شب خون

میں خواب میں جنگ دیکھتا ہوں
اندھیرااوڑھے ہوئی زمین اپنی کوکھ میں سائے پالتی ہے
جو پیدا ہوتے ہی خوف اور احتیاط کی گھٹنیوں پے چلتے
میرے قبیلے کے چند خیموں کو گھیرلیتے ہیں اور خاموش
سانس روکے کسی اشارے کے منتظر وقت کاٹتے ہیں
وہ وقت جو مجھ پے اور ان پے
بہت گراں ہے
وہ بے خبر ہیں کہ ایک خیمے میں آج کی رات بھی یہ آنکھیں چمک رہی ہیں
میں آج بھی ان کا منتظر تھا

میرے برابر میں زندگی ہے
جو نیند میں مسکرا رہی ہے
وہ اپنا اک خواب پورا کر لے
تو اس کے ماتھے پے بوسہ دے کے
میں اپنی تلوار تھام لوں گا…