Tag: جدید نثری نظم

معمول کی کوئی خبر سن کر بھی
جب خاموشی کا بوجھ میرے سینے میں اٹکنے لگے
میری ہتھیلیاں آپس میں جڑ جائیں
انگوٹھے اُن کی پشت اور کلائی پر جمنے لگیں
میں ہتھیلیوں کو آہستگی سے الگ کرتا ہوں
اور پھر ایک اضطراب میں
وقفے وقفے سے
بے اختیار اُنہیں رگڑنے لگتا ہوں
پہلے آہستہ آہستہ
پھر تیز
پھر اور تیز
میں بے دھیانی میں اُنہیں رگڑتا چلا جاتا ہوں
ایک الاؤ کے بھڑکنے تک
شعلوں کےاس جنگل میں
میری روح اور جسم اکھٹے اترتے ہیں
اُس شام کی طرح
جس کے سنگم پر
دن اور رات کا محتسب دھندلکا
خون میں تیرتا رہتا ہے
اس جنگل میں کچھ جلتا ہے
جس کی راکھ سے وقت ایسے پرندے بناتا ہے
جو مجھ میں چاروں طرف اڑتے
اور میری ذات کی دیواروں پرپیہم ٹھونگیں مارتے ہیں
میں نقرئی آگ کے سمندر میں
نمک کی طرح پگھلتا
اور ساحل کی ہوا سے ہمکلام ہوتے ہوئے
خوابوں کا گرم موم اپنے سر پر ٹپکتا محسوس کرتا ہوں
اپنے ہاتھوں کی انگلیوں کو دیکھتا ہوں
اور ڈر جاتا ہوں
کہ اُن کی پوریں
تعبیروں کے اس پُل کی طرح ہیں
جس کی ریلنگ کے حصے
بصارت سے محروم آنکھوں سے بنے ہوں
اور جو سر کٹے بھتنوں کی طرح
مجھ پر دانت نکوسنے میں مصروف ہوں
جنگل کی بھڑکتی آگ میں
بن بلائے موسم شعلے پھلانگتے
زندگی کا قرض چکانے
کہیں دور نکل جاتے ہیں
اُن تمناؤں،امیدوں اور یادوں سے دور
جو اپنے اعمال کا بوجھ اٹھائے
گیلی لکڑیوں کی طرح سلگتی رہتی ہیں
میں سارے ایندھن کا شور
خود میں انڈیل لینا چاہتا ہوں
افق پر لہو میں تیرتا دھندلکا
میرے کسی ہم نفس کو پکارتا ہے
اور میرے تلووں تلے انگارے سر اٹھا کر کہتے ہیں
یہاں تمہارے سوا کوئی نہیں
۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔
تو پھر
یہ جہنم
جو میری ہتھیلیوں میں چھپی ہے؟

کئی زمانوں سے
مسلسل جاگنے کے باعث تھک گیا ہے
ہنگامی حالت کے باعث
انگڑائی لینے تک کی اجازت نہیں دی گئی
اُسے
کس غم میں، کس انتظار میں،
کس خیال میں مسلسل جگایا جا رہا ہے
یہ بھی نہیں بتایا گیا

کئی بار اس نے چاہا
چاند، سورج اور ستاروں کو نوچ کر
ایسے ڈسٹ بن میں ڈال دے
جو کسی سے کھل نہ سکے
دھوپ اور چاندنی کو موڑ توڑ کر
کسی تھیلے میں ڈال کر
اس پر اتنا کودے
کہ ان کے سارے کس بل نکل جائیں
لیکن نہیں
کبھی سوچتا ہے
کہیں کوئی چاندنی کا لطف نہ اٹھا رہا ہو
محبوبہ کا چہرہ نہ دیکھ رہا ہو،
ہو سکتا ہے یہ اس کے آخری پل ہوں
دھوپ میں سُکھا رہا ہو کوئی
اپنے بھیگے ہوئے خواب
مجھ سے پوچھتا ہے:
یہ کیسا کانٹا ہے
جو روح میں اٹک گیا ہے
لہو لہان کر رہا ہے میرا دل
قطرہ قطرہ ٹپک رہا ہے
ریزہ ریزہ ہو رہا ہے
کچھ پتا نہیں روح بھی ہے یا نہیں
اور دل یا دماغ بھی
یہ میرا عدم ہے یا وجود
یا دونوں مل کر ایک ہی ہیں
کہیں کوئی دروازہ بھی نہیں اس دیوار میں
مل بھی گیا تو کیا کروں گا
کس کا نام لے کر دستک دوں گا
کیا کہوں گا
اور کوئی آ بھی گیا تو؟

کچھ نہیں بس اتنا چاہتا ہوں
کچھ دیر کے لیے سمٹ جاؤں
کچھ دیر کے لیے
پاؤں پسار کر آنکھیں موند لوں
اور اس سے پہلے دیکھوں
کیسا لگتا ہے سب کچھ
میرے بغیر