Laaltain

لہروں پر جھومتا چاند! (ایچ-بی-بلوچ)

27 اپریل، 2020

لہروں پر جھومتا چاند
رات کے طول کا ایک دیدہ عکس ہے
باقی نادیدہ سراپا پانی کی نظر ہو چکے ہیں

گزرے لمحات کی قبر میں مدفون اے میری راحت!
میں تصور بھی نہیں کر سکتا
کہ میں نے تجھے کبھی چوما تھا !

میں اکیلائی کے جسم پر
مجوزہ منصوبوں کی وارداتیں لکھتا ہوں
شاید
تنہائی لاجوردی شام کی ایجاد
اور نظر انداز کئے گئے پرندوں کی بدعا ہے!

میں عجلت میں
فیصلہ کرنے کی قوت سے محروم ہوں
اور سوچ کے سلسلے میں
ہر اس آواز کو شامل کر لیتا ہوں
جس نے مجھے کبھی
ریتیلے کنویں کے عذاب سے
محتاط رہنے کی آگاہی نہیں دی

لیکن اب کے
چاند نکلنے سے پہلے
میں ستاروں کے دامن سے
ایک صدا کی بازگشت کھینچوں گا
اور اسے فضا کی بصیرت میں پھیلا دوں گا
اور پھر تم
سویرے کی دہلیز سے
صبح کی ڈور بیل پہ ہاتھ رکھ کر بھول جانا!

Leave a Reply

Your email address will not be published. Required fields are marked *

Leave a Reply

Your email address will not be published. Required fields are marked *