Tag: خیبرپختونخواہ

دہشت گردحملے کے تدارک کے لیے مناسب سیکیورٹی انتظامات نہ کرنے والے سینکڑوں سکولوں کے خلاف مقدمات درج کیے گئے ہیں۔ اتوار 29 مارچ 2015 کو ستر سکول مالکان اور پرنسپل حضرات کے خلاف مقدمات درج کیے گئے ہیں، اس سے ایک ہفتہ قبل بھی 88 نجی و سرکاری سکولوں میں سیکیورٹی کے مناسب انتظامات نہ کرنے کی پاداش میں مقدمات درج کیے گئے تھے۔
تفصیلات کے مطابق یہ مقدمات علی زئی، خادی زئی، استارزئی، چکارکوٹ، بالا، نصرت خیل، پراچگان بندہ، محمد زئی، ملوک خان بندہ، گمبٹ، خوشحال گڑھ، گنڈیالی، غورہ زئی، جابر، توغ، ڈھوڈا، دھیری بندہ، شینوخیل، جدید بندہ، لاچی تحصیل، حافظ آباد، جنگ خیل، ملنگ آباد، شہید بندہ، جرما، خرماٹو، ریاتی بندہ، بازیدخیل، باقی زئی اور گھکمول کے علاقوں میں قائم سکولوں کے منتظمین کے خلاف قائم کیے گئے ہیں۔ ضلعی پولیس افسر شعیب کے مطابق ان سکولوں میں یاددہانی کے باوجود سیکیورٹی انتظامات نہیں کیے گئے تھے جس کے باعث کارروائی کی گئی ہے۔
کوہاٹ میں ایک نجی سکول چلانے والے اشرف رحیم کے مطابق وسائل کی کمی کے باعث وہ حکومتی مدد کے بغیر فوری طور پر سیکیورٹی کے خاطرخواہ انتظامات نہیں کر سکتے،”ہمارے پاس اتنے وسائل نہیں اور نہ ہی والدین اضافی فیس دینے کو تیار ہیں ایسے میں ہمارے لیے حکومت کی ہدایات پر عمل کرنا ممکن نہیں۔پشاور حملے کے بعدتمام نجی اور سرکاری تعلیمی اداروں کو دس فٹ بلند چاردیواری کی تعمیر، محافظوں کی تعیناتی اور سی سی ٹی وی کیمروں کی تنصیب کا حکم دیا گیا تھا تاہم بہت سے سکولوں میں تاحال یہ حفاظتی اقدامات نہیں کیے جاسکے ہیں۔