ہمارے دل ایک نہیں ہوتے
مگر کمرے ایک ہوتے ہیں
الماری میں الگ الگ طرز کے کپڑے ایک دوسرے سے نہ لپٹ جائیں اسی الجھن میں اپنے اندر رہ جانے والی جسموں کی بساند میں لپٹے خاموشی سے کئی کئی برس گزار دیتے ہیں
کمرے دو مختلف لوگوں کی مختلف سوچوں کے وزن سے کسی خوشبو کے بغیر مردہ محسوس ہوتے ہیں
بستر پر الگ الگ سرہانوں اور الگ الگ لحافوں سے الگ الگ ہمک اٹھتی ہے
ہم اپنے جسموں کے منکر ہیں
ہم جذبوں سے روحیں نکال کر ٹھکانے لگا چکے ہیں
ہمارے اپنے دل ،دماغ اور زبان کسی لمحہ بھی ایک ڈگر پر نہیں چلتے
ہم رشتوں کو پائمالی سے بچانے کے لیے جسموں کو تیاگے ہوئے ہیں
تعلق کے گدھ ہمارے جسم نوچتے ہیں
اور ہم تمام عمر مصلیحتوں کی قبروں میں گڑے رہتے ہیں
ہماری قبروں سے اٹھنے والا تعفن ہماری ہی سانسیں تنگ کرتا ہے
