میری زندگی کا شیزوفرینیا
مجھے مسلسل ایک جیسی زندگی گزارنے نہیں دیتا
ایک ایسی زندگی
جس میں میں چاہوں تو
لوگوں کو جوتے کی نوک پر رکھوں
سب سے ملنا چھوڑ دوں
سچ بول بول کر لوگوں سے تعلقات توڑ لوں
نظموں کی برسات میں بیٹھی بھیگتی رہوں
لیکن افسوس
میری زندگی کا شیزوفرینیا
ناقابل یقین انداز سے
غائب کر دیتا ہے
ہر لمحے میں چھپی بے شمار نظمیں
اور مجبور کر دیتا ہے مجھے
اپنی کہی باتوں پر شرمندہ ہونے کے لیے
ایک طویل بے حد طویل عرصے تک کے لیے
حتیٰ کہ ناامیدی قدم اکھاڑنے کے قریب ہوتی ہے
تو مجھے بچانے کے لیے
زندگی لے لیتی ہے
ایک شیزوفرینک کروٹ
Image: Henrietta Harris
