میں وقت کے چڑیا گھر
جانوروں کے جنگلوں میں ان کی
تمام تر ضرورتوں کے ساتھ دی گئ آزادی
اور تمہارےدل کے کونے کھدروں میں
میرےجنون کو دی گئ آزاری میں
کچھ زیارہ فرق نہیں دیکھتی
سدھانےکے لئے انتظامیہ کی یومیہ اور
ہفتہ وار میٹنگ کے ذریعے بے مہابہ جذبوں کو
اصولوں کے مطابق سدھانے کا بھرپور عمل
نتیجہ خیز ثابت ہو رہا ہے
مگر مجھےاعتراف ہے کہ جنگلےکے اندر میری
ضرورتوں کا پورا پورا خیال رکھا جا رہا ہے
میری خوراک اور پانی پابندی سے مقررہ وقت پر
پہنچائی جا رہی ہے
سلاخوں کے اندرکا پورا علاقہ میری دسترس میں
دے دیا گیا ہے
مگر تماش بینوں کے روائتی شوق سے پہنچنے والی
اذیت سے تحفظ بھی دیا جا رہا ہے
کھولیوں میں بقائے باہمی کے زریں اصول کے تحت
دوسرے جنگلوں تک پہچنے کے راستےبھی مسدود
کر دیئے گئے ہیں
سبزے کائی پتھروں اور تالاب کے زریعے مصنوعی دنیا کی
بنت ایسی ضرور ہے
کہ کوئی بھی اس پہ اصل ہونے کا دھوکا
کھا سکتا ہے
سو میں بھی اپنے آپ کو اس خوبصورت ماحول
کا عادی بنا نے کی مکمل کوشش کر رہی ہوں
