عشرہ / لونٹھا پولیس

عشرہ — دس لائنوں پر مبنی شاعری کا نام ہے جس کے لیے کسی مخصوص صنف یا ہئیت، فارم یا رِدھم کی قید نہیں. ایک عشرہ غزلیہ بھی ہو سکتا ہے نظمیہ بھی۔ قصیدہ ہو کہ ہجو، واسوخت ہو یا شہرآشوب ہو، بھلا اس سے کیا فرق پڑتا ہے۔ ادریس بابر

ان کی سیٹیوں الارموں ہوٹروں شوٹروں کے چلو میں
ٹریفک کا شور ڈوب مرنے کی جگہ ڈھونڈتا ہے

ملٹی نیشنلوں کے نیون سانپوں کو سالم نگل جاتے ہیں
ان کی نیلی پیلی چھپکلیاں لال ہرے اژدھے

عربی فرنچی داڑھیاں، نیچے سے موثر جرمن رانیں
ڈھیلے ماٹھے لینڈ لارڈ ہو جاتے ہیں انہیں تکتے ہی ہارڈ
ایسوں ویسوں کو اوقات سے بڑھ کے لفٹ نئیں دیتے
ہلکی رشوت پھلکی سفارش گھٹیا گفٹ نئیں لیتے

ملین ڈالر مین کے جیسی بائیک ہے ان کے نیچے
بگٹٹ بھاگ نکلتے ہیں کسی ادھیے والے کے پیچھے