میں نے کہا تھا – نصیر احمد ناصر

میں نے کہا تھا
راستے ویران ہو جائیں گے
اور تم نہیں مانتے تھے

میں نے کہا تھا
دروازے بند ہو جائیں گے
اور تم نہیں مانتے تھے

میں نے کہا تھا
ٹیرس کے گملے سوکھ جائیں گے
اور پورچ میں
خشک پتوں کا ڈھیر لگ جائے گا
اور تم نہیں مانتے تھے

میں نے کہا تھا
محبت اور اناج کے
ذخیرے کم پڑ جائیں گے
اور تم نہیں مانتے تھے

میں نے کہا تھا
لوگ جنگوں سے نہیں
اَن دیکھی وبا
اور تنہائی سے مریں گے
اور تم نہیں مانتے تھے

میں نے کہا تھا ۔۔۔۔۔۔