ایک گیت تمہیں گھیر لیتا ہے
ایک گیت جو تم نے سن رکھا ہے
ایک گیت جو تم کبھی نہیں سنو گے
راستے میں چلتے ہوئے گھیر لیتا ہے
ایک گیت تمہیں گلے لگا لیتا ہے
ایک گیت جس کے لیے تم زندہ رہ سکتے ہو
ایک گیت جس کے لیے تم مر سکتے ہو
تمہیں پہچان کر گلے لگا لیتا ہے
ایک گیت تمہیں قتل کر دیتا ہے
ایک گیت جس سے تم محبت کرتے ہو
ایک گیت جس سے تم نفرت کرتے ہو
تمہارا گلا گھونٹ کر تمہیں قتل کر دیتا ہے
پڑے پڑے ایک کھٹا اور میٹھا گیت
بدذائقہ ہو سکتا ہے
رکھے رکھے ایک سادہ مگر الجھا ہوا گیت
شکن آلود ہو سکتا ہے
ایک گیت دُکھنے لگتا ہے
جب اس میں پیپ پڑ جاتی ہے
یا تمہارے گلے میں پھنس سکتا ہے
جب تم اسے نگلنے لگتے ہو
لیکن ایک گیت بھلایا نہیں جا سکتا
ایک بھلایا ہوا گیت
ایک خون آشام عفریت ہے
جو تمہیں بھنبھوڑ ڈالتا ہے
ایک گیت دہرایا نہیں جا سکتا
ایک دہرایا گیا گیت
ایک موذی عادت ہے
جو تمہیں تھکا دیتی ہے
ایک گیت گایا نہیں جا سکتا
ایک گایا گیا گیت
ایک بے کار سہولت ہے
جسے تم کبھی استعمال نہیں کر سکتے
