ہمیں ایک دن جدائی کا گیت گانا ہے

ہمیں ایک دن جدائی کا گیت گانا ہے
سروں پر گرد ڈالے ہوئے
یا ہاتھوں میں پھول لئے ہوئے
گھروں میں روٹیاں پکاتے ہوئے
یا کھیتوں میں ہل چلاتے ہوئے
دفتروں میں فائلوں کو بھرتے ہوئے
یا سیمنٹ کی بوریاں ڈھوتے ہوئے
ہمیں ایک دن جدائی کا گیت گانا ہے

شاہراہوں اور میدانوں میں دوڑتے ہوئے
یا باغوں میں تتلیاں پکڑتے ہوئے
ریل کی پٹڑی پر پتھروں کی سرگوشی سنتے ہوئے
یا دریاوٗں اور ہواوٗں میں تیرتے ہوئے
باپ کے بوسے کا لحن حفظ کرتے ہوئے
یا اپنی کوکھ سے کسی کو جنم دیتے ہوئے
ہمیں ایک دن جدائی کا گیت گانا ہے

اڑن کھٹولوں پر ہوا کے ساتھ اڑتے ہوئے
یا ضیافتوں میں قہقہوں کو بسر کرتے ہوئے
لفظوں کی مزدوری کرتے ہوئے
یا اضطراب کی لے پر زندگی کی دھن ترتیب دیتے ہوئے
آنکھوں کے پیالوں کو منظر سے بھرتے ہوئے
آتے ہوئے یا جاتے ہوئے
ہمیں ایک دن جدائی کا گیت گانا ہے
سردیوں کی دھوپ سینکتے ہوئے
یاپسینے میں نہائےتھکن زدہ جسم کا بوجھ اٹھاتے ہوئے
محملوں میں پلتے ہوئے
یا خانہ بدوش ہوا کے ساتھ سفر کرتے ہوئے
بارگاہوں میں پیشانی کا قرض اداکرتے ہوئے
یا بستروں پر لذت کشید کرتے ہوئے

جاگتے ہوئے یا سوتے ہوئے
ھنستے ہوئے یا روتے ہوئے
ہمیں ایک دن جدائی کا گیت گانا ہے