Tag: محبت

“میں اپنے لیے جیون ساتھی خود تلاش کرنا چاہتا ہوں مگر مسئلہ یہ ہے کہ اسے کہاں ڈھونڈوں؟ یونیورسٹی میں ایک لڑکی سے پوچھا کہ کیا ہم ایک دوسرے کے ساتھ کچھ وقت گزار سکتے ہیں؟ جواباً نہ صرف اس نے مجھے سخت سست سنائیں بلکہ لڑکیوں میں مجھے چھچھورا مشہور کردیا۔ اپنے دفتر میں بھی ایک لڑکی پسند ہے مگر وہ میرے سلام کا جواب تک نہیں دیتی مزید بات کیا کروں۔ مجھے سمجھ نہیں آتی کہ وہ منڈی کہاں لگتی ہے جہاں ہم اپنے لیے بر تلاش کرسکیں؟”
یہ المیہ پاکستان کے ایک ایسے نوجوان کا ہے جس نے ابھی پیشہ وارانہ زندگی میں قدم رکھا ہے۔ ان صاحب کے مطابق انہوں نے اپنے والدین سے خاصی بحث و تمحیص کے بعد انہیں قائل کر لیا ہے کہ وہ اپنی پسند کی کسی لڑکی سے شادی کریں گے جسے وہ اچھی طرح جانتے ہوں مگر وہ اپنی تلاش میں تاحال کامیاب نہیں ہوپائے۔
برصغیر میں محبت عام لوگوں کے لیے صدیوں سے شجر ممنوعہ رہی ہے، ہیر رانجھا، سسی پنوں، سوہنی مہینوال، مرزا صاحباں، آدم خان و درخانی، ہانی و شاہ مرید عشق کی سبھی داستانوں میں سماج نے محبت دشمنی کا ثبوت دیا ہے۔ اگرچہ بادشاہوں اور امرا کے حرم ہمیشہ آباد رہے ہیں لیکن شہزادے سلیم کی انارکلی کو بھی دیوار میں چنوا دیا گیا تھا۔ محبت کی کہانیاں ہر خطے اور ہر دور میں موجود رہی ہیں اور محبت کرنے والوں کی جدائی لوگوں کے دلوں میں گداز پیدا کرتی آئی ہے۔لیکن جدیدیت اور انفرادی آزادیوں کے تصورات کے پھیلاو کے ساتھ اب یہ چند افراد کی کہانی نہیں رہی بلکہ پاکستان کے اکثر نوجوانوں کا مسئلہ بن گیا ہے۔ جدید اور قدیم اخلاقیات کے انتخاب میں الجھی یہ تعلیم یافتہ نئی نسل اپنی زندگیوں کا ہر اہم فیصلہ خود کرنا چاہتی ہے مگر ان کی راہ میں کئی رکاوٹیں حائل ہیں۔ اکثر لڑکے اور لڑکیاں خود سے کسی ساتھی کی تلاش میں ناکام رہتے ہیں کیونکہ مغربی معاشروں کی طرح پاکستان میں مخالف جنس سے براہ راست اظہار دلچسپی آسان نہیں۔ اس مرحلے کو عبور کرلینے والوں کی راہ بھی آسان نہیں ہوتی خاندانی، معاشرتی اور معاشی پس منظر کے جھگڑوں میں کئی محبتیں اور مطابقتیں دم توڑ دیتی ہیں۔

لاہور کی فارمن کرسچن کالج یونیورسٹی سے فارغ التحصیل رابعہ کی کہانی ایسی ہی ہے۔ ان کی اپنے ہم جماعت علی سے دوستی قلبی رشتے میں بدل گئی اور دونوں نے شادی کا فیصلہ کیا۔ ابتداً لڑکی کے والدین نے اس پر اعتراض نہیں کیا مگر اس بات کا علم ہونے پر کہ لڑکے کا تعلق کسی دوسرے فرقے سے ہے انہوں نے فوراً اس رشتے سے انکار کردیا۔ رابعہ نے دو سال تک اپنے لیے آنے والے ہر رشتے سے انکار کیا۔ مگر آخر کار والدین کی جذباتی دھمکیوں میں آکر گذشتہ برس دسمبر میں ان کی پسند کے لڑکے سے شادی کرلی۔اسلام آباد کے ایک سرکاری ادارے میں کام کرنے والے زمان کو بھی ان کی محبوبہ کے گھر والوں نے اس لیے رد کردیا کیونکہ ان کا تعلق اسماعیلی فرقے سے تھا۔ اب وہ عمر بھر شادی نہ کرنے کا ارادہ رکھتے ہیں۔
اگرچہ وا بستگیوں اور معاشقوں کے قصے ہمارے ہاں بڑی دلچسپی سے نجی محفلوں میں بیان کیے جاتے ہیں لیکن ایک عمومی اندازے کے مطابق ایسے لوگوں کا تناسب خاصا کم ہے جنہیں اپنی پسند کے ساتھی کی تلاش اور شادی کے مراحل میں کامیابی نصیب ہوتی ہے۔
لاہور کے ایک معروف ٹیلیویژن چینل میں کام کرنے والی ماریہ اب تک اکیلی اس لیے ہے کیونکہ اسے اپنی پسند کا کوئی لڑکا نہیں ملا۔ اس کا کہنا ہے کہ میری سہیلیوں میں سے اکثریت اپنے کسی مرد دوست سے شادی کی خواہاں ہیں مگر اب تک جتنی سہیلیوں کی شادیاں ہوئیں وہ ان کے والدین کی پسند کے لڑکے سے ہوئی ہیں۔ میں چاہتی ہوں کہ لڑکا میری پسند کا ہو اور ہم میں ایک مطابقت ہو اس کے لیے ضروری ہے کہ ہم شادی سے پہلے ایک دوسرے کو جانتے ہوں مگر میں اس بات سے خائف ہوں کہ ہمارے ہاں ایسے تعلقات کو بری نگاہ سے دیکھا جاتا ہے۔

مادی سہولتوں کے ساتھ ساتھ سائنس کی بدولت معاشرتی اخلاقیات خاص کر جنسی اخلاقیات میں انقلابی تبدیلیاں رونما ہوئی ہیں۔ کئی قدیم معاشروں میں آزادانہ جنسی اختلاط پر پابندی کی وجہ اس کے نتیجے میں پیدا ہونے والے بچے کی پرورش کا مناسب انتظام نہ ہونا تھا مگر مانع حمل ادویات اور اشیا کی ایجاد نے اس تصور کو راسخ قرار دے دیا۔ انہیں ایجادات کے بعد مغرب میں نئے جنسی رجحانات نے جنم لیا ۔ اس بات سے قطع نظر کہ یہ تبدیلی مثبت رہی یا منفی، اس نے لوگوں کو شادی سے پہلے اپنے ساتھی کی ہر ممکن جانچ پرکھ کی آزادی عطا کی۔
سائنسی تحقیق کے مطابق قریبی خاندان میں شادیاں موروثی بیماریوں کے پھیلاو کا عام سبب ہیں اور مختلف نسلی پس منظر کے حامل جوڑے کے ہاں پیدا ہونے والا بچہ نسبتاً بہتر جسمانی و ذہنی صلاحیتوں کا مالک ہوتا ہے۔
مردانہ برتری والے ہمارے معاشرے میں بظاہرایسا معلوم ہوتا ہے کہ لڑکیوں کو اپنے لیے کسی لڑکے کی تلاش میں زیادہ مشکلات کا سامنا کرنا پڑتا ہوگا لیکن لڑکوں کا معاملہ بھی کچھ مختلف نہیں ہے۔ لاہورکےمقامی کالج میں اردو کے استاد علی کو اپنی یونیورسٹی ہم جماعت سے شادی کرنے کے لیے کئی سال انتظار کرنا پڑا کیونکہ ان کے گھر والے اس رشتےکے لیے راضی نہیں ہورہے تھے۔ان کے دوست عبدالرحمان کے والدین نے ان کی شادی ان کی عم زاد سے طے کررکھی تھی جس نے مقامی کالج سے اسلامیات میں ماسٹرز کی ڈگری لی تھی اور سخت مذہبی نظریات کی حامل تھی جبکہ موصوف آزاد خیال واقع ہوئے تھے۔ اس رشتے کو ختم کرنے کے لیے انہیں خاصی مزاحمت کرنا پڑی۔

اس سارے قصے کا ایک اور اہم پہلو طبقاتی تقسیم بھی رہا ہے۔ اشرافیہ میں مردوزن کے آزادانہ میل جول اور تعلقات خاصے عام رہے ہیں جبکہ دیہات اور پسماندہ علاقوں میں خاندانی روایات کے برعکس ایک دوسرے کا ہاتھ تھامنے والے جوڑے قتل ہوتے آئے ہیں۔ شہری و نیم شہری متوسط طبقات کی نئی نسل اپنے والدین اور نئی اقدار کے مابین بری طرح سے پھنسی نظر آتی ہے۔ ماہرین نفسیات اس بات پر متفق ہیں کہ ایک خاص عمر کے بعد اکیلا پن انسان کی صلاحیتوں پر منفی اثر ڈالتا ہے جبکہ جوان افراد کی جذباتی او جسمانی ضروریات کی آسودگی ان کی کارکرگی پر مثبت طور پر اثر انداز ہوتی ہے۔
ویلنٹائن ڈے کے موقع پر جہاں لاہور، اسلام آباد اور کراچی جیسے بڑے شہروں میں جوڑے زمانے کی نظروں سے بچ کر عہد و پیمان باندھ رہے ہیں تو اس موضوع پر مربوط اور جامع سماجی مکالمے کی ضرورت اور شدت سے محسوس ہونے لگتی ہے۔ کیا محبت کرنا ہماری تہذیبی روایات سے متصادم ہے؟ اگر ایساہے تو اس تصادم میں ہمیں کس کا ساتھ دینا ہے؟ ان سوالات کے جوابات آج کے نوجوان کے جذباتی مسائل کا حل ثابت ہوسکتے ہیں۔ معاشرہ بھلے جو بھی کہتا رہے، لیکن حقیقت یہ ہے کہ محبت کرنے والے کم نہ ہوں گے۔

محبت چار حرفی لفظ جو کہیں پہ بادشاہ افلاک ہے تو کہیں مطعون و راندہ درگاہ۔ محبت جس کے بارے میں سب کا اتفاق ہے الہامی جذبہ ہے۔ خدا خاص دلوں پر ودیعت کرتا ہے۔ ہم سب محبت اور محبت کرنے والوں کے لیے ہمدردی رکھتے ہیں کیوں کہ ہم محبت کرنے والی قوم ہیں۔ہماری دھرتی سے محبت کی الہامی داستانیں جڑی ہیں جو ہم کو بتاتی ہیں کہ ہم سے زیادہ محبت کو مان دینے والا کوئی نہیں۔ ہم محبت اور محبت کرنے والوں کو عزت اورمان دیتے آئے ہیں۔ اس لیے بھی کہ محبت میں دو دل انتہائی مخلص ہوتے ہیں، ان کے لیے دنیاوی جاہ و جلال بے معنی ہوتاہے۔ شاہان وقت اپنی سلطنت کو ٹھوکر مار کر محبت کے پیچھے چل پڑتے ہیں۔ یہ مخصوص اور پاک دلوں پر اتاری جانے والی ایسی نعمت ہے جس کا کوئی نعم البدل نہیں۔ شاعروں کی شاعری، گیتوں ،غزلوں، لوک داستانوں، رنگ دھنک، سنورنا، خوشی، سکون؛غرض کے ہر انسانی جذبے پر حاوی یہ جذبہ محبت ہے۔ اولیا اللہ کا کلام،صوفیوں کے تصوف کی بنیاد سب محبت عشق پر رکھی ہے۔ سب عشق مجازی کو عشق حقیقی اور خدا تک پہنچنے کا زریعہ گردانتے ہیں۔لیکن!!!!

چلیں کہانی شروع کرتے ہیں۔

ایک لڑکی تھی یہ غریب بھی ہوسکتی ہے اور امیر بھی، کالی گوری درمیانی شکل کی بھی، تعلیم یافتہ بھی ہو سکتی ہے اور کم پڑھی لکھی بھی۔ دور دیس سے آیا ایک لڑکا، یا چلیں دور دیس سے نہیں بھی آیا ، کہیں آس پاس ہی تھا۔ دونوں نے ایک دوسرے کو دیکھا محبت کے آسمانی جذبے نے ان دونوں کو اپنی گرفت میں لے لیا، خلوص اور سچائی نے ایک دوسرے کو شناخت کر لیا،دونوں معصوم دلوں نے ساتھ جینے مرنے کی قسمیں کھا لیں ۔۔۔۔اور محبت ہوگئی۔

اب اس کہانی میں ولن کی آمد ہوئی۔ یہ ولن ظالم سماج بھی ہو سکتا ہے، لڑکی کا باپ اور بھائی بھی۔ لڑکے کی بھابھی یا ماں یا بھائی، لڑکی کا کوئی پڑوسی رشتے دار بھی اور لڑکے پر فریفتہ کوئی اس کی رشتے دار بھی۔ تو بس ولن نے ہر ممکن کوشش کی کہ یہ ملاپ نہ ہوپائے۔ لیکن سچے جذبوں نے ہر مشکل کو شکست ِفاش دے کر اپنا آپ منوا لیا۔ ہم سب خوش کہانی بھی ختم۔
نہیں کہانی ایسے ختم نہیں ہوا کرتی۔ یوں ہوا کہ بدنیت ولن یا ظالم سماج یا لڑکی کے باپ کا کردار بہت اہم ہوگیا ، انہوں نے لڑکی کو گھر میں قید کر دیا۔ مار پیٹ بھی کی جارہی ہے کھانا پینا بھی بند ہے، بے چاری بہت تکلیف میں ہے،رو رو کر بے حال ہے۔ بالکل اجڑ گئی ہے اس کی کھلکھلاتی ہنسی، آنکھوں کی چمک اور وجود کا بانکپن سب کھو گیا۔ اب وہ بھٹکتی اداس روح ہے اور ظالم سماج اسے اس کے محبوب کے علاوہ کسی بھی نالائق کے ساتھ بیاہنے کو تیار ہے۔
اب پنڈال سج گیا ہے، درمیان میں متوقع دلہا بیٹھا ہے۔ اس کی آنکھیں ایک لڑکی کو بانہوں میں بھرنے کے خواب دیکھ رہی ہیں۔ دلھا اپنے جوان ارمانوں کی پیاس اندر دلہن بنی لڑکی کے وجود کے رس سے بجھانے کے لیے بے تاب ہے۔ اندر لڑکی کو غش پر غش آرہے ہیں، وہ بے دم بے جان پڑی ہے۔ کیا اس لڑکی نے اب ساری زندگی دل میں کسی اور کو بسا کر اپنا جسم کسی دوسرے کو سونپنا ہے؟جس نے پرائے مرد کو اور اس کے لمس کو تاعمر یوں سہنا ہے کہ نکاح کے دوبول بھی اس مرد کو، اس شوہر کو اس کے لیے پرایا ہی رکھیں گے۔
ایسا کرتے ہیں ہیرو کو یہاں لے آتے ہیں تو جناب موقع پا کر ہیروبھی یہاں آجاتا ہے۔ تسلی ہوئی اب آپ کو! شاید کچھ حالات بہتر ہوسکیں۔ ہیرو نے یہاں آ کر لڑکی کو آواز دی، محبوب کی آواز نے اس کے تن من میں بجلی سی بھر دی اور وہ بھاگ کر اپنے محبوب کی پناہ میں آگئی۔ یہاں ظالم سماج دونوں کو گولی بھی مار سکتا ہے، یہ بھی محبت کی جیت کا ایک رائج طریقہ ہے۔ چلیں زیادہ افسوس نہیں کرتے ابھی اس انجام کو موقوف کرتے ہیں۔
چلیں یوں کرتے ہیں کہ محبوب کو چھپا کر لے آتے ہیں جو عین موقع پر لڑکی کو وہاں سے آزاد کروا کر (عرف عام میں بھگا کر) لے جاتا ہے۔ اب دونوں ادھر ادھر چھپتے پھر رہے ہیں۔ چلیں آپ کی تسلی کے لیے ان کو تین بار”قبول ہے”بھی پڑھوا دیتے ہیں۔ اب آپ بتائیے ہمیں کیا کرنا چاہیے، اب تک تو ہم سب کی ہمدردی ان دو محبت بھرے دلوں کے لیے تھیں۔ کیا ہم ان لڑکا لڑکی کی مخبری کر دیں؟ یا ان سے ہمدردی کریں؟
یہ مناظر تو ہم تقریبا تمام فلموں کہانیوں میں پڑھ دیکھ یا سن چکے ہیں۔ ہر مرتبہ ہماری ہمدردی ان مظلوم محبت بھرے دلوں کے لیے ہوتی ہے۔ اب کہانی کو آگے بڑھاتے ہیں۔فرض کیجیے یہ محبت میں مبتلا لڑکی آپ کی اپنی بہن یا بیٹی ہے اب آپ کا کیا ردعمل ہے؟ ارے ارے ناراض نہ ہوں، محض فرض ہی تو کرنا ہے۔ نہیں؟ کیوں صاحب، سوال کیوں نہیں پیدا ہوتا۔ آپ کی بہن بیٹی بھی تو انسان ہے۔ ہم پُر محبت قوم ہیں، محبت کے لیے نرم گوشہ بھی رکھتے ہیں، محبت کو عزت بھی دیتے ہیں۔ پھر!
جی جناب آپ واقعی عزت دار ہیں، تسلیم! آپ کا شملہ بھی اونچا ہے، آپ اونچے نام نسب کے، راجے یا مہاراجے بھی ہوسکتے ہیں۔لیکن ابھی کہانی کے شروع میں آپ نے مانا تھا محبت بھی عزت دار جذبہ ہے، اولیا کی میراث ہے۔ اگر عشق ِمجازی کے ذریعے آپ کی بہن بیٹی بھی عشق حقیقی کو پا لے تو کچھ ایسا غلط بھی نہیں۔صاحب ٹھنڈے دل سے بغور سنیے۔ دیکھیے گناہ تو نہیں کیا ہے دونوں نے۔ آپ نے تو تمام عمر محبت کے حق میں جذبات رکھتے ہوئے تمام فلمیں ازبر کر رکھی ہیں۔ جوانی تو آپ پر بھی آئی تھی اور وہ بھی منہ زور رہی ہوگی۔ یہ آپ یک دم اب آپے سے باہر کیوں ہوگئے؟ ارے آپ تو زندہ گاڑ دینے کی بات پر اتر آئے، اس طرح آمادہ قتل ہوجانا کوئی دانشمندی تو نہیں۔
اچھا چلیں لڑکی نہیں لڑکا آپ کا بھائی یا بیٹا ہے۔ بس اب تو آپ مطمئن ہیں۔ ہاں کام تو غلط ہے کسی کی لڑکی بھگانا لیکن اب آپ لڑکے کا ساتھ دیں گے آخر کو آپ کا خون ہے۔ اور خم ٹھونک کر بھی آپ یہ کہہ سکتے ہیں کہ بھئی مردوں والا کام کیا ہے لڑکے نے۔ آپ کا شملہ مزید اونچا بھی ہو سکتا ہے اس کارنامے سے۔
چلیں پھر ایسا کرتے ہیں تھوڑا آگے بڑھاتے ہیں اس کہانی کو،آپ لڑکے کے بھائی ہیں، ایک چھوٹا سا مسئلہ ہے۔ وہ یہ کہ لڑکی بیوہ اور دو چھوٹے بچوں کی ماں بھی ہے۔ کم عمری میں بیوہ ہوگئی بے چاری،والدین شادی کرنا نہیں چاہتے اور بچوں سمیت کوئی اس کو قبول کرنے کو تیار بھی نہیں تھا۔ امید ہے اب تو کوئی اعتراض نہیں ہوگا آخر کو انبیا کی سنت ادا ہونے جا رہی ہے۔

کیا ! آپ غیر خون کو اپنے خاندان میں نہیں ملائیں گے؟ ارے بھائی آپ کے بھائی کے نطفے سے جو اولاد پیدا ہوگی وہ تو غیر نہیں ہو گی نا یہ دو بھی پل جائیں گے۔ چلیں کچھ بھی سہی آپ کے بھائی نے محبت بھی کی اور ثواب کا کام بھی، اب دو بول پڑھوا دیجیے۔ کیوں ہرگز نہیں؟ اب آپ بھائی کی عقل پر ماتم کر رہے ہیں اور اسے تنبیہہ بھی کر رہے ہیں کہ پرائے بچوں کی ذمہ داری نہ لے۔ بھابی جی، ماں جی آپ ہی سمجھائیں، آپ تو ایک عورت کا ساتھ دیجیے۔ کیا کہا ماں جی! آپ کے خیال میں یہ لڑکی نہیں عورت ہے ، اور وہ بھی عمر دار ، پکی اور خرانٹ بھی، جس نے آپ کے بھولے معصوم لڑکے کو پھنسا لیا ہے۔ ارے ماں جی عمر کا اعتراض ، چہ معنی دارد! آپ تو سارا دن مصلے پر گزارتی ہیں۔ ام المومنین رضی اللہ تعالہ عنہا کے نقش قدم کو زاد ِحیات گردانتی ہیں۔ حضرت خدیجہ رضی اللہ تعالی عنہا بھی تو بڑی عمر کی تھیں۔ کیا کہا آپ کو قبول نہیں، آپ کے پیارے نبی صلی اللہ علیہ وآلہ وسلم کو تو قبول تھا۔ نبی کی ساری سنتیں عزیز ہیں اس ایک سنت کے سوا؟
اچھا چلیں فرض کرتے ہیں لڑکی غیر مذہب سے ہے، اب آپ کے لڑکے کے واسطے تبدیلی مذہب کو تیار ہے، اب آپ کی کیا رائے ہے؟ ہائے! کیسا تقدس ،کیسی مسرت بھری مسکراہٹ ہے، مانو جنت کی ہوا آپ نے یہیں محسوس کرلی۔ آپ کے ہاتھ پر کوئی لڑکی اسلام قبول کرنے جا رہی ہے۔ لیکن نہیں وہ تو آپ کے لڑکے کو قبول کر رہی ہے تبدیلی مذہب تو بس بہانہ ہے۔ چلیں آپ راضی تو ٹھیک۔ لیکن مسئلہ یہ ہے کہ وہ دل سے مذہب بدلنا نہیں چاہ رہی تو رہنے دیجیے۔ دونوں اپنے مذہب پر چلتے رہتے ہیں، کوئی بات نہیں۔ ارے نہیں بنائے گی آپ کی نسل کو کافر، اتنا ڈر کیسا، آپ کا سچا مذہب اس کو متاثر کر لے گا، اپنے مذہب کی سچائی اور اچھائی پر بھروسہ کیجیے۔
اچھا آپ نہیں مانتی ہیں اور لڑکی کی ماں بھی نہیں مانتی۔ لڑکی کی ماں کی شرط ہے آپ کا بیٹا مذہب بدلے، اب بتائیے؟ کیا! اب آپ اپنے بیٹے کو ایسی حرکت پر دودھ نہیں بخشیں گی! لیکن ابھی تو آپ لڑکی کا مذہب بخوشی بدلوا رہی تھیں، تو لڑکے کا کیوں نہیں؟ محبت میں دو لوگ ایک دوسرے کو قبول کرتے ہیں یہ مذہب ،فرقہ،ذات پات، زبان ،قومیت ،عمروں کا تفاوت یہ سب تو ذیلیات ہی ہیں۔
اچھا چلیں یہ الہامی جذبہ، یہ خدا کا انعام خدا نے ایک شادی شدہ عورت کے دل میں اتار دیا۔ یہ لڑکی کسی کی بیوی ہے، اپنے گھر مطمئن تھی، لیکن کیا کیجیے محبت کے درد سے کون دامن بچا پایا ہے۔ کئی ایک فلموں میں بھی میں نے خود دیکھا، آپ سب کی ہمدردی اس لڑکی کے لیے تھی۔ اب۔۔۔ ارے نہیں صاحب غصہ نہیں۔ ٹھنڈے دل سے سنیے، سمجھنے کی کوشش تو کیجیے۔ لاحول نہ پڑھیےبخدا اس میں کوئی بے حیائی نہیں۔ دونوں نے کوئی گناہ نہیں کیا۔ دونوں بہت نیک ہیں، بس خدا نے محبت ڈال دی دلوں میں۔ کیوں ایسا کیوں نہیں ہو سکتا۔ یہ بے اختیار جذبہ تو کسی کو بھی اپنا اسیر کر سکتا ہے۔ کس کتاب میں لکھا ہے کہ خدا محبت صرف کنوارے دلوں میں ہی ڈالے گا؟

اچھا ایک آخری فرض کر لیجیے۔ بس جان کی امان پاتے ہوئے ایک آخری فرض کرنا چاہتی ہوں۔ دل سنبھال کر رکھیے، میرا سر نہ پھاڑ ڈالیے گا۔ فرض کیجیے یہ محبت خدا نے مرد کے دل میں مرد کے لیے یا عورت کے دل میں عورت کے لیے ڈال دی ہے تو، اب کیا کریں! نہیں نہیں، یہ میری رائے نہیں، خواہش بھی نہیں۔ محبت کے بارے میں بہت کچھ پڑھا یا سنا ہے جملہ خوبیاں خامیاں علامات سب پڑھیں، تو یہ قسم بھی تو ہو سکتی ہے نا! ایک محبت سو فسانے پڑھے یہ ایک سو ایک واں بھی سہی۔