راندۂ درگاہ

6 مارچ، 2017

کے۔ بی۔ فراق

راندۂ درگاہ

مَیں نے آنکھیں بند کرلیں
اور خواب میں چلتا رہا یونہی
تو اِس بیچ
کسی لمحے نے
میرے وجود کو
بھینچ لیا
اور پھر مِرے چہرے پر
چیچک زدہ نُقطے کی صورت
پھیل گئے لمحہ بھر میں
تب میرا
انسانی آبادی میں
رہنا ٹھیک نہیں سمجھا گیا
کیونکہ مَیں
اِس شُمار میں کہیں آتا ہی نہیں تھا
اور میرے لیے
کہیں دُور پرے
کسی مندر کے پہلو میں
اور چِنالی (1)کے سینے پر
کٹیا بنا کے
مجھے رکھا گیا
اور آج مری جب
آنکھ کھلی تو
خود کو اپنی اِس
جنم بھومی سے دُور کہیں
انجانی اور بے مہرآنکھوں کے جِلو میں
اور اذہان کو ملتے دیکھا
تو خود کو دفعتاً
چیچک زدہ کے
اُسی استھان میں پایا

نوٹ: (1)چنالی : گوادر کے جنوب میں پہاڑی کے بالکل ساتھ ہی واقع ایک تاریخی جگہ کا نام جہاں چیچک زدہ لوگوں کو رکھا جاتاتھا۔

Image: Oswaldo Guayasamin

کے۔ بی۔ فراق

کے بی فراق کا تعلق گوادر، بلوچستان سے ہے۔ آپ نے بلوچستان یونیورسٹی ، کوئٹہ سے اردو ادب میں ماسٹرز کی ڈگری حاصل کی اور اب کئی سالوں سے فری لانس لکھاری، مترجم اور شاعر کے طور پر اردو اور بلوچی دونوں زبانوں میں ادبی اور تخلیقی خدمات سرانجام دے رہے ہیں۔

مصنف کی دیگر تحریریں