Tag: siddique shahid

مشکل شہروں میں
آسانی سے خرچ ہو جاتے ہیں
آدمی….. آٹھ سے پانچ تک
اور ڈھے جاتے ہیں

سینیما گھروں پر
چائے خانوں پر
سگریٹ پان کے ٹھیلوں پر
طوائفوں کے دروازوں پر

دھری رہ جاتی ہیں
چوباروں اور جھولوں میں
انتظار کے گٹھر کھولتی
حاملہ محبوبائیں

تکتی رہ جاتی ہیں
برامدوں اور مٹکوں کو
موت کی ٹہنی سے جھولتی
کبڑی مائیں

ہنستے رہ جاتے ہیں
برگد اور بیری کے پیڑ
گمشدہ یاداشتیں دہراتے
کچے پکے دوست

روتے رہ جاتے ہیں
آہلنوں اور واکروں میں
دانہ چگتے, دودھ پیتے
چڑیا اور آدمی کے بچے

حیران رہ جاتے ہیں
مشکل شہروں میں
آسانی سے ختم ہوتے آدمی

وہ میرے دل کو ایسے بھر دیتا ہے
جیسے سناٹا خالی کمرے کو
ربط اور ضبط کی ساری گرہیں ان آنکھوں کی دلچسپی سے کھلتی ہیں
جن آنکھوں کی حیرانی سے باغ عدن کے تالے کھلیں گے

بھر دیتی ہیں
وہ آنکھیں مجھ کو بھر دیتی ہیں
خوف اور لذت سے
اک مصنوعی وصل کی وحشت سے
رک جاتا ہوں
میں بھرا بھرایا رک جاتا ہوں
ان رستوں پر
جن رستوں کی بھول بھلیاں مجھ کو ایسے سیدھی ہیں
جیسے مقناطیس کو لوہا
جیسے مقتول کو قبر کی مٹی

ہنستے ہنستے رہ جاتا ہوں
اپنے دل کی ویرانی پہ
اور ان آنکھوں کی حیرانی پہ
جب وہ میرے دل کو ایسے بھر دیتی ہیں
جیسے آخری ہچکی بھر دیتی ہے
کمرہ موت کی خوشبو سے