کچھ ہی دنوں میں وہاں سنگِ مر مر کی نئی تختی لگی ہوگی۔ اس وجہ سے قبرستان کے اندر کوئی جگہ خالی نہ رہی تھی اور باوجود ہزار خواہش کے کوئی اپنے کسی پیارے کے ساتھ دفن نہ ہو سکتا تھا۔ کئی دفعہ ایسے ہوا کہ قبرستان کے درمیان میں جہاں جھاڑ جھنکار زیادہ تھا اور موجود قبروں پر 1880ء کے آس پاس کی تختیاں لگی تھیں، کسی نے خالی جگہ دیکھ کر اپنا مردہ دفنانا چاہا لیکن چار فٹ نیچے جانے پر بیلچے الٹے گھڑوں سے ٹکرانے لگتے۔ (بزرگ بتاتے ہیں کہ مدتوں پہلے آج کل کی طرح لحد پر پتھر کی سلیں رکھنے کی بجائے الٹے گھڑے رکھے جاتے تھے۔ ) اس قبر کواحترام سے دوبارہ پاٹ دیا جاتا۔

کچھ مدت سے ہمارے دیکھتے دیکھتے ایک نیا رواج چل نکلاتھا۔ لوگوں کے دل میں اپنے پیاروں کے ساتھ دفن ہونے کی خواہش ہمیشہ سے رہی ہے۔ ہمارے گاؤں میں اس سوچ نے نیا رنگ اختیار کیا۔ جب گھر کا کوئی ایک فرد کسی جگہ دفن ہوتا تو اس گھر کے باقی زندہ افراد کی خواہش ہوتی کہ جب ان کا وقت پورا ہوتو انہیں دفن کے لیے اس کے آس پاس جگہ ملے۔ یہ خواہش صرف آرزو کی بات نہ تھی، لوگ اس کے لیے عملی کوشش بھی کرتے تھے۔ آج ایک مردہ دفن ہوتا، کل اس کے بہن بھائی، ماں باپ کی کل تعداد گن کر اتنی قبروں کی جگہ ناپ کر اس کے چاروں طرف دیوارچی سے چاردیواری بنا دی جاتی۔ لوگوں کو تسلی ہوجاتی تھی کہ سب اپنے اکٹھے دفن ہوں گے۔ ایک فائدہ یہ بھی تھا کہ مرنے سے پہلے اپنی مخصوص جگہ دیکھ کرآدمی کو روحانی تشفی ملتی تھی اوربعد از وفات اسے اپنے خون کے رشتوں کے پاس دفن دیکھ کر اس کے لواحقین کو طمانیتِ قلبی بھی میسر ہو جاتی۔

قبرستان کی جگہ کسی کی ملکیت نہیں تھی۔ اس کا نظام ایک کمیٹی چلاتی تھی جو میت کی تدفین پر کوئی پائی پیسہ وصول نہ کرتی۔ فی سبیل اللہ کام تھا۔ سارا نظام چندے پر چلتا تھا۔ پہلے پہل کمیٹی نے لوگوں کی یہ در اندازی نظر انداز کی، پھر جب یہ چلن عام ہونے لگا تو کمیٹی والوں نے بھی کاروباری ذہانت کا مظاہرہ کیا۔ ایسے خاندانوں سے جو اپنے لیے جگہ مخصوص کرنا چاہتے، ان سے اس زمین کی قیمت لے کرجگہ دی جاتی اور حاصل شدہ رقم سے مزید کچھ زمین خرید کر قبرستان میں شامل کر دی جاتی۔ خاندانی شرف اور دولت پر نازاں لوگ اپنے خاندان بھر کے لیے جگہ مخصوص کر لیتے جب کہ غریب لوگ ایسے ہی اکیلے دُکیلے دفن ہوتے۔ گاؤں کے تقریباً ہر اچھے اور قابلِ ذکر خاندان نے اپنے لیے جگہ مخصوص کر رکھی تھی۔ ایسی جگہ کے گرد چاردیواری لگی ہوتی۔ چاردیواری پر خوبصورت ٹائلیں لگی ہوتیں اور قبروں کی آرائش بڑھ چڑھ کرکی جاتی۔ شان و شوکت کے جن مظاہر کا مقابلہ زندگی میں ہوتا تھا، اب موت کے بعد بھی وہی مقابلہ شروع ہو گیا تھا۔ سب کی یہی خواہش ہوتی کہ اپنے خاندان کا امتیاز قائم کرنے کے لیے قبرستان میں دو تین مرلے جگہ حاصل کر لیں۔ جگہ پر قبضہ جمانے کی اس دوڑ میں وہ لوگ زیادہ مستعد تھے جو یورپ اور امریکہ یا خلیجی ممالک میں اپنے خاندانوں سمیت رہائش پذیر ہیں۔ یہ لوگ جب کسی پیارے کی میت واپس لے کر آتے تو ان کی خواہش ہوتی کہ کسی اپنے سگے کے ساتھ دفن ہوں، اگر کسی اجنبی کے ساتھ ہی دفن ہونا ہے تو باہر ہی کیوں نہ مٹی ہو جائیں۔ ایسے لوگ جب اپنا کوئی ایک پیارا دفن کر دیتے تو اس کے آس پاس کی جگہ اپنی برادری کے باقی بزرگوں کے لیے مَل لیتے۔ کمیٹی کو اس جگہ کی معقول قیمت ادا کر کے اس کی اپنی حیثیت کے مطابق آرائش کر لیتے۔ کسی خاندان کی عظمت اسی میں جھلکتی تھی کہ اس کے کتنے لوگ ایک جگہ اکٹھے دفن ہیں۔ جیسے قبائلی جیون میں زندہ لوگوں کے سروں کی تعداد سے قبیلے کی بڑائی کا اندازہ ہوتاتھا، ایسے ہی یہاں مرنے کے بعد تختیوں کی اکٹھی تعدادخاند ان کی برتری قائم کرنے لگی تھی۔ اگر کسی خاندان کی قبریں مختلف جگہ پر بکھری ہوتیں تو انہیں قدر کی نگاہ سے نہ دیکھا جاتا اور وہ خود بھی قبرستان میں جاتے ہوئے شرمندگی محسوس کرتے تھے۔

اس طریقے سے جگہ پر قابض ہوئے بغیر اگر کوئی یہ خواہش کرے کہ اس کے مرنے پر اس کی قبر اس کے کسی قریبی عزیز کے سا تھ بنائی جائے تو آرزو امکان کی حدوں سے باہر نظر آتی تھی۔ ایک سال کے دوران قبر کے چاروں طرف درجنوں غیروں کی قبریں چھاؤنی جمائے پڑی ہوتی ہیں۔ ادھر ہماری پاگل بے بے چاہتی تھی کہ وہ مرے تو اُس کی قبر بابے کے پہلو میں بنائی جائے۔ اس خواہش کا اظہار پہلی بار اس نے اپنے بڑے بھائی سے کیا تھا۔ وہ فوج کا ریٹائر ڈکرنل تھا اور شہر میں رہتا تھا۔ نانا کی وفات پر گاؤں آیا تو اس نے باپ کی قبر کے ساتھ چھ قبروں کی مزید جگہ کے پیسے دے کر ایک چار دیواری تعمیر کروا دی۔ وہاں سے فارغ ہو کر وہ ہمارے گھر آیا اور بے بے کے پاس بیٹھ گیا۔ باتوں کے دوران اس نے بے بے کو بتایا کہ اس نے جو چھ قبروں کی جگہ خریدی ہے، وہ اپنے ماں باپ، چاروں بھائیوں اور بہن کے لیے ہے۔ بے بے کا چہرہ تمتما اٹھا اور اس نے وہیں اپنے بھائی کو ٹوک دیا۔

’’نہیں! ہر گز نہیں!میں کسی صورت بھی وہاں دفن نہیں ہو گی۔ ‘‘

بے بے کا بھائی حیران رہ گیا۔ بے بے کے چہرے کو تکتا رہا اور پھر حیرانی سے پوچھا:’’پر بہن! اس میں غلط کیا ہے؟ تمہیں اپنے ماں باپ کا ساتھ گوارا نہیں ہے کیا؟یابھائیو ں سے ناراضی ہے؟‘‘

’’نہ بھائی۔ تم لوگوں سے کیوں ناراض ہوں گی۔ میں نے اپنی جگہ پہلے سے ہی مَل رکھی ہے۔ ‘‘
’’وہ کہاں؟ پہلے کبھی بتایا نہیں۔ ‘‘
’’یہ کوئی پوچھنے والی بات ہے۔ جہاں میرے سر کا سائیں ہے، میں بھی وہیں جاؤں گی نا۔ ‘‘
’’پر وہ تو قبرستان کے عین درمیان میں ہے۔ قبر پر قبر چڑھی ہے۔ تمہارے لیے ادھر جگہ کہاں سے ملے گی؟‘‘
’’تم لوگ کبھی اس کی قبر پر جاؤ تو پتا چلے نا۔ میں جاتی رہتی ہوں،مجھے پتا ہے۔ اس کے دائیں پہلو میں ابھی تک ایک قبر کی جگہ خالی ہے۔ بس اسی جگہ کو میں نے مَل رکھا ہے۔ ‘‘
’’مگر وہاں کسی نے چاردیواری بنائی ہی نہیں۔ ‘‘
’’قبر کے لیے قبضہ ضروری ہے؟ دل کی ملکیت کافی نہیں ؟ جس دن احسان کا بابا دفن ہوا تھا، اسی دن میں نے اپنے لیے جگہ مَل لی تھی۔ ‘‘
’’لیکن خالی جگہ قبرستان میں کون چھوڑتا ہے؟ جانے کب کسی کو ادھر دفن کر دیا جائے۔ تمہاری حسرت دل میں ہی رہ جائے گی۔ ‘‘
’’چالیس سال ہو گئے اسے وہاں لیٹے۔ آج تک کسی کی جرأت نہیں ہوئی اس کے ساتھ قبر کھودنے کی۔ آگے بھی دیکھ لینا، وہاں کوئی نہیں آئے گا۔ وہ جگہ میں نے پکی مَل رکھی ہے۔ ‘‘
’’تو تمہارا بیٹا اب خوشحال ہے۔ تھوڑے سے پیسے خرچ کر لو۔ وہ جگہ خرید کے اپنے لیے چاردیواری بنا دو۔ ‘‘
’’ وہ جگہ ہے ہی میری۔ چاردیواری کی ضرورت ہی نہیں؟ اپنی جگہ کون خریدتا ہے ؟‘‘
’’لیکن اگر کسی اور نے وہاں قبر بنا لی توپھر۔۔۔؟‘‘
’’ہر گز نہیں۔۔۔ یہ ہو ہی نہیں سکتا۔ وہ میری ملکیت ہے۔‘‘
’’پر بہن! اس جگہ دن کو بھی ڈر لگتا ہے۔ ہماری طرف قبرستان خاصا کشادہ ہے۔ صفائی بھی ہوتی رہتی ہے…‘‘
’’اپنے گھر میں کبھی کسی کو ڈر لگتا ہے بھلا؟‘‘

یہ بات آج سے تیئس سال پہلے کی ہے۔ تب میں لڑکا تھا۔ بے بے کی بات مجھے اتنی عجیب نہیں لگی تھی۔ بے بے کے لہجے کا تیقن مجھے ابھی تک یاد ہے۔ بے بے کی پائینتی بیٹھے یہ باتیں سنتے ہوئے اُس کے تندرست جسم اور سیدھی اٹھی گردن دیکھ کر یہ خیال آیا تھا کہ کیا پتا بے بے کب مرتی ہے اور کون جانتا ہے کہ وہ جگہ خالی رہے گی یا نہیں۔ لیکن بے بے درست کہتی تھی۔ کون سا زبان سے کہتی تھی۔ وہ تو دل سے اس جگہ پر قابض تھی۔ وہ جگہ اسی کی رہنی تھی۔

آج بابے کی وفات کے تریسٹھ سال بعد جب ابا جی کی عمر بھی چونسٹھ سال ہو چکی ہے اور میں خود بھی جوانی کی آخری صفوں میں کھڑا ہوں، بے بے میرے تقریباً جوان بچوں کو کھیلتے کودتے دیکھنے کے بعد اس دنیا سے رخصت ہو گئی ہے۔ بے بے نے اپنی تمام عمر جس سکون اور اطمینان سے گزاری ہے، اسی طرح اگلی دنیا کو سدھار گئی ہے۔ جیسے کوئی کامل پیر محبوبِ ازلی کے وصل کی امید میں چہرے پر سکون اور اطمینان کا احساس لیے نزع کے کرب ناک مراحل سے گزر جاتے ہیں۔ آخری سانس لیتے وقت بے بے ویسے ہی سرشار تھی۔ میری بڑی بچی اور اس سے چھوٹا بیٹا بے بے کے آخری لمحوں میں قریب تھے، وہ بتاتے ہیں کہ انہیں پتا ہی نہیں چلا کہ بے بے نے کب اور کس وقت آخری سانس لیا۔ بس بستر پر لیٹی ہے۔ طبیعت خراب ہے، لبوں پر مسکراہٹ ہے۔ اسی حالت میں معلوم نہیں کب دم دے دیا۔ خود میں نے بھی جب بے بے کاچہرہ دیکھا تو وہی میٹھی مسکراہٹ اُس کے لبوں پر ثبت تھی جو بابے کا ذکر کرتے وقت ہوتی تھی۔

بے بے کی وفات کے وقت ابا جی یو اے ای میں تھے۔ عمر نوکری کرنے کی حد سے آگے گزر گئی تھی،پرانی جگہ سے جواب مل گیا تھا۔ ابھی ان کی خواہش تھی کہ کچھ برس اور ادھر لگ جائیں تا کہ گھر چلتا رہے۔ ایک نئی کمپنی میں ملازمت ملنے والی تھی اور اس کا ویزہ لگنے کے لیے پاسپورٹ ایمبیسی میں جمع تھا۔ یو اے ای میں پاسپورٹ جمع ہو تو یہ ایک لحاظ سے کالے پانی کی سزا ہوتی ہے۔ پاکستان آنے کا کوئی طریقہ نہیں تھا۔ فون پر جتنی دفعہ بات ہوئی، آواز کی بجائے رندھے ہوئے الفاظ کا گریہ ہی سنائی دیتا تھا۔ ان کی تلملاہٹ، ان کی بے تابی اور دکھ اپنی جگہ لیکن وہ بے بے کی فوتیدگی پر آ نہ سکے۔ میں اور میرے بچے تھے۔ بہن بھی اپنے گھر والوں کے ساتھ پہنچ گئی تھی۔ بے بے کے سبھی بھائی بھی خبر سنتے ہی آ گئے تھے۔ اپنی برادری تھی۔ ہمیں کسی طرح کی مشکل نہ ہوئی تھی۔ مرن کی سبھی رسومات مناسب طریقے سے نپٹتی چلی گئی تھیں۔ میرا زیادہ وقت تعزیت کے لیے آئے لوگوں کے ساتھ ہی گزرا۔رسومات کی تمام ذمہ داریاں برادری والوں نے سنبھال لی تھیں۔ جب قبر کھودنے کا وقت آیا تو مجھے کہا گیا کہ قبرستان میں جا کر قبر کی جگہ نشان زد کر وا آؤں۔

ہمارے گاؤں میں قبر کھودنے کے لیے کوئی پیشہ ور آدمی نہیں ہے۔ جب کوئی فوت ہو جائے تو برادری اور گاؤں کے لوگ مل جُل کر خود ہی قبر کھودلیتے ہیں۔ درجنوں لوگ یوں باری باری ہاتھ بٹاتے ہیں کہ کسی کو احساس تک نہیں ہوتا کہ کچھ کام کیا گیا ہے۔ پہلے رشتہ دار پہنچتے ہیں، نشان لگا کر کھودنا شروع کر دیتے ہیں۔ اس کے بعد ٹولیوں کی ٹولیاں جوانوں کی آنے لگتی ہیں۔ دیکھتے ہی دیکھتے قبر تیار پڑی ہوتی ہے۔

بے بے کی میت کا ناپ لے کر جب میں قبرستان پہنچا اور کسیاں بیلچے لے کر مستعد کھڑے رشتہ داروں کو قبر کی جگہ بتائی تو سبھی نے اعتراض کیا۔ ان کا خیال تھا کہ یہاں قبر کے لیے جگہ خالی ہو، یہ ممکن ہی نہیں۔ بھلاکیسے ہو سکتا ہے کہ تریسٹھ سال سے ادھر کوئی مردہ دفن نہ ہوا ہو۔ چھ فٹ کی جان توڑ کھدائی کے بعد کسی کی کڑکڑاتی ہڈیاں برآمد ہو جائیں گی۔ نئے سرے سے گرد پھانکنی پڑ جائے گی۔ انہوں نے مزید کہا کہ جنازے میں وقت کچھ زیادہ نہیں ہے، اتنی دیر میں ایک ہی قبر نکل سکتی ہے۔ آخر پر ہڈیاں نکل آئیں تو نئی قبر کی تیاری تک میت کو انتظار کرنا پڑے گا۔ مجھے ان سب باتوں کی کوئی پروا نہ تھی۔ میں جانتا تھا، جس نے اپنی جگہ مَلی ہوئی تھی،وہی اس جگہ دفن ہو گی۔ اس نے تریسٹھ سال انتظار کیا ہے اپنے محبوب کے پہلومیں لیٹنے کا۔ وہ یہیں دفن ہو گی۔

جب بے بے کو نہلا دھلا،کفن پہنا کر چارپائی پرلٹایا گیا تو میں چہرہ دیکھنے کوگیا۔ چہرے پر جمی مسکراہٹ دیکھ کر میرے آنسو نہ رک سکے۔ وہاں جمع مردوں اور عورتوں نے مجھے بہت روکا مگر میرے جذبات قابو میں نہ رہے تھے۔ پہلے بے بے کے پاؤں چومے، پھر ہاتھ اور آخر پر ماتھا چوما۔ یہ میری بے بے تھی جس کے ہاتھوں اور پیروں نے کبھی غیر مرد کی طرف جانے کا سوچا بھی نہ تھا۔ میرے بابے کے ہوئے تھے اور مرتے دم تک اسی کے لمس کو زندہ رکھا تھا۔ یہ میری بے بے کے ہاتھ اور پائوں تھے جو مجھ سے اس لیے حد درجہ محبت کرتی تھی کیوں کہ میری صورت میرے بابے سے ملتی تھی۔ یہ میری بے بے تھی جس کی بے لوث محبت جیسی دولت مجھے دوبارہ نہ ملنی تھی۔ اس بے بے کی محبت کا لاوا تھا جو اس کے آخری دیدار کے لیے آنکھوں سے پھوٹتا چلا آرہا تھا۔ کب جنازہ اٹھا، کب جنازہ گاہ پہنچے اور کس طرح جنازہ پڑھا گیا، مجھے کچھ ہوش نہ تھا۔ آنکھوں میں بے بے کی محبت کے تمام مناظر گریہ کناں تھے اور اشکوں کی پوری برادری میرے اس نقصان پر ماتم کرتی چلی آ رہی تھی۔ جناز ے کے بعد بے بے کو قبر کی طرف لے جایا گیا۔ تریسٹھ سال پہلے چار کہاروں کے کندھے پر لد کر وہ بابے کے پاس آئی تھی اور آج اسی طرح چار کندھوں پر سوار بابے کے پاس لے جائی جا رہی تھی۔ قبر بابے کے بالکل پہلو میں تیار پڑی تھی۔ امام صاحب نے تدفین سے پہلے کی دعا مانگی اور پھر بے بے کی میت کو لحد میں اتارا جانے لگا۔ مجھ میں صبرکی تاب نہ تھی۔ بے بے کے بدن کو ہاتھ لگانے کی ہمت نہ تھی۔ سو بے بے کا ایک بھائی اور بھتیجا میت کو لحد میں اتارنے لگے۔ بے بے کا بے جان وجود لحد میں لٹایا جا رہا تھا جب میرا بھانجا میرے قریب آ کر مجھے ایک تھیلا تھما گیا۔ تھیلا بھرا ہوا تھا اور اس میں بے بے کے گلابوں کی مہک آ رہی تھی۔ اس نے اشارے سے بتایا کہ امی نے توڑ کے دیے ہیں اور بے بے کی قبر پر ڈالنے ہیں۔ میں نے پھول بے بے کے بھائی کو تھما دیے اور اس نے پتی پتی کر کے کفن میں لپٹی بے بے پر ڈال دیے۔ سفید کفن سرخ پھولوں میں چھپ گیا۔ مجھے بے بے کی حسرت یاد آ گئی۔ یہ میت کے پھول کیا ان پھولوں کا مداوا ہو سکتے ہیں جو بابے نے وعدہ کر کے بھی نہیں دیے تھے۔ تھوڑی ہی دیر میں پھولوں سے لدے بے بے کے وجود کو پتھر کی سلوں سے ڈھک دیا گیا اور بے بے کا مادی وجود نظروں سے اوجھل ہوگیا۔

اس دن عصر تک ہماری بیٹھک میں فاتحہ خوانی کا سلسلہ چلتا رہا۔ اس کے بعد میرے ذمے آگ کی ذمہ داری لگا دی گئی۔ میں اِس رسم کا قائل نہیں تھا لیکن دنیا داری کے لیے کرنا پڑتا ہے۔ مشہور ہے کہ قبر میں مردہ دفن کرنے کے پہلے ہفتے کے دوران کسی بھی رات کوبِجّو آتا ہے اور پائینتی کی طرف سے قبر کھود کر میت تک جا پہنچتا ہے۔ میت کے پاؤں کے انگوٹھے کو منھ میں دباتا ہے تو اس میں دوبارہ جان آ جاتی ہے اور وہ بِجّوکے پیچھے چلتا چلتا اس کے ٹھکانے پر جا پہنچتا ہے جہاں بِجّو اس کا سارا ماس نوچ نوچ کر کھا جاتا ہے۔ مزید یہ بھی کہا جاتا ہے کہ بِجّو آگ سے بہت ڈرتا ہے۔ اگر قبر کے پائینتی ساری رات آگ جلتی رہے توقبر کے قریب بھی نہیں آتا۔ ایسی آگ لگانا مشکل ہے کہ جو شام کو لگائی جائے اور صبح تک جلتی رہے۔ اپلوں کی آگ دھیمی ہوتی ہے، پانچ تھاپیاں ہوں تو تمام رات دُھختے رہتے ہیں۔ بھوسے کی آگ بھی دیر تک دہکتی ہے۔ سو بھوسہ اور اپلے ملا کر انہیں سلگا دیا جاتا ہے۔ یہ روایت جانے کب سے ہے اور جانے کب تک رہے گی۔ میں اگر نہیں کرتا تو ساری برادری کے طعنے ماتھے پر لگتے رہیں گے کہ اسے مرنے والی سے کوئی لگاؤتھا ہی نہیں۔

میں اپلوں اور بھوسے سے بھرا توڑا لیے قبرستان پہنچا تو سورج سرخ تھالی بن چکاتھا۔ قبرستان کے باہر ابھی روشنی میں چمک تھی۔ اندر روشنی ذرا کم تھی لیکن بے بے کی قبر کا گیلا خاکی رنگ پوری طرح نظر آرہا تھا۔ قبر کی تازہ کچی مٹی دیکھ کر تازہ درد تڑپ اٹھا۔ دن بھر لوگوں کے سامنے جس ضبط کا مظاہرہ کیا تھا، وہ ٹوٹ گیا۔ میں نے اپلوں اور بھوسے کا توڑاوہیں پھینکا اور خود بے اختیار بے بے کی پائینتی گر گیا۔ بے بے نے چالیس سال کی عمر میں جتناپیار دیا تھا اور آئندہ کی تمام زندگی جس پیار سے محروم رہنا تھا، اس کا احساس پانی ہو کر آنکھوں سے بہہ نکلا۔ جانے کتنی دیر میں بے بے کی امڈتی یادوں کے سہارے وہاں پڑا رہا اور بے بے کو پکار پکارکے بچوں کی طرح روتا رہا۔ آنسو میری آنکھوں سے بہتے چلے جارہے تھے۔ کوئی خیال نہ تھا کہ میں اتنا بڑا ہو گیا ہوں، کوئی روتا دیکھ لے تو کیا کہے گا۔ بس یہی خیال تھا کہ میری جو سب سے پیاری ہستی تھی،وہ اب نہیں رہی اور اس کی دائمی جدائی پر مجھے بہت زیادہ رونا ہے۔

جب خوب دل بھر گیا تو دھیان آیا کہ میں کس کام کے لیے آیا تھا۔ اٹھا اور بے بے کی پائینتی بھوسے اور اپلوں کی ڈھیری لگا دی۔ ماچس جیب سے نکال کر آگ جلانے لگا تھا کہ تبھی میری شامہ سے ایک تیز امڈتی ہوئی خوشبو ٹکرائی۔ خوشبو مانوس تھی۔ میں چونک اٹھا۔ یا حیرت!یہ خوشبو واضح طور پر بے بے کے پھولوں کی تھی۔ ان کی منفرد خوشبو کے متعلق میرے گھر کا کوئی فرد بھی ایک دفعہ سونگھ کر بتا سکتا ہے۔ البتہ یہ خوشبوعام دنوں کی نسبت بہت تیز تھی۔ میں انہی پھولوں میں پلا بڑھا تھا، کسی بھی موسم میں ان پھولوں کی خوشبو اتنی تیز نہ ہوتی تھی، عین بہار میں جب ویہڑے میں سرخ سرخ پھولوں کے کھیس بچھے نظر آتے تھے، تب بھی خوشبو کا احساس اس قدر جوان نہ ہوتا تھا۔ مجھے بھلا دھوکا کیا ہو سکتا تھا کہ ان پھولوں کی خوشبو میری ہر رگ میں بسی ہوئی تھی۔ عمر بھر ان کی گوڈی کی تھی۔ ان پھولوں کی مست خوشبو اپنے دل آنگن میں کھلتی محسوس کی تھی۔ لیکن ے بے کے پھول تو بڑی اداس، دھیمی اور ٹھنڈی خوشبو رکھتے تھے۔ ابھی جو خوشبو آرہی تھی اس میں تیزی تھی،گرمی تھی اور خوشی کے رقص تھے۔ لیکن تھی یہ خوشبو بے بے کے پھولوں کی ہی۔ یہ خوشبو قبرستان میں آ کیسے رہی ہے؟ ادھر کھلے میں کہیں بھی پھول نہیں پڑے ہوئے اور اگر پڑے بھی ہوتے تو اتنی تیز خوشبو نہ آتی؟ آخر اس خوشبو کا منبع کیا ہے؟ دماغ میں کونداسا ہوا کہ یقینا یہ خوشبو ان پھولوں کی ہے جو بے بے کی لحدمیں منوں مٹی نیچے بے بے کے کفن پر ڈالے گئے تھے۔ یقیناً یہ وہی پھول تھے ورنہ ادھر بے بے کے کوئی اَورپھول تو لائے ہی نہیں گئے تھے۔ یقینا یہ وہی پھول تھے جو بے بے کے وجود کے ساتھ مَس ہو کر مرجھا جانے چاہیے تھے لیکن جانے آج کیا ماجرا ہوا۔ خوشبو مری بھی نہیں تھی اور رات کی تاریکی اترنے کے ساتھ پھول اس شدت سے مہکنے لگے تھے کہ منوں مٹی بھی ان کی مہک کونہ روک پائی تھی۔ امڈ امڈ کے باہر آرہی تھی۔ آنسوؤں کی ماری میری آنکھیں خوشی سے سجری ہو گئیں۔ بھوسہ اور تھاپیاں وہیں پڑے رہنے دیے اور ماچس جیب میں ڈال لی۔ بھلا آج کی رات اپلے جلانے کا کیا جواز۔۔؟رونا بھی نحس تھا۔

قبرستان سے نکلتے وقت آخری بار پلٹ کر اس سمت دیکھا جدھر بے بے کی تازہ کھدی قبر تھی۔ پھولوں کی خوشبو یہاں تک آرہی تھی۔ میں دھیرے سے مسکرا اُٹھا۔ یوں ہی خیال آگیا تھا کہ ابدی زندگی کے آغاز پر آج بے بے کے دونوں شکوے ختم ہو گئے۔ اب بابا کبھی جدا بھی نہیں ہو گااور پھولوں بھری مہکتی ہوئی سیج بھی مل گئی ہے۔ میں نے وہیں کھڑے کھڑے آخری بار ان پھولوں کی خوشبو کو اپنے وجود میں اتارا اور تیزی سے ہٹ آیا۔

آج بے بے کو خلوت کی ضرورت تھی۔ آخر تریسٹھ سال بعد سُچے وصال کی رات آئی تھی۔

سب حیران رہ گئے جب اچّھا رات دس بجے ہی گھرواپسی کو اٹھ کھڑا ہوا۔

اس وقت ہم چاروں دوست حسبِ معمول میرے ڈیرے پر تاش کھیل رہے تھے۔ تاش ابھی ابھی شروع ہوئی تھی جس کا مطلب ہے کہ رات بھی ابھی شروع ہوئی تھی۔ دس بجنے میں ابھی پانچ منٹ باقی تھے۔ ’’رنگ‘‘ کا رنگ جمنے بھی نہ پایا تھا کہ اچّھے نے تاش پھینٹنے کی بجائے اکٹھی کر کے ایک طرف رکھ دی۔ یہ اشارہ کھیل ختم کرنے کا تھا۔ڈاکٹر نے فوراً ہی گھڑی دیکھی اور ساتھ ہی جیب سے سگریٹ ماچس برآمد کر لیے:’’لگتا ہے، آج اچّھے کا چائے بنانے کو دل ہے۔ ٹھیک ہے یار۔اٹھو ذرا چھوکری قسم کی چائے تو پلاؤ۔‘‘

’’چاہ ہو جئے تو سادہ سرگٹ بھی ڈبل کا مزہ دے۔‘‘ کالو نے لقمہ دیا۔

’’نئیں یرا۔میں تو جا رہا ہوں …گھر۔ تم لوگ بیٹھو اور گپ شپ کرو۔‘‘ اچّھے نے بھی اپنا ولز کنگ کا سگریٹ سلگایا اور دونوں ٹانگیںمیز پر رکھ کر بڑا پر سکون ہو کر سوٹے مارنے لگا۔

کالو نے تاش اٹھائی اور اس کا پنکھا بنانے لگا:’’سدھی طرح کیوں نہیں کہتا کہ سرگٹ پینے کو دل کر رہیا ہے۔ گھر جانے کا بہانا کیوں کرتا ہے۔‘‘

’’نئیں…میں تو بس یہ آخری سگریٹ پیوں گا ا ور… گھر۔‘‘

’’فضول بکواس نہ کر۔ یہاں رنگ تیرا پیو کھیلے گا۔ چوتھا بندہ … تمہاری … سے نکالیں گے۔ ‘‘کالو نے اسے گھورا۔

’’نہیں او یارا۔ ایویں بونگیاں مار رہا ہے۔ یہ کہاں جائے گا۔یہ تو رات کو بھی بھگتا کر گھر جانے والا شخص ہے۔‘‘

مجھے تو یقین تھا کہ اچّھا اتنی جلدی گھر نہیں جانے والا۔ ابھی تو اس کی دوپہر بھی نہیں ہوئی۔ ابھی چلا گیا تو اسے نیند کہاں سے آئے گی۔ اس کی نیند تو اذانِ سحر کی محتاج تھی۔ ادھر صبح کی اذان بلند ہوتی، ادھر اس کے چہرے پر پہلی جمائی پھوٹتی۔ نمازیوں کو گھروں سے نکلتا دیکھنے کے بعد ہی کہیں اسے گھر جانے کی ہڑک پیدا ہوتی تھی۔ اور وہی اچّھا آج اتنی جلدی گھر جانے کو کہہ رہا تھا۔ یہ ممکن ہی نہ تھا۔ مجھ سے زیادہ کون جان سکتا تھا۔تاش سے تو ہم لوگ دو بجے تک اٹھ جاتے تھے۔ ڈاکٹر اور کالو نے صبح اپنی اپنی دیہاڑی لگانی ہوتی تھی، سو انہیں توگھر واپسی ضروری تھی۔ پر میں اور اچّھا ان کے بعد بھی بیٹھے رہتے۔ کبھی تو پنکھا چلا کر ڈیرے پر ہی بیٹھ جاتے، جو تاش کے دوران،پتے بکھرنے کے اندیشے سے بند ہی رہتا تھا۔ اگر کسی دن اچّھا زیادہ حساس ہو رہا ہوتا تو پھر پنکھے کی آوازاس کے اعصاب برداشت نہ کر پاتے اور ہم ڈیرے سے نکل کر گلیوں میں گھومنے لگتے۔ آج کل ہم دونوں باقاعدگی سے’’ سیانوں‘‘ کے پاس بیٹھ رہے تھے۔ ’’سیانے‘‘ ہم نے ایک خاص جگہ کو نام دے رکھا تھا۔ گاؤں کے مرکزی چوراہے میں ایک بڑے سے تھڑے پرسارا دن گاؤں کے بڈھے ٹھیرے لوگ چوپال جمائے بیٹھے آپس میں اپنے اپنے تجربے بانٹتے رہتے۔ خوبیِ قسمت سے یہ چوراہا ایسا تھا جہاں سے اپنے اپنے گھر جاتے ہوئے میرا اور اچّھے کا راستہ جدا ہوتا تھا۔ ایک رات گھر جانے سے پہلے ہم وہاں تھوڑی دیر کو رک گئے۔ وہاں بیٹھ کر جو اچّھے نے گفتگو شروع کی تو ایسے ایسے کمال کے جملے کہے کہ ہم دونوں ہی حیران رہ گئے۔ اتنی عقل مندی کی باتیں …اچّھے کو سوجھیں کیسے؟ میں تو اس نتیجے پر پہنچا کہ اس تھڑے پر چونکہ دن بھر سیانے بابے بیٹھے رہتے ہیں،لگتا ہے ان کی سیانپ کا اثریہاں ہر وقت رہتا ہے۔ بس اسی اثر سے اچّھا بھی سیانا ہو گیا ہے۔ اب کیا تھا، ہم نے اس جگہ کو ’’سیانے‘‘ کا نام دے دیا اور معمول بنا لیا کہ رات کو تاش کے بعد کافی دیر ’’سیانوںکی معیت‘‘ میں بیٹھا کرتے۔وہاں اچّھا صاحب ولز کنگ کی پوری پوری ڈبی پھونک ڈالتے، پر باتیںایسی گجھی ہوئی کرتے کہ اصل سیانے بھی سنتے تو اس سے دانائی کادرس لیتے۔

سگریٹ ختم ہوا تواچّھا اٹھ کے چل پڑا:’’ ٹھیک ہے یرا، میں چلتا ہوں، آئندہ دس بجے تک ہی بیٹھا کروں گا۔ جب تک میرا ابا واپس نہیں جاتا، تب تک تم اپنے لیے کوئی چوتھا سنگی ڈھونڈ لو۔‘‘

کالو نے اپنی چنید ہ گالیوں سے اسے نوازا۔ ڈاکٹر نے سوشل بائیکاٹ کی دھمکی دی۔ تاش کا واسطہ بھی دیا گیا، سیانوں کی بھی یاد دلائی گئی مگر وہ ذرا بھی ماٹھا نہ پڑا اور اُٹھ کے گھر چلا گیا۔کالو نے تاش میز پر پٹخی اور غصے میں اندرجا کے کمرے سے پنکھا اٹھا لایا: ’’ اس حرامی کی وجہ سے تاش نہیں کھیل سکتے، پنکھا توچلا لیں۔ ہم کوئی دوزخی نہیں کہ ’’جھڈوؤں ‘‘کی طرح اس گرمی میں بیٹھے رہیں۔‘‘

وہ غصے میں بڑ بڑ کرتا رہا۔ ڈاکٹر اپنے خاص فلسفیانہ انداز میں سوٹا لگاکر یوں دھواں نکالتے ہوئے،گویا کوئی جن برآمد کرنے والا ہو، بولا:’’ پر باوا، سوچنے والی بات یہ ہے کہ وہ گیا کیوں، اسے تو اتنی جلدی کبھی بھی نہ ہوتی تھی، بلکہ وہ جو تم نے ایک شاعر بتایا تھا جو ساری رات سڑکیں ناپتا رہتا تھا… کیا نام…‘‘

’’ناصر کاظمی یار۔‘‘

’’ہاںوہی… اسی کی طرح یہ بھی سب سے آخر پر گھر جایا کرتا ہے۔ تو پھراب اسے کیا تکلیف ہو گئی ہے؟‘‘

’’ آ ہاں… تم نے کہا تو مجھے یاد آیا کہ اُس شاعر کا ایک شعر بالکل اسی موضوع پر ہے، سمجھو کہ ناصر نے اسی موقع کے لیے یہ شعر کہا تھا:

وہ میکدے کو جگانے والا، وہ رات کی نیند اڑانے والا
یہ آج کیا اس کے جی میں آئی کہ شام ہوتے ہی گھر گیا وہ

جب میں نے شعر ان دونوں کو ذرا سا سمجھایا تو دونوں مچل اٹھے:’’واہ، واہ۔‘‘ اور کالو نے تو اپنے خاص انداز میں کہا:’’لگتا ہے، ناصر نے یہ شعر اسی بھوسڑ کے لیے لکھا تھا۔‘‘

’’پر سوچنے کی بات یہ ہے کہ وہ گیاکیوں؟‘‘ ڈاکٹر کی چرخی ابھی تک اسی محور پہ گھوم رہی تھی۔

’’بتا کر نہیں گیا کہ پیو کے ڈر سے …؟ اب ہم پر یہ ویلا بھی آنا تھا کہ باپ کے ڈر سے تاش کھیلنا چھوڑ دیں۔‘‘کالو غصہ ٹھنڈا کرنے کے لیے کرسی کے ہتھے پر کبھی کبھی مکہ مار دیتا۔

’’ابا جب تک یہاں ہے…!اس کا کیا مطلب ہے؟ اِسے ابے کا اتنا خیال تھا کب، اور پھر اِس کا ابا تو پچھلے چھ ماہ سے گھر آیا بیٹھا ہے۔ اب تو اُس کی چھٹی بھی ختم ہونے والی ہے۔ پہلے اِسے کبھی ابے کا خیال نہیں آیا۔ آج ابے کی اتنی دہشت کیوں؟‘‘

’’ہو سکتا ہے کل تک اسے یقین ہی نہ ہو کہ یہی اس کا باپ ہے۔ اور آج ہی اماں نے اسے قسم دی ہو کہ تم حلال کے جنے ہو۔‘‘ کالو کا غصہ اسی طرح مستقل ہوا کرتا تھا:’’ اتنا بھی نہ سمجھا کہ ماں جھوٹ بھی تو بول سکتی ہے۔‘‘

’’تم خواہ مخواہ ابل گئے ہو۔ بندے کی کوئی مجبوری بھی تو ہو سکتی ہے۔‘‘

’’دفع کرو اس کو۔ کوئی کام کی بات کرو۔ کنجر کو آئندہ یہاں گھسنے نہیں دینا۔ کہتا ہے، بس دس بجے تک ٹھہرا کروں گا۔ یہ کتے کا بچہ، احسان کرے گا ہم پر۔ جب ہم چوتھا سنگی ڈھونڈ لیں گے تو پھر ہمیں کیا ضرورت ہے تم جیسے شہدے کی۔ ہم ہر روز وکھرے وکھرے لوگوں سے کیوں…‘‘

’’پر سوچنے کی بات تو یہی ہے نا کہ اسے ہوا کیا، باوا بھی تو نہیں بتا رہا، اسے تو کچھ پتا ہو گا کہ وہ آج جلدی کیوں چلا گیا۔ ‘‘
’’میں کیا بتاؤں یار، میں تو خود حیران ہوں کہ بیٹھے بٹھائے اس کے اندر ابے کی اندھی محبت کہاں سے آ گھسی کہ وہ تاش کو چھوڑ کے چلا گیا۔‘‘

’’میں تو یہ سوچ رہا ہوں کہ کل تاش کے لیے چوتھا سنگی کسے بناؤں۔ میرا مسیر بہت اچّھارنگ کھیل لیتا ہے، کوشش کروں گا کہ اسے گھیر لاؤں، وہ اس حرامی کی طرح بزدل نہیں ہو گا کہ دس بجے جا کر ابے کی بغل میں بیٹھ جائے۔‘‘

۔۔۔۔۔۔۔۔۔۔۔۔

اب تو اچّھے نے دس بجے گھر چلے جانا معمول بنا لیا تھا، کالو کو شک تھا کہ اچّھا ڈیرے سے اٹھ کر سیدھا گھر نہیں جاتا بلکہ کسی اور جگہ رات رنگیلی کرتا ہے۔ عاشقی معشوقی میں یاروں کی یاد حرام زادی کب آتی ہے۔ لیکن ایک دن خود اچّھے کی اماں نے کالو کے سامنے اچّھے کی تعریف کی کہ پتا نہیں کیسے اسے عقل آ گئی ہے، اب تو دس بجے ہی لوٹ آتا ہے۔ اس کا ابا بے چارہ جب سے آیا، کھپتا رہتا تھا کہ رات کو جلدی گھر آ جایا کرو مگر وہ انسان نہ بنا تھا، کبھی چاربجے تو کبھی پانچ بجے آ دیوار پھلانگتا۔ اگر وہ اس قدر گبھرو جوان نہ ہوتا تو اس کا ابا اس کو خوب پھینٹی لگاتا مگر ڈرتا ہے کہ جوان بیٹا ہے، کہیں جواباً اس پر ہاتھ نہ اٹھا دے۔ بس منہ سے کہتا رہتا ہے لیکن اس نے بھی مان کر نہ دی۔ پر پچھلے دس بارہ دن سے بڑا فرمانبردار بنا ہوا ہے۔ ابھی ہم سب جاگ رہے ہوتے ہیں کہ وہ لوٹ آتا ہے۔ اس کا ابا بھی اس سے بہت خوش ہے۔
کچھ دن میں ہم بھی اُس کے اِس نئے معمول کے عادی ہو گئے۔ وہ ڈیرے پر آتا، بمشکل آدھا گھنٹہ بیٹھتا اور واپس چل دیتا۔ ڈاکٹر نے ایک دو دفعہ اسے باز رکھنا چاہا تو وہ تھوڑا اُکھڑ گیا۔
’’تم لوگ دیہاڑیاں لگاتے ہو ناں؟ کیوں لگاتے ہو؟‘‘
’’کیوں کا کیا مطلب؟ گھر والوں کا پیٹ بھرنا ہوتا ہے اور کیا۔‘‘
’’تم گھر والوں کے لیے دیہاڑی لگاتے ہو اور میں گھر والوں کے لیے جلدی لوٹ جاتا ہوں۔ میں نے کبھی تم لوگوں کو دیہاڑی لگانے سے روکا؟ تو پھر تم مجھے کیوں روکتے ہو؟‘‘
ڈاکٹر کو کوئی جواب نہ سوجھا۔
ڈیرے پر اب تاش کم، گپیں زیادہ چلتیں۔ ہمیں چوتھا کھلاڑی نہ مل سکا، اسی لیے اچّھے کے اٹھنے تک رنگ کی دو بازیاں لگتیں اور پھر چادر لپیٹ دی جاتی۔ ڈیرے پر رات دیر تک بیٹھنے کی عادت بنی ہوئی تھی، اسی عادت کو نبھانے کے لیے بیٹھے رہتے ورنہ تاش کے بغیر کہاں مزہ آتا تھا۔ ڈاکٹر تو کہا کرتا تھا کہ جن دوستوں کے درمیان تاش بٹنا ختم ہو جائے، وہ خود بٹ جاتے ہیں۔ یہ تاش کے باون پتے ہیں جو دوستوں کو باندھ رکھتے ہیں۔ ہم لوگوں نے اتنی مدت اکٹھے تاش کھیلی تھی کہ لگتا، تاش ہمارا پانچواں دوست ہے۔ تاش کے بغیر ہمیں مل بیٹھنا عذاب ہو جاتا تھا۔ آخر فارغ بیٹھ کر ایک دوسرے سے کیا بات کریں؟ تاش کے ساتھ تو عجب معاملہ تھا، ادھر پتے سب کے ہاتھ میں آئے اور ادھر دنیا بھر کے موضوع یاد آنے لگے۔ پتا پھینکا جا رہا ہے اور ہستی کے مسائل پر بحث ہو رہی ہے۔تاش پھینٹی جا رہی ہے اور زمانے بھر کے فلسفے چھانٹے جا رہے ہیں۔ اب تاش کے بغیر ہم ایک دوسرے کی گفتگو سے بیزار ہونے لگے تھے۔ یوں جیسے محض دکھاوے کے لیے باتوں کی تسبیح رول رہے ہوں۔ کالو بیٹھا بے لطفی سے پتے پھینٹتا رہتا۔ بد مزگی اس کے ہر ہر روم سے عیاں ہوتی تھی۔ میں اور ڈاکٹر بھی اکتائے اکتائے سے بیٹھے رہتے۔کئی بار ہم نے تین کھلاڑیوں والا رنگ کھیلنا شروع کیا مگر عادت نہ تھی، بدمزگی میں اضافہ ہی ہوا۔
۔۔۔۔۔۔۔۔۔۔۔۔
آخر ایک دن ڈیرے کی رونق پھر سے بحال ہو گئی۔ اچّھے کا ابا واپس بحرین چلا گیا اوراچھّا اس شب پھر رات دیر تک تاش کھیلتا رہا۔ اب وہ پھر وہی پرانا اچّھا تھا، ڈیرہ پھر تاش کا ڈیرہ بن گیا۔ ڈاکٹر اور کالو دوبجے چلے جاتے اور میں اور اچّھا سیانوں کے پاس جا بیٹھتے۔ اس کا ولز کنگ جلتا رہتا، باتوں کا سلسلہ چلتا رہتا۔ ایک دن پتا نہیں کس لہر میں رواں تھا کہ مجھ سے پوچھنے لگا۔

’’تمہیں اندازہ ہے کہ پچھلا پورا مہینہ میں جلدی گھر کیوں جاتا رہا؟‘‘
’’نہیں۔ میں نے بہت سوچا مگر ذرا بھی اندازہ نہ کر سکا۔‘‘
’’بس یرا، یہ بھی ایک الگ ہی معاملہ تھا۔‘‘ اس نے تھڑے پر ٹانگیں پھیلا لیں:’’ بات توبتانے والی نہیں مگر تم سے اپنا اتنا پردہ بھی نہیں۔ اور میں خود چاہتا ہوں کہ کسی سے یہ ساری گل سانجھی کروں۔‘‘
’’تو پھر بتا دو۔ بجھارتیں کیا ڈال رہے ہو۔‘‘

’’بتاتا ہوں یرا…پر نکتہ باریک ہے… سمجھانے کے لیے شروع سے بات کرنی پڑے گی۔ تم جانتے ہو کہ میرا ابا مارچ سے گھر آیا بیٹھا تھا۔ تب سے وہ مجھے جھڑکتا رہتا تھا کہ میں جلدی گھر کیوں نہیں آتا۔ اسے بڑا دکھ ہوتا تھا، رات کو میرے گھر نہ ہونے سے۔ وہ کہتا تھا: ’میں بحرین سے آیا ہوں کہ اپنے پتر دھیوں سے مل آؤں۔ چھ مہینے کی چھٹی لایا ہوں کہ اپنے گھر والوں کے ساتھ کچھ وقت گزار آؤں،سوچا تھا اپنے اکلوتے پتر سے جی بھر کے باتیں کروں گا۔مگر اسے ذرا بھی غیرت نہیں آتی،گھر ہوتے ہوئے بھی مجھے نظر نہیں آتا۔ساری رات کتے کی طرح لور لور کرتا رہتاہے۔سارا دن مگر مچھ کی طرح سویا رہتا ہے۔کچھ کھانے کو مل گیا تو اونٹ کی طرح ہر چیز لپیٹ گیا۔ نہیں تو بھینس کی طرح خاموش پڑا رہے گا۔اس میں انسانوں والی کوئی عادت ہی نہیں۔ باپ اتنی مدت بعد گھر آیا ہے،ذرا دیرکو اس کے پاس بھی بیٹھ، کچھ اس کی سن، کچھ اپنی سنا۔ مگر نواب صاحب گھر پر ٹھہریں تو ناں۔ لوگوں کی اولاد ایسی نیک ہے کہ ماں باپ کی اجازت کے بغیر قدم بھی نہیں اٹھاتی،ایک مجھے یہ اللہ میاں کا تحفہ مل گیا ہے، پتا نہیں کب اسے باپ کا خیال آئے گا۔‘ تو یہ تھا میرے باپ کا مسئلہ، وہ میرے ساتھ بات کرنا چاہتا تھا اور آخر اس کی خواہش کیوں نہ ہوتی، ساری عمر اس نے بحرین مزدوری کر تے گزار دی، کس کی خاطر، میری خاطر ناں، اب وہ بس اتنا چاہتا تھا کہ میں اس کے ساتھ دو گھڑی گپ شپ ہی کرلوں۔ مجھے معلوم ہے کہ وہ چاہتا تھا کہ میں بیٹے کی طرح اس سے ملوں…‘‘

’’یہ خیال اُس کی چھٹی کے آخر میں تمہیں کیسے آیا … پہلے کیوں نہیں؟‘‘

’’نہیں تم پوری بات تو سنو۔ وہ تو چاہتا تھا کہ میں بیٹے کی طرح اس سے ملوں، اس کے پاس بیٹھا کروں لیکن مجھے اِس کی عادت ہی نہ تھی، وہ کب میرے سامنے باپ کی طرح رہا تھا۔ یہی چھ مہینے کی چھٹی وہ میرے بچپن میں کبھی آ جاتا تو میرا ذہن اسی وقت ا س کو اپنا باپ مان لیتا۔ جب وقت تھاتب اس نے مجھ سے باپ کا رشتہ نہیں بنایا۔ اب وہ چاہتا تھا کہ میں اس کا بیٹا بن جاؤں، یہ کیسے ہو سکتا تھا۔ میں اکثر سوچتا تھا… ذرا ماچس تو دینا… کہ جب مجھے اس کی ضرورت تھی، وہ میرا نہیں بنا تو اب اس کی ضرورت پوری کرنا کیا مجھ پر فرض ہے ؟ نئیں یرا، یہ ولز کا سگریٹ بھی انتہائی گھٹیا ہوتا جا رہا ہے، جیسے تمباکو کی جگہ بھوسا بھرا ہو، کوئی سواد ہی نہیں آتا۔‘‘
’’بس، تم جانتے ہو آج کل دو نمبر سگریٹ بہت ہو گئے ہیں۔‘‘

’’نئیں او یرا!جب سے یہ بجٹ میں ان پر ٹیکس زیادہ لگا ہے، تب سے ان کا سٹینڈر ہی نہیں رہا۔ ٹیکس لگاتے وقت بھی یہ کہاں خیال رکھتے ہیں غریبوں کا… کالو بجٹ بنانے والوں کو گالیاں دیتا ہے تو بڑا مزہ آتا ہے۔ یہ لوگ ہیںبھی…‘‘

’’سگریٹ اور کالو دونوں کی …‘‘

’’ہاں یرا …ابا کہتا ہی رہا کہ رات کوجلدی گھر آ جایا کرو یا دن کو دوگھڑی میرے پاس بیٹھ جایا کرو مگر میں نے بھی ایک طرح سے ضد ہی بنالی تھی کہ ابے کی نہیں سننی۔ جو میری مرضی ہو،وہی کروں گا۔صورت حال یہاں پر تھی کہ وہ واقعہ پیش آگیا۔ ہوا یوں کہ اس رات ہم ڈیرے سے دو بجے اٹھے اور’’ سیانوں‘‘ کے پاس بیٹھے ہی نہیں، یوں میں معمول سے قبل گھر پہنچ گیا۔ڈیوڑھی کا دروازہ اندر سے بند تھا۔ حسبِ معمول میں نے بھی دیوار پھلانگی اور اندر۔ آج کل سب ہی گھر والے ویہڑے میں سوتے ہیں۔تمہیں پتا ہے کھڑا پنکھا ہمارے گھر ایک ہی ہے۔سب سے پہلے پنکھے کے ساتھ میری چارپائی ہوتی ہے۔ اس کے بعد بے بے اور بابے کی۔ پھر ابے کی، اس کے بعد چھوٹی بہنوں کی دو چارپائیاں اور آخر پر تقریباً دیوار کے ساتھ اماں کی چارپائی۔ اس رات چاند کی ۲۱ یا۲۲ ہو گی۔ روشنی بہر حال اتنی تھی کہ صحن میں سوئے سب لوگ دھندلے دھندلے نظر آتے تھے۔ میں دیوار پھلانگ کر اماں کی چارپائی کے قریب اترا۔ دیکھا تو اماں اپنی چارپائی پر نہ تھی۔ادھر اُدھر دیکھا،گھر کے سبھی کمرے گھپ بند تھے۔ ادھر…غسل خانے کی بتی بھی آف تھی۔یہ اماں کہاں گئی؟ میں نے ذراسی اونچی آواز دی’’اماں۔ اے اماں۔‘‘ لیکن تھوڑی دیر بعد مجھ پر انکشاف ہو گیا کہ اماں ویہڑے میں ہونے کے باوجود بولنے جوگی نہیں ہے۔ میں تیز تیز قدم چلتا اپنی چارپائی تک پہنچا اور اوندھا ہو کے پڑ رہا۔‘‘

’’تو اماں کہاں تھی…؟‘‘ میں حیران ہو گیا:’’ اوہ ہ ہ… … ‘‘

’’ہوں۔ درست سمجھے۔اب خود دیکھو، ایسے موقع پر میں کیا سوچتا؟…صبح میں نے یوں ظاہر کیا جیسے مجھے رات کو کچھ پتا ہی نہ چلا۔ اور وہ بھی ایسے ہی رہے، گویا رات کو کچھ ہوا ہی نہیں۔‘‘

’’ تو پھر …؟‘‘

’’تو پھر یہی کہ میں نے تم لوگوں سے معذرت کر لی اور جلدی گھر آنے لگا۔اس رات میں سونے کی بجائے سوچتا ہی رہاتھا۔ میں سمجھ گیا، ابا مجھے جلدی گھر آنے کو کیوں کہتا تھا۔ میرے گھر لوٹنے کا کوئی وقت مقرر نہیں تھا، میرے آنے سے پہلے تک وہ گھبراتے ہوں گے کہ پتا نہیں کب اچّھا دیوار پھلانگے اور ان کے سر پر آن پہنچ جائے۔اس لیے میرا ابا مجھ سے کلپتا رہتا تھا کہ جلدی گھر آجایا کرو۔ میں جب اس نکتے پر پہنچ گیا تو میں نے جلدی گھر جانا اور وقت پرسونا شروع کر دیا۔ اب یہ سوچ سوچ کر مجھے بڑی مسرت ہوتی ہے کہ آخری ایک مہینہ اماں کس طرح کھل کر اپنی چارپائی سے اتری ہو گی۔ایک اور ہی نشے میں… ابا بھی ہنستے بولتے بحرین سدھارا ہے۔‘‘

وہ خاموش، دھواں پیتا رہا۔میں اس کے سگریٹ پر نظر جمائے بیٹھا رہا۔کافی وقت گزر گیا۔اس کا سگریٹ بجھے بھی بڑی دیر ہو چکی تھی۔ میں نے اس کے کندھے پر ہاتھ رکھا:’’چلیں یار گھر، اب تو لگتاہے، تیرے سگریٹ بھی ختم ہو گئے۔‘‘

اس نے ولز کنگ کا نیا پیکٹ نکالا، سیل کھولی، سگریٹ سلگایا اور دو چار سوٹے مارنے کے بعدبڑے اطمینان سے کہنے لگا:’’ابا اب بحرین پہنچ چکا ہے۔ اب گھر جا کے کیا کروں گا… ہم تو بات کر رہے تھے کہ بجٹ کے بعد ولز کنگ بہت خراب ہو گیا ہے۔ پتا نہیں یہ ٹیکس کا سگریٹ کے سٹینڈر پر کیا اثر پڑتا ہے؟‘‘

اس کی زندگی تین دھروں پر گھومتی تھی۔گھر، قبرستان اور غلام علی۔ ان میں بھی غلام علی کی حیثیت مرکزی دھرے کی تھی۔
بہت بچپن میں وہ ہم سب دوستوں کے لیے ایک ڈراؤنی شخصیت کا درجہ رکھتا تھا۔بعد میں جب پریوں کی کہانیاں سننی شروع کیں تو کسی جن بھوت کا ذکر آنے پہ میرے ذہن میں جن کا جو خیالی پیکر بنتا وہ بڑی حد تک اس سے مشابہہ ہوتا تھا۔ اس کو اس قدر ڈراؤنا بنانے میں جہاں اس کے حلیے کا کردار خاصا اہم تھا وہاں اس کا ذریعۂ معاش اور طرز رہائش بھی خاصی اہمیت رکھتے تھے۔ ذریعۂ معاش جو ہم پرذرا بڑے ہونے کے بعد واضح ہوا،یہ تھا کہ گاؤں والوں نے آج سے کوئی چالیس سال قبل متفقہ طور پر اسے گاؤں کے قبرستان کا راکھا مقرر کیا تھا۔ اس کے فرائض منصبی میں قبروں کی حالت درست رکھنا، درختوں کی کاٹ چھانٹ، جھاڑ جھنکار سے قبرستان کو صاف رکھنا اور قبروں کو ڈھور ڈنگر کی ’دست برد‘ سے محفوظ رکھنا تھا۔ اس کے عوض اسے گاؤں کے ہر گھرانے سے دو ٹوپے گندم اور ایک ٹوپہ باجرہ یا غیر کاشتکار گھروں سے مساوی رقم سالانہ کی ادائیگی قرار پائی تھی۔ پورے چالیس سال اس نے قبرستان سے یہ ناتا برقرار رکھا۔ اب یہ نہیں کہا جا سکتا کہ اس نے اپنے یہ تمام فرائض ہمیشہ نبھائے۔ وہ احساسِ ذمہ داری یا حساب کتاب جیسی باتوں سے ماورا تھا۔قبرستان کے رقبے کو مد نظر رکھا جائے تو یہ سب کام اس اکیلے کے بس کا روگ بھی نہ تھے۔ اس کے لیے تو ایک آدھ پلٹن درکار تھی۔البتہ آخر الذکر فریضے پہ وہ بہت توجہ دیتا تھا۔ اس کے ہوتے کوئی جانور، بکری سے لے کر بھینس تک قبرستان میں زیادہ دیر نہیں ٹھہر سکتا تھا۔ قبرستان کی وسعت اورخود اس کی عمر (جس کا درست تعین کبھی نہ ہو سکا)کے پیشِ نظر یہ بھی ایک ناممکن کام تھا مگر اس نے ہمیشہ یہ کام نبھایا۔ہم نے اسے سردیوں کی صبحوں اورگرمیوں کی دوپہروںمیں بھی ڈنگورا کندھے پہ رکھے قبرستان میں گھسنے والے جانوروں کا پیچھا کرتے دیکھا۔ گرمی کی شدت سے ساری خلقت تفو تفو کر رہی ہوتی اور وہ ننگے پاؤں، ننگے سر اور ننگے دھڑ اپنے ڈنگورے کو تیغِ برہنہ کی مانند لہراتا ڈنگروں سے گولڑہ چھپاکی کھیل رہا ہوتا۔گرمیوں میں اکثر ہم اسے دیکھتے تو اتنا ترس آتا جتنا اپنی طاقت سے زیادہ بوجھ اٹھا کرگھسٹنے والے گدھے پر۔

رہائش اس کی تھی تو گاؤں کے عین درمیان، لیکن اتنی اجاڑ کہ وہاں عشاق کے جوڑے کیدو نظروں سے بچنے کے لیے دن کو بھی بے خطر مل لیا کرتے۔ چاردیواری ایک کنال پہ محیط تھی۔ اندرایک کونے پر صرف ایک کمرہ بنا ہوا تھاجس کے دروازے پر کبھی تالا نہیں لگتا تھا(یار لوگ بعض اوقات اس کمرے سے بھی مستفید ہو لیتے تھے) عمر میں اس نے جو بھر پایا تھا، وہ اسی کمرے میں ڈھیر تھا۔ مانگے کے کپڑے جن کی تعداد شماری نہ جا سکتی، ایک چارپائی جس کی بُنائی اتنی بگڑ چکی تھی کہ شاید ہی کوئی انسان اس پر سو سکتا۔ایک طرف شیشے اور پلاسٹک کی ناکارہ بوتلیں،انہی کے ساتھ زنگ اور دیمک سے اٹے کچھ اوزار مثلاً کسّی،کلہاڑا، کھرپہ، بیلچہ وغیرہ پڑے تھے۔ دوسری جانب لکڑی کی ایک بڑی پیٹی تھی جس میں اس نے جانے کون کون سی قیمتی چیزیں رکھی ہوئی تھیں۔ دروازے کے بالکل ساتھ اس کا چولہا ہوا کرتا تھا، جہاں اس نے کھانا بنانے کی زحمت یقینا کبھی نہ کی ہو گی البتہ کبھی گرم کرنا پڑتا ہو تو کر لیتا ہو گا۔ سامنے پڑچھتی پر عام استعمال کے کچھ برتن تھے، ایک دو چنگیر، سلور کی دیگچیاں، تام چینی کی پلیٹیں، بادیے وغیرہ۔ اس کمرے کے باہر باقی تقریباً ۱۹ مرلے جگہ پر جتنا جھاڑ جھنکار اگ سکتا تھا، اگا ہوا تھا۔ جس بُوٹی، جس جھاڑی کی جتنی تمنا تھی،اتنے اس نے پاؤں پسارے ہوئے تھے۔ بے تحاشا اگے ہوئے اس ’’گھاہ بوٹ‘‘ کی وجہ سے اس کے گھر اور قبرستان میں کوئی فرق نہیں لگتا تھا۔ شاید اپنے گھر کی اسی ویرانی کے باعث اسے قبرستان سے بھی اجنبیت محسوس نہ ہوتی تھی۔۔۔ یا شاید معاملہ بر عکس تھا۔

اسی گھر میں بلکہ اسی کمرے میں اس نے اپنی عمر کی بیشتر راتیں گزاریں۔وہ کبھی بھی رات اس کمرے سے باہر نہیں سہارتا تھا۔گرمی ہو یا سردی،ہمیشہ اندر ہی سوتا۔ کھانا دونوں وقت اس کے بھائی کے گھر سے آ جاتا جو ہمسایہ تھا۔ صبح کھانا کھا کر وہ قبرستان نکل جاتا، شام کو واپس آ کر کھاتا اورسو جاتا۔ مجھے اچھی طرح یاد ہے کہ بہت بچپن میں، میں نے سب سے پہلے اسے اسی گھرمیں منڈلاتے دیکھا تھا اور اس کی طرف سے ایک خوف سا دل میں بیٹھ گیا تھا جو لڑکپن تک میرے ساتھ رہا۔گلی میں کہیں بھی جب وہ نظر آ جاتا تو میں سہم کر راستہ بدل لیا کرتا۔ اب میں چاہوں بھی تو اس کی وہ صورت پیش نہیں کر سکتا جیسی خوفناک بچپن میں مجھے نظر آتی تھی۔ ایک میں ہی نہیں میرے تقریباً سبھی ہم عمر اپنے بچپن میں اس سے ڈرتے رہے ہیں۔ وہ تو بہت بعد میں جا کر جب ہمیں یقین آ گیا کہ یہ ہم انسانوں میں سے ہی ہے، تب جا کر یہ خوف سمٹنے لگا۔جو زیادہ شرارتی لڑکے تھے،انہوں نے تو اپنے اس خوف کا اس سے گویا بھر پور بدلہ لیا اور ہر ممکن طریقے سے اسے تنگ کرتے رہتے۔ اسے تنگ کرنا بالکل آسان تھا۔ اک ذرا چھیڑیے پھر دیکھیے کیا ہوتا ہے۔بہت سی چیزیں اس کی چھیڑ تھیں، بلکہ میرا تو خیال ہے کہ اس کی کوئی مخصوص چھیڑ تھی ہی نہیں،بس جو بھی کہہ دو، وہ تپ جاتا تھا۔ ادھر کسی نے اسے انگل دی، ادھر اس کے منہ سے گالیاں نکلنی شروع ہو گئیں۔اور یہ تو اس کی عادت تھی کہ جب گالیاں دینی شروع کر دے تو پھر کوئی مائی کا لال اسے نہیں روک سکتا تھا بلکہ ایسی کوئی بھی کوشش اس کے جذبے کو مزید بڑھاوا دیتی۔ انتہائی کڑاکے دار آواز میں ایسی ایسی گالیاں دیتا کہ سات پردوںمیں بھی بہو بیٹیاں لال ہو جاتیں۔ اسے جو عمر بھر عورت کا قرب نصیب نہیں ہوا تھا، شاید اسی کا بدلہ وہ سب کی ماں بہن ایک کر کے لیا کرتا تھا۔ اس دن تو بہت ہی تماشا ہوتا تھا، جب وہ گاؤں میں کسی جگہ پر پایا جاتا۔ ویسے تو وہ کم ہی گاؤںکا چکر لگایا کرتا لیکن جس دن وہ آ نکلتا، لڑکوں کے ہاتھ تماشا لگ جاتا۔ذرا سا چھیڑ دیتے اور وہ پھر پورے گاؤں میں بکتا پھرتا۔ جہاں تھوڑاخاموش ہوتا، پھر کوئی چھیڑ دیتا اور وہ نئے جوش و خروش سے نئی گالیوں کے ساتھ اپنی اننگز شروع کر دیتا۔جیون مرن ہو تو وہ خاص طور پرپہنچ جاتا تھا۔اور جب وہ آ جاتا توبھلے کتنی خوشی کا موقع ہو، خواہ کتنا سوگ منایا جا رہا ہو،کچھ لوگوں کی توجہ اس طرف ضرور ہو جاتی اور کوئی نہ کوئی اسے چھیڑ دیتا۔بس پھر تو مرد حضرات سر جھکائے گٹکتے رہتے اور گھر بھر کی عورتیں منہ چھپائے پھرتیں۔ کیا کچھ کہتا رہتا، مگر کوئی اسے نہ روک پاتا۔ اس کی ذہنی حالت سے سبھی واقف تھے اور گاؤںمیں متفقہ طور پر اسے وہ ساری مراعات حاصل تھیں جوکسی پاگل کو مل سکتی ہیں۔ اسے نہ توکوئی سیانا بندہ گالی کا جواب دیتا اور نہ ہی کبھی کسی نے اس پر ہاتھ اٹھایا تھا۔ سب جانتے تھے کہ وہ بالکل بے ضرر آدمی ہے۔ گاؤں بلکہ قبرستان میں گزری اس کی پوری زندگی سب کے سامنے کھلی تھی۔ اس کی طرف سے نیکی کے کام کی کسی کو خبر ہو یا نہ ہو، مگر اتنا سب جانتے تھے کہ اس نے زندگی میں منہ چھپانے لائق کام کبھی نہیں کیا تھا۔

مفلس زندگی نے اس کا جثہ ہلکا تودیا تھا مگربدن میں ابھی توانائی باقی تھی۔۔۔شاید عورت سے محرومی کے باعث۔ رنگ تقریباً سیاہ تھا۔ عمر کی دھوپ نے چہرے پر تریڑوں کا نقشہ بنا چھوڑا تھا۔ سر کے بال کہیں کہیں سے کالے رہ گئے تھے۔ داڑھی کے بال اگے ہی بہت کم تھے۔ جیسے دھان کی پنیری لگاتے وقت وقفہ زیادہ رکھا گیا ہو۔ناک اور کان عمر کی چھ، سات دہائیاں طے کرنے کے بعد غیر معمولی طور پر بڑے لگتے تھے، شاید جوانی میں متناسب رہے ہوں۔ بہت موٹے شیشوں کی عینک پہنتاجس کے دونوں طرف کمانی کے بجائے ایک موٹا دھاگا ڈال کر اس نے اپنے سر کے سائز کے مطابق گانٹھ دے رکھی تھی،اس لیے وہ عینک بھی ٹوپی کی مانند پہنتا اتارتا تھا۔ لباس اس کا کچھ زیادہ ہی عجیب و غریب ہوتا۔ ہر موسم کے لحاظ سے اس کا لباس مقرر تھا۔ ساون بھادوں کے مہینوںمیں صرف شلوار اور پاؤں میں لیلن (نائلون)کے سستے بوٹ ہوتے جو اس کے گھٹنوں تک آتے تھے۔ اسوج کاتک، پھاگن چیت میں وہ دھوتی کرتا استعمال کرتا اور پاؤں میں لیلن کے ہی چپل۔ گرمی کے دنوں میں اس کے پورے بدن پر قدرت کی طرف سے دی گئی چیزوں کے علاوہ ایک تہمد ہوتا یا پھر کندھے پر ڈنگورا۔ دھوپ کی شدت اور حدت برداشت سے باہر ہو جائے تو ایک صافہ سر پر رکھ لیتا ورنہ عام طور پر اس تکلف میں نہیں پڑتا تھا۔ سردیوںمیں اس کی وضع سب سے عجیب ہوتی۔ ادھر سردیوں کا آغاز ہوتا اور ادھر وہ ہر کسی سے کپڑوں کا جوڑا مانگنے لگتا۔نچلے دھڑ پر ایک شلوار اوراو پر جتنی بھی قمیضیں دستیاب ہو پاتیں،سب پہن لیتا۔جوں جوں سردیوں کی شدت میں اضافہ ہوتا، اس کے بدن پر قمیضوں کی تعداد بڑھنے لگتی۔ایک دفعہ پوہ کے مہینے میں،خود میں نے اس کے بدن پہ نو قمیضوں کی گنتی کی تھی۔جرسی،سویٹر یا کوٹ وغیرہ کی زحمت وہ گوارا ہی نہیں کرتا تھا۔ قمیضوں کے اوپر سر اور ہاتھوں کی حفاظت کے لیے چادر لے لیتا۔ پاؤںمیں لیلن کے وہی بوٹ جو ساون بھادوں میں اس کے کام آتے تھے، مگر اتنے فرق کے ساتھ کہ جاڑے میں ان گنت جرابیں پاؤںپر چڑھاکر اوپر جوتے کھونس لیتا۔ اسی لیے وہی جوتے جو کھلے ہونے کی وجہ سے ساون کے کیچڑ میں شڑپ شڑپ کرتے تھے، جاڑوں کے دوران اس کے پیروں میں نعل کی طرح جمے ہوتے۔

سردیوں میں کہر اورسوکھے کی وجہ سے لوگ مال مویشی گھروں سے نہیں نکالتے تھے، اس لیے وہ قبرستان کی طرف سے مطمئن ہو کر گاؤں میں ہی گھوما پھراکرتا۔ کبھی چائے کے کھوکھے پر تو کبھی کسی دکان کے تھڑے پر۔کبھی گلیاں ناپتا ہوا تو کبھی کسی کو کوسنے دیتا ہوا۔یہی اس کی زندگی کا معمول تھا۔ البتہ یہ معمول ایک حادثے کے بعد ختم ہو گیا۔

حادثے کی تفصیل کسی صورت نہیں بیان کی جا سکتی۔ واقعہ تھا ہی اتنا پر اسرا ر کہ اس کے متعلق کوئی بتائے بھی توکیا۔ بعض لوگوں کے نزدیک یہ حادثہ نہیں تھا بلکہ سوچی سمجھی سازش تھی۔ ہوا یوں کہ جیٹھ کی ایک گرم دوپہر جب پورا گاؤں اندر کمروں میں سویا پڑا تھا اورخودوہ قبرستان میں ڈنگروں سے آنکھ مچولی کھیل رہا تھا، اس کے گھر میں اچانک آگ بھڑک اٹھی۔ پاس پڑوس کے لوگوں کو خبر ہونے تک اس کا پورا کمرہ آگ کی لپیٹ میں آ چکا تھا۔چاہتے ہوئے بھی کوئی کچھ نہ کر سکا کہ کمرے کے باہر سارے گھر کا گھاہ بوٹ بھی آگ پکڑ چکا تھا۔ کوئی کمرے تک کیسے جاتا۔ اس کی کل زندگی جل کر کوئلہ بن گئی۔ سنا ہے کہ جب وہ وہاں پہنچا تو صدمے سے اس نے خود بھی اس آگ میں کود مرنے کی کوشش کی مگر بھائی اور اس کے بیٹوں نے اسے بچا لیا۔یوں کہنے کو تو اس کوٹھڑی میں کوئی بھی قیمتی چیز نہیں تھی مگر جو کچھ بھی تھا، اس کی کل کائنات یہی تو تھی۔گھر جل جانے کے بعدوہ بالکل بجھ سا گیا اور ہر وقت ملول سا رہنے لگا۔ وہ عمر بھر یہ تو نہ جان سکا کہ آگ کس نے لگائی تھی مگر جب بھی اسے اپنا گھریاد آتا آگ لگانے والے کے لیے اس کے منہ سے آگ ہی نکلتی تھی۔

گھر نہ رہا تو اس کے معمولات بالکل بدل گئے۔ گرمیوں میں وہ چوبیس گھنٹے قبرستان میں ہی رہنے لگا۔ دن کو قبرستان کی رکھوالی اور رات کو جنازہ گاہ میں میت کے لیے بنائے گئے شیڈ کے نیچے چادر تان کر سو رہتا۔دو وقت کا کھانا، جس کی اسے اتنی فکر رہی بھی نہ تھی،اس کا بھتیجا اسے پہنچا آیا کرتا۔ٹھنڈے موسم میں جب راتوں کو پالا برداشت سے باہر ہونے لگتا تو وہ سونے کے لیے بھائی کے گھر آ جاتا اور صبح آنکھ کھلتے ہی پھر قبرستان میں جا پہنچتا۔ گالیاں بکنا اس نے کم تو نہیں کیا تھا مگر اب گالیاں دیتے وقت واضح معلوم ہو جاتا کہ وہ میکانکی انداز میں، گویا کوئی فرض نبھا رہا ہے۔ ایک تخلیقی شان سے گالیاں دیتے وقت اس کے لہجے میںجو کھنک ہوتی تھی وہ اب مفقود ہو گئی تھی۔ اب تو وہ بس اسی لیے گالیاں دیتا تھا کہ لوگ اس سے گالیاں سننا چاہتے تھے۔

سب سے خاص بات یہ کہ گھر جلنے کے بعد اس نے سرِ عام یہ اعلان کرنا شروع کر دیا تھا کہ آج سے ٹھیک سات سال،سات ماہ، سات روز بعد جمعرات کے دن وہ مر جائے گا۔ جس کو بھی ملتا، اسے بڑے تیقن سے اپنا خواب سناتا کہ رات پیرانِ پیر یارھویں والے سرکار اس کے خواب میں آئے تھے اور بتا گئے ہیں کہ آج سے ٹھیک سات سال،سات ماہ، سات روز بعد جمعرات کے دن وہ اسے لینے آئیں گے۔ اس کی زبانی یہ خواب میں نے کتنی بار سنا۔ ہر دفعہ خواب اپنی جزئیات سمیت بالکل یکساں ہوتا البتہ بشارت (وہ اسے بشارت ہی سمجھتا تھا)دینے والے بزرگ تبدیل ہو جاتے۔ کبھی یہ ’’دمڑیاں آلی سرکار پیر شاہ غازی کھڑی شریف ‘‘بن جاتے تو کبھی ’’ولیاں دے بادشاہ باہو سلطان لج پال ‘‘ بن جاتے۔ بلکہ میرا تو خیال ہے کہ وہ اِس خواب کو قریب قریب ہر اُس صوفی بزرگ سے منسوب کرچکا تھا جس کا نام وہ جانتا تھا۔ حتی کہ ایک دن ایک مومن بھائی سے کہہ رہا تھا: ’’ مینوں راتیں خوابے چ مولا علی مشکل کشا حق علی سرکار نے آکھیا اے کہ ست سال۔۔۔‘‘

معمولات کی تبدیلی تو پھر بھی سمجھ میں آنے والی تھی، اب وہ غلام علی کو بھی بہت زیادہ یاد کرنے لگا تھا۔ اس کے غلام علی سے میرا غائبانہ تعارف پہلے بھی تھا۔ یہ اس کا ایک فرضی پوت تھا جو بچپن میں ولایت چلا گیا تھا اور اب وہاں موجاں کر رہا تھا۔ لڑکپن میں جب ہم اسے چھیڑا کرتے تو وہ بہت زیادہ تپ کر آخر میں یہی کہتا۔۔۔’’کر لو،جو ظلم کرنا اے۔غلاملی نوں آ لین دیو، سب نال مُک لوے گا۔۔۔ تم سب ماں کے خصموں کو۔۔۔‘‘

غلام علی اس کی وہ اولاد تھا جس نے کبھی نہ کبھی واپس لوٹ کر اپنے باپ پر ہونے والے مظالم کا بدلہ لیناتھا۔اسی شاخ پہ اس کی تمام امیدوں کا بسیرا تھا۔جب بھی اس پر کوئی مشکل وقت آتا،بیمار پڑ جاتا،جانورو ں کے پیچھے بھاگتے ہوئے ہانپ جاتا یا بچوں بڑوں کی چھیڑ کا نشانہ بنتا، وہ اپنے غلام علی کو ضرور یاد کرتا اور فوری انتقام کی خواہش کو غلام علی کی واپسی تک ملتوی رکھ،رو دھو کے چپ ہو جاتا:’’ٹھیک ہے،میرا غلاملی یہاں نہیں، جو مرضی ظلم کر لو۔حق علی سرکار دے حکم نال اوہ جدوں مڑ آیا، فیر سب کولوں پچھ لیساں۔‘‘
سردیوں کی ایک دوپہر میں گاؤں کے ٹی سٹال کے قریب سے گزرا تو اندر سے اس کی آواز آئی:’’او پتر۔۔۔ اک گل سن جائیں۔‘‘ میں اندر گیا، دیکھا تو وہ ایک گندہ سا کھیس لپیٹے پٹھے کی چارپائی پر دوہرا تہرا ہوا پڑا تھا۔سات آٹھ قمیضیں اس نے ڈانٹی ہوئی تھیں۔ سردی کا مقابلہ کرنے کے لیے خود کو حتی الامکان سکیڑے اپنے ہی جسم کی گرمی سے حرارت لے رہا تھا۔آنکھوں میں ترس بھر کر بولا:’’ آ پتر۔۔۔دیکھ کتنا تپ چڑھا ہے۔پورا پنڈا اُبل رہا ہے۔‘‘

میں نے ہاتھ لگا کر دیکھا تو واقعی اسے کافی تیزبخار تھا۔اس نے مجھے جیب سے ایک خاکی پڑیا نکال کر دکھائی جس میں کچھ گولیاں تھیں۔اور کچھ روپوں کا مطالبہ کیا تا کہ وہ کچھ کھا پی کر دوا لینے کے قابل ہو سکے۔ میں نے دس روپے اسے تھما دیے،یہ جاننے کے باوجود کہ وہ ان سے کوئی چیز نہیں کھائے گا اور ابھی نہ جانے کتنے لوگوں کو گولیاںدکھا کر پیسے بٹورنے کی کوشش کرے گا۔میرے اٹھتے وقت اس نے ذرا پانی ہو کے کہا:’’جدوں میرا غلاملی مڑآیا۔میں تیرے پیسے دے دوں گا، بس وہ آیابیٹھا سمجھو۔‘‘

میں ہنس پڑا:’’ٹھیک ہے چاچا۔ اس نے آنا ہے نہ تم نے پیسے لوٹانے ہیں۔‘‘

وہ تڑپ اٹھا:’’اوئے اوئے۔کیوں نہ آئے گا۔۔۔ایں؟مولا علی مشکل کشاحق علی سرکار دے ناں دا صدقہ،اوہ اج ہی آجاوے،پر میں ای اس کو روکے بیٹھا ہوں۔ کیا کرے گا آ کر۔اس کا پیو تھوڑا ذلیل ہو رہیا اے کہ وہ بھی آ جائے۔ نعرہ ٔ حیدری،پنجتن پاک دے ناں دا صدقہ۔ او شالا وہیں رہے۔پر جدوں میں مرنے لگا،فیر اس کو بلا لوں گا۔میں نے اس کو خط لکھ ماریا اے کہ اج تو ٹھیک ست سال،ست مہینے،ست دناں بعد آ جانا۔تم دیکھ لینا۔جب مرن دے نیڑے ہویا،اس آپے آ جانا اے۔ نہ آیا تے میرا پتر ہی نہیں‘‘

اگریہی واقعہ پہلے پیش آیا ہوتا تو میں غلام علی پر اسے ضرور چھیڑتا مگر ان دنوںمیری اس سے تھوڑی دوستی ہونے لگی تھی اس لیے میں صرف مسکرا کے لوٹ آیا۔

غلام علی کا ذکر تو وہ پہلے بھی کرتا تھا مگر گھر جلنے کے بعد اس کے لبوںپر اکثر اسی کا تذکرہ رہنے لگا۔ان دنوں میں بھی کالج جانے کے بجائے گاؤں کے قبرستان میں چھپ کر جاسوسی ناول پڑھتے کالج ٹائم گزار دیتا تھا۔ایسے میں،اس نے مجھ سے سنگ بنا لیا،بلکہ میں نے اس سے بنا لیا۔اسے سنگ کی کیا ضرورت تھی،اس نے صرف سنانا ہی تو ہوتا تھا۔میں نہ ہوتا تو وہ قبرستان کے درختوں،جھاڑیوں،پرندوں بلکہ قبروں تک کو سنا لیتا۔اس کے پاس سامعین کی کون سی کمی تھی۔یہ تو میںتھا جو کالج سے بھاگ کر اس کی چپ نگری میں آجاتا اورکسی بھی انسانی سائے سے بھاگتا تھا۔ تقریباً دو مہینے تک میں اس کے پاس بیٹھتا رہا اور یہیں غلام علی سے میری شناسائی میں اضافہ ہوا۔یہ اور بات کہ خود غلام علی کی طرح یہ شناسائی بھی ہوائی تھی۔مگر اتنا ہے کہ جہاں گاؤں کے دوسرے لوگ صرف غلام علی کے نام سے واقف تھے۔ وہاں مجھے اس کی بابت کچھ دوسری تفصیلات بھی معلوم تھیں۔غلام علی اس کے پاس کبھی بھی نہ رہا تھا بلکہ پیدا ہونے کے بعد ننھیال کے پاس ہی رہا تھا۔ انہی کے پاس پڑھ لکھ کر پھر ولیت چلا گیااور وہاں پکا چن تارے والا افسر بن گیا تھا۔۔۔ جسے گاؤں کی پنچایت جیسے بڑے بڑے چودھری بھی’ سروٹ‘ مارتے ہیں اور وہ کسی کا لحاظ نہیں کرتا۔جس کے سامنے شطان کی بڑی بڑی جڑیں بھی چوں نہیں کرتیں۔ اور پتا نہیں کیا کیا۔دو تین بار تو وہ گھنٹوں غلام علی کی باتیں کرتا رہا۔ اس کے علاوہ بھی جب کبھی اس کا ذکر آ جاتا تو وہ بڑے لاڈ سے غلام علی کا کوئی قصہ سنا دیتا۔ وہ جو کبھی کڑک اور کھڑک کے بغیر بول نہیں سکتا تھا، غلام علی کا نام آتے ہی اتنا مہربان بن جاتا تھا جیسے ماگھ کی بارش کے بعد دھوپ۔

ایک دفعہ وہ آیا تو چپ چپ سا تھا۔ میرے استفسار پر ایک شرمیلی سی مسکراہٹ کے ساتھ اس نے بتایاکہ غلام علی آج کل بڑا پریشان ہے۔ تین گوریاں اس پر مرتی ہیں، ایک اس کے ساتھ نوکری کرتی ہے،ایک گاڑی چلاتی ہے اور ایک بینک میں نوکر ہے۔ تینوں اس سے ویاہ کرنا چاہتی ہیں۔ اب وہ پریشان ہے کہ کس سے شادی کرے؟تم ہی بتاؤ وہ کیا کرے؟ میں کافی دیر تک اس کا چہرہ دیکھتا رہااور اسے پوری طرح سنجیدہ پا کرانتہائی رسان سے یوں مشورہ دینے لگا جیسے واقعی اس کے بیٹے کی شادی ہو رہی ہے اوربڑی دیر تک محویت سے اس کے ساتھ بحث کرتا رہا۔لڑکی کا انتخاب، شادی کے دن کا تقرر، دعوت کی تیاریوں کی تفصیل، لڑکی کا حق مہر، لڑکی والوں کے ’’لاگ ‘‘کا تعین، سب پر اچھی خاصی گفتگو کی۔پھر آخر پراس نے غلام علی کی جلد وطن واپسی کی خبر دی اور کہا کہ میں نے اسے کہہ دیا ہے، شادی کے بعد ایک بار ضرور اپنے گھر آنا۔وہ اتنا امیر ہے کہ جب وہ آ گیا تو میں اس پورے گراں کا سب سے بڑا چودھری بن جاؤں گا۔وہ ولیت کا افسر ہے۔یہ پھودو پسنجر چودھری اس کا مقابلہ کیسے کر سکتے ہیں۔ اس کی تو ٹور ہی وکھری ہو گی۔ گوری زنانی،افسراں والا سوٹ،لش پش گڈی،سوہنا قد بت،فیشنی قسم کی مُچھ۔ اس کی شان دیکھ کے یہ سارے چول چودھری مجھے سر پر بٹھائیں گے۔پر میں بھی گن گن کے بدلے لوں گا۔۔۔گن گن کے۔۔۔ادھار کیوں رکھوں؟

ایک مدت سے اسے گاؤں والوں نے غیر سرکاری طور پر بے ضرر قسم کا پاگل قرار دیا ہوا تھا اوراپنے آپ کو پاگل ثابت کرنے میں وہ خود بھی کوئی کسر نہیں چھوڑتا تھا۔اور میںخود، اس سنگت سے قبل گاؤں والوں کی طرح اسے پاگل جانتا اور مانتا تھا۔ مگر ڈیڑھ دو ماہ تک اس کے ساتھ اکیلے گپ شپ کے بعد میری سوچ تبدیل ہو گئی تھی۔ صرف ایک غلام علی والے معاملے میں اس پر پاگل پن کا شائبہ ہوتا تھا،باقی وہ بالکل سمجھدار تھا۔ا س کی سمجھ داری کا ثبوت یہ کم تھا کہ اسے قبرستان میں دفن سینکڑوں لوگوں کے نام، شجرے اور تقریباً سال وفات بھی معلوم تھے۔اور قبرستان پر ہی کیا موقوف، گاؤں کی تین چار ہزار آبادی میں شاید ہی کوئی ایسا شخص ہو جسے وہ پہچانتا نہ ہو، اور جس کی سابقہ زندگی بلکہ خاندان کا ریکارڈاسے حفظ نہ ہو۔اتنی توانا یادداشت کا مالک شخص جو کچھ بھی ہو، پاگل ہو سکتا ہے بھلا؟
یوں ہی قبرستان میں گھومتے گھومتے وہ کہنے لگتا:’’حق حیدر، ایہہ مائی بودی ہے۔ جب گاؤں میں مَدَرسہ بنا تھا، اس سال مگھر میں پوری ہوئی تھی۔ ست دن فاجل(فالج)نال اکڑی رہی۔ آٹھویں دن گھوک ہو گئی۔۔۔ حیدری۔اس دے مرن پچھوں اس دا پتر اج تک پنڈ وچ نہیں آیا، کدرے باہر کریچی گیا ہے۔۔۔مست بابا پیرے شاہ غازی دمڑیاں والی سرکار۔‘‘ یا’’یہ بابا سندھو، بنگال سے جب فوجیوں کی لاشیں آئی تھیں، اس کے تین سال بعد مرا تھا۔۔۔ساون میں۔۔۔بارش کی وجہ سے قبر کھودنی بھی اوکھی ہو گئی تھی۔یہاں اونچی جگہ تاڑ کے تمبو لگا کر قبر کھودی گئی تھی۔‘‘

ایسے ہی ایک دن بیٹھے بیٹھے مجھے خیال آیا اور میں نے اس سے پوچھ لیا کہ پاکستان بننے کے وقت وہ کہاں تھا اور اس نے کون کون سے واقعات دیکھے جو سنانے کے قابل ہیں ؟ جواباً اپنے خاص انداز میں بھڑکیں مارتے ہوئے بولا۔

’’اس دن ڈاکو باج خان ریفل ہاتھ میںلے کر نعرہ ماریا۔ اوئے کافرو تے کھتریو اپنا سامان تے کڑیاں چھوڑ کے کافراں دے ملک نس جاؤ۔۔۔نئیں تے سدھے ہو جاؤ۔۔۔پیراں نے پیر غوث پاک قلندر۔۔۔اک کھتری اپنی کڑی کھوہ چ سٹ کے نسیا۔۔۔باج خان نے نعرہ ٔ حیدری یا علی مار کے ساریاں نوں لٹ لیا۔۔۔کھتری نوں کسے نہ چکیا۔۔۔سارے ڈشٹر کھاتے ڈاکواں کھوہ چ سٹ دتے۔ ‘‘

اسی طرح کی بہت سی باتیں۔۔۔ اسے ابھی تک ۱۹۴۷ کے واقعات یاد تھے۔ اسی لیے میرا خیال تھا کہ وہ پاگل وغیرہ بالکل نہیں۔ مسئلہ کوئی اورہے۔

ایک دن خود ہی رواں ہو گیا اور بتانے لگا کہ جوانی میں کس طرح اس کی کڑمائی(منگنی) ہوئی تھی اور اس کی منگ کتنی خوبصورت، کتنی گن وان تھی۔اور کیسے لڑکی والوں نے بعد میں رشتہ توڑ دیا کہ لڑکا نکما ہے، کام کاج نہیں کرتا، اسے رشتہ دے کر لڑکی فاقوں مروانی ہے۔ اس نے پھر بہت زور مارا مگر انہوں نے لڑکی دینی تھی، اور نہ ہی دی۔ ’’بس فیر میں قسم کھا لئی کہ مر جاؤں پر ویاہ نہیں کرنا۔‘‘

’’تو پھر واقعی تم نے ویاہ نہیں کیا؟‘‘
’‘کیوں کرتا۔۔۔؟پورا پاؤ دھنیا گھوٹ کے پی گیا۔ عورت کی لوڑ ہی نہ ہوئی۔‘‘
’’دھنیا،قسم سے۔۔۔!‘‘
’’ہاں، بدام پستہ ملا کے، ٹھنڈا یخ کر کے سواد لے لے کے۔۔۔برف ورگی ٹھنڈ میرے پورے جثے چ دوڑ گئی۔۔۔فیر ویاہ سہاگا کرنا سی۔‘‘
’’تو پھر یہ غلام علی کہاں سے آ گیا؟‘‘
’’اوہ بس۔۔۔ توں سمجھیا کر ناں۔ ایہہ پہلاں دا کم سی۔‘‘
اس بات پر وہ مجھے محض آنکھ مار کر ٹرخا گیا۔

اس کے ساتھ میری بہت عرصہ بنی رہی مگر اسے بہت گہرا نہ جان سکا تھا۔کالج کے بعد میں یونیورسٹی نکل گیا۔ مہینے دو مہینے بعدایک آدھ دن کے لیے گاؤں واپسی ہوتی اوراس دوران میں اس سے بہت کم ہی ملاقات ہو پاتی۔ لیکن اتنا پتا چل جاتا تھا کہ وہ ابھی زندہ ہے اور ویسا ہی ہے۔ ابھی بھی اس نے سات سال، سات ماہ،سات روز بعد عین جمعرات کے دن مرنا ہے۔ ابھی بھی وہ ڈنگروں کے پیچھے اور بچوں کے آگے بھاگتا ہے۔ اور یہ کہ ابھی بھی اسے غلام علی کا انتظار ہے۔ جس دن وہ لوٹ آیا۔۔۔تو پھر۔۔۔

یونیورسٹی میں دیکھتے دیکھتے میرے دوسال گزر گئے۔ان دنوں میں ہاسٹل میں رہ کر مقالہ لکھ رہا تھا کہ میرے ایک دوست نے مجھے فون پر باتوں کے دوران اس کے متعلق یہ خبرسنائی کہ اس کو گاؤں والوں نے قبرستان کی رکھوالی سے فارغ کر دیا ہے اور ہر گھرانے سے ملنے والی گندم اور باجرہ بھی روک دیاگیا ہے۔ اس نے گاؤں کے ایک دو بڑے چودھریوں کی بیویوں کو کہیں راستے میں گالیاں بکی تھیں اور بڑی دیر تک بکی تھیں جس پر پنچایت نے اسے آئندہ کے لیے قبرستان سے فارغ کر دیا۔ میں نے اندازہ لگایا۔ تقریباً نصف صدی اس نے یہ خدمت انجام دی تھی۔ خود اس کی عمر اب یقیناً ۷۰ کے قریب تھی۔ اگر وہ کچھ دن اور یہ کام کرتا رہتا تو آخر کیا ہو جاتا، ویسے بھی سات سال، سات ماہ، سات دن بعد وہ مرنے والا تھا۔ساری زندگی قبرستان سے ڈنگروں کو نکالتا رہا، اب جو قبرستان میں خود اس کے مستقل قیام کے دن آ چکے تھے تو اس کو دھکیل دیا گیاتھا۔ پتا نہیں اس پر کیا گزری ہوگی۔

میں گاؤں واپس آیا تو کافی دنوں تک اس سے ملاقات نہ ہو سکی۔ دوستوں سے سنا کہ اسے قبرستان سے نکالا تو دے دیا گیا ہے مگر اس کا ٹھکانہ اب بھی وہیں ہے، بلکہ اب تو وہ قبرستان سے نکلتا ہی نہیں اور نہ کہیں آتا جاتا ہے۔ اس کا قبرستان سے تعلق اجرت کی وجہ سے تھوڑا ہی تھا۔

ایک دن میں قبرستان گیا تو وہیں ایک قبر کے کتبے کا سہارا لیے پاؤںلمبائے وہ نظر آ گیا۔ پہلے سے بہت کمزور نظر آ رہا تھا۔رخساروں کی ہڈیاںنوکیلی ہو چلی تھیں۔ ہاتھوں پیروں کا چمڑا پھٹے ہوئے غبارے ساہو گیا تھا۔وزن میں کمی واضح محسوس ہوتی تھی۔گندہ بھی پہلے سے زیادہ تھا۔ سب سے بڑی بات کہ مجھے دیکھ کر اس کے چہرے پر جو چمک آ جاتی تھی، اس کی جھلک تک نظر نہ آئی۔ البتہ مجھے پہچان ضرور گیا تھا۔ میں نے اس کی خیریت دریافت کی تو اس نے بڑی نیم دلی سے جواب دیا۔۔۔خدایا۔۔۔ اتنا شکستہ تو وہ اپنا گھر جلنے پر بھی نہ ہوا تھا۔ اب کے چوٹ گہری لگتی تھی۔

’’جب میں مرن لگا ہوں تے مینوں قبرستان چوں کڈھن لگ پئے نیں، قسم مولا علی مشکل کشا حق علی سرکار دی، میں وی نہیں نکلنا۔ ہن میری قبر ہی بنے گی ایتھے۔ میں نئیں جانا ایتھوں غونث پاک۔۔۔ میں نہیں جانا۔‘‘ اس کی آنکھوں سے میں نے پہلی بار آنسو نکلتے دیکھے۔’’اپنے ہاتھوں سے مجھے رکھیں گے یہاں۔۔۔‘‘

’’چل او چاچا۔ ابھی تم نے سات سال، سات مہینے۔۔۔‘‘
’’نئیں۔۔۔ہن میں ست دن وی نہیں رہنا۔‘‘
میں نے اسے غور سے دیکھا۔ واقعی اب اس کے چہرے پر زندگی کے آثار نظر نہیں آرہے تھے۔وہ قبرستان کو چھوڑنے والا لگتانہیں تھا۔ وہ بیٹھا بڑے پیار سے کتبے کو سہلاتا رہا۔میں کافی دیر اس کے پاس خاموش متاسف بیٹھا اسے دیکھتا رہا۔پھر میں نے اس کو حوصلہ دینے کے لیے اس کے پتر کا ذکر چھیڑنا چاہا۔
’’تم ایسے کرو۔ اب غلام علی کے پاس چلے جاؤ۔‘‘
ایک چھناکا ہوا’’کون ماں دا خصم غلاملی۔۔۔اوہ سب ڈراما ہے۔۔۔ کوئی غلاملی نہیں۔۔۔ ‘‘ پھر وہ چاروں طرف موجود قبروں کی طرف اشارہ کر کے رندھا ہوا بولا:’’میرے غلاملی تے ایہہ سارے نیں۔‘‘

وہ بلک بلک کے رونے لگا اور میں اس کی آنکھوں سے امڈتی ہوئی پدرانہ شفقت کو حیرانی سے دیکھتارہا۔اس کے ہاتھ قبر کے کتبے پہ یوں سرک رہے تھے جیسے بیٹے کے سر پہ ہاتھ پھیر کر اسے دلاسہ دینے کے بہانے خود اپنے آپ کوتسلی دے رہا ہو۔