Laaltain

ہمارے لیے لکھیں۔

پشتون تحفظ موومنٹ (سلمان حیدر)

test-ghori

test-ghori

26 جنوری, 2019

تم لوگوں کو قتل کرتے رہے
یہاں تک کہ
احساس تحفظ تمہاری گولیوں کا نشانہ بن گیا
تم نے بے گناہوں کو
ان کے بستروں کے سکون سے جھپٹ لیا
ان کی سواریوں کی راحت سے نیچے دھکیل دیا
ان کی خاندان کی عافیت سے کھینچ نکالا
اور ان کے دوستوں کی راحت سے اچک لیا
باقی بچ جانے والوں کو خاموشی کا گھن اندر ہی اندر کھانے لگا
یہاں تک کہ انہوں نے اپنی آواز سننا شروع کر دی
وہ کسی کا انتظار کیے بغیر
اپنی آرام گاہوں سے نکل آئے
اور انہوں نے اپنے جیسوں کو اپنے گرد پایا
انہوں نے سواریوں روک دیں
عافیت کو ترک کر دیا
راحت کو کسی اور دن کے لیے اٹھا رکھا
اور تمہارے دروازوں پر اپنی آوازیں بلند کر دیں
تمہارے ہتھیار خوف کھانے لگے
ان کی لبلبی پر رکھی انگلیاں
حیرت سے اکڑ گئیں
تم نے احساس تحفظ کو قتل کرتے ہوئے نہیں سوچا
کہ لوگ گھروں میں خوفزدہ ہو جائیں
تو سڑکوں پر نڈر ہو جاتے ہیں۔۔۔۔