حمل بھری ماؤں کی خاطر رو دے

جاں نچوڑتے دردِ زہ سے گزر کر جس لمحے جنما تھا میں نے تجھے
اور لیبر روم کی سرکاری ڈاکٹرنی نے ہاتھوں میں لیا ہی تھا ابھی تجھے
اور میرے کان تیری آواز سننے کے ابھی منتظر ہی تھے
کہ سرکاری ڈاکٹرنی نے نرس سے کہا
بچے کو رونے مت دینا
سرکار نے رونے پر پابندی لگا دی ہے
اور حکم نامہ جاری کر دیا ہے کہ رونے والے بچوں کو دریا بُرد کر دیا جائے
آتشِ نمرود میں بٹھا دیا جائے
تب سے میرا ہاتھ تیرے منہ پے دھرا ہے
اور تب سے اس دیس کی کئی نسلیں دریا برد ہو چکی ہیں
آتشِ نمرود میں خاکستر ہو چکی ہیں
تب سے اس دیس میں نہ موسیٰ ہے، نہ عصا ہے
مگر آج تیرے منہ پر رکھا اپنا ہاتھ ہٹاتی ہوں میں
ماں بن کے تجھے اجازت دیتی ہوں میں
تو آج رو دے
حمل بھری ماؤں کی خاطر رو دے
حمل میں ٹھہری نسلوں کی خاطر رو دے
آنسو بہا
اس بانجھ ہو چکی دھرتی کو ہرا کر دے
سوکھ چکے دریا بھر دے
بھرے دریاؤں پر چپّوُ چلا
نیّا بن جا
دریا کاٹ اور دوسرے کنارے اتر
اور کہہ دے کہ فرعون مردہ باد
کہہ دے کہ موسیٰ زندہ باد