پر اس جہان سے بھی ہے بڑا ملالِ حسین

قبائے خاک مجھے دشت نے ودیعت کی
پھر اس کے ساتھ جنوں کی مجھے نصیحت کی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بجھا چراغ تو روشن ہوا جمالِ حسین
خیام چرخ بنا اور سجا ہلالِ حسین

سپاہ پست نے تھاما فنا کا کند سلاح
بقا نیام سے نکلی ہوا جدالِ حسین

بساطِ عشق کو شہ مات سے شروع کیا
اور ایک چال سے فاتح بنا جلالِ حسین

جہاں پناہ جہاں ہے ترا وسیع و عریض
پر اس جہان سے بھی ہے بڑا ملالِ حسین

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

لباسِ حج کو اتارا جنون پوش کیا
ابد کا جام اٹھایا بقا کو نوش کیا

فراتِ عشق کی جانب رخِ مراد ہوا
لہو کو نعل لگائی طلب کو دوش کیا

نیامِ دشت سے نکلی اجل کی تیغِ سراب
یقیں کو ڈھال بنایا رضا کو پوش کیا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

فراتِ اشک کا ساحل لبانِ خشک ہوئے
اجل کے دست لہو کی مہک سے مشک ہوئے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

سنانِ صبر سے شر کے جگر کو چاک کیا
جبینِ دشت سے زعمِ فنا کو پاک کیا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

لباسِ دشت پہ تازہ لہو کا داغ لگا
گلِ حسین سے صحرا بھی ایک باغ لگا

سناں کی نوک پہ جب شاہ نے طلوع کیا
فلک کے طاق پہ رکھا قمر چراغ لگا

فنا کی تیغ سے اس نے کوئی کلام کیا
جسے سمجھنے کو ہستی کا سب دماغ لگا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

گلو صغیر کا گل کی طرح نمود ہوا
بقا کی گود میں گویا چمن کشود ہوا

سپاہِ بد کے سواروں نے دشت پست کیا
پسر رباب کا نکلا تو دشت عود ہوا

کمانِ کرب سے نکلا ستم کا تیر عدم
لبانِ خشک ہلے اور سپر درود ہوا

پدر کی شاخ پہ اصغر مثال برگ ہلے
ستم کی بادِ فنا کا عجب ورود ہوا

اجل نے کان دھرے نغمہء رباب سنا
الم کے تارِ شکستہ سے کیا سرود ہوا

فلک کی سمت اچھالی پسر کی تشنہ فغاں
سحابِ زخم بنا اور لہو فرود ہوا

لہو سے ریشِ مبارک کو یوں خضاب کیا
فنا کا نغمہ رکا سازِ غم جمود ہوا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

نگاہِ شہ نے غرورِ اجل کو خاک کیا
پھر اپنے خون سے دشتِ فنا کو پاک کیا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کسی کا زخم کی بخیہ گری میں نام ہوا
کسی کے زخم کا بخیہ گری سے کام ہوا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

زمیں کے خشک لبوں کو لہو سے تر رکھا
سخی نے موت کے کاسے میں اپنا سر رکھا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

قضا کے ساتھ عطش کی بس اک نشست ہوئی
لبانِ خشک سے صحرا کو کیا شکست ہوئی

لہو کے ساز پہ جوں ہی کسی نے ہاتھ رکھا
ہوائے مرگ مثالِ کنیز مست ہوئی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

قبائے جسم مجھے دشت نے ودیعت کی
اور اس کے ساتھ جنوں کی مجھے نصیحت کی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اسی نے میری نگاہوں میں ایک راز رکھا
اسی نے میرے لبوں کو سخن سے باز رکھا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بیاضِ عشق کو دیکھا اسے درست کیا
سناں کی نوک سے سارا کلام چست کیا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کہیں خدا ہے کہیں انبیا کہیں پہ ملک
خیامِ شاہ میں ٹھہری ہے کائنات تمام

اسی کے اذن سے آنکھوں کو خوئے گریہ ملی
اسی کے غم سے عبارت ہیں شش جہات تمام

اسی کے خوں سے زمیں کو نئی حیات ملی
اسی کے زخم سے عالم کی ممکنات تمام