Tag: طلبہ

سرسید یونیورسٹی آف انجینئرنگ اینڈ ٹیکنالوجی کراچی کے طلبہ نے رینجرز اہلکاروں کی جانب سے تشدد کے باوجود فیسوں میں مجوزہ اضافے کے خلاف احتجاج جاری رکھنے کا عزم ظاہر کیا ہے۔ تفصیلات کے مطابق سرسید یونیورسٹی کے طلبہ گزشتہ کئی روز سے یونیورسٹی انتظامیہ کی جانب سے فیسوں میں اضافے کے فیصلے کے خلاف پرامن احتجاج کرہے ہیں۔ منگل 26 جون کویونیورسٹی کے باہر ہونے والے پرامن احتجاج کے دوران قریبی چوکی سے رینجرز اہلکاروں کی بھاری تعداد نے طلبہ کا گھیراو کرلیا اور شدید لاٹھی چار ج کیا۔ تشدد کے نتیجے میں کئی طلبہ زخمی ہونے کے باوجود طلبہ نے حتی الامکان اپنا احتجاج جاری رکھا۔ احتجاج میں شریک طالب علم وقاررئیس کے مطابق رینجرز اہلکار کی جانب سے طلبہ کو وحشیانہ تشدد کا نشانہ بنایا گیا اور ذرائع ابلاغ کے نمائندوں کے آنے تک بے دریغ لاٹھی چارج کیا گیا۔
یونیورسٹی انتظامیہ کی جانب سے اس معاملے سے لاتعلقی ظاہر کی گئی ہے تاہم طلبہ حلقوں نے اس صورت حال کی ذمہ داری یونیورسٹی انتظامیہ پر ڈالی ہے۔ سوشل میڈیا پر سرسید یونیورسٹی کے طلبہ کے صفحات پر جاری کی گئی معلومات کے مطابق یونیورسٹی انتظامیہ نے مختلف پروگراموں کی داخلہ اور امتحانی فیس میں اضافہ کیا ہے جس کے خلاف طلبہ نے احتجاج کیا ہے اور اس فیصلے کو واپس لینے کا مطالبہ کیا ہے۔ طلبہ کی جانب سے جاری کیے گئے ایک گراف میں سرسید یونیورسٹی کی فیس میں اضافے کا دیگر یونیورسٹیوں کے ساتھ موازنہ بھی کیا گیا ہے۔ طلبہ کا دعوی ہے کہ رواں برس فیس 55000 سے بڑھا کر 85000 کر دی گئی ہے۔

طالب علموں نے کراچی میں رینجرز کے کردار پر تحفظات کا اظہار کیا ہے ۔ ایک طالب علم نے نام ظاہر نہ کرنے کی شرط پر بتایا کہ اس وقت جامعہ کراچی رینجرز کی سب سے بڑی چھاؤنی بن چکی ہے۔ رینجرز شہر میں آئے روز اساتذہ، طلبہ اور مختلف طلبہ تنظیموں سے الجھتی رہتی ہے اوراب یہ سلسلہ سر سید یونیورسٹی تک جاپہنچا ہے”۔ سرسید یونیورسٹی کے طلبہ نےاعلی حکام سےایسے واقعات کا نوٹس لینےاور طلبہ کے خلاف رینجرز اہلکاروں کے تشدد کی روک تھام کا مطالبہ کیا ہے۔

اسلامیہ یونیورسٹی بہاولپور کے طلبہ نے یونیورسٹی انتظامیہ سے پارکنگ کے تنازعہ پر ہونے والے جھگڑے پر جمعرات 26 مارچ کو ڈی آئی جی چوک پر احتجاج کیا اور یونیورسٹی بسوں کی آمدورفت معطل کردی۔ طلبہ نے ڈی آئی جی چوک سے اولڈ کیمپس تک ریلی بھی نکالی اور دھرنا بھی دیا۔ چار گھنٹے تک جاری رہنے والے احتجاج کے دوران طلبہ نے نعرے بازی کی اور انتظامیہ سے تشدد میں ملوث سیکیورٹی اہلکاروں کے خلاف کارروائی کا مطالبہ کیا۔ احتجاج کرنے والے طلبہ نے 18 مارچ کو یونیورسٹی سیکیورٹی گارڈز سے ہونے والے جھگڑے کے خلاف احتجاج کرتے ہوئے متعلقہ اہلکاروں کے خلاف کارروائی کرنے، خاتون سیکیورٹی گارڈوں کی تعیناتی اور فیسیں کم کرنے کا مطالبہ کیا ہے۔

لالٹین کو موصول ہونے والی اطلاعات کے مطابق گزشتہ برس پشاور حملے کے اسلامیہ یونیورسٹی انتظامیہ نے ممکنہ دہشت گرد حملے سے بچاو کے لیے بعد غیر اندراج شدہ گاڑیوں کے لیے داخلی دروازے کے قریب پارکنگ قائم کی تھی۔ یونیورسٹی انتظامیہ کی جانب سے کیمپس حدود میں صرف انتظامیہ کے پاس اندراج شدہ گاڑیوں کو داخل ہونے کی اجازت دینے کے فیصلے کے باوجودبعض طلبہ نے اپنی گاڑیوں اور موٹر سائیکلوں کے اندراج کے بغیر انہیں یونیورسٹی حدود میں لے جانے کی کوشش کی جس پر انہیں روکا گیا، “طالب علموں نے اپنی موٹر سائیکلیں ڈیپارٹمنٹ تک لے جانے کی کوشش کی، سیکیورٹی اہلکاروں کے روکنے پر ہاتھا پائی اور احتجاج پر اتر آئے۔” ایک یونیورسٹی گارڈ نے نام ظاہر نہ کرنے کی شرط پر بتایا۔ گارڈ کے مطابق طلبہ کی جانب سے گالم گلوچ اور مارپیٹ کا آغاز کیا گیا۔
احتجاج کرنے والے طلبہ نے یونیورسٹی انتظامیہ کو تشدد کا ذمہ دار قرار دیا ،”گارڈز نے یونیورسٹی انتظامیہ کی ایماء پر طلبہ کو تشدد کا نشانہ بنایا ہے۔” اسلامیہ یونیورسٹی کے طالب علم فیاض کا کہنا تھا۔ ان کا کہنا تھا کہ یونیورسٹی انتظامیہ نے پارکنگ کی جگہ ڈیپارٹمنٹس سے بہت دور بنائی ہے جس کی وجہ سے طلبہ کو کافی دشواری کا سامنا ہے، انہوں نے احتجاج کا دائرہ وسیع کرنے کا عندیہ بھی دیا،”ہم اپنا احتجاج جاری رکھیں گے اور ڈی سی آفس کے سامنے بھی دھرنا دیں گے۔” تاہم آج دھرنے کےطے شدہ مقام پر کسی قسم کا احتجاج دیکھنے کو نہیں ملا۔ مظاہرین نے دو طالب علموں محمد طیب جاوید اور جنید ججہ پر تشدد کا الزام بھی عائد کیا۔
یونیورسٹی انتظامیہ کی ایک پریس ریلیز کے مطابق کی جانب سے کیے جانے والے مطالبات بے جا اور احتجاجی طلبہ کو یونیورسٹی کے اٹھارہ ہزار طلبہ کی حمایت حاصل نہیں، احتجاج میں شریک طلبہ یونیورسٹی سے خار کیے گئے طلبہ ہیں۔ پریس ریلیز کے مطابق یونیورسٹی انتظامیہ نے فیسوں میں اضافہ نہیں کیا اور نئی پارکنگ صرف غیر اندراج شدہ گاڑیوں کے لیے ہے۔

“بچوں کو ایک کلاس میں تعلیم دینا کیسے ممکن ہو گا جب ایک ہاتھ میں بندوق ہوگی اور ایک ہاتھ میں کتاب۔” خیبر پختونخواہ حکومت کی جانب سے اساتذہ کو اسلحہ چلانے کی تربیت دینے کے فیصلے کی مذمت کرتے ہوئے پرائیویٹ سکولز ٹیچرز ایسوسی ایشن کے صدر ملک خالد خان نے کہا۔ ان کا کہنا تھا کہ سکولوں کا تحفظ کرنا ان کی ذمہ داری نہیں،”ہماری ذمہ داری بچوں کو کتابوں کی مدد سے تعلیم دینا ہے، کلاس میں ایک استاد کے ہاتھوں میں گن سے طالبعلموں پر بہت برا اثر پڑے گا، اگر پولیس کو پولیس نفری میں کمی کا سامنا ہے تو مزید اہلکاروں کو بھرتی کیا جانا چاہئے۔”

خیبر پختونخواہ حکومت کی جانب سے تعلیمی اداروں کے تحفظ کے لیے اساتذہ کو اسلحہ رکھنے اور اسے چلانے کی تربیت دینے کا فیصلہ کیا تھا جس کے بعد اسے شدید تنقید کا سامنا کرنا پڑرہا ہے۔اس فیصلے کے تناظر میں گزشتہ ہفتے مرد اساتذہ کو اسلحہ چلانے کی تربیت دینے کا آغاز کیا گیا تھا، جبکہ آج(28 جنوری ) کو خواتین اساتذہ کو بھی اسلحہ چلانے کی تربیت دینے کا آغاز کر دیا گیا ہے۔ یہ تربیت قانون نافذ کرنے والے اداروں کے تعاون سے دی جا رہی ہے۔پشاور پولیس ہیڈکوارٹرز کے ایک ٹرینر محمد لطیف نے بتایا ” یہ دو روزہ کورس ہے اور ہم ان خواتین اساتذہ کو گن سنبھالنے اور اسے چلانے کی تربیت دے رہے ہیں”۔
دوسری جانب صوبائی حکومت کے اس فیصلے کا دفاع کرتے ہوئے صوبائی وزیر اطلاعات مشتاق غنی نے بتایا کہ صوبائی حکومت تمام سرکاری تعلیمی اداروں کو پولیس گارڈز فراہم کرنے سے قاصر ہے۔ان کا کہنا تھا ” صوبے میں پولیس کی نفری 35 ہزار اسکولوں، کالجوں اور یونیورسٹیوں کی حفاظت کے لیے کافی نہیں اور یہی وجہ ہے کہ ہم اساتذہ کو اسلحہ لے کر آنے کی اجازت دے رہے ہیں”۔

صوبائی حکومت نے یہ فیصلہ سولہ دسمبر 2014کو پشاورکے آرمی پبلک سکول پر ہونے والے حملے کے بعد تعلیمی اداروں کی حدود میں اسلحہ رکھنے کی اجازت دی گئی تھی ۔ صوبائی حکومت کے اس فیصلے پر تنقید کرتے ہوئے ماہرین تعلیم نے اسے تعلیمی اداروں کے پرامن ماحول کے لیے خطرہ قرار دیا ہے۔پشاور کے ایک نجی تعلیمی ادارے کے سربراہ نذیر خان کے مطابق اس سے عدم تحفظ اور عسکریت پسندی میں اضافے کا خطرہ ہے،”اب اگر سکول میں استاد مسلح ہو کر آئیں گے تو اس سے طلبہ کے عدم تحفظ میں اضافہ ہو گا اور انہیں یہ پیغام ملے گا کہ ریاست ان کا تحفظ نہیں کر سکتی اس لیے اپنے بچاو کے لیے خود ہتھیار اٹھالینے چاہئیں۔