عشرہ // ہر کسی کو مار دو

عشرہ — دس لائنوں پر مبنی شاعری کا نام ہے جس کے لیے کسی مخصوص صنف یا ہئیت، فارم یا رِدھم کی قید نہیں. ایک عشرہ غزلیہ بھی ہو سکتا ہے نظمیہ بھی۔ قصیدہ ہو کہ ہجو، واسوخت ہو یا شہرآشوب ہو، بھلا اس سے کیا فرق پڑتا ہے۔ ادریس بابر

کون سی شکایتیں ؟؟ کون سی ملامتیں ؟؟
یا اللہ ۔۔ یا رسول ۔۔ خوف کی علامتیں!
مسل دو ہر ایک پھول، ہر کلی کو مار دو — ہر کسی کو مار دو

الف ہے واجب القتل بے کے نیک خیال میں
جیم کیوں نہ ہو شریک دال کے قتال میں
اے کو بی کو مار دو سی کو ڈی کو مار دو — ہر کسی کو مار دو

کچھ کہے یا نہ کہے، کچھ کرے یا نہ کرے
جو تمہیں نہیں پسند، کل کیا آج ہی مرے!
تم سے جتنا ہو سکے، زندگی کو مار دو — ہر کسی کو مار دو

احتیاط ہی کرو، بس! سبھی کو مار دو — ہر کسی کو مار دو