Tag: ممتاز قادری

اسلام آباد ہائیکورٹ نے ممتاز قادری کی اپیل کا فیصلہ سناتے ہوئے دہشتگردی کی دفعات کو کالعدم قرار دے دیا ہے۔یاد رہے کہ سابق گورنر پنجاب سلمان تاثیر کو 4 جنوری 2011 کو اُن کے اپنے سیکیورٹی گارڈ نے اسلام آباد میں ہلاک کردیا تھا۔ جس کے بعد انسدادِ دہشتگردی کی عدالت نے ملزم ممتاز قادری کو سزائے موت کی سزا سنائی تھی۔ اس فیصلے کو اسلام آباد ہائیکورٹ میں چیلنج کیا گیا تھا جس کے دو رکنی بنچ نے فریقین کے دلائل سننے کے بعد ممتاز قادری کی انسداد دہشت گردی کی عدالت سے ہونے والے سزائے موت کیخلاف اپیل پر فیصلہ محفوظ کرلیا تھا۔

اسلام آباد ہائیکورٹ کے فیصلے میں ممتاز قادری کو انسداد دہشتگردی کے قانون کے تحت دی گئی سزا کو کالعدم قرار دے دیا گیا ہےجبکہ دفعہ 302 کے تحت سزائے موت کو برقرار رکھا گیا ہے۔ یہ بھی اچھا ہے کیوں کہ محترم ججز کے لیے اپنی جان بچانا بھی تو ضروری ہے، اب کون خطرہ مول لے، روپوشی اختیار کرے، دھمکیاں سنے اور ثواب کمانے کا ایک موقع ہاتھ سے جانے دے اس لیے بہتر ہے کہ کچھ مصلحت سے کام لیا جائے۔ فاضل ججز کی فہم و فراست کی داد دینی چاہیے کہ انہوں نے ایک تیر سے دوشکار کیے، سانپ بھی مار دیا اور لاٹھی بھی نہ ٹوٹنے دی اور ہینگ پھٹکڑی کے بناء ہی چوکھا رنگ چڑھا دیا ؛اپنی جان بھی بچا لی اور “انصاف ” کے تقاضے بھی پورے کر دیے۔ اسلام آباد ہائیکورٹ کے فیصلے کے بعد ممتاز قادری کے حامیوں نے ہائیکورٹ کے احاطے میں ہی مٹھائی بانٹی اور ثواب کے طالب ہر فرد نے اس خوشی میں شریک ہو کر اپنے عشق مصطفی کا اظہار کیا۔یہاں یہ یاد ر ہے کے انسداد دہشتگردی کی عدالت نے اعترافِ جرم کرنے والے ممتاز قادری کو یکم اکتوبر 2011 کو سزائے موت سنائی تھی۔
انسداد دہشتگردی کی خصوصی عدالت کے جج پرویزعلی شاہ نے اڈیالہ جیل میں اس مقدمے کی سماعت کے بعد ممتاز قادری کو دو مرتبہ سزائے موت اور دولاکھ جرمانے کی سزاسنائی تھی۔اس وقت عدالت نے اپنے فیصلے میں لکھا تھا کہ “کسی کو کسی بھی جواز پر قتل کا لائسنس نہیں دیا جاسکتا”۔مگر اب اسلام آباد ہائیکورٹ نے انسداد دہشتگردی کی دفعات کے تحت سزائے موت کو ہی کالعدم قرار دے دیا ہے۔ اس کا مطلب یہ ہوا کے ممتاز قادری کا یہ اقدام دہشتگردی کے زمرے میں نہیں آتا۔ مزید یہ کے انسداد دہشتگردی کی عدالت کے جج نے جو فیصلے میں لکھا تھا کہ “کسی کو بھی کسی کو قتل کرنے کا لائسنس نہیں دیا جا سکتا” وہ بھی غلط تھامگر چونکہ ممتاز قادری کے اس اقدام سے ایک انتہائی اہم شخص ہلاک ہوااس لیے دفعہ 302 کے تحت اسلام آباد ہائیکورٹ نے سزائےموت کا فیصلہ برقرار رکھا۔
وفاقی حکومت کی جانب سے ممتاز قادری کی سزا پر عمل درآمد کے خلاف عدالت عالیہ میں درخواست پیش نہیں کی گئی تاہم جیسے سزا کے خلاف سماعت میں سرکاری وکیل اپنی ذمہ داری رسماً نبھانے کو پیش ہوتے رہے ہیں ویسے ہی آگے بھی چلتا رہے گا۔بہرحال ابھی تو ہائیکورٹ میں اپیل کا فیصلہ آیا ہے جس میں اعلیٰ عدالتی روایات کو برقرار رکھتے ہوئے صرف انسداد دہشتگردی کی دفعات کو ختم کیا گیا ہے مگر دفعہ 302 کے تحت سزائے موت ابھی بھی برقرار ہےجس کے خلاف یقینی طور پر سپریم کورٹ میں بھی اپیل کی جائیگی۔
اسلام آباد ہائیکورٹ کے فیصلے کے روز ایک ٹی وی پروگرام میں ممتاز قادری کے وکیل کا موقف تھا کہ یہ ہماری بہت بڑی کامیابی ہے کہ اسلام آباد ہائیکورٹ نے دہشتگردی کی دفعات کو کالعدم قرار دے دیا ہے یہ ہماری فتح ہے اور سپریم کورٹ میں اپیل کر کے ہم دفعہ 302 کے تحت دی جانے والی سزائے موت کو بھی کالعدم قرار دلوالیں گے( شاید وہ یہ بتانا بھول گئے کہ اگر گھی سیدھی انگلیوں سے نہ نکلتا تو ممتاز قادری کے جانثار انگلیاں ٹیڑھی کرنا بھی جانتے ہیں)۔

ان کا کہنا تھاکہ ممتاز قادری نے کوئی جرم نہیں کیا اور انھوں نے ایک سچا مسلمان ہوتے ہوئے اپنا فرض نبھایا تھا۔ ان کا مزید کہنا تھا کہ ممتاز قادری نے حکومتِ پاکستان کے ساتھ وفاداری کا حلف اٹھایا تھا نا کہ کسی کی ذات کی حفاظت کا۔ممتاز قادری کے وکلا کو یہ بھی امید ہے کے اس مقدمے کی پیروی کے بدلے میں جنت عطا ہوگی۔ممتاز قادری کے وکلا کا موقف تو جو بھی ہو اور بیشک کسی دلیل کے بغیر ہی ہومگر اس حقیقت میں کوئی شک نہیں کہ ہمارےمعاشرے کی ایک بہت بڑی تعداد ممتاز قادری کو ہیرو سمجھتی ہے، ایسے میں عدالت کیسے ممتازقادری کو پھانسی دے سکتی ہے؟
ماہرین کے مطابق سپریم کورٹ معاشرتی حقیقتوں اور مسلکی رجحانات کو دیکھتے ہوئے ممتاز قادری کی سزائے موت کو عمر قید میں تبدیل کردیگی اور یوں ایک طویل عرصہ جیل میں گزارنے کے بعد ممتاز قادری ایک زندہ ہیرو بن کر باہر نکلے گا۔یہ پہلو بھی اہم ہے کہ ایک طرف تو حکومت انسداد دہشتگردی کی عدالتوں سے سزا یافتہ سابق صدر پرویز مشرف پر حملے کرنے والوں کو پھانسی پر لٹکارہی ہے اور دوسری طرف اسلام ہائیکورٹ نے ممتاز قادری پرلگائی گئی انسداد دہشتگردی دفعات کو کالعدم قرار دیدیا ہے۔اس کے علاوہ اب اس بات میں کوئی شک نہیں رہا کہ ایک حاضر سروس صدر پر صرف حملہ کرنے والوں کو تو سزائے موت دی جائے گی (جس میں خوش قسمتی سے وہ بچ بھی گئے) مگر اگر کوئی حاضر سروس گورنر کو صرف ان کے مذہبی خیالات اور مذہبی قوانین کے غلط استعمال کے خلاف آواز اٹھانے کی بنا پر قتل کرتا ہے تو یہ جُرم نہیں بلکہ قاتل کے لئے باعثِ فخر ہوگا۔اسلام آباد ہائیکورٹ کے فیصلے کے بعد یقینی طور پر ممتاز قادری کے 90 وکیل بمعہ جاں نثارانِ قادری سابق چیف جسٹس لاہور ہائیکورٹ خواجہ شریف اور اسلام آباد ہائیکورٹ کے سابق جج میاں نذیر احمد کی سربراہی میں پیش ہوں گے اور پھر سماعت پر سماعت پر سماعت کا نہ ختم ہونے والا سلسلہ شروع ہوگا۔

اسلام آباد ہائی کورٹ کی جانب سے ممتاز قادری کو انسداد دہشت گردی کے قانون کے تحت دی جانے والی موت کی سزا کالعدم قرار دینا ایک شرمناک فیصلہ ہے، اگرچہ محترم عدالت نے تعزیرات پاکستان کی دفعہ 302کے تحت ممتاز قادری کی سزا برقرار رکھی ہے لیکن سلمان تاثیر کو قتل کرنے کے اقدام کو دہشت گردی کے قوانین کے تحت سزا دینے سے گریز کیاہے۔ لیکن کیا ممتاز قادری محض ایک قاتل ہے؟

نہیں، ممتاز قادری محض قاتل نہیں بلکہ ایک دہشت گرد بھی ہے۔ اس نے ان سینکڑوں، ہزاروں، لاکھوں آوازوں کو دہشت زدہ کیا ہے جو مذہب کے نام پر بننے والے غیر منصفانہ قوانین اور ان قوانین کے غلط استعمال کے خلاف بلند کی گئیں۔ اس نے انسانی حقوق کے ان کارکنوں کوخاموش ہونے پر مجبور کیاہے جو مذہب کے نام پر ہونے والے ظلم کے خلاف شمعیں روشن کرنے کو نکلتے تھے۔ جو آسیہ بی بی جیسے مظلوموں کے ساتھ کھڑے ہونا چاہتے تھے۔ جو مذہبی شدت پسندی سے لڑنا چاہتے تھے۔
نہیں ممتاز قادری صرف ایک قاتل نہیں بلکہ دہشت، مذہبی جنون اور بربریت کا ایک پیغام بر بھی ہے جس نے سبھی پاکستانیوں کو یہ پیغام دیا ہے کہ خبردار جو کوئی کبھی کسی مظلوم کے ساتھ کھڑا ہوا۔ اس نے ہم سب کو یہ جتایا ہے کہ پاکستان میں مذہبی آزادی اور اقلیتوں کے حقوق کے لیے کھڑے ہونا جرم ہے اور اس جرم کی سزا دینے کے لیے کسی عدالت کی بجائے کوئی بھی سر پھرا جنونی ایک بندوق سے آپ کو مار سکتا ہے۔
نہیں ممتاز قادری محض ایک قاتل نہیں بلکہ مذہبی شدت پسندی کا نیا چہرہ ہےاوریہ چہرہ ہے جو اس قدر بھیانک ہے کہ اس کے سامنے آتے ہی بازار، گلیاں اور مکان خالی کر دیے جانے چاہئیں۔ یہ ایک ایسی ذہنیت کا چہرہ ہے جو ہم سب پر طاقت کے زور پر مسلط کی جارہی ہے اور اس شدت پسند اور انتہا پسند نقطہ نظر سے اختلاف کی اجازت نہیں۔
نہیں ممتازقادری محض ایک قاتل نہیں بلکہ وہ دشمن ہے جسے ہم وزیرستان اور خیبر ایجنسی میں تو مارنے کو تیار ہیں لیکن اپنے نظام انصاف کے تحت سزادینے پر قادر نہیں۔ شاید اس لیے کہ مذہب اور پیغمبر امن صلی اللہ علیہ وآلہ وسلم کے نام پر قتل کرنے والے ہی ہمیں پسند ہیں، ہم ان سے خوف زدہ ہیں کیوں کہ ہم ان کا مقابلہ نہیں کرسکتے۔

ممتاز قادری صرف ایک قاتل نہیں بلکہ ان طالبان جتنا ہی ظالم اور فتنہ پرور ہے جو ہماری ریاست کو کھوکھلا کرنے میں مصروف ہیں۔ طالبان اور ممتاز قادری کی سوچ اور نظریے میں کوئی فرق نہیں اور ممتاز قادری بھی بیت اللہ محسود، حکیم اللہ محسود اور ملا فضل اللہ ہی کی طرح دہشت گرد اور قابل گرفت ہے۔ ممتاز قادری کے حامی بھی طالبان کے حامیوں کی طرح ہی پاکستان اور انسانیت کے دشمن ہیں۔
ممتازقادری صرف ایک قاتل نہیں بلکہ ایک علامت ہے، ایک آزمائش ہے اور ایک امتحان ہے۔ یہ امتحان ہے کہ ہم فیصلہ کریں کہ ہم کس کے ساتھ ہیں۔ کیا ہم ان کے ساتھ ہیں جو ممتاز قادری جیسے قاتلوں پر پھول نچھاور کرتے ہیں یا ان کے ساتھ ہیں آسیہ بی بی جیسے مظلوموں کے ساتھ کھڑے ہوئے۔ یہ آزمائش ہے کہ ہم طے کریں کہ ہم رسول اللہ صلی اللہ علیہ وآلہ وسلم سے کیسے محبت کرنا چاہتے ہیں۔ کیا ہم ممتاز قادری کی طرح لوگوں کی جان لے کر رسول اللہ صلی اللہ علیہ وآلہ وسلم سے محبت کا اظہار کرنا چاہتے ہیں یا ہم آسیہ بی بی کی رہائی کی کوشش کرکے اسلام کا وہ حقیقی پیغام امن سامنے لانا چاہتے ہیں جس کے لیے رسول اللہ صلی اللہ علیہ وآلہ وسلم کو اس دنیا میں بھیجا گیا تھا۔
نہیں ممتاز قادری ایک قاتل ہی نہیں بلکہ انسانیت کا بھی مجرم ہے کیوں کہ اس نے ایک ایسے نبی صلی اللہ علیہ وآلہ وسلم کے نام پر قتل کرنے جیسا گھناونا جرم کیا ہے جو کل انسانیت کے لیے رحمت تھے ۔ ممتازقادری صرف سلمان تاثیر، ان کے خاندان اور پاکستانیوں کا مجرم نہیں بلکہ ہراس انسان کا مجرم ہے جو نبی رحمت صلی اللہ علیہ وآلہ وسلم سے محبت کا داعی ہے۔ وہ ہر اس فرد کا مجرم ہے جو مذہب کی انتہاپسندتشریح کے خلاف ہیں، جو مذہب کو قتل و غارت گری کے لیے استعمال کرنے کے خلاف ہیں اور مذہب کے نام پر قانون ہاتھ میں لینے کے خلاف ہیں۔

ہم ممتاز قادری کو دین کا سپوت کہتے ہیں، قاتلوں کو عاشق رسولﷺ کا خطاب دیتے ہیں اور قانون کو اپنے ہاتھ میں لینے والوں کے حق میں جلسے، جلوس اور ریلیاں بھی نکالتے ہیں اور اگر ہماری رائے سے کوئی اختلاف کرتا ہے تو اسے دین دشمن اور توہین رسالتﷺ کا مرتکب قرار دے کر اس کے خلاف اعلان جنگ کر دیتے ہیں۔ ہم جنہیں عاشقان رسول ﷺ قرار دیتے ہیں وہ ایسے لوگ ہیں جن کے غیض و غضب سے کوئی محفوظ نہیں، جن کی زبانیں بہتان تراش ہیں اور جن کے ہاتھ معصوموں کے خون سے رنگے ہیں ۔ ہم نے ہر برس کی طرح اس بار بھی جشنِ ولادتِ رسولﷺ کی خوشی میں میلاد پڑھے، تقریریں کیں، نعرے لگائے، لنگر تناول فرمائے مگر نبی رحمت ﷺکے حلم، بردباری اور صبر کو اپنانے کی زحمت گوارا نہیں کی۔جشن ولادت رسول ﷺ کی شام لبرٹی گول چکر پر سلمان تاثیر کی چوتھی برسی کے موقع پر جو لوگ جمع تھے ان پر حملہ آور لوگوں کو یہ جان لینا چاہیے کہ اللہ کے نبی ﷺانتقام لینے کی بجائے معاف کرنا پسند کرتے تھے، وہ قاتلوں نہیں مظلوموں کے ساتھ کھڑے ہونے والے تھے اور اگر نہتے مظاہرین پر حملہ آور ہونے والے سمجھتے ہیں کہ اس طرح انہوں نے سچا عاشقِ رسول ﷺ ہونے کا ثبوت دیا ہے تو ان سے بڑھ کر گمراہ کوئی نہیں۔
یوں لگتا ہے کہ اب اس دیس میں حق کے لیے آواز اٹھانا ناممکن ہو چکا ہے اور محض طاقتور ہی اپنا تحفظ کر سکتے ہیں ۔ دھرنا دینے والے اور ملکی معیشت اور املاک کو نقصان پہنچانے والےچار ماہ تک دھمکاتے رہے کہ اگر کسی پولیس والے نے ان کے کسی کارکن کو ہاتھ بھی لگایا تو اسے الٹا لٹکا دیا جائے گا لیکن سانحہ پشاور کےتناظر میں پشاور مٰیں ایک پرامن ریلی کا انعقاد کرنے والے خواتین و حضرات کو ہتھکڑیاں لگا کر جیل میں ڈال دیا جاتا ہے۔ اگر ہمارے رہنما یہی درس دیں گے تو پھر عام لوگوں کا متشدد ہونا کوئی اچنبھے کی بات نہیں ہے کیونکہ ہمیں یہی درس دیا جاتا ہے کہ آپ عقلِ کل ہیں اور جو بھی آپ سے اختلاف کرے وہ آپ کا مخالف ہے اور آپ کو چاہیے کہ آپ اسے منہ توڑ جواب دیں۔ ہم نے یہی سیکھا ہے کہ اپنے مقاصد کے حصول کے لیے تشدد کا استعمال ہمارا حق ہے کیوں کہ حکقمت ہمیں تحفظ فراہم نہیں کر سکتی۔

دہشت گردی کا مقابلہ کرنے میں حکومت کی بے بسی مولوی عبدالعزیز کے ناقابل ضمانت وارنٹ گرفتاری جاری ہونے اوران کی جانب سے کھلے بندوں یہ کہنا کہ نہ وہ اس وارنٹ کو چیلنج کریں گے اور نہ ہی گرفتاری دیں گے، سے ہی ظاہر ہے۔ حکومت اپنی تمام تر مشینری کے باوجود اس قابل نہیں کہ انہیں ہتھکڑی لگا کر عدالت میں پیش کرسکے۔ وزیراعظم صاحب قوم سے خطاب کرتے ہوئے کہتے ہیں کہ کسی بھی شخص یا گروہ کو لسانی مذہبی یا علاقائی منافرت پھیلانے کی اجازت نہیں دی جائے گی اور اس سے سختی سے نمٹا جائے گا لیکن دوسرے ہی روز عامر لیاقت ٹی وی سکرین پر بیٹھ کر مذہبی منافرت کو ہوا دیتا ہے اور کسی سرکاری ادارے کے کان پر جوں تک نہیں رینگتی کہ اس شخص کے خلاف کاروائی کی جائے۔ہماری حکومت کے پاس دہشت گردی کا مقابلہ کرنے کے لیے محض ڈبل سواری پر پابندی لگانے اور سڑکوں پر رکاوٹیں کھڑی کرنے جیسے اقدمات کے سوا نہ تو کوئی لائحہ عمل ہے اور نہ ہی اتنی اہلیت کہ وہ شدت پسندوں کے خلاف موثر کاروائی کر سکے۔