Category: خصوصی

ائیر کموڈور بلونت کمار داس

میجر جنرل جیولین پیٹر

میجر جنرل افتخار جنجوعہ

لیفٹننٹ جنرل عبدالعلی ملک

ائر وائس مارشل ایرک گورڈن ہال

ائر وائس مارشل مائیکل جان اوبرائن

ائر مارشل ظفر احمد چوہدری

ائر کموڈور نذیر لطیف

سکواڈرن لیڈر پیٹر کرسٹی

ونگ کمانڈر میروِن لیزلی مڈل کوٹ

گروپ کیپٹن سیسل چوہدری

میجرجنرل کیزاد سپاری والا

میجر جنرل نوئیل اسرائیل کھوکھر

فلائٹ لیفٹننٹ الفریڈ جگ جیون

شہید سیکنڈ لیفٹننٹ ڈینئل عطارد

کیپٹن ہرچرن سنگھ

رانا عرفان

ضیا الحق کی موت کے ساتھ اس کا گیارہ سالہ دور ختم ہوئے کئی دن ہو چکے تھے اور ابھی تک مساجد میں جمعہ کے خطبوں میں اس کے فضائل پر مشتمل دھواں دھار تقریروں کا سلسلہ جاری تھا۔ جہادی تنظیمیں اب بھی ہمارے شہر میں برابر سرگرم تھیں۔ لٹریچر اور جوشیلے ترانوں والی کیسٹوں کی تقسیم، جہادی مظاہرے، اسلحے کی نمائش اور تقریروں، خطبوں میں کمی آنے کی بجائے یہ سلسلہ کچھ تیز ہوتا نظر آ رہا تھا۔
میرا تعلق چنیوٹ کے ایک سخت گیر مذہبی گھرانے سے ہے جو اس وقت کی ایک نوزائیدہ فرقہ پرست کالعدم تنظیم کا شدید حامی خاندان تھا۔ اس پس منظر کی وجہ سے مجھے مخالف فرقوں کے خلاف متشدد جذبات رکھنے کے لیے بڑی حد تک گھر میں ہی موزوں فضا میسر آ گئی تھی۔ مذہبی مزاج کا یہی انتہا پسند پہلو آگے جا کر میری زندگی کے ایک بڑے حصے کوایک نہایت بے سمت سفر میں دھکیلنے والا تھا۔میں اس وقت کالج میں زیرِ تعلیم تھا اور بجا طور پر اس وقت کے نوجوانوں میں گردش کرنے والے تشدد پسند لٹریچر سے ازحد متاثر بھی تھا۔ گلی محلوں میں آ کر جہاد کی تبلیغ کرنے والے سبھی اجنبی چہروں سے مانوسیت ہو چکی تھی اور میں نے ان کے مقامی اجتماعات اور محافل میں جانا شروع کر دیا تھا۔ روایات صالحات کے مسلسل اعادے سے ہمیں یہ تو باور کروا دیا گیا تھا کہ اسلحہ مومن کا زیور ہے، ساتھ میں ان اجتماعات میں جدید اسلحے کی سرِ عام نمائشیں ہمیں یہ زیور پہننے کے لیے للچاتی اور لبھاتی بھی رہتیں۔ میرے یہ نئے دوست پر امن تبلیغی مہمات اور تبلیغی گروہوں کی شدید مخالفت اور مذمت کرتے ہوئے ہمیں پر جوش جہادی ترانوں کی دھن پر “عملی قدم” اٹھانے کی تلقین کیا کرتے تھے، اور ہم ان تعلیمات کو ان اجتماعات سے ازبر کر کے اپنے اقارب میں آ کر ان تعلیمات کا اعادہ کرتے۔ شہر کے عام لوگوں میں بھی اب اخلاقی قدریں بڑی حد تک بدل رہی تھیں۔ میرے جو دوست میری تبلیغ کے باوجود نماز کے لیے باقاعدگی سے مسجد میں نہیں پائے جاتے تھے، میں نے ان سے قطع تعلق کر لیا۔روز مرہ معاملات میں ملنے جلنے والےلوگوں سے تعلقات رکھنے یا نہ رکھنے کے لیے میں نے تقویٰ کے ایک ذاتی معیار کو پیمانہ بنا لیا۔ اب مجھے اپنی باتوں پر کان نہ دھرنے والے لوگ دوزخ کا ایندھن اور جانوروں سے بدتر مخلوق نظر آنے لگے تھے۔ میرا حلقۂ احباب ایک طرف سے سکڑ رہا تھا، جبکہ دوسری طرف میں آئے روز نئے “نورانی” چہروں سے متعارف ہو رہا تھا۔
چنیوٹ میں آئے روز مختلف گروہوں کے زیر اہتمام جہاد کانفرنسیں منعقد ہو رہی تھیں، اور میں بھی تمام تعلیمی مصروفیات سے ترجیحی طور پر وقت نکال کر ان اجتماعوں میں شریک ہوتا رہا۔ کشمیر اور افغانستان کے میدانوں سے آئے ہوئے مجاہدین اپنی تقریروں میں جوشیلے جملوں کے ساتھ اپنی کارروائیوں کا احوال سناتے۔ ان کا کہنا تھا کہ دنیا کے ہر خطے میں مسلمان پِس رہا ہے اور سبھی غیر مسلم ممالک کی سوائے اس بات کے، کسی اور امر میں دلچسپی نہیں کہ مسلمانوں کوصفحۂ ہستی سے مٹا دیا جائے۔سبھی لوگوں پر مسلح اقدام واجب ہے اور پر امن تبلیغ یا سیاسی جدوجہد کرنے والے لوگ کشمیری اور افغان مسلمانوں کے مجرم ہیں وغیرہ۔ بیچین کر دینے والی ان تقریروں کو سن کر میرے اندر عدم تحفظ کا ایک احساس پیدا ہوا اوراسلحے کی نمائشوں کو دیکھ کر میرے دل میں ہتھیار چلانے کی لگن پیدا ہوئی۔
۱۹۸۹ء کے ابتدائی دنوں میں میں نے جہاد پر جانے کا فیصلہ کر لیا اورایک مقامی کالعدم فرقہ پرست تنظیم سے وابستہ افراد کے توسط سےمجاہد تنظیموں کے چنیوٹ سطح کی انتظامیہ تک رسائی حاصل کی۔مقامی تشکیل کے باریش امیر المجاہدین نے میرے جذبۂ جہاد کی قدر کی اور میری شہادت کی آرزو کے پورے ہونے کی دعا کی۔ سن ۸۹ء کے موسم بہار میں ایک دن میں گھر سے ضروری سامان اور کپڑے لے کر چنیوٹ مرکز پہنچا اور امیر صاحب نے مجھ سمیت پچیس نوجوانوں کے لیے ایک رقعہ میرانشاہ معسکر کے امیر المجاہدین کے نام لکھ کر ہمیں دیا۔ایک طویل اور بے چین فاصلہ طے کرنے کے بعد ہم میرانشاہ میں قائم حرکۃ المجاہدین کے معسکر (چھاؤنی) پہنچے اور پہنچتے ہی ہمارے تمام کوائف کی تصدیق کی گئی۔اس عمل کے مکمل ہونے کے بعد ہماری تشکیلِ نو کی گئی اور ہمیں دس سے بارہ جوانوں پر مشتمل گروہوں میں تقسیم کر دیا گیا۔ تشکیلِ نو کے بعد ایک گاڑی ہمیں میرانشاہ سے شمال مغرب کی طرف لےگئی۔ افغانستان کی حدود میں پہنچنے کے بعد گاڑی تبدیل کی گئی جو کہ ہمیں خوست شہر کے نواحات میں واقع ایک جہادی معسکر تک لے گئی۔ اس معسکر میں ہمیں چالیس دن تک جہادی تربیت حاصل کرنا تھی۔ ہمارے استقبال کے بعد ہم سے مختلف قسم کے فارم اور حلف نامے بھروائے گئے جن میں ہم نے اس بات کا اعلان کیا کہ ہم اپنی مرضی سے جہاد پر آئے ہیں اور مارے جانے کی صورت میں جہادی تنظیم، والدین یا لواحقین کے کسی ردعمل کی ذمہ دار نہیں ہوگی۔
دوسرے ہی دن ہماری تربیت کا آغاز ہوا، جس میں نمازِ فجر کے بعد تلاوت ہوتی اور اس کے بعد وردی بوٹ بدلنے کے لیے دو منٹ دئیے جاتے جس کے فوراً بعد ہم پیشہ ور اساتذہ کے زیرِ نگرانی صبح سات تا نو بجے تک پی.ٹی اور ڈرل جیسی مشقیں کرتے۔ ناشتے کے بعدظہر کے وقت تک اسلحہ کی تربیت حاصل کرتے جس میں ہلکے اسلحے سے لے کر بھاری راکٹ لانچروں تک کی تربیت شامل تھی۔ عصر تک سپیشل کمانڈوز ٹریننگ (تخصص) کرنے والے جوان اپنی مشقوں میں مگن رہتے جبکہ ہم اپنا اسلحہ کی صفائی کرتے اور سستاتے، عشاء کی نماز کے بعد دیر تک جہادی بیان ہوتا اور جہاد کے فضائل اور کشمیر و افغانستان میں مسلمانوں پر ہونے والے مظالم کی داستانیں بیان کی جاتیں۔
چالیس دن بعد ہماری تربیت مکمل ہوئی اور مجھے صوبہ خوست ہی میں شمالی اتحاد کے خلاف ایک محاذ پر بھیج دیا گیا۔ یہاں ہر پندرہ روز بعد تعینات جنگجوؤں کا تبادلہ ہوتا تھا۔ پندرہ روز تک معمول کی جھڑپوں اور گوریلا کارروائیوں کے بعد میری جگہ ایک اور جنگجو کو تعینات کر کے مجھے معسکر واپس بلوا لیا گیا۔ یہاں ہم سے جہاد جاری رکھنے اور تخصص (اسپیشل کمانڈو تربیت) کرنے کے لیے ہماری آمادگی کا پوچھا گیا۔ تخصص کر چکنے والے جنگجوؤں کو بہت قابلِ ذکر مراعات حاصل تھیں اور دیگر وابستہ حلقوں میں انہیں بہت تکریم کی نگاہ سے دیکھا جاتا تھا۔میں نے جہاد جاری رکھنے اور تخصص کرنے کے لیے اپنی آمادگی ظاہر کی جس کے بعد مجھے میرانشاہ سےپشاور بھیج دیا گیا۔ پشاور کے مرکز میں رسمی کارروائیاں نمٹانے کے بعد جلال آباد (افغانستان) میں واقع ایک اور معسکر میں بھیج دیا گیا جہاں تین ماہ پر مشتمل تربیتی دور کا آغاز ہوا۔ یہ معسکر فلپینی جنگجوؤں کے زیرِکمان تھا جو عربی، پشتو اور انگریزی پر عبور رکھتے تھے۔ دیگر زیرِتربیت جنگجو چونکہ ان تینوں زبانوں سے نابلد تھے لہٰذا مجھے انگریزی سے موزوں واقفیت کی وجہ سے ان کمانڈروں کے نہایت قریب رہنے کا موقع ملا۔ میں زیرتربیت جنگجوؤں اور فلپینی کمانڈروں کے درمیان ترجمانی اور رابطے کا کام بھی سرانجام دیتا رہا۔تخصص کے دوران ہمیں بھاری توپ خانے، ہلکے ہتھیاروں اور دیگراعلی مہارتوں کی تربیت دی گئی۔ اس کورس سے فارغ التحصیل ہونے کے بعد ہمیں کشمیر، تاجیکستان یا اندرون افغانستان کے محاذوں کی مہمات پر بھیجا جانا چاہیے تھا۔ تین ماہ کی تربیت کے اختتام پر ہم سے ہماری پسند کے محاذوں کا پوچھا گیا۔
معسکر کی راتوں میں جہادی کانفرنسوں میں سنی تقریریں ہمارے کانوں میں گونجتی تھیں اور جہادی لٹریچر میں دکھائی گئی کٹی پھٹی لاشیں ہمارے خوابوں میں آ آ کر چیختی تھیں۔ہم ہڑبڑا کر اُٹھ بیٹھتے اور پکار پکار کر کشمیر کے لوگوں کو آوازیں دیتے اور انہیں بھارتی ریاست سے آزاد کرانے کے عہد کیا کرتے۔ پہاڑوں سے ٹکرا کر واپس آنے والی خنک ہوائیں ہمیں جنت کے بہشتی جھونکوں کی طرح لگتیں اورجنتی خیموں کے کنارے بیٹھی حوروں کا انتظار ہمارے بس سے باہر ہونے لگتا۔ تخصص مکمل ہوتے ہی میں نے اور کچھ دوسرے ساتھیوں نے کشمیر جانے پر آمادگی ظاہرکی۔جلال آباد سے ہمیں مظفرآباد لایا گیا۔ یہاں سے اَٹھ مقام میں واقع قومی حساس ادارے کے ایک دفتر میں ہمارا استقبال کیا گیا۔اکتوبر ۱۹۸۹ء کو سخت سردی میں اَٹھمقام سے ہم حساس اداروں کی حفاظت میں بھارتی مقبوضہ کشمیر میں داخل ہوئے لیکن شدید برفباری کی وجہ سے آگے کے راستے بند تھے اور ہم فضا سازگار ہونے کے انتظار میں وہیں رک گئے۔
اسی دوران مظفرآباد سے مجھے پیغام ملا کہ میرے والد صاحب مجھے ڈھونڈتے ڈھونڈتے مظفرآباد پہنچ آئے ہیں۔ مجھ سے میری آمادگی جان کر خصوصی گاڑی پر مظفرآباد بھیجا گیا جہاں میں نے والد صاحب سے ملاقات کی۔ والد صاحب نے مجھے والدہ کی صحت اوردیگر معاملات اور گھر پر میری ضرورت کے حوالے سے بہت سی باتیں کیں اور اس دوران وہ نہایت جذباتی ہو گئے۔ میں نے گھر واپس جانے کا فیصلہ کیا اور والد صاحب کے ہمراہ چنیوٹ آ گیا۔ گھر واپسی پر میرے خاندان میں ایک خوشی کی لہر ضرور دوڑی لیکن اس وقت تک مجھ میں بہت سی تبدیلیاں آ چکی تھیں۔خوست کے سرحدی محاذوں پر جھڑپوں میں عملی شرکت اور مجاہدین کی ہمراہی میں تقویٰ اور روحانی ریاضتوں نے ایک خاص قسم کی پرہیزگارانہ نخوت پیدا کر دی تھی۔ آس پاس رہنے والے عام لوگ، جو میری طرح جہاد پر نہیں گئے تھے اور جہادی حلیے کی بجائے روایتی لباس اور وضع قطع کے ساتھ روزمرہ کے کام کاج کرتے تھے، ان لوگوں کے لیے میرے دل میں سوائے حقارت کے اور کوئی جذبہ نہیں بچا تھا۔ اب میرے نزدیک شہر کے سبھی “غیرمجاہد” باسیوں کی زندگی کا ایک ایک سانس ایک کفریہ فعل کے مترادف تھا۔ افغانستان میں جاری روس امریکہ جنگ میں پاکستان کی شمولیت کے حامی افراد میں میری جہاد سے واپسی کی خبر جنگل کی آگ کی طرح پھیل گئی۔ آئے روز شہر میں نئے سے نئے ناواقف افراد کے ہاں سے مجھے کھانے کے دعوت نامے موصول ہونے لگے۔ ان مجلسوں میں بیٹھ کر اپنے جہاد کے قصے سنا کر مجھے جس قدر تکریم اور پذیرائی ملتی رہی، اسی قدر عام “دنیادار” لوگوں سے بیزاری اور میرے جنگجویانہ مزاج میں مزید ترشی آتی گئی۔
اس دوران میں نے دوبارہ جہاد پر جانے کا فیصلہ کیا اور نئے سرے سے اپنا سامان باندھ لیا۔میرا ایک ہم راز دوست مجھے بس اسٹاپ تک چھوڑنے میرے ساتھ آیا، لیکن اسی دوران میرے والد کو میرے دوبارہ جہاد پر جانے کا علم ہو چکا تھا۔ وہ نہایت جذباتی ہو کر بس سٹاپ پہنچے اور مجھے روکنے پر قائل کرنے لگے۔ انہوں نے کہا کہ اگر میں اپنے اس ارادے سے باز نہ آیا تو وہ گاڑی کے چلتے ہی اس کے آگے لیٹ کر اپنا خاتمہ کر لیں گے۔ اس وقت دنیا کا ہر وہ جذبہ جو مجھے لڑائی پر جانے سے روکتا تھا، میرے نزدیک نہایت مذموم اور میرے جنت کے حصول کی راہ میں رکاوٹ تھا۔ میں نے پوری بے حسی کے ساتھ اپنے مرحوم والد کو واویلا کرتا چھوڑا اور بڑے بس اڈے کی طرف نکل پڑا۔ میرے بس اڈے پہنچنے تک بنوں جانے والی آخری بس نکل چکی تھی۔ بس نکلنے کو میں نے اپنی روانگی کے لیے ایک برا شگون سمجھا اور مجھے اپنے والد کی نافرمانی پر ندامت محسوس ہوئی۔ لیکن دوسری طرف میری اپنی انا، اور جنت کا حصول میرے گھر لوٹنے سے مانع بھی ہو رہے تھے۔ ایک طویل پس و پیش کے بعد میں نے اپنے گھر جانے کا فیصلہ کر لیا۔ گھر پہنچا تو میرے والد ابھی تک گھر نہیں پہنچے تھے اور والدہ بستر پر نڈھال پڑی تھیں۔ میں نے دوبارہ جہاد پر نہ جانے کا فیصلہ کیا لیکن ساتھ ہی میں جہادی مراکز میں میری ذہن کو جس طرح کے متشدد خیالات میں ڈھالا گیا تھا، مجھے مسلسل بے چین کیے رکھتا تھا۔
۱۹۹۲ء میں میری ملاقات ایک کالعدم فرقہ پرست تنظیم کے ایک عسکریت پسند سے ہوئی۔ بے تکلفی ہونے کے بعد وہ مجھے ایک مسجد کے ایک گوشے میں لے گیا جہاں اس نے مجھے جدید اسلحے اور ایمونیشن کا ایک بڑا ذخیرہ دکھایا۔ اسے دیکھ کر میری اسلحہ استعمال کرنے کے لیے بیچینی اور بڑھ گئی۔ اپنے ذاتی پس منظر اور امتیازی تربیت کی وجہ سے میں دوسرے تمام فرقوں کو بھی دیگر غیر مسلموں کی طرح واجب القتل سمجھتا تھا۔ اور اسی ہم فکری نے مجھے اس نئے دوست سے قریب کیا تھا۔ اس شخص نے مقامی سطح پر ‘جہاد’ کے ارادے میں شمولیت کے حوالے سے میری رائے لی، جس کے لیے میں پہلے سے ہی تیار تھا۔ کالعدم تنظیم کے اس رکن نے مجھے مقامی سطح پر شیعہ فرقہ کے لوگوں کے خلاف مسلح جہاد کی ایک اسکیم پیش کی۔ اس کے مطابق ہمیں پہلے مرحلے میں علاقہ کے بااثر اور ثروت مند شیعہ لوگوں کو مالی طور پر کمزور بنانا اور ان کے کاروبار اور املاک کو نقصان پہنچانا تھا۔ میں شیعہ فرقہ کی تکفیر پر مشتمل تقریری و تحریری مواد اس قدر پڑھ سُن چکا تھا کہ مجھے ڈکیتی جیسا سنگین اخلاقی جرم ایک کارِ خیر سے کم نہیں لگا۔
کالعدم تنظیم کے اس گروہ کے ساتھ ہم نے ڈکیتی اور لوٹ مار کی وارداتوں کا سلسلہ شروع کیا جس میں ہمیں تالا توڑنےاور نقب لگانے کے لیے پیشہ ور چوروں اور نقب زنوں کی ہمراہی حاصل تھی۔ اس وقت تک مجھے اپنا ہر مجرمانہ عمل، نفاذِ اسلام اور ناموسِ صحابہ کے مشن کے لیے ایک مقدس اقدام لگتا تھا اور میرے پاس اپنے ضمیر کو مطمئن کرنے کے لیے ہزار جواز تھے۔ تاوقتیکہ ڈکیتی کی ایک واردات کے دوران میں نے اپنے گروہ کے سب سے پارسا ‘مجاہدوں’ کی اخلاقی سطح کو بے نقاب ہوتے دیکھا، جب ایک شیعہ گھر پر رات گئے بلوہ کے دوران اس گھر سے ایک خاتون نے ہماری توقع سے کہیں ذیادہ مزاحمت کی۔ میرے ساتھیوں نے اس خاتون کو خاموش کروانے کے لیے نہایت حیا باختہ گالیاں دیتے ہوئے انتہائی بے دردی سے زدوکوب کیا۔ اس خاتون کے مانوس زبان میں احتجاجی واویلا اور چیخ و پکارکے آگے مجھے مظلوم عورتوں کی وہ سب فرضی چیخیں بہت مدھم ہوتی نظر آئیں جو مجھے خوابوں خیالوں میں کشمیر یا کابل کی بولیوں میں سنوائی جاتی رہی تھیں۔ اپنے ہی ملک اور اپنے ہی شہر کی ایک خاتون کی اس درجہ بے احترامی کو اپنے آنکھوں کے آگے دیکھ کر میرے ذہن میں اپنی زندگی کے گزشتہ ڈھائی سالوں پر کئی ایک سوالیہ نشان کھڑے ہو گئے۔ان ڈھائی سالوں میں، جب میں اپنے ہم وطنوں سے مسلسل نفرت کر کے غیر ملکی جنگجوؤں کے ساتھ ایک ایسی جنگ میں شریک رہا تھا، جس جنگ کے پیچھے کارفرما عوامل اور طاقتوں کے ذاتی مفادات کے متعلق نسبتاً متوازن مطالعے کی میں نے کبھی زحمت نہیں کی تھی۔
اس رات کا واقعہ میرے لیے سوچ میں تبدیلی کا ایک اہم محرک تھا ہی، لیکن ساتھ ہی میں نے اب تک معسکروں اور جہادی کانفرنسوں میں پڑھی سنی یکطرفہ آراء کو ایک طرف رکھ کر متبادل تجزیوں کا مطالعہ کرنا شروع کیا۔ متوازن مطالعے کی بدولت مجھے گزشتہ ڈھائی سالوں میں اپنی تعلیم، خانگی زندگی اور توانائیوں کی رائیگانی کا احساس اور بھی شدت سے ہوا۔ اس تبدیلی کے بعد میں نےاپنی سماجی زندگی میں ملنساری اور انسان دوستی کے جذبے بحال کرنے کے لیے خوب ریاضت کی تاکہ گزشتہ برسوں کی مردم بیزاری کی تلافی کر سکوں۔اپنے گھر کی معیشت میں بہتر حصہ ڈالنے کے لیے میں نےشہر میں تن سازی کا کلب قائم کیا اور ساتھ میں میرے باطن میں فکری جوڑ توڑ کا عمل بھی برابر جاری رہا۔
سن ۹۲ء ہی کے موسمِ گرما میں ایک دن پولیس نے میرے کلب پر ریڈ کیا اور مجھے گرفتار کر کے حوالات میں بند کر دیا۔ بعد میں پتہ چلا کہ علاقہ میں کالعدم تنظیم کی ایک تازہ ڈکیتی کی واردات پر مشکوک افراد کی فہرست میں، سابقہ وابستگی کی بنیاد پر مجھے بھی شامل کر لیا گیا تھا۔ ملزمان پر چھبیس لاکھ روپے کی ڈکیتی کا الزام تھا۔ ایک طویل قانونی جدوجہد کے بعد مَیں اس مقدمہ سے بری ہو گیا اور اسی دن اپنی تن سازی کی دکان بڑھا کر شہر چھوڑ دیا۔ حوالات میں گزرنے والی رات اپنے ہاتھوں پر لگی آہنی ہتھکڑیوں کے ساتھ میں نے اپنی گزشتہ زندگی کا تفصیلی اور دیانتدارانہ محاسبہ کیا اور بہت سے ایسے نتیجوں پر پہنچا، جن کے اخذ کرنے کی اب تک مجھ میں ہمت نہیں آ رہی تھی۔ میں نے چنیوٹ کو خیرباد کہہ دیا۔فیصل آباد میں میری ڈاڑھی مونڈنے والا حجاّم وہ پہلا آدمی تھا جسے میں نے سب سے پہلے اپنے مجرمانہ ماضی کی داستان سنائی، اور جس نے مجھے ایک بدلی ہوئی وضع قطع کے ساتھ، ایک عام پاکستانی شہری کے روپ میں پہلی بار دیکھا تھا۔
آج میں لاہور میں اپنے خاندان کے ساتھ ایک نئی اور بالکل مختلف زندگی گزار رہا ہوں۔ اگرچہ دو دہائیاں پرانی وہ جنگ ہمارے گھروں تک پہنچ آئی ہے، لیکن مجھے خوشی ہے کہ میرے بچوں نے ایک مختلف صدی میں جنم لیا ہے۔ یہاں میری معاش درس و تدریس سے وابستہ ہے اور اپنے تدریسی فرائض سرانجام دیتے ہوئےمیری کوشش ہوتی ہے کہ نئی پود کے ذہنوں میں زہر بھرنے کی بجائے انہیں محبتیں بانٹنے والا، جمہوریت پسند اور پرامن پاکستانی بننے کی تلقین کی جائے۔
افغان جہاد اور جہادِ کشمیر میں میرے ساتھ کئی ایک لوگ ایسے تھے، جو محاذوں سے زندہ نہیں لوٹے… بہت سے ایسے بھی ہیں جو محاذ سے لوٹ آئے لیکن اب تک عام شہریوں کو ان کے “پارسا” نہ ہونے کی وجہ سے حقارت کی نظر سے دیکھتے ہیں، یا ان کے ہم وطنوں نے انہیں اپنے درمیان قبول کرنے سے انکار کر دیا۔ اور کئی ایک ایسے بھی ہیں، جو اپنے سماج میں واپسی پر اس تصادم کے خوف سے اب تک پہاڑوں میں بیٹھے اپنے وطن کو یاد کر رہے ہیں۔ مجھے جلال آباد میں اپنے فلپینی کمانڈر کے وہ الفاظ اب بھی یاد ہیں جب میں نے اس پوچھا تھا کہ وہ وطن واپس کب جائے گا۔۔ اس کی آنکھوں میں ایک دلگیر درد تھا جب اس نے ایک آہ بھرتے ہوئے کہا تھا؛ “شاید کبھی نہیں…”
میں خوش قسمت ہوں کہ ایک نئی زندگی کے ساتھ اپنے بیوی بچوں کے درمیان زندہ ہوں، تاکہ آنے والی نسلوں کو اپنی نسل کی منفی مہم جوئیوں کی یادداشتیں سنا سکوں۔

---

انگلش میں ترجمہ پڑھنے کیلیے یہاں کلک کریں۔

---

اسد فاطمی
شہر قصور کا ذکر بھی جی سے سننے والوں کے لیے ایسا سب رنگ اور دلآویز ہے کہ موضوع بدلنے کے لیے کسی بہت بڑے تمدنی نام کو بیچ میں لانے سے بات بدلتی ہے۔ ایک بھرپور تاریخ کے حامل اس شہر کی شناخت بننے والے مشاہیر کی فہرست کسی بھی دوسرے عظیم شہر سے کم نہیں ہے۔ بلھے شاہ کی مستانہ کافیوں نے اسے آتش فشانی دہانوں کا شہر بنایا ہے، عہدِ اکبری میں تان سین کی جاگیر رہنے والا، استاد بڑے غلام علی خاں اور میڈم نور جہاں کا یہ شہر پانچ دریاؤں کے بیچ تانپورے کے منجھلے تار کی طرح ہے۔ سیاست و حکمرانی میں سیاسی فطانت سے لے کر محلاتی سازشوں تک، قصور کی تاریخ ایک نصابی حوالے کی مانند ہے۔

شہر کے معرض وجود میں آنے کے بارے میں کوئی حتمی رائے دینا بہت قبل از وقت ہو گا، تاہم رامائن میں ہے کہ شری رامچندر جی نے اپنے بیٹے کشو کو نوازنے کے لیے ایک تیر پھینکا جو اس جگہ آن گرا اور رام نے یہ جگہ کشو کو جاگیر کے طور پر عطا کی، اور خیال کیا جاتا ہے کہ اسی نسبت سے اس کا نام کسور پڑا۔فیروز پور روڈ پر واقع ٹبہ کمال چشتی کا اونچا خرابہ، ایک پرانے شہر روہےوال کا پتہ دیتا ہے، عہدِ اکبری میں قصور روہیوال کا ایک قصبہ تھا جو اکبر نے تان سین کو عطا کیا تھا۔ ایک محلاتی بدگمانی کو رفع کرنے کی غرض سے بعد میں یہ علاقہ مغل فوج کے ایک علی زئی افغان جرنیل کو بخشا گیا۔ افغان فوجی افسروں کے یہاں آباد ہونے سے شہر کی معلوم تاریخ کا آغاز ہوتا ہے۔ پٹھانوں نے اس جگہ قصر نما ۱۲ قلعے (باراں کوٹ) تعمیر کیے۔ اس کے بعد یہ شہر ہندوی لفظ کسور سے، عربی کا ‘قصور’ کہلانے لگا۔اس عہد میں رند قبیلے کے ایک بلوچ سورما پِیرا بلوچ کی پٹھانوں کے ساتھ چشمک علاقے کی لوک داستانوں کا اہم موضوع ہے۔ پِیرا بلوچ رات کے اندھیرے میں پٹھان امراء کے محلات میں شب خون مارتا، اور ساتھ میں اپنی غریب پروری کی وجہ سے عام لوگوں میں مقبول بھی رہا۔ پٹھانوں کے ساتھ ایک جھڑپ میں پیرا مارا گیا اور قصور کے بارہ قلعوں کی پرتعیش زندگی میں امن و سکون کے ایک اور عہد کا آغاز ہوا۔ تاہم لوک رزمیوں (واراں) میں آج بھی پِیرا کو ایک ہیرو کے طور پر یاد کیا جاتا ہے۔سکھ قبیلے بھنگی کی تاراج کے عہد کو ‘مِسل دور’ کہتے ہیں۔ مسل دور بھی یہاں کے پٹھان امراء کے لیے بے سکونی کا ایک باب ہے۔ یہ عہد قصورکی تاریخ میں بھاری سیاسی اور ثقافتی بحران کا زمانہ ہے۔ قصور میں سنگھا شاہی رسوخ ملتان کے نواب مظفر خاں سدوزئی کے ساتھ رنجیت سنگھ کی جنگوں کے پس منظر سے شروع ہوتا ہے جب یہاں کے ایک جرنیل قطب الدین خاں کو رنجیت سنگھ نے ملتان کے سدوزئیوں کے خلاف اس کا ساتھ دینے کا کہا اور قطب الدین نے انکار کیا۔اس بات پر رنجیت سنگھ قصور کے رؤسا پر چڑھ دوڑا اور قطب خان کو شکست کھا کر رنجیت کا کہا ماننا پڑا۔ قطب خاں کی نصرت میں رنجیت سنگھ نے ملتان کا قلعہ فتح کیا اور اس کی مغل جاگیریں بحال کر دیں۔

انیسویں صدی کے وسط میں قصور کا قلمرو انگریزوں نے سکھوں سے چھین لیا۔ برٹش دور میں یہاں کہ پٹھان رؤسا کے حکومت کے ساتھ نہایت دوستانہ روابط رہے۔ پہلی اور دوسری جنگِ عظیم کے دوران رؤسائے قصور نے جنگ کے لیے خطیر چندے اکٹھے کیے اور سرکاری طور پر انہیں بھاری مراعات اور عہدوں سے نوازا گیا۔ جلیانوالہ باغ کے واقعےپر قصور میں نہایت پرجوش عوامی ردعمل سامنے آیا۔ ان مظاہروں کو قصور جلوس ایجی ٹیشن کے نام سے یاد کیا جاتا ہے۔ مقامی امراء نےاسکولوں سے طلبہ کی ایک بڑی تعداد کو پکڑ کر پنجروں میں قید کر دیا اور ان پر کوڑے برسائے۔ برطانوی عہد میں قصور کے گرد ریل کی پٹڑی کا جال بچھایا گیا، جو اسے امرتسر، فیروزپور، لودھراں اور رائیونڈ سے ملاتی تھی۔ اس عہد میں قصور کو ضلع لاہور کی ذیل میں تحصیل کا درجہ ملا اور نئی طرز کے بنیادی انتظامی ادارے،کچہریاں اور یونین کونسل قائم ہوئے۔تقسیمِ ہند کے بعد یہاں کی تقریباً چوتھائی بھر غیرمسلم آبادی نے شہر چھوڑ دیا، جبکہ ہندوستان سے فیروزپور، امرتسر اور میوات وغیرہ سے مہاجرین کی ایک بڑی تعداد یہاں مہاجر بستیوں میں آباد ہوئی۔ تقسیم کے وقت کا یہ المناک باب بھی قابلِ ذکر ہے کہ جب پاکستانی پنجاب کے مختلف شہروں سے ہجرت کر کے بھارت جانے والے تارکین قصور بارڈر کے راستے ملک چھوڑ رہے تھے، قصور شہر کے ریلوے اسٹیشن پر تارکین سے کھچاکھچ بھری تین ٹرینوں کو روک کرمسافروں کو موت کے گھاٹ اتار دیا گیا۔ ۱۹۶۵ء کی جنگ میں فتح ہونے والا
بھارتی قصبہ کھیم کرن تقسیم ہند سے قبل قصور کے مضافاتی قصبات میں شمار ہوتا تھا۔ ریڈیو پر کھیم کرن فتح ہونے کی خبر نشر ہوئی تو تقسیم کے وقت کھیم کرن سے ہجرت کر کے قصور آباد ہونے والے خاندان پیدل، سائیکلوں اور گھوڑوں پر بیٹھے جوق در جوق اس قصبے میں واقع اپنے پرانے گھروں کو پہنچ گئے۔ مفتوحہ شہر کھیم کرن کے مکان خالی پڑے تھے، لوگوں نے اپنے سابقہ گھروں سے بچ رہے سامان، کواڑ، شہتیر، یہاں تک کہ اینٹیں، اپنے آبائی گھروں کی یادگار کے طور پر ساتھ لیں اور قصور میں واقع اپنے نئے گھروں میں سجا دیں۔ کھیم کرن سے قصور آئے ان گھرانوں کے لیے جنگِ ستمبر ۱۹۶۵ء میں ہاتھ آنے والا سب سے قیمتی سرمایہ یہی ہے جو آج بھی ان کے گھروں میں محفوظ ہے۔ ۱۹۶۷ء میں قصور کو ضلع کا درجہ دیا گیااور شہرِ قصور اس کا انتظامی مرکز قرار پایا۔ ضلعی مرکز بننے کے بعد شہر میں ضلعی حکومتی دفاتر کے قیام اور نئی تعمیرات کے بننے سے شہر کی ظاہری صورت میں صفائی آنے کی ایک امید قائم ہوئی لیکن اس کے باوجود بھی افسروں کی گنی چنی گزرگاہوں کے علاوہ شہر کی شاہراہیں اور گلیاں دھول اور کیچڑ ہوا میں اچھالتی رہیں۔نصف دہائی قبل قصور میں تعمیراتی ترقی کی ایک جھلک واضح دیکھنے میں آئی ہے۔ تین سال قبل قصور کو لاہور سے ملانے والی جرنیلی سڑک، فیروزپور روڈ کے حالیہ کشادہ تر اور دو رویہ سڑک میں تبدیل ہونے سے قصور کا صوبائی و صنعتی دارالحکومت لاہور سے فاصلہ نہایت سکڑ گیا ہے۔ ساتھ ہی شہر کی بیشتر نقل و حرکت اور تجارتی اہمیت کی حامل شاہراہوں کی حالت میں بھی بہتری آنے سے یہاں کی صنعت اور روزمرہ سرگرمیاں بہتر معیشت کی جانب راہی ہوتی نظر آتی ہیں۔

قصور کی روایتی صنعتوں میں چمڑے کے جوتے شہر کی خاص پہچان ہیں، لوک ادب و موسیقی میں بھی “جتی قصوری” کا حوالہ نفاست اور وقار کی علامت کے طور پر آتا رہا ہے۔ پارچہ بافی میں یہاں کے جولاہے (انصاری) ایک صدیوں پرانی روایت کے وارث ہیں۔ اس صنعت میں کپڑے کی قسم ‘بافتہ’ کو خاص امتیاز حاصل ہے جس میں ایک ریشم کے تار کے ساتھ سوت کے ایک تار کو بُنا جاتا ہے۔ گرم اوڑھنیوں میں یہاں کے جولاہے کھیس (مجنوں) بنانے میں خاص کمال رکھتے ہیں۔ جانوروں کی کھال سے چمڑا تیار کرنے کی قدیم صنعت بھی قصور کی خاص شناخت ہے۔چمڑے کی صنعت کی وسعت اور قدامت کا اندازہ اس امر سے لگایا جا سکتا ہے کہ صدیوں سے تازہ گیلی کھال سے ماس اور خون کی باس نکالنے، بالوں کی صفائی وغیرہ سے لے کر قابلِ استعمال سوکھے چمڑے کی تیاری تک کے مراحل میں جو خاص کیمیاوی مواد برتا جاتا ہے، اس تمام فاضل مواد کی غیر دانشمندانہ نکاسی کی وجہ سے قصور کی زمین کے نیچے موجود پانی نہایت آلودہ ہو چکا ہے۔اس پانی کو پینے اور دیگر ضروریات میں استعمال کرنے کی وجہ سے قصور میں کینسر کے مریضوں کی شرح ملک بھر میں سب سے ذیادہ ہے۔ شہید محترمہ بینظیر بھٹو کی وزارتِ عظمیٰ کے دوران یہاں پانی کا ایک بڑا ٹریٹمنٹ پلانٹ قائم کیا گیا تھا جو شہر بھر کو پینے کا صاف پانی مہیا کرتا ہے۔ اس اقدام کی وجہ سے صورتِ حال کی سنگینی میں بہت کمی واقع ہوئی۔ لکڑی کی مصنوعات کی قدیم صنعت یہاں خاتمے کے دہانے کو پہنچ چکی ہے۔ رنگلے پایوں والی کھاٹ، مدھانیاں، رنگلے پیڑھے اور شوخ رنگوں والے لٹو ایک مدت تک قصور کی خاص شناخت رہے ہیں۔ مغل عہد کے ایک سِکھ مہتمم کی نسل یہاں ‘مہتم’ برادری کے نام سے جانی جاتی ہے جن کا موروثی پیشہ چھج بانی (سرکنڈے سے بننے والی مصنوعات) تھا۔ چِک سازی، مصلے اور ایسی دیگر اشیاء بنانے کا ہنر اس خاندان سے یادگار ہے۔جھی ور قبیلہ خوشنما رنگوں اور نسلوں کے پرندوں کا شکار اور فروخت کا کام کرتا ہے۔ کمانگر ذات کے لوگ پرانے وقتوں میں تیر، کمانیں اور ترکش بنانے کے پیشے سے وابستہ تھے۔ ان سب پرانی صنعتوں میں سے جو صنعتیں جدید انڈسٹری کے ساتھ مطابقت پیدا کر پائیں، باقی رہیں۔ باقی تمام صنعتیں آہستہ آہستہ معدوم ہو چکی ہیں، یا معدومی کے دہانے پر ہیں۔

کھانے پینے کے حوالے سے قصوریوں کی حسِ ذائقہ نہایت قابلِ رشک ہے۔ ملک بھر میں قصوری فالودہ کی ایک جداگانہ شناخت ہونے کے ساتھ ساتھ قصوری اندرسا، بھلے پکوڑیاں، اوجڑی اور ناشتے میں دہی قلچہ نہایت مرغوب سمجھے جاتے ہیں۔ قصور کے روایتی گھرانوں میں شام کا
کھانا گھر پر پکانے کا رواج بہت کم ہے۔کپاس اور مرچ کی کاشت یہاں نواحات کی روایتی فصلیں ہیں لیکن گزشتہ تین سے چار دہائیوں میں آلو، اروی، میتھی، ہلدی اور مکئی کی کاشت کے رجحان میں اضافہ ہوا ہے۔ ملنساری، زندہ دلی اور محنت یہاں کے لوگوں کے امتیازی اوصاف ہیں، دوسری طرف قصور چونکہ صدیوں سے مختلف طاقتوں کی کشمکش اور حویلیوں، قلعوں میں محلاتی سازشوں کا گڑھ رہا ہے، اسی وجہ سےروایتی اذہان کے زبانی حوالوں میں مکر، سیاست اور دورویہ روش کے منفی خواص بھی متوازی طور پر قصور کے لوگوں سے منسوب کیے جاتے ہیں۔ ثقافتی طور پر اگرچہ قصور لاہور سے بہت مشابہت رکھتا ہے، تاہم قصور کی بسنت ایک مدت تک لاہور میں منائے جانے والے بسنت کے تہوار کے برابر، اور بعض حالات میں اس سے بھی زیادہ والہانہ طور پر منائی جاتی رہی ہے۔ قصور ریلوے اسٹیشن کے جنوب مغرب میں واقع علاقہ کوٹ مراد خان رقص وموسیقی کے حوالے سے قصور کی شناخت رہا ہے۔ افغان عہد میں کلاسیکی گائیکوں کا ایک قبیلہ، جس کا سردار مراد خان تھا، اس جگہ آباد ہوا تھا۔ اس علاقے نے برصغیر پاک و ہند کی موسیقی میں استاد غلام حیدر خاں، استاد بڑے غلام علی خاں، استاد چھوٹے غلام علی خاں، ظہور بخش قصوری، ملکۂ ترنم نور جہاں، ظلِ ہما، عذرا جہاں اور ایسے لاتعداد ناموں کا اضافہ کیا، جبکہ کلاسیکی رقص میں استاد فلوسے خاں جیسے لوگ یہاں پیدا ہوئے۔سخن پروری کے حوالوں میں یہ بابا بلھے شاہ کا شہر کے نام سے جانا جاتا ہے۔ وارث شاہ نے بھی اپنی ابتدائی فنی زندگی اسی شہر میں گزاری تھی۔ وارث شاہ کے استاد و مرشد مخدوم قصور سے تعلق رکھتے تھے۔ اندرون شہر کے موری دروازے کی جامع مسجد میں دو حجرے موجود ہیں جن کے بارے میں یہ کہا جاتا ہے کہ ان میں سے ایک حجرے میں بابا بلھے شاہ مقیم رہے، جبکہ دوسرا ایک عرصہ تک وارث شاہ کی قیام گاہ رہا۔ ادب کی ان عظیم روایتوں کے تسلسل میں پنجابی زبان کی معاصر شاعری میں بھی قصور نے لاتعداد عظیم نام پیدا کیے ہیں۔ پنجاب کی فلم انڈسٹری لالی وڈ کے قیام کے وقت سے ہی قصور کے فنکاروں کا اس میں ایک گرانقدر حصہ رہا ہے۔ایوب خان کے عہدِ صدارت میں معروف فلم ‘جال’ کی پاکستان میں نمائش پر جو تنازعہ کھڑا ہوا، اس کے روح رواں قصور کے معروف فلمساز یوسف خان تھے۔ ان مظاہروں کو ‘جال ایجی ٹیشن’ کے نام سے بھی یاد کیا جاتا ہے۔ اس ایجی ٹیشن کا مقصد پاکستانی فلمی صنعت کی بقاء اور خودانحصاری کے لیے بھارتی فلموں کی پاکستان میں نمائش پر پابندی کے لیے جدوجہد کرنا تھا۔ اس تنازعے میں فلمی صنعت مختلف دھڑوں میں تقسیم ہو گئی۔ اور بڑی تعداد میں فنکاروں اور فلم بینوں کو زدوکوب کیا گیا۔

اس شہر نے ترقی، تمدن اور تہذیب کے مراحل کی کم و بیش سبھی ناہمواریوں کو تجربہ کیا ہے۔اس لیے قصور اپنے آغوش میں ایک بڑے شہر کی سی رنگا رنگی اور چھوٹے شہروں والی سادگی اور روایتی پسندی، ہر دو ذائقے نہایت حسین توازن کے ساتھ لیے ہوئے ہے۔ یہی وجہ ہے کہ پنجاب کی سیاسی، معاشی اور ثقافتی تاریخ کے حوالوں یا عصری احوال میں سے قصور کو منہا کر کے ایک مکمل رائے قائم نہیں کی جا سکتی۔

ارون آرتھر

۹ مارچ ۲۰۱۳ء کو لاہور میں واقع مسیحی برادری کی بستی جوزف کالونی، بادامی باغ کو توہینِ رسالت کے ایک مبینہ ملزم کی بستی ہونے کی پاداش میں مذہبی شدت پسند ہجوم نے آگ لگا کر راکھ کے ڈھیر میں بدل دیا۔ علاقہ کے مکینوں کے گھر، مقدسات، اور گھریلو املاک سمیت بھاری قیمت کے سامان کے مکمل طور پر خاکستر ہونے کے بعد آگ بجھانے اور قانون نافذ کرنے والے ادارے حرکت میں آئے۔مبینہ ملزم کو حراست میں لے لیا گیا اورحکومت اور خیراتی اداروں کی مدد سے بحالی اور تعمیر نو کے وعدے کیے گئے۔ تعمیرات کا کام ایک حد تک مکمل ہو چکا ہے تاہم مقامی بااثر افراد کی طرف سے انتخابات کے بعد ایسی کارروائیوں کے دوہرائے جانے کی دھمکیاں اب بھی جوزف کالونی کے مکینوں کو دی جا رہی ہیں۔ حال ہی میں قریبی آبادیوں کے بااثر لوگوں کی طرف سے یہاں کے باسیوں پر تشدد اور دھمکیوں کے واقعات نے علاقہ میں خوف و ہراس پھیلا دیا ہے اور یہاں کی مسیحی برادری کے عدم تحفظ کے احساس میں اضافہ ہوا ہے۔

توہین کے مبینہ ملزم ساون مسیح کی بہن بشریٰ نے وقوعہ کا پس منظر بتاتے ہوئے ‘لالٹین’ کو بتایا کہ اس کے بھائی کی بلیرڈ کی دوکان تھی، جس کے ہمسائے میں ایک حجام کی دوکان بھی تھی۔ ساون کے ہاں حجام کا کچھ قرض واجب الادا تھا جس کا وہ کئی دن سے تقاضا کر رہا تھا۔ بدھ کے روز وہ بلااجازت ان کے گھر داخل ہوا اور اور ساون کے ساتھ جھگڑا اور بدکلامی کی۔ جھگڑا بڑھا تو اس شخص نے ساون کو نازیبا گالیاں دینے کے ساتھ ساتھ عبرتناک انتقامی کارروائی اور توہینِ مذہب کے مقدمے میں مروائے جانے کی دھمکی دی۔
اہلِ علاقہ کے مطابق صوبائی حکمران جماعت کا حمایت یافتہ ایک بااثر شخص غزالی بٹ جو کہ جوزف کالونی کی جگہ پر ایک فیکٹری بنانے کا ارادہ رکھتا تھا، گزشتہ دو ماہ سے اہلِ علاقہ کو بستی خالی کر دینے کے لیے دھمکا رہا تھا۔ سانحے سے دو دن قبل غزالی بٹ نامی اس بااثر شخصیت کے دفتر میں تفصیلی منصوبہ بندی کی گئی اور علاقہ کے مولویوں کو بلوا کر ان سے مشاورت کی گئی۔ منصوبہ کے مطابق نمازِ جمعہ کے خطبہ میں عوام کے مذہبی جذبات کو بھڑکا کر نماز کے فوراً بعد مشتعل ہجوم کی ہمراہی میں بستی کو نذرِ آتش کیا جانا تھا۔ جمعے ہی کے دن جوزف کالونی کے باسیوں کو پولیس کے کچھ اہلکاروں نے مطلع کیا کہ بستی پر حملہ ہونے والا ہے، لہٰذا اپنی جانیں بچانے کے لیے جلد از جلد بستی کو خالی کر دیں۔اسی وقت یہاں کے باسیوں نے بستی سے نکلنا شروع کر دیا اور کچھ ہی دیر میں علاقہ خالی کر دیا گیا۔ یہ علاقہ جمعہ کی دوپہر سے لے کر ہفتے کے روز تک خالی پڑا رہا۔ہفتے کو لگ بھگ تین ہزار لوگوں پر مشتمل ہجوم بستی پر حملہ آور ہوا اور پہلے مرحلے میں گھروں سے زیورات، اور چھوٹی قیمتی اشیاء لوٹی گئیں، بعد ازاں بھاری بھرکم اشیاء پر کیمیکل چھڑک کر آگ لگا دی گئی۔ کیمیکل جلنے کی حرارت سے گھروں کے دھاتی سامان اور چھتوں کے شہتیر تک پگھل گئے۔ پولیس، جسے ممکنہ حملے کا پہلے سے علم تھا، کے سیکڑوں اہلکار موقع پر موجود تھے۔ پولیس اہلکار وقوعہ پر خاموش تماشائی بنے رہے۔ واقعہ میں ایک سو اٹھہتر گھر اور دو چرچ نذرِ آتش ہوئے اور ایک خاتون سمیت دو افراد جل کر ہلاک ہوئے۔

اتوار کے روز وزیرِ اعلیٰ پنجاب میاں شہباز شریف متاثرہ بستی کا دورہ کرنے آئے لیکن میڈیا پر بیان دینے کے بعد بستی میں داخل ہو کر متاثرین کی حالتِ زار دیکھے بغیر ہی چلے گئے، جس کی وجہ سے پنجاب حکومت کے خلاف شدید نعرے بازی شروع ہو گئی۔ صوبائی حکومت کی طرف سے پوری بستی کے متاثرین کے لیے دو شامیانے لگائے جن کے نیچے زیادہ سے زیادہ پچاس کے قریب لوگ کھڑے ہو سکتے تھے۔ حکومت کی طرف سے متاثرین کی طرف سے ایک وقت کا کھانا بھی بھیجا گیا جسے متاثرین نے لینے سے انکار کر دیا۔متاثرین کی اکثریت کے دیر تک بھوکے رہنے کے بعد اتوار کے دن تک مشنری تنظیموں اور دیگر فلاحی اداروں کی طرف سے کھانے کی شکل میں امداد پہنچنا شروع ہو گئی۔ دو ہفتے بعد پنجاب حکومت کی طرف سے متاثرین میں پانچ پانچ لاکھ کے چیک تقسیم کیے گئے، جن میں سے بیشتر چیک باؤنس ہو گئے۔بعدازاں میڈیا پر تنقید کا نشانہ بننے کے بعد ان میں سے چند چیکس کے ریکارڈ کی درستی کی گئی۔
توہین کے مبینہ ملزم کو اقلیتوں کے حقوق کے لیے کام کرنے والے کارکن جوزف فرانسس کی کوششوں سے گرفتار کر لیا گیا۔ جوزف فرانسس کے مطابق اس نے ساون مسیح کی گرفتاری میں مدد اس لیے کی کہ یہ جوزف کالونی کی باقی ماندہ آبادی کی سلامتی کے لیے مفید اور مصلت پسندانہ عمل تھا، جبکہ مسیحی آبادی میں ساون مسیح کی گرفتاری میں جوزف فرانسس کی معاونت کو ایک ناپسندیدہ قدم کے طور پر دیکھا جا رہا ہے۔ ساون مسیح کی بہن بشریٰ کا کہنا ہے کہ اس کا بھائی کسی قسم کی گستاخی کا مرتکب نہیں ہوا بلکہ اسے ایک ذاتی چپقلش میں انتقام کا نشانہ بنایا گیا ہے۔ ساون مسیح کا والد جو کہ وقوعہ کے دن دل کا دورہ پڑنے کے کی وجہ سے ہسپتال لے جایا گیا، دل کے دورے کے بعد فالج میں مبتلا ہو گیا تھا، دوہری مصیبت میں گرفتار ہے کہ اپنے علاج کے قابل نہ ہونے کے ساتھ ساتھ اسے اپنے بیٹے کی خیریت کا کوئی علم نہیں ہے اور نہ ہی اب تک اس سے اس کی کوئی ملاقات ممکن ہو پائی ہے۔ساون مسیح کی بہن کے بقول اس کی ماں کی حالت قدرے بہتر ہے جبکہ اس کا باپ ابھی تک موت و حیات کی کشمکش میں ہے، دوسری طرف ان کو آئے روز ملنے والی دھمکیوں کا سلسلہ بھی بدستور جاری ہے۔ پولیس سمیت دیگر سیاسی اداروں کا رویہ بھی نہایت امتیازی ہے۔
جوزف کالونی میں تعمیر نو کا بیشتر کام مکمل ہو چکا ہے۔ علاقہ کے مکینوں کا کہنا ہے کہ حکومت کی طرف سے تعمیر نو کے وعدوں کے بعد صرف ان افراد کے گھر سرکاری خرچ پر تعمیر ہوئے ہیں جو اپنے رسوخ کے ذریعے اداروں سے امداد حاصل کرنے میں کامیاب ہو سکے تھے۔ زیادہ تر افراد نے اپنے ذاتی اخراجات سے اپنے گھر تعمیر کیے ہیں۔ سرکاری طور پر کیے گئے تعمیر نو کے کاموں میں صرف گھر کے باہری حصوں کی معمولی مرمت کی گئی جبکہ اندرونی حصے پر محض سفیدی کر کے جلنے کے آثار چھپائے گئے ہیں۔ علاقہ مکینوں کا کہنا ہے کہ تعمیر نو کا ٹھیکہ لینے والے ٹھیکیدار کا رویہ مقامی باسیوں کے ساتھ نہایت شرمناک اور ہتک آمیز رہا۔ دیگر اداروں کی طرف سے روزمرہ تعاون میں کمی ہوئی ہے۔۴ مئی کے دن یہاں آنے والی پولیو ٹیم نے یہاں کے باسیوں اور بچوں کے ساتھ امتیازی رویے کا مظاہرہ کیا، جس پر مقامی خواتین اور پولیو ٹیموں میں جھگڑا ہو گیا، یہاں تک کہ پولیس کو بلوا کر معاملہ رفع کروایا گیا۔ سیوریج اور پانی کی فراہمی اب تک بحال نہیں ہو پائی ہے اور پینے کے پانی کے حوالے سے جوزف کالونی ایک قحط زدہ علاقے کا منظر پیش کر رہی ہے یہاں تک کہ مقامی باسیوں کو اکثر مقامات پر سیوریج کا گندا پانی پیتے دیکھا گیا ہے۔
بحالی کے کاموں میں سرکاری طور پر اس قدر غفلت اور معاشرتی طور پر امتیازی سلوک کا شکار جوزف کالونی کی آبادی کے سر سے خوف اور عدم تحفظ کے بادل ابھی تک ٹلے نہیں ہیں۔ اس کی تازہ مثال ۳۰ اپریل کو موٹرسائیکل مکینک کا کام کرنے والے کم سن بَنی مسیح پر اغواء اور تشدد کا حالیہ واقعہ ہے۔ جسے کام پر جاتے ہوئے قریبی علاقہ شیخ آباد کے چند افراد نے اغواء کر کے اس پر تشدد کیا اور بعد ازاں اس کے گلے میں رسی ڈال کر اسے گھسیٹ کرجان سے مارنے کے لیے لے جانے لگے۔ تشدد کی وجہ سے بنی مسیح کا بازو ٹوٹ گیا اور اس کی ٹانگوں اور باقی جسم پر شدید چوٹیں آئیں۔ بنی مسیح کے ذریعے علاقہ کے باسیوں تک اس دھمکی آمیز پیغام کا اعادہ کیا گیا کہ جوزف کالونی پر دوبارہ حملہ ہو سکتا ہے۔ اسی طرح جوزف کالونی کا رہائشی بابر مسیح کچھ دن قبل اپنی بہن کی شادی کی تیاری کے سلسلے میں شیخ آباد گیا، وہاں چند لڑکے بلوا کر اس پر ڈنڈوں سے شدید تشدد کیا گیا جس سے اس کی ایک ٹانگ اور ایک بازو ٹوٹ گئے۔ جوزف کالونی ہی کے ایک اور کمسن بچے کو اغواء کرنے کے بعد دو دن تک اس پر بلیڈوں کے گھاؤ اور دوسرے طریقوں سے تشدد کیا جاتا رہا۔ دو دن بعد نہایت تشویشناک حالت میں اسے رہا کیا گیا۔تشدد کے ان سب واقعات میں ایک مشترک بات یہ ہے کہ ان سب کو یہ پیغام دیا جاتا رہا کہ وہ اپنی بستی میں جا کر یہ بتا دیں کہ انتخابات تک وہ سیاسی مجبوریوں کی بنا پر کارروائی نہیں کر پا رہے ہیں، انتخابات کے بعد جوزف کالونی کے باسیوں پر پہلے سے زیادہ عبرتناک سلوک کیا جائے گا۔
ان دھمکی آمیز پیغامات کی وجہ سے علاقہ میں خوف و ہراس پھیل گیا ہے۔ علاقہ کے باسیوں کے مطابق راتوں کو کسی معمولی سے کھٹکے پر بھی مائیں اپنے بچوں کو سینے سے لگا لیتی ہیں اور لوگ کسی انہونی آفت کے لیے خود کو تیار کر لیتے ہیں۔ جوزف کالونی کے لوگوں نے حکومت سے مطالبہ کیا ہے کہ وہ تعمیر نو کے وعدوں کی بجائے انہیں جانی تحفظ فراہم کیا جائے۔ جوزف کالونی پر اس قدر شرمناک سانحہ گزرنے کے بعد بھی سرکاری اداروں کے عدم تعاون کے ساتھ ساتھ عام ہم وطنوں کی طرف سے بھی اس قدر امتیازی رویہ بجا طور پر مذہبی ہم آہنگی کی ختم ہوتی قدروں کے حوالے سے ایک بہت بڑا لمحۂ فکریہ ہے۔