ریسکیو آپریشن
ماں سے ڈانٹ پڑی کہ ٹھیک سے دانہ دنکو ، اس پر ان کو، اوپر ڈیڈی اور نیچے ہوسٹل وارڈن باگڑ بلے کی آنکھوں کے مشترکہ تاروں کو، شوخی سوجھی
پاس ہی کوریڈور میں اک روشن دروازہ کھلا پڑا تھا ، پٹ سے ٹکرائے، پر مڑے نہیں، دونوں بھائی کمرے میں در آئے
پھر کیا تھا، اٹھکیلیاں کرتے کرتے چھوٹے میاں کے شہپر پنکھے سے جا ٹکرائے اور میں نے سر تھام لیا
عامر نے زخمی کو میدانِ امن سے جمع کیا اور اپنے طائر ڈاکٹر محراب حسین سے مل کر اجنبی در انداز کی جان بچا لینے کا طمع کیا
ان دو ٹین ایجر سرد و گرم چشیدہ زمانے بھر کے سنجیدہ نرسوں نے مسکرا مسکرا کر ٹنکچر آیوڈین لگا کر غازی کو اس کی رجمنٹ تک واپس پہنچایا
تھوڑی دیر میں ڈارون کی بچی وہ فیملی اپنے زخمی ممبر کو چک کے باہر پھینک چکی تھی، مصطفی کمال مہارت سے اسے ترکی بہ ترکی سمیٹ ہی لایا
لکی کبوتر! شکر کر ہم نے نہیں پھینکا تھا ہمدردی سے پُر فکشن اور محبت میں گم شاعری کی بکس کا خالی ڈبہ!
جس کی دیواروں میں چاروں طرف تیری معصوم آنکھوں سے ملتے جلتے گول مٹول دریچے کھلے پڑے ہیں
لکی کبوتر! میرے سینے میرے یثرب میرے مدینے میں بھی تیرے پنجرے جیسا اندھیرا ہے
اور اک گھائل پنچھی تیری مثال سے حوصلہ پا کر دھڑکن دھڑکن صبح کی جانب بھاگ رہا ہے
“یہ چار چھے پل”
یہ چار چھے لفظ، اور سورج
ساتھ لے آئیں گے نظم، اور آگ
یہ دو تین لائنیں، اور ہوا
ساتھ لے آئیں گی نظم، اور پانی
شاعر کے پاس ہے
غزل کا پیمانہ ، جتنا بھر جائے
عشرے کا گھڑا، جتنا خالی رہ جائے
شاعر جو سب رنگوں کی مٹی
کا بنا ہے
شاعر جسے ستر ماؤں نے مل کے جنا ہے
شاعر کی مرضی
(منظر اعجاز منظر کی ایک نظم کے عنوان کے سحر میں)
عشرہ // جنگی قیدی
ابو ابو جنگی قیدی کیا ہوتے ہیں
بیٹا جنگ میں قید کئے جانے والوں کو
جنگی قیدی کہتے ہیں
میں کہتا ہوں
ایک دن ہم بھی
دشمن کی فوجوں سے
لڑائی ہار گئے تھے
تب سے اب تک ہم بھی جنگی قیدی ہیں
پچیس کروڑ جنگی قیدی!
جن پہ جنیوا کنوینشن لاگو نہیں ہوتا
اتواریہ // ہولو کاسٹ اور چھٹی کمانڈمنٹ
1.
ہولو کاسٹ! ایسا کچھ نہیں ہوا
وہ محض ایک ڈراؤنا خواب تھا
اگر ایسا کچھ ہوا ہوتا
کل کے مصنوعی مظلوم
آج کے حقیقی ظالم نہ ہوتے
کل کے حقیقی ظالم
فرضی احساسِ گناہ کے مارے
آج کے حقیقی ظالم کو جپھیاں نہ ڈالتے
مگر ہولو کاسٹ؟ ایسا کچھ نہیں ہو رہا
یہ محض ایک ڈراؤنا خواب ہے
2.
سنا ہے پتھروں پر کندہ تھے
دس کے دس احکاماتِ ربانی
“اور تم قتل نہیں کرو گے!”
چھٹی کمانڈمنٹ
پتھر کی بجائے
موم کی لکیر نکلی
سانپ لکیر پیٹتے رہے
موم کی لکیر
خون کا دریا بن گئی
کیا سانپ خون میں تیر لیں گے؟
3.
ہولو کاسٹ! اگر ایسا کچھا ہوا ہوتا
تو اس پر سوال اٹھانا جرم نہ ہوتا
وہ جن کا یہ سب کیا دھرا تھا
ان انسان دوست ریاستوں میں
تم قرآن وغیرہ جلا سکتے ہو
تم خاکے وغیرہ چھاپ سکتے ہو
ہولو کاسٹ پر انگلی نہیں! یہ ہماری ریڈ لائن ہے! ورنہ۔۔
اس نے انگلی اٹھائی اس نے بازو پھیلایا اس نے مکا لہرایا
۔۔جانوروں کے انسانی حقوق پر جان دینے والے جان لے سکتے ہیں
گدھ نے ادھوری لاش کے سینے پر پنجوں سے V کا سائن بنایا
4.
لڑائی تو عہد نامہء قدیم
اور جدید کے درمیان تھی
بیچ میں قرآن کیسے آ گیا
اے عیسی کی بھیڑو
اے موسیٰ کے بچھڑو
تم جس کا انکار کرتے آئے ہو
تمہارے نبیوں کو اس کے ساتھ ماننے والے ، ہم
کب تک تمہارے سیاہ اعمال نامے سرخ لہو سے دھوتے رہیں
کب تک تمہارے ایک دوسرے پر واجب قصاص چکاتے رہیں
کب تک تمہارے ٹریڈ ڈیفیسٹ اپنی جانوں سے بھرتے رہیں
5.
ازلی گناہ پر
جھوٹ موٹ لرزاں
عیسیٰ کی بھیڑیں
چھٹی کمانڈمنٹ
کے پرخچے اڑاتے
موسٰی کے بھیڑیے
سچ سچ بتا
تُو کس کی طرف
سے کھیل رہا تھا
اے محمد (ص) کے خدا
6.
وہ جن کے مرد غلام عورتیں لونڈیاں بنا لی جاتیں
وہ جن کی نرینہ اولادیں موت کے گھاٹ اتار دی جاتیں
وہ مظلوم جو بچ کے بھاگ نکلے
وہ جن کا ظالموں نےبپیچھا کیا
وہ جن کو دریا نے رستہ دیا ۔۔۔۔ وہ کون تھے؟
بنی اسرائیل کو بنی فرعون سے الگ کرنے میں
کیا دریا نے غلطی کی؟
کیا عصا نے غلطی کی؟
کیا خدا نے غلطی کی؟
یا صرف ہم نے جو آلِ ابراہیم پرپنجگانہ درود بھیجتے رہے!
7.
یوروپا جانے
جس نے تمہیں قتل کیا
یا نہیں کیا
یوروپا جانے
جس نے تمہیں بے دخل کیا
یا نہیں کیا
امیریکا جانے جس نے تمہیں روپیا دیا
اور تم نے ہمیں بے دخل کیا
امیریکا جانے جس نے تمہیں اسلحہ دیا
اور تم نے ہمیں قتل کیا
8.
یہ کہ تم مسلط کر دیے گئے
ہماری دھرتی پر ہمارے آکاش پر
یہ کہ تم نے نکال باہر کیا ہمیں
ہمارے آبائی گھروں سے
یہ کہ تم نے جلا کے راکھ کر دیے
ہمارے باغ ہمارے کھیت کھلیان
یہ کہ تم نے اڑا کے خاک کر دیے
ہمارے سکول ہسپتال مکان دکان
ہم تمہارے احسانات کا بدلہ کیسے چکا سکتے ہیں
جے ہو تمہاری اے بنی اس را ایل اے بنی فر عو ن
9.
یہ کہ تم نے بارود بھری مترنم لوریاں دیں
خود کش معذوروں کو، دہشت گرد شیر خواروں کو
یہ کہ تم نے طاقتور بموں کے انجیکشن لگائے
بوڑھوں اور بچوں اور زخمیوں اور بیماروں کو
یہ کہ تم نے ریپ کیا گھروں کے ملبے پر حاملہ عورتوں کو
یہ کہ تم نے چن چن کر مارا ، ایک ایک کر کے سب کو
یہ کہ تم نے بالوں سے پکڑ کر گلیوں میں گھسیٹا
اور گالی نکال کے گولی مار دی ۔۔ کسی کو بھی!
یہ تو کچھ بھی نہیں
یہ تو کچھ بھی نہیں
10۔
اس کی گڑیا کے بال
گریپ فروٹ رنگے تھے
اسریٰ کے اپنے گالوں کی طرح
چھوٹے بھیا سے یکسر مختلف
وہ تو پکے ہوے انار سا رس رہا ہے
آڑو، خوبانی، آم، پستہ، اخروٹ، بادام
فرش پر اسریٰ کے ہمجولی کھِلرے پڑے ییں
انہیں چاہئیے خوب اچھی طرح پیک کریں
اسریٰ لوگوں کو آئس کریم فریزر میں رکھنے سے پہلے
سٹرابری جوس کہیں رستے میں نہ بہنے لگے
ع // کامی اور اس کے ہمسائے
سکول رجسٹر میں اس کا نام کامران بعد میں درج ہوتا
ہم، جولی لوگ، اسے پہلے ہی کامی کہہ کر بلانے لگے
لیڈی برڈ کی جنس کا انکشاف طبی معائنے کے دوران ہوا
جب یہ پتا چلا کہ اس کے کاغذ اور بائیں پیر کے پور پورے نہیں
سلطنتِ انسان دادِ کمرہ میں کامران عرف کامی کو تب سے حاصل ہے
ایک غیر قانونی ریفیوجی کا منفرد، متاثر کن اور مشکوک اسٹیٹس
ہفتہ بھر بند پنجرے میں رکھ کر اسے چھوڑ دیا گیا
کھلے پنجرے میں، اس کا استقبال ایک عجیب الخلقت جانور نے کیا
آج کل نئے سرے سے پر پھڑپھڑانا سیکھ رہا ہے، سیکھ رہی ہے
وہ مجھ سے
میں اس سے