Tag: داعش

روس شام میں داعش کے خلاف محاذ کا حصہ بن چکا ہے۔ عالمی میڈیا پر روس کو لے کر دو طرح کی بحث دیکھنے کو ملتی ہے؛ ایک تو یہ کہ روس داعش سے زیاد ہ بشارالاسد کو مضبوط کرنے کے لیے اس کے مخالف باغیوں کو نشانہ بنا رہا ہے اور چونکہ یہ باغی داعِش کے خلاف بھی برسرِ پیکار ہیں سو اِنہیں کمزور کرنے سے داعِش مضبوط ہوسکتی ہے اور اِس سے یہ تاثر بھی دیا جا رہا ہے کہ یوں اس طرح کے آپریشن سے لوگ زیادہ متنفر ہو سکتے ہیں اور انتہا پسندی میں اضافہ ہو سکتا ہے۔ یہ خد شہ امریکہ اور اس کے حامیوں کی طرف سے ظاہر کیا جا رہا ہے۔ دوسرا نقطہ نظر یہ ہے کہ امریکہ اور اس کے حامیوں کی طرف سے کئی سالوں سے جاری کارروائیوں کی نسبت روس کی جانِب سے کی گئی کاروائی نے داعش کو زیادہ نقصان پہنچایا ہے اور ماسکو آ نے والے دنوں میں بشارالاسد اور اس کے حامیوں کو شام میں ایک اچھی حکومت چلانے کے لیے کسی دوسرے گروہ یا شخص سے زیادہ منا سب سمجھتا ہے۔ مگر امریکہ کی جنگی حکمتِ عملی اور رویہ ہمیشہ روس سے مختلف رہا ہے۔ وہ نہ تو اپنی سر زمین پہ جنگ چاہتا ہے اور نہ کبھی ہونے دیتا ہے۔ جب امریکہ کو کسی مضبوط ریاست سے کسی قسم کا خطرہ ہوتا ہے وہ اس کے کمزور ہمسائے کے ساتھ یا تو سفارتی تعلقات بناتا ہے یا پھر عسکری تعلقات استوار کرتا ہے۔ امریکہ ہمیشہ کسی خطے میں ویسی حکومت چاہتا ہے جیسی وہاں موجود اس کے سیاسی دوست چاہتے ہیں۔ وسطی ایشیا اور جنوبی ایشیا میں ابھرتی ہوئی معیشت چین کو مات دینے کے لیے امریکہ وہاں قدم جمانا چاہتا تھا مگر وسطی ایشیا پہ ایران کے ساتھ سیاسی اختلافات ہونے کی وجہ سے اس نے افغانستان میں اپنی پسند کی حکومتیں لانے کی کوشش کی تا کہ وسطی ایشیا میں کسی بھی صورتِ حال سے نمٹنے کے لیے وہاں فوج موجود ہو۔ امریکہ افغانِستان میں عین ویسی حکومت کا خواہاں ہے جیسی خظے میں موجود اس کے سیاسی حلیف پاکِستان اور بھارت چاہتے ہیں۔

امریکی سفارتی حکمت عملی میں دیگر ممالک میں عسکری مداخلت نہایت اہم ہے۔ دنیا کے مختلف ممالک میں سیاسی اور معاشی مفادات کے تحت امریکہ کی براہ راست مداخلت کی تاریخ طویل ہے اور یہ سلسلہ دوسری جنگ عظیم کے بعد سے جاری ہے۔ عراق اور افغانستان کے بعد بظاہر امریکہ پاکستان کے بعض علاقوں میں میں بھی براہِ راست عسکری مداخلت چاہتا تھا تا کہ افغانستان میں اپنے فوجیوں اور تنصیبات کو محفوظ بنا سکے مگر اس وقت کی پاکِستانی قیادت اس سے نا خوش تھی سو وہ براہِ راست مداخلت نہ کر سکا۔ دہشت گردی کے خلاف طویل جنگ کے دوران پاکستان کو اتحادی بنائے رکھنے کے بعد اب امریکہ نے ہندوستان کو خطے میں اپنے حلیف کے طور پر دیکھنا شروع کردیا ہے جس کی وجہ سے پاکستان نے امریکہ کی بجائے چین پر اپنا انحصار بڑھا دیا ہے۔ اوبامہ نے خود بھارت کا دورہ کیا اور کئی معاہدوں پر دستخط کیے۔

دیگر سامراجی طاقتوں برطانیہ اور فرانس کی طرح امریکہ بھی مذہب کو اپنے لیے کار گر حربہ سمجھتا ہے۔ اَسّی کی دہائی میں روس کے بڑھتے ہوئے اثرات کے پیش نظر امریکہ نے افغانستان میں نجیب حکومت گرانے کے لیے یہاں مذہب کی بنیاد پر مزاحمت کی سرپرستی شروع کی۔ لوگوں کو مذہب کے نام پر انتہا پسند بنا کر پاکستان اور سعودی عرب کی مدد سے مجاہدین بنائے گئے تاکہ ایک تو خطے میں بڑھتے ہوئے روسی اثرورسوخ روکا جا سکے اور آنے والے دنوں میں یہاں پر اپنی موجودگی کے لیے کوئی جواز تراشا جا سکے۔

مشرقِ وسطیٰ کے موجودہ صورتِ حال پر نگاہ ڈالنے سے پتہ چلتا ہے کہ شام اور عراق میں امریکہ بالکل ویسی حکومت چاہتا ہے جیسی وہاں موجود اس کے حامی ترکی، اِسرائیل اور سعودی عرب چاہتے ہیں۔ بدقسمتی سے امریکہ حلیف بھی اب امریکی طرز پر اپنے مفادات کے حصول کے لیے عسکریت پسند گروہوں کی سرپرستی اور براہ راست مداخلت کی راہ اپنا چکے ہیں ۔ شام اور عراق میں امریکی و سعودی مداخلت کے باعث شیعہ، سنی تصادم میں اضافہ ہوا ہے۔ امریکی خارجہ پالیسی اور مداخلت کے باعث مشرق وسطیٰ میں پیدا ہونے والے سیاسی خلا سے فائدہ اٹھاتے ہوئے وہاں النصرہ فرنٹ، القاعدہ اور داعش جیسی مذہبی تنظیموں نے قدم جما لیے ہیں۔ ان تنظیموں کی وجہ سے مشرق وسطیٰ خانہ جنگی کے دہانے پر پہنچ چکا ہے۔ دہشت گردی کے خلاف جنگ کے دوران افغانستان اور عراق میں امریکی اور اتحادی افواج کی مداخلت سے دنیا میں عسکریت پسندی میں اضافہ ہوا ہے ۔ امریکی حکمت عملی مختلف وجوہ کی بناء پر ناکام ہوئی ہے اور القاعدہ سے زیادہ خوفناک تنظیموں کی شکل میں نئے عفریت سامنے آئے ہیں۔

داعش کے خلاف امریکہ اور اتحادیوں کی کارروائیاں غیرموثر رہی ہیں کیوں کہ امریکی حکام شام اور عراق میں اپنے مفادات کے تحت مخصوص گروہوں کو نشانہ بناتے رہے ہیں۔ امریکہ نے جو ہتھیار شامی باغیوں کے حوالے کیے تھے وہ بھی داعش کے ہاتھ لگنے کی اطلاعات سامنے آئی ہیں۔ داعش کے خلاف سب سے موثر مزاحمت کردِش آرمی پیش مر گہ کی جانب سے کی جارہی ہے لیکن امریکہ کی جانب سے انہیں ہتھیار فراہم کرنے یا تربیت دینے کے کوئی انتظامات نہیں کیے گئے اور اور نہ ہی امریکہ کے کسی سیاسی یا عسکری حلیف کی طرف سے انہیں کوئی کمک حاصل ہے۔ امریکہ کو خدشہ ہے کہ ایسا کرنے سے کرد مزاحمت کار مضبوط ہوسکتے ہیں اور قوم پرست پیش مرگہ ترکی میں اردگان کے لیے سردرد بن سکتے ہیں۔ ترکی پیش مرگہ کو اس وقت بھی نشانہ بناتا ہے جب وہ کوبانی میں داعش کے خلاف جان کی بازی لگا کر زندگی اور موت کی جنگ لڑ رہے ہیں۔ یوں یہ تاثر بھی عام ہے کہ ترکی شمالی کردستان میں داعش کو مضبوط دیکھنا چاہتا ہے کرد علاقوں میں اپنی فوج استعمال کرسکے۔

شامی خانہ جنگی اور یمنی جنگ میں امریکہ اور اس کے اتحادیوں کا کردار تخریبی رہا ہے۔ یہ بات امریکہ کے لیے قطعی ناقابلِ قبول ہے کہ امریکی اتحادی ممالک میں ایسی حکومتیں آئیں جو امریکی مفادات کے خلاف ہوں یہی وجہ ہے کہ امریکہ اپنے حلیف ممالک میں آمروں اور انسانی حقوق کی خلاف ورزیوں کو نظرانداز کرتا آیا ہے ۔ اس طرزعمل نے عالمی امن کو خطرات سے دوچار کیا ہے اور مسلح عسکریت پسندی کو عام کیا ہے۔ اگر امریکہ واقعی مشرقِ وسطٰی میں داعش اور دیگر انتہا پسندوں کا خاتمہ چاہتا ہے تو اسے روس، عراق اور ایران کے ساتھ مل کر کام کرنا ہو گا۔ امریکہ کو ترکی اور سعودی عرب جیسے اپنے حلیفوں کے مفادات کو پسِ پشت رکھتے ہوئے عالمی اتفاق رائے کے قیام کے لیے کوشش کرنا ہوگی۔ امریکہ اور سعودی عرب کو چاہیے کہ وہ مشرق وسطیٰ میں نجی ملیشیاز اور جہادی گروہوں کو اپنے مفادات کے لیے استعمال کرنے کی روش ترک کر دیں نہیں تو آنے والے دِنوں میں پاکستان کی طرح اس کا خمیازہ ان ممالک کو بھگتنا پڑ سکتا ہے۔

سولہ دسمبر کا دن ہمارے لئے قیامت صغریٰ ہی تو تھااس رات ایسی کوئی آنکھ نہ ہوگی جو اشکبار نہ ہو۔ سولہ دسمبر کا دن پاکستان کی تاریخ کا سیاہ ترین دن رہا ہے اور اب اس کی سیاہی مزید گہری ہوگئی۔ جو ایک سو تیس معصوم جانیں چھین لی گئیں، خدا انکے والدین کو صبر عطا کرے لیکن وہ سینکڑوں جو بچ گۓ انکی زندگی شاید پھر کبھی نارمل نہ ہوپاۓ، اپنے ساتھیوں کی قبروں کی مٹی اور خون آلود لاشے تمام عمر ان کے دلوں میں تازہ رہیں گے۔سولہ دسمبر کی رات ہم سب نے شدید اذیت میں گزاری ہے،سب افسردہ تھے، غمگین تھے اور صدمے کی کیفیت میں تھےلیکن سب سے غالب عنصر لاچارگی کا تھا۔ ہم سب کو اس وقت اپنی بیچارگی پر سخت غصّہ تھا، ہم سب ہی سوچنے سمجھنے کی صلاحیت سے تقریباً محروم تھے لیکن آج ہمیں ٹھنڈے دل و دماغ سے حالات کا جائزہ لینے کی ضرورت ہے۔ حملہ کے بعد سے اب تک یہ سب شمالی وزیرستان میں ہونے والی فوجی کارروائیوں کا نتیجہ ہے، آرمی اسکول پر طالبانی حملہ دراصل انتقامی کارروائی ہے لیکن یہ سوچنا ضروری ہے کہ کیا واقعی ایسا ہی ہے؟
ذرا غور کریں کیا اس سے پہلے پاکستان میں تخریبی کارروائیوں میں بچے ہلاک نہیں ہوۓ؟ آل سینٹس چرچ، پشاور پر خودکش حملے میں ہلاک ہونے والوں میں ایک بڑی تعداد بچوں کی بھی تھی جو وہاں اپنے والدین کے ساتھ عبادت کرنے آۓ تھے۔ہزارہ برادری اور شیعہ زائرین پر ہونے والے حملوں میں بھی بچوں کو نشانہ بنایا جاتا رہے ہیں لیکن ان حملوں میں ہلاک ہونے والے بچوں کی حیثیت ہمارے لیے محض ایک اخباری خبر کی سی ہوتی ہے۔

رواں سال اکتوبر میں عید الاضحٰی کے موقع پر طالبان کے ترجمان شاہد اللہ شاہد نے داعش کے ساتھ حمایت کا اعلان کیا تھا، اس اعلان میں داعش کو بھائی کہہ کر مخاطب کرتے ہوۓ ترجمان طالبان نے تنظیم کو اسکی کامیابیوں پر مبارکباد دی تھی اور بھرپور حمایت کا اعلان بھی کیاتھا۔ طالبان کی طرف سے داعش کی حمایت کا بعد ملک بھر میں داعش کی حمایت میں وال چاکنگ کا سلسلہ سا چل نکلا تھا اور پاکستان میں داعش کی موجودگی کی خبریں ذرائع ابلاغ میں گردش کرنے لگی تھیں۔
ضرب عضب کے آغاز سے اب تک پاکستانی طالبان (جنہیں خطّے کی ایک خطرناک طاقت سمجھا جانے لگا تھا) کی مقبولیت میں خاطر خواہ کمی دیکھنے میں آئی ہے،ان کا نیٹ ورک کم زورہوا ہےاسی لیے انتہا پسند جنگجو، القاعدہ کی بجائےداعش کی جانب راغب ہوئے ہیں- داعش میں شمولیت سےشدت پسندوں کو اپنا سابقہ اثرورسوخ بحال کرنے میں مدد ملنے کی امیدہے۔ داعش کی قیادت، القاعدہ اور طالبان کی طرح بوڑھی اور محتاط نہیں ہے، ان کے پاس بہترین پروپیگنڈا مشینری اور سفاک ترین قاتل موجود ہیں- داعش ذرائع ابلاغ اور سوشل میڈیا کی طاقت سے بھی اچھی طرح واقف ہے اورسماجی رابطوں کی ویب سائٹس پر اس تنظیم کی فعال موجودگی سے یوں محسوس ہوتا ہے کہ القاعدہ کے برعکس داعش اپنے نظریات اور کارروائیوں کی سفاکیت چھپانے میں دلچسپی نہیں رکھتی۔ داعش کے پاس وہ سب کچھ ہے جو انتہا پسند جنگجوؤں کے لئے کشش کا باعث ہے؛ نقل و حرکت کی آزادی، قتل و غارتگری کی آزادی،وسائل کی فراوانی اور نظریاتی مماثلت، یہ چیزیں القاعدہ اور طالبان میں شامل نچلے درجے کے جنگجوؤں کو میسر نہیں اور یہی وجہ ہے کہ نئی نسل کے انتہا پسند داعش کی طرف زیادہ مائل ہیں اور بڑی تیزی کے ساتھ اس تنظیم میں شمولیت اختیار کر رہے ہیں۔
پشاور سانحہ سے دوروز قبل، آسٹریلیا کے شہر سڈنی میں ایک کیفے کو یرغمال بنانے والا ایرانی شخص ہارون مونس، داعش کی حمایت حاصل کرنا چاہتا تھا- اسی طرح پچھلے دنوں انڈیا میں گرفتار کیا جاے والا ‘شامی وٹنس’ بھی داعش کا ہی پرستار تھا۔اخباری اطلاعات کے مطابق اب تک طالبان کے کے کم از کم چھ گروہ داعش سے الحاق کر چکے ہیں۔ داعش کی شدت پسند جہادی تنظیموں میں بڑھتی ہوئی مقبولیت کے پیش نظر ہی رواں برس ستمبر میں القاعدہ نے مقامی جہادی گروہوں کو اپنی جانب متوجہ کرنے کے لیے اپنی مقامی شاخ کا اعلان کیا تھا۔مشکل یہ ہے کہ طالبان، ملا عمر کو اپنا امیر مانتے ہیں اور القاعدہ سے وابستگی رکھتے ہیں، داعش سے وابستہ ہوکر وہ اپنے امیر سے غدّاری کے مرتکب نہیں ہوسکتے ہاں البتہ داعیش کی طرف دوستی کا ہاتھ ضرور بڑھا سکتے ہیں۔
داعش اور القاعدہ کے بیچ جنوبی ایشیاء کے کروڑوں مسلمانوں پر اپنا اثر و رسوخ قائم کرنے کے لئے مسلسل رسہ کشی جاری ہے،طالبان نے داعش کی جانب دوستی کا ہاتھ بڑھا کر ایک طرح سے اس تنظیم کو پاکستان میں اپنی خدمات کی پیشکش کی ہیں اور پشاور آرمی سکول پر حملہ کو داعش کی حمایت حاصل کرنے کی ایک کوشش بھی قرار دیا جا سکتا ہے۔پشاور سانحہ کے پیچھے طالبان کے اصل عزائم صاف نظر آتے ہیں۔ یہ کارروائی آرمی سے بدلہ لینے کے ساتھ ساتھ داعش کو اپنی صلاحیتوں سے واقف کرانے کا ایک ذریعہ بھی تھی۔ یہ امر بھی قابل غور ہے کہ اسکول کو محض اس کے ایک کمزور ٹارگٹ ہونے کی وجہ سے ہی منتخب نہیں کیا گیا تھا، اس حملے کا ماسٹر مائنڈ اچھی طرح جانتا تھا کہ آرمی اسکول میں ایک بار اندر گھس جانے کے بعد حملہ آوروں کا زندہ باہر نکلنا ناممکن ہے،اس لئے یرغمالی کارروائی کی بجاۓ ، مارو اور مرجاؤ کا منصوبہ تشکیل دیا گیا۔

محض فوج سے بدلہ لینے کے لیے خودکش حملے یا بم دھماکے بھی استعمال کیے جاسکتے تھے اور چھٹی کے وقت خودکش حملہ کرنے کا منصوبہ بھی تیار کیا جا سکتا تھا،لیکن اس طرح اصل داعش تک اپنی وفاداری اور اہلیت کا پیغام ٹھیک طرح پہنچانا ممکن نہ تھا اس لئےداعش کی طرز پر چن چن کر بچوں کو قتل کرنے کا منصوبہ بنایا گیا۔اور وہی ہوا معصوم جانوں کا قتل کر کے طالبان نے یہ ثابت کردیا ہے کہ وہ بھی داعش کی طرح سفّاک قاتل ہیں اور ان کے دلوں میں رحم نام کی کوئی چیز نہیں، ٹھیک داعش ہی کی طرح اپنے مکروہ عمل کو جائز قرار دینے کے لئے اسلامی تاریخ سے واقعات کو سیاق وسباق سے ہٹا کر اور مسخ کر کے جواز بھی پیش کیا گیا ہے۔
طالبان بخوبی واقف تھے کہ اس حملہ کے نتیجے میں پاکستان کی جانب سے فوجی آپریشن نہ صرف تیز ہوگا بلکہ عوامی حمایت میں بھی نمایا کمی ہو گی لیکن اس کے باوجود اس حملہ کا کیا جانا اور اس میں ازبک جنگجووں کی شمولیت یہ ظاہر کرنے کے لیے کافی ہے کہ پاکستانی طالبان اب افغان طالبان اور القاعدہ کی جگہ د اعش کی جانب حمایت کے لیے دیکھ رہے ہیں۔ پشاور حملہ ضرب عضب کا بدلہ لینے کے ساتھ داعش کی حمایت حاصل کرنے کی ایک کوشش بھی ہے۔دوسری جانب انہوں نے اپنے آقاؤں کی آنکھوں پر یہ کہہ کر پردہ ڈال دیا ہے کہ یہ حملہ ضرب عضب کے خلاف انتقامی کارروائی ہے- لیکن سوال یہ ہے کہ اگر واقعی یہ محض انتقامی کارروائی ہے تو افغان طالبان اتنے برہم کیوں ہیں پشاور سانحہ پر افغان طالبان کی برہمی صاف بتا رہی ہے کہ جو کچھ ہم خبروں اور تجزیوں میں سن رہے ہیں وہ مکمل سچ نہیں، افغان طالبان بھی ہوا کا رخ دیکھ رہے ہیں اور یہ جان گۓ ہیں کہ آپریشن ضرب عضب کے نتیجے میں پاکستانی طالبان کا جھکاؤ داعش کی طرف ہوچکا ہے اور یہ سب کچھ خود کو داعش کا منظورنظر بنانے کی کوشش ہے۔

فٹ بال کے عالمی مقابلے اور شمالی وزیر ستان آپریشن نیز علامہ طاہر القا دری ایسی بلند قامت دیواروں کے پیچھے جو واقعہ ہماری نظروں سے مسلسل اوجھل ہو رہا ہے وہ ہے عراق کا بحران اور بین الاقو امی سیاسی منظر نامے میں اس کی غیر معمولی اہمیت۔ داعش کی برق رفتار فتوحات اور بغداد کے گرد ہر گزرتے دن کے ساتھ تنگ ہونے والا گھیرا یہ سمجھنے کو کافی ہے کہ عالمی سیاست کا دھارا اب مشرق وسطیٰ کا رخ کر چکا ہے۔ داعش بنیادی طور پر اسلامی شدت پسند جنگجوؤں کا ایسا جتھہ ہے جو عراق ، شام ، لبنان اور بعد ازاں ترکی کے علاقوں پر مشتمل اسلامی خلافت کے قیام کے لئے لڑائی کر رہے ہیں۔2003 سے متحرک اس گروہ نے اس سال کے اوائل میں القا عدہ سے علیحدگی کا اعلان کرنے کے بعد اپنے طور پر سرگرمیوں کا آغاز کیا۔ اس کے موجودہ امیر ابوبکر البغدادی ہیں جو عراق پر امریکی قبضے کے دوران قید میں بھی رہے۔ البغدادی نے بغداد یونیورسٹی سے ڈاکٹریٹ کی ڈگری لے رکھی ہے اور ان کے بارے میں کہا جاتا ہے کہ وہ اعلیٰ جنگی حکمت کے مالک ہیں۔

داعش کو کچھ لوگ عراق کے طالبان سمجھتے ہیں جو میرے خیال میں کچھ زیادہ درست نہیں ہے۔ صدام حسین کی برطرفی کے بعد عراق میں دبے ہوۓ شیعہ سنی مسئلے کا ابھر آنا داعش کی سرگرمیوں کو بڑھاوا ملنے کی ایک اہم وجہ ہے جو پاکستانی طالبان کے معاملے میں نہیں ہے۔ عراق کے موجود وزیر اعظم المالکی پر لگنے والے الزامات کہ وہ سنی اقلیت کے ساتھ تعصب کا رویہ رکھتے ہیں اور انہیں حکومت میں مناسب نمائندگی نہیں دی گئی۔ نیز عراق کے اندرونی معاملات میں ایران کا حد سے بڑھتا ہوا کردار بھی معاملے کو مزید گنجلک بنا دیتا ہے۔ چنانچہ عراقی سنی آبادی میں پائی جانی سیاسی محرومی سے بھرپور فائدہ اٹھاتے ہوۓ داعش ان سب کو حکومت مخالف محاذ میں اکٹھا کرنے میں کامیاب رہی ہے۔ اگرچہ سنی آبادی کا ایک معقول حصہ اب بھی داعش سے اشتراک کا قائل نہیں ہے مگر عراقی سرکاری افواج کی داعش سے مسلسل شکستوں کے بعد جب آیت اللہ سیستانی کی جانب سے شیعہ عوام سے یہ کہا گیا کہ وہ رضا کارانہ طور پر داعش کے خلاف لڑنے میں حکومت کا ساتھ دیں اور پھر مقتدیٰ الصدر کے فرمان پر مہدی آرمی کی بغداد میں فوجی پریڈ ایسے عوامل ہیں جنہوں نے عراقی سنی عوام میں یہ خدشہ پیدا کر دیا ہے کہ ان کی بقا داعش کے ساتھ ملنے میں ہے۔ عراقی کردستان میں بغداد سے آنے والے سنی مہاجرین نے ایک صحافی کو یہ بتایا کہ ان کا المیہ یہ ہے کہ ان کے پاس عراقی حکومت یا داعش کے علاوہ کوئی تیسرا امکان نہیں بچا۔ آپ اس بیان سے مسئلے کی پیچیدگی کا اندازہ لگا سکتے ہیں۔ ملک کی سب سے بڑی آئل ریفائنری اور شام اور اردن کی سرحدی چوکیوں کے بعد اب داعش بغداد سے محض ایک گھنٹے کی دوری پر ہے اور شاید بغداد پر حملے سے بھی پہلے داعش حدیثیہ کے ڈیم پر قبضہ کرنے کی کوشش کرے گی اور ایسی کسی بھی کوشش کے نتیجے میں عراق کی جنگ اپنے سنجیدہ اور خطرناک ترین حصے میں داخل ہو جاۓ گی۔

کہا جاتا ہے کہ داعش میں صدام دور کے کئی فوجی افسران بھی شامل ہیں جنہوں سے بعث پارٹی کی حکومت کے دنوں میں سوویت یونین سے فوجی تربیت حاصل کی تھی اور داعش کی جنگی کامیابیوں میں ان افسران کا اہم کردار ہے۔ چند روسی تجزیہ کار اس امر کو فخریہ انداز میں جارجیا میں امریکی تربیت یافتہ افواج کی روسی فوج سے شکست کے ساتھ جوڑ کر دیکھتے ہیں۔ جو چیز عراقی بحران کو شام کے بحران سے جدا کرتی ہے وہ صدام دور میں حکومتی سطح پر غالب رہنے والا سنی مسلمانوں کا وہ طبقہ ہے جسے صدام کے بعد عراقی منظر نامے سے غائب کر دیا گیا تھا جبکہ شام میں طویل عرصے سے کوئی سنی حکومت رہی ہی نہیں۔ شام اور عراق کے مسئلے کو اس انداز میں بھی جدا جدا دیکھا جا سکتا ہے کہ عراق میں داعش کے خلاف امریکہ اب تک عراق کا ایک محتاط اتحادی ہے جبکہ شام میں یہی امریکہ داعش اور اس جیسے دیگر حکومت مخالف دھڑوں کی حمایت میں سرگرم ہے۔ امریکی صدر کی جانب سے کانگریس سے 50 کروڑ ڈالر کی رقم کا مطالبہ کیا گیا ہے جو شام میں قابلِ اعتماد باغیوں کی مدد میں استعمال ہو گی۔ اس امر کے امکانات بہت کم ہیں کہ امداد کی یہ رقم شفاف طریقے سے تقسیم کی جاسکے گی۔ امریکی حکومت نے عراق کے بارہا مطالبے کے باوجود اب تک عراق میں داعش کے ٹھکانوں پر فضائی کاروائی نہیں کی جبکہ شام کی جانب سے عراق میں داعش پر بمباری اور روس کی جانب سے عراقی حکومت کو جنگی طیاروں کی کھیپ دئیے جانے کا عندیہ داضح طور پر بتا رہا ہے کہ امریکہ عراق میں داعش کے خلاف کھل کر فوجی کاروائی نہیں کرے گا اور بشار الاسد اور روس کا دیرینہ اتحاد عراق میں المالکی حکومت اور ایران کے اتحاد سے مل کر داعش کا مقابلہ کرنے کی کوشش کرے گا۔ اس صورت حال میں یہ واضح ہے کہ امریکہ شام کے بحران کے تناظر میں ہی عراق میں کاروائی کرے گا۔ ایران کا امریکہ سے عراقی مسئلے پر متوقع اشتراک ایران کے سپریم لیڈر کی جانب سے امریکہ مخالف بیان کی وجہ سے تقریباً کھٹائی میں پڑ چکا ہے۔ مگر آیت اللہ کا یہ بیان کوئی رسمی بیان نہیں تھا۔ انہوں نے کہا کہ امریکہ المالکی کی جگہ عراق میں اپنی پٹھو حکومت قائم کرنا چاہتا ہے۔ شاید ایران کو یہ احساس ہو چکا ہے کہ عراق میں امریکہ کی کاروائی شام کے بحران کو سامنے رکھے بغیر ممکن نہیں جہاں امریکہ اور ایران ایک دوسرے کے شدید مخالف ہیں۔ نیز ایران یہ بھی جان چکا ہے کہ عراق میں امریکہ کسی بھی کاروائی کو حکومت میں سنی نمائندگی سے مشروط رکھنا چاہے گا جو مستقبل میں عراق میں ایرانی مفادات کے حق میں نہیں ہے۔ بغداد میں القدس فورس کے چیف سمیت ایرانی فوجی مشیروں کی موجودگی اس بات کا پتہ دیتی ہے کہ ” تہران عالمِ مشرق کا جنیوا بننے” کا خواب تنہا پورا کرنا چاہتا ہے ۔ لیکن ایران کی حالیہ پالیسی عراق میں شیعہ سنی مسئلے کو بڑھاوا ہی دیتی آئی ہے اور اب خبر ہے کہ ہندوستان سے بھی شیعہ رضاکار عراق کی جنگ کا حصہ بننے کا تیار ہیں۔

ہمارے لئے اس تمام بحران میں جو شے سب سے زیادہ قابلِ غور ہے وہ مسلم ممالک میں جمہوریت کی مسلسل ناکامی اور اس کی بڑی وجہ حکومتوں کا مذہبی ہونا ہے۔ تباہ حال عراقی شہری یہ گلہ بھی کرتے ہیں کہ صدام کے دور میں کم ازکم سیکورٹی کے ایسے سنگین مسائل تو نہیں تھے جو امریکی حملے کے نتیجے میں پیدا ہونے والی جمہوریت میں ہیں۔ مسلم ممالک کو یہ جان لینا چائیے کہ جمہوریت کی کامیابی سیکولرازم اپناۓ بغیر ممکن نہیں ہے۔ جب عوام ہی حکومت کا چناؤ کرتے ہوں تو طاقت کا سر چشمہ بھی عوام کو ہی ہونا چائیے ناکہ کسی مذہبی عقیدے یا مافوق الفطرت خدا کو۔ عراق کا یہ مسئلہ کبھی پیدا ہی نہ ہوتا اگر عقیدے کی بنا پر عوام کو طبقات میں تقسیم نہ کیا گیا ہوتا۔ مسلم ممالک بشمول پاکستان میں ہم آسانی سے دیکھ سکتے ہیں کہ جمہوریت اور مذہب کو جوڑ کر حکومت چلانے کے تجربے اکثر اسی بنا پر ناکام ہوۓ ہیں کہ جمہوریت تمام شہریوں کو ان کی شہریت کی بنیاد پر مساوی سمجھتی ہے جب کہ مذہب عوام کی ایسی تقسیم کا قائل ہے جو عقیدے کی بنیاد پر ہو۔ یہ واضح تناقض مسلم جمہوریتوں کی ناکامی اور سیکورٹی مسائل نیز بار بار کے مارشل لا ء کی بڑی وجہ ہے۔