غیر معمولی عورت

اس نظم میں مایا اینجلو کا اپنی ذات پر اعتماد اور یقین واضح طور پر محسوس کیا جا سکتا ہے اور عام عورت کی نمائندہ ہونے کی حیثیت سے یہ بھی اخذ کیا جا سکتا ہے کہ وہ عورت کواُس کے غیر معمولی پن اُس کی شخصیت کے سحر، پُر اسراریت اور خوبصورتی کا احساس دلانا چاہ رہی ہیں۔ عورت جسے مردانہ حاکمیت پر استوار معاشروں میں دوسرے درجے کی مخلوق تصور کیا جاتا ہے۔ اس نظم میں حد سے زیادہ پُر اعتماد اور اپنی شخصیت کی خوبیوں سے آشنا دکھائی دے رہی ہے اور شاید مایا اینجلو ہر عورت کو ایسا ہی غیر معمولی طور پُر اعتماد دیکھنا چاہتی ہیں۔

شاعرہ: مایا ایجلو
تعارف و ترجمہ: رابعہ وحید

حسین عورتیں حیرت زدہ ہیں کہ میری (سحر زدہ شخصیت) کا راز کس چیز میں ہے
میں نہ تو پُر کشش ہوں اور نہ ہی میرے خد و خال
کسی ماڈل (گرل) سے مطابقت رکھتے ہیں
لیکن جب میں اپنی (سحر زدہ شخصیت) کا راز انہیں بتانا شروع کرتی ہوں
وہ سوچتی ہیں کہ میں جھوٹ بول رہی ہوں

میں کہتی ہوں
یہ(سحر) میری بانہوں کی دسترس میں ہے
یہ میرے کولہوں کے احاطے میں ہے
یہ میرے اٹھتے ہوئے قدموں میں ہے
میرے ہونٹوں کے کٹاؤ میں ہے
میں ایک ایسی عورت ہوں
جو غیر یقینی حد تک مختلف ہے
وہ غیر معمولی عورت _____
_____میں ہی ہوں!

میں بھی کمرے میں جاتی ہوں
ایک مرد کے پاس
اُسی پُر سکون انداز میں جیسے تم مطمئن کرنے جاتی ہو
اُن محبوبوں کو جو تمہارے سامنے کھڑے ہوتے ہیں
یا گھٹنوں کے بَل جھکے ہوتے ہیں

پھروہ میرے گرد اشتیاق سے جمع ہو جاتے ہیں
جیسے شہد کی مکھیاں شہد کے چھتے کے گرد

میں کہتی ہوں
یہ میری آنکھوں کی دہکتی ہوئی آگ ہے
اور میرے دانتوں کی چمک ہے
میری بَل کھاتی ہوئی کمر ہے
اور میرے پیروں میں بھری مستی ہے

میں ایک ایسی عورت ہوں
جو غیر معمولی حد تک مختلف ہے
وہ غیر معمولی عورت _____
_____میں ہی ہوں!

خود مرد بھی حیرت زدہ ہیں
کہ ان کو مجھ میں کیا دکھائی دیتا ہے
وہ بہت کوشش کرتے ہیں
لیکن وہ میری ذات کی پُر اسرایت کو نہیں چھو پاتے
جب میں ان پر اپنی (ذات) آشکار کرتی ہوں
تو وہ کہتے ہیں
ہم پھر بھی کچھ نہیں دیکھ پائے

میں کہتی ہوں
یہ (سحر) میری کمر کے خَم میں ہے
میری مسکراہٹ کے چمکتے سورج میں ہے
میرے پستانوں کے اُبھار میں ہے
میرے پُر وقار نازو ادا میں ہے
میں ایک ایسی عورت ہوں
جو غیریقینی حد تک مختلف ہے
وہ غیر معمولی عورت _____
_____میں ہی ہوں!

اب تم سمجھ سکتی ہو
صرف اسی وجہ سے میرا سر کبھی نہیں جھکا
میں چیختی چلاتی نہیں
یا ادھر ادھر اچھلتی نہیں پھرتی
یا مجھے کبھی حاکمانہ انداز میں بات نہیں کرنا پڑتی
تمہیں تو اس بات پر ہی نازاں ہو جانا چاہیے
جب تم مجھے اپنے پاس سے گزرتا ہُوا دیکھو

میں کہتی ہوں
یہ(سحر) میری ایڑیوں کی ٹک ٹک میں پوشیدہ ہے
مرے گھنگریالے بالوں میں ہے
میری ہاتھ کی ہتھیلی میں ہے
میری نوک پلک سنوارنے کی ضرورت میں ہے
کیوں کہ میں ایک عورت ہوں
غیر معمولی_______
وہ غیر معمولی عورت_______
میں ہی ہوں