Tag: اردو زبان

ہمارے ہاں کسی بھی موضوع پر بات کرنا بھڑوں کے چھتے میں ہاتھ ڈالنے کے برابر ہے۔ اور بات کرنا بھی شاید فضول ہے کیونکہ ہم بحیثیت قوم کائنات کی سب حقیقتوں کو پہلے سے ہی جانتے ہیں اور ہم سے زیادہ ذہین قوم آج تک روئے زمین نے نہیں دیکھی ۔ اپنی اسی عقل ودانش کی وجہ سے ہم کسی کی بھی جاہلانہ رائے برداشت نہیں کرسکتے اور فوراً ہی اس پر کوئی نہ کوئی ٹیگ لگاکر اسے دنیا سے رخصت کرنے کا بندوبست کرتے ہیں۔ میں کچھ بھی لکھوں اور چاہے کتنے ہی خلوص اور علمی دیانت سے لکھوں، کوئی نہ کوئی پاکستانی دنیا کے کسی کونے میں بیٹھ کر آدھا پڑھے گا اور اس سے بھی آدھا سمجھے گا لیکن ایک مکمل نتیجہ نکال لے گا اور پھر مجھ پرغدار، لبرل اورایجنٹ ہونے کا ٹیگ لگا دے گا۔ میری تحریر پر مجھے ہرعوامی فورم پر گالیاں دے کر ملک و قوم کی خدمت کرے گا۔ کیونکہ ہمارے ہاں ہر چیز ہی مقدس ہے اس لیے اس پر بات کرنا ممنوع ہے لیکن کیا کیجئے کہ جون ایلیا کی بات یاد آجاتی ہے
پھر جی میں ہے بے حرمتی کی خواہش
ہم سبھی کو یہاں محترم دیکھتے ہیں
اب اردو کے نفاذ کا معاملہ ہی لے لیجئے۔ ہمارے عوام ہمیشہ کی طرح وقتی جذباتی ہوگئے ہیں اور انہوں نے یہ سمجھ لیا ہے کہ اب عوامی زبان کو اشراف میں قبولیت مل جائے گی۔ اردو انگریزی کی بحث اب (پاکستان میں ہر چیز کی طرح) علمی سے زیادہ سیاسی ہوچکی ہےاس لیے کوئی علمی دلیل کسی کے دل میں نہیں اترے گی لیکن پھر بھی اپنی ناقص رائے کا اظہار کردینا چاہتا ہوں۔

برصغیر کی عوام کا خمیر احساس کمتری اور مرعوبیت سے اٹھا ہے، یونانی، چینی، عرب، ترک، افغان اور انگریز ایک کے بعد ایک ان پر حکومت کرتے رہے ۔ اس لیے ان پر ہر چیز باہر سے مسلط کی جاتی رہی ہے۔ اگرچہ اقبال اللہ کے آزاد بندوں کی تعریف کرتے رہے لیکن برصغیر میں آزاد بندہ کہاں سے ملے۔ ہماری مرعوبیت زندگی کے ہر پہلو پر محیط رہی ہے۔ ہر نئے آقا سے ڈرنا ، احساس کمتری کا شکار ہونا اور پھر اس کے رنگ میں رنگنا ہماری عادت رہی ہے۔ہم نے ہر نئے آقا کا لباس، زبان، اور عقائد اپنائے ہیں۔ آپ ہماری مرعوبیت کا اس بات سے اندازہ لگائیں کہ دنیا کی بہت سی قوموں نے اسلام قبول کیا مثلا ًعرب، مصری اور ایرانی لیکن کسی قوم نے ہماری طرح اپنے ناموں کو نہیں بدلا بلکہ اپنی تہذیب اور روایات کو برقرار رکھا اور اسلام کے ذریعے اس میں مزید خوبصورتی پیدا کی۔ ایران آج بھی اپنی تاریخ کو سات ہزار سال تک لے کر جاتا ہے، مصری اپنی تاریخ کو فراعنہ تک لے کر جاتے ہیں، عرب اپنی تاریخ کو حضرت ابراہیم سے شروع کرتے ہیں اور خود کو تما م مذاہب کا وارث سمجھتے ہیں۔ ان تمام قوموں کی اپنی زبان، تہذیب ،روایات، لوک کہانیاں، ہیرو، موسیقی، آرٹ اور فنون لطیفہ ہیں،اور وہ فتوی لگا کر انہیں اپنی تاریخ سے باہر نہیں نکالتے۔لیکن برصغیر کے مسلمانوں نے سب سے پہلے اپنے پرانے نام تبدیل کیے،کیونکہ ان کے خیال میں نام بھی اسلامی اور غیر اسلامی ہوتے ہیں( شاید انہیں دین کا فہم دنیا بھر کے مسلمانوں سے زیادہ تھا)۔صرف نام ہی نہیں پھر انہو ں نے ہر چیز اپنے آقاؤں کی اپنائی۔ لیکن ان آقاؤں نے کبھی بھی ان وفادار غلاموں کو اپنا نہیں سمجھا چاہے وہ ان کی زبان، لباس اور مذہب کو ہی کیوں نہ اپنا لیں۔ اردو کے ایک شاعر رفیق سندھیلوی کبھی ہمیں اردو پڑھاتے تھے تو ایک دن کہنے لگے کوئی شخص آپ کے گھر پر قبضہ کرلے اور آپ کو گھر میں ملازم رکھ لے ۔ کچھ سال بعد آپ اسے دل سے آقا تسلیم کرلو اور اس کے رنگ میں رنگ جاو تو بھی تمہاری عقیدت کے باوجود وہ شخص ڈاکو ہی رہے گا۔ برصغیر کے مسلمانوں کے ساتھ بھی ایسا ہی ہوا ہے ان کے قاتل ہی ان کے دلدار بن گئے۔

مشہور مورخ ڈاکٹر مبارک علی اپنی کتاب “مسلم برصغیر کا المیہ” میں مسلم نفسیات کو بہت تفصیل سے بیان کرتے ہیں۔ ان کے مطابق” حکمران طبقہ اور اشراف ہمیشہ عوام سے خود کو جدا سمجھتے تھے اور ہر کام عوام سے جدا کرتے تھے، عربوں کی حکومت میں اشراف کی زبان عربی تھی اور تمام حکومتی امور اور علمی کام عربی میں کیا گیا۔ ایرانیوں اور ترکوں کی حکومت میں سرکاری اور اشراف کی زبان فارسی تھی ، تمام مذہبی اور سیاسی کام اس زبان میں ہوتا تھا، عوام کی اکثریت کو یہ زبان نہ سمجھ آتی تھی اور نہ ہی یہ رابطے کی زبان تھی۔ جو لوگ اسلام قبول کرتے تھے انہیں کبھی بھی حکمران طبقے نے اپنے برابر نہیں سمجھا۔ عوام ہمیشہ عوامی زبان کو رابطے کے لیے استعمال کرتے تھے۔ اسی طرح مذہبی کام بھی مقامی زبان میں نہیں ہوتا تھا ہمارے برصغیر کے علماء بھی عرب اور ایران کے علماء سے متاثر تھے اور ا ن کی کتابوں کی تشریحات لکھتے رہتے تھے۔ عربی و فارسی نہ آنے کی وجہ سے عوام مذہب کو بھی نہیں سمجھ سکتے تھے۔ حکمرانوں کی زبان نہ آنے کی وجہ سے حکومت اور مذہب دونوں ہی عوام کی پہنچ سے دور رہے اور یہی حال شاعری کا تھا کہ ہمارے تمام شعراء فارسی میں شعر کہنا پسند کرتے تھے تاکہ اشراف میں مقبولیت حاصل کرسکیں۔ لیکن تاریخ گواہ ہے کہ ہمارے علماء کے مذہبی کام اور ہمارے شعراء کے فارسی کلام کو اہل زبان عربوں اور ایرانیوں نے کبھی پذیرائی نہیں بخشی۔”

انگریز کے آنے کے بعد بھی ہم نے ایسا ہی کیا اور اشراف نے انگریزی کو فوراً اپنا لیااور اس حد تک اپنا لیا کہ وہ انگریزوں سے زیادہ انگریز بن گئے۔ انہی دیسی انگریزوں کو جاگیریں بھی عطا کی گئیں، یہی سیاست، فوج، عدلیہ اور افسرشاہی کا حصہ بنے اور ان کے بقول پاکستان بنانے والے بھی یہی تھے۔ اس لیے جب پاکستان بن گیا تو پاکستان کو چلانے والے بھی یہی لوگ تھے۔ پہلے دن سے حکومت کے تمام اداروں کی زبان انگریزی ہی تھی اور یہ سلسلہ آج تک اسی جذبہ سے جاری ہے۔ یہ بات سمجھ سے بالا تر ہے کہ عدالت کے ایک حکم کے بعد ان تمام اداروں میں اردو دفتری زبان کے طور پر کس طرح رائج ہوجائے گی۔ ہماری اشرافیہ ایسا کبھی نہیں ہونے دے گی کیوں کہ اس اشرافیہ کا مفاد انگریزی سے وابستہ ہے۔ سرسید جیسے مخلص شخص کی کوششوں کا مرکز بھی یہی اشرافیہ تھی ۔ اسی اشرافیہ نے انگریز سے مراعات بھی لیں اور انہی کی مدد سے انگریزوں نے عوام کو دبا کر رکھا۔ پاکستان بننے کے بعد یہ اشرافیہ ہمیں ورثے میں ملی۔ تاریخ کا ہم پر یہ جبر ہے کہ ہندوستان میں گزشتہ ایک ہزار برس میں حکومت کی زبان کبھی بھی عوامی نہیں رہی ، پہلے یہ عربی اورفارسی تھی اور اب انگریزی ہے۔ وادی سندھ کی مقتدر اشرافیہ کبھی بھی خود کو عوام کی سطح تک نہیں لائی اور زبان کی بنیاد پر اس اشرافیہ نے ہمیشہ خود کو ممتاز رکھا ہے۔
اردو اپنی موجودہ صورت میں تین کام کررہی ہے ایک تو یہ رابطے کی زبان ہے، دوسرا سو سال سے مذہبی کام اس میں ہورہا ہے اور تمام اہم مذہبی کتب اردو میں موجود ہیں اگرچہ یہ اردو بھی عوام کے لیے اتنی اجنبی ہے کہ عام پڑھا لکھا شخص بھی اسے نہیں سمجھ سکتا، تیسرا ہماری شاعری اور نثر کا ذخیرہ اس میں ہے۔ لیکن اردو کا دامن سائنس، ٹیکنالوجی، اور تمام موجودہ علوم سے خالی ہے ۔ سب سے بڑی ستم ظریفی یہ ہے کہ ہماری اشرافیہ نے اردو کی ترقی اور اسے آسان بنانے کے لیے نہ کوئی کام کیا اور نہ ہی ہونے دیا۔ بازار میں کوئی ایسی مستند سرکاری لغت دستیاب نہیں جو دورحاضر کے تقاضوں کے مطابق مرتب کی گئی ہو۔ تراجم کرانے کا کوئی نظام وضع نہیں کیا گیا۔ اردو کو بس نام کی قومی زبان بنایا گیا ہے، اس کے نام پر سیاست کی گئی ہے اور سرکاری یا غیرسرکاری سطح پر اسے عربی اور فارسی کی چھاپ سے نکالنے کی بھی کوئی کوشش نہیں کی گئی۔ ہمیں ان سات دہائیوں میں اردو میں مقامی زبانوں کے الفاظ و اصطلاحات کا رنگ نظر نہیں آتاہاں انگریزی کی چھاپ بہت واضح ہے۔
اردو کو نظرانداز کرنے کی سرکاری روش کا یہ عالم ہے کہ مبارک علی جیسے تارخ دان یہ کہہ رہے ہیں کہ اردو کو اس مقام تک پہنچا دیا گیا ہے کہ یہ ایک مردہ زبان بن چکی ہے جس میں کسی جدید خیال کو سمجھنے اور سمجھانے کی صلاحیت موجود نہیں ہے اب یہ فقط رابطے کی زبان ہے ۔اس صورتحال میں ہماری اشرافیہ کے لیے یہ ثابت کرنا بہت آسان ہوجاتا ہے کہ اردو عدلیہ، فوج، بیوروکریسی ، بینکاری، تعلیمی اداروں اور تمام دوسرے اداروں میں ایک دفتری زبان کے طور پر رائج ہونے کے لیے موزوں نہیں ہے۔ایسی صورتحال میں آئیں مل کر کسی معجزے کا انتظار کریں۔

بے چاری اردو زبان جو ویسے ہی ستم گروں کے نشانے پر رہتی تھی پر ایک بار پھر غیظ وغضب کے بادل منڈلا رہے ہیں۔جیسے ہی حکومت کی طرف سے اردو کو دفاتر میں رائج کرنے کا ابتدائی کام شروع کرنے اعلان ہوا ،یاروں کے دلوں پر سانپ لوٹنے لگے اور زبانیں زہر اگلنے لگیں۔ اردو سے نفرت سے کا اژدھا گویا ایک با رپھر زبان لپلپانے لگا۔ کسی کو اردو کی حیثیت اور مقام سے شکوہ ہوا تو کسی گرگ باراں دیدہ کو قائد اعظم کے اردو کو پاکستان کی زبان قرار دینے میں گناہ ہی گناہ نظر آنے لگے۔ کچھ کے خیال میں یہ ہندوستانی زبان ہے۔
پاکستان میں یوں تو کم و بیش ستر زبانیں بولی جاتی ہیں لیکن ان میں سے بہت سی زبانوں کو اردو اور انگریزی کے فروغ کی وجہ سے معدوم ہوجانے کا خطرہ درپیش ہے۔ پنجابی پاکستان کے 54 فی صدافراد کی جبکہ پشتو 15 فی صد، سندھی 14 فی صد، بلوچی 3.6 فیصد اور اردو 8 فی صد افراد کی مادری زبان ہے۔ اردو اگرچہ ایک اقلیت کی مادری زبان ہے تاہم ملک بھر میں اکثریت اس سے واقفیت رکھتی ہے۔

پنجابی پاکستان کی سب سے بڑی علاقائی زبان ہے جو 54 فی صدپاکستانیوں کی مادری زبان ہے۔مجموعی طور پر پنجابی دنیا بھر میں تسلیم شدہ زبانوں میں سے ایک ہے اور نویں بڑی زبان ہے۔ جدید ٹیکنالوجی سے سے متعلق مواد،ویب سائٹ،موبائل ایپس اور ونڈوز سافٹ وئیرز کا پنجابی ترجمہ بھی گورمکھی اور شاہ مکھی میں کیا جارہا ہےجو یقینا ایک بڑی پیش رفت ہے۔ لیکن ابھی تک اسکولوں یا مدرسوں میں پنجابی زبان کی بنیادی تعلیم کا انتظام نہیں کیا جاسکا ہے۔البتہ میٹرک ، انٹر اور گریجوایشن کی سطح پر پنجابی ایک اختیاری مضمون کے طور پر پڑھایا جارہا ہے۔ پنجابی میں ڈگری کی سطح کی تعلیم بھی دی جارہی ہے۔ تاہم،یہ پڑھائی ابھی صرف زبان و ادب تک محدود ہے مذہب، سائنس، ریاضی اور دیگر عصری موضوعات پر پنجابی زبان میں مقامی سطح پر قابل ذکر نصاب موجود نہیں۔یہی صورتحال کم وبیش دوسری علاقائی زبانوں کے ساتھ ہے۔ علاقائی زبانیں چونکہ ایک خاص خطے سے منسوب ہوتی ہیں اس لیے ان پر غیر شعوری طور پر علاقائی رسم ورواج کی ایک جداگانہ چھاپ ہوتی ہے جو انہیں ایک ہمہ جہت معاشرے میں قومی زبان کے طور رائج کرنے کی راہ میں حائل ہوتی ہے۔ سب سے بڑھ کریہ کہ اگر ذریعہ تعلیم کو مقامی زبانوں تک محدود کر دیا جائے تو آنے والے وقتوں میں ملک کے مختلف خطوں کے درمیاں دوریوں میں اور بھی اضافہ ہونے کا امکان بڑھ جائے گا ۔ اس کے علاوہ،عام طور پر مقامی زبانیں پڑھنے کا کوئی ایسا قابل ذکر رجحان نظر نہیں آتا۔لوگوں کی ایک بڑی تعداد اپنے بچوں کو اردو یا انگریزی تعلیم دلوانے میں زیادہ دلچسپی رکھتی ہے۔علاقائی زبانوں کے تعلیمی اداروں میں رائج نہ ہونے کی ایک بڑی وجہ یہ بھی ہوسکتی ہے۔

جبکہ اردو ایک غیرجانبدار زبان ہوتے ہوئے بھی پاکستان کی دوسری زبانوں سے جڑی ہوئی ہے اور رابطے کا بہترین ذریعہ ہے اور مختلف قومیتوں کے افراد کے درمیان تفاوت دور کرنے اور یکساں انداز میں علم حاصل کرنےکا موزوں ذریعہ ہے۔اس کے علاوہ مسلمانوں کا ایک قابل قدر عملی و ادبی ذخیرہ بھی اردو زبان میں پہلے سے محفوظ ہے۔اردو کی مخالفت میں ایک دلیل یہ بھی ہے کہ چونکہ بنگلہ دیش کا قیام ایک علاقائی زبان کی بنیاد پرہوا تو اسی بنا پر پاکستان میں ہر صوبے کی قومی زبان اس کی علاقائی زبان کوبنا دینا چاہیے۔مگر اردو کے برعکس،بنگالی زبان آج بھی صرف بنگلہ دیش اور ہندوستان کے کچھ علاقوں تک محدود ہے جبکہ اردو ایک بین الاقوامی زبان ہے اور دنیا بھر میں اردو پڑھنے،لکھنے اور بولنے والے موجود ہیں جو محض پاکستان ہندوستان تک محدود نہیں ۔.
علاقائی زبانوں کی اہمیت اور معاشرے میں ان کا مقام اپنی جگہ لیکن رابطے کے لیے اردو کو اپنانے میں کوئی حرج نہیں۔ بلاشبہ علاقائی زبانوں کو قومی زبان کا درجہ دینا بھی کچھ ایسا غلط مطالبہ نہیں۔اگر ہم پڑوسی ہندوستان کی طرف دیکھیں تو اس وقت کم و بیش بائیس علاقائی زبانوں کو قومی زبان کا درجہ حاصل ہے ۔جبکہ بنیادی رابطے کی زبان ہندی ہے جسے مختلف مقامی لہجوں کو ملا تقریباً چالیس کروڑ لوگ استعمال کر رہے ہیں ۔ پاکستان کی 75 فی صد آبادی پہلے ہی رابطے کی زبان کے طور پراردو کااستعما ل کر رہی ہے اس لیے اسے دفتری اور تدریسی زبان کے طور پر رائج کرنا مشکل نہیں۔ لوگوں کی ایک بڑی تعداداردو لکھ پڑھ اور بول سکتی ہے،اس زبان میں نصاب موجود ہے ذرائع ابلاغ اور نشرواشاعت کا عمل جاری ہے اس لیے اردو کو رابطے کی زبان بنانے میں کسی کو اعتراض نہیں ہونا چاہیئے۔