گندم سبسڈی احسان نہیں

اپریل کے مہینے میں جب وزیر اعظم پاکستان میاں نواز شریف نے گلگت دورے کا عندیہ دیا تو مقامی ذرائع ابلاغ اور مسلم لیگ نواز کے ذمہ داروں نے اُن کی آمد سے پہلے ہی یہ افواہ پھیلانا شروع کردی کہ وزیراعظم اپنے دورے میں گلگت بلتستان کو قومی دھارے میں شامل کرنے کے لیے اہم اعلان کریں گے۔ لیکن بدقسمتی میاں نواز شریف کی جانب سے روایتی اعلانات سے بڑھ کرکوئی نئی چیز سُننے کو نہیں ملی۔ خطے کی مجموعی صورتحال کے تناظر میں دیکھا جائے تو یہ دورہ بے سود ثابت ہوا لیکن یہ پہلی مرتبہ نہیں کہ مسلم لیگ نواز نے عوام کو مایوس کیا ہو یہ جماعت کئی مرتبہ اقتدار حاصل کرنے کے باوجود بھی گلگت بلتستان کی فلاح بہبود اور ترقی کے لیے نمایاں اقدمات کرنے میں ناکام رہی ہے۔ صرف نواز شریف ہی نہیں بلکہ ہر جماعت اور رہنما نے اس علاقے کو نظرانداز کیا ہےیہی وجہ ہے کہ گلگت بلتستان کے لوگ قائد عوام شہید ذولفقار علی بھٹو کو بقول راشد سمیع کولمبس سمجھتے ہیں۔ 1948 کی ناکام بغاوت یا سازش کا شکار ہونے اورمعاہدہ کراچی پرگلگتی عوام کی مرضی کے بغیر دستخط کے بعد پاکستان نے گلگت بلتستان کو ایسے بھلا دیا جیسے یہاں انسان ہی نہیں بستے۔ بھٹو شہید کو جب مختصر وقت کیلئے وزیراعظم بننے کا موقع ملا تو انہوں نے گلگت بلتستان کو نئے سرے سے “دریافت “کیا۔ مقامی ڈوگروں سے نجات دلاتے ہوئے عوام کو برابر کاانسان ہونے کا یقین دلایا ورنہ تو گلگت کے عوام ریاستی غلامی سے نکل کرعلاقائی غلامی کی بھٹی میں جل رہے تھے، یہی وجہ ہے کہ آج بھی بھٹو کا نام ہمارے لبوں پر محبت کے ساتھ آتا ہے۔
میڈیا رپورٹ کے مطابق نون لیگ نے وفاقی بجٹ میں گلگت بلتستان کے عوام سے بھٹو کا دیا تخفہ چھیننے اور گندم پر موجود سبسڈی ختم کرنے کی کوشش کی۔ نواز شریف سرکار نے گلگت بلتستان کے عوام کو یہ پیغام دینے کی کوشش کی کہ ہم چاہیں تو یہ سبسڈی ختم بھی کرسکتے ہیں۔ یہاں یہ بتانا ضروری ہے کہ وفاق گلگت بلتستان کے باشندوں کو گندم پر سبسڈی دےکر کوئی احسان نہیں کر رہا بلکہ اقوام متحدہ کی قراردادوں پر عمل کررہاہے ۔ اقوام متحدہ کی13اگست 1948کی قراردادمیں جموں و کشمیر اورگلگت بلتستان کوخوراک کی ترسیل کے سلسلے میں سبسڈی دینے کی منظوری دی گئی تھی جس کے تحت سرحد کے آر پار دشوارگزارعلاقوں تک خواراک کی ترسیل پر اٹھنے والے اخراجات انتظامیہ برداشت کرے گی۔ اگرچہ یہ قرارداد 1948 میں منظور ہوئی تھی تاہم اس پر عملدرآمد کاآغاز 1972 میں ذوالفقار علی بھٹو نے کیا ۔
گندم سبسڈی مقامی غریب آبادی کے لیے ایک نعمت سے کم نہیں بدقسمتی سے 2008 میں مشرف دورحکومت میں وفاق نے مرحلہ واراس رعایت سے اپنا ہاتھ کھینچنا شروع کیا اوریوں کچھ ہی عرصے میں 100کلوکی گندم کی بوری 850سے بڑھ کر 1650روپے کی ہو گئی۔ آٹے کاچالیس کلوکا تھیلاجب 430سے بڑھ کر750 روپے کا ہوا تو عام آدمی اس سبسڈی کے خاتمے سے براہ راست متاثر ہونے لگا ۔ گندم کی بڑھتی قیمتوں نے اپنا رنگ دکھایا اور احتجاجی مظاہرے ،ریلیاں اوردھرنے شروع ہوئے ، جس پر عوامی ایکشن کمیٹی کا قیام عمل میں آیا۔اس کمیٹی میں تاجر،شہری،طلباء سول سوسائٹی کے لوگ شریک ہوئے۔ گندم سبسڈی کے خاتمے عوامی سطح پر احتجاج زورپکڑتاگیا جس کے بعد 2013کے اختتام پر اس سبسڈی کا کچھ حصہ پھر بحال کر دیا گیا اور 100 کلو کی گندم کی بوری کی قیمت 1650سے کم کر کے1400روپے مقرر کر دی گئی۔

حالیہ بجٹ میں وزیر خزانہ کی جانب سے گندم سبسڈی کے خاتمے کی تجویز کو وزیراعظم نے بروقت نوٹس لیتے ہوئے واپس لیا وگرنہ گلگت بلتستان کے عوام انتخابات کے بائیکاٹ کا فیصلہ کرنے پر مجبور ہوجاتے ۔ اس سبسڈی کے خاتمے کے باعث مقامی لوگوں کے احساس محرومی میں اضافہ ہونے کا خدشہ ہے جس کا اثر اقتصادی راہداری کے منصوبے پر بھی پڑ سکتا ہے۔ بھارتی سرکار اور ذرائع ابلاغ پہلے ہی انتخابات اور اقتصادی راہداری کے حوالے سے پاکستان کے خلاف پروپیگنڈا کر رہے ہیں، سبسڈی کا خاتمہ جلتی پر تیل ثابت ہوتا کیونکہ دنیا جانتی ہے کہ وفاق پاکستان گلگت بلتستان کے عوام کوگندم سبسڈی خیرات کے طور پر نہیں بلکہ گلگت بلتستان کی متازعہ حیثیت کی وجہ سے عالمی قوانین کے تحت دینے کا پابند ہے۔

وفاقی حکومت اگر واقعی میں گندم سبسڈی ختم کرنا چاہتی ہے تو پہلے اسے گلگت بلتستان کے عوام کے جائز معاشی و سیاسی مطالبات بھی تسلیم کرنا ہوں گے۔ پھر مقامی لوگ یہ مطالبہ کرنے میں حق بجانب ہیں کہ اس خطے کو قومی دھارے میں شامل کرتے ہوئے اس کی آئینی حیثیت کا تعین کیا جائے۔ سوست ڈرائی پورٹ ،کسٹم اور سیاحت کی آمدنی کے ساتھ قراقرم ہائی وے اور دریائے سندھ کی رائلٹی گلگت بلتستان کو ملنی چاہیے کیونکہ عالمی قوانین اور آئین پاکستان کے مطابق تمام صوبوں کو یہ حق حاصل ہے۔ گلگت بلتستان کے عوام اپنے جائز آئینی حق سے محروم کیے جانے کی صورت میں یہ حق رکھتے ہیں کہ اپنی سزرمین سے حاصل ہونیوالی آمدنی کا حساب کتاب کرنے کےلیے اقوام متحدہ سے رجوع کریں تاکہ دنیا کو معلوم ہوجائے کہ گلگت بلتستان وفاق کی خیرات پر نہیں پل رہا بلکہ وفاق اس خطے کا کھربوں ڈالر کا مقروض ہے۔لیکن افسوس سے کہنا پڑتا ہے کہ مقامی لوگ اپنے حقوق سے ہی لاعلم ہیں۔ ہمارے مفاد پرست سیاست دانوں نے عوام کو غلامی، استحصال اور ناانصافی برداشت کرنے پر مجبور کیا ہے یہی وجہ ہے کہ آج ہر اُس شخص کو ریاستی جبر کا سامنا ہے جو اقوام متحدہ کے پاک و ہند کمیشن کے تحت خطے کو حقوق دینے کی بات کرتا ہے۔ گلگت میں پولیس گردی اس ظلم کی تازہ مثال ہے جس نے قوم پرست رہنماوں کو صرف اس لیے گرفتار کیا اور تشدد کا نشانہ بنایا کیونکہ یہ لوگ اقتصادی راہداری اور انتخابات کے حوالے سے اقوام متحدہ کے کیمپ آفس میں یادداشت پیش کرنا چاہتے تھے۔