سوالاًجواباً: جفعر خان اچکزئی کی یاد میں

سوال: بلوچستان سے آپ کو کیا یاد آتا ہے؟
جواب: وہ سب بہت غریب ہیں۔

سوال: خیبرپشتونخوا سے کیا مراد لیتے ہیں؟
جواب: عمران خان۔

سوال: پنجاب میں کیا ہوتا ہے؟
جواب: میلے، بسنت، ورلڈ ریکارڈ، موٹروے۔۔

سوال: طالبان کون لوگ ہیں؟
جواب: ہمارے کرموں کا پھل۔

سوال: ماما قدیر سے آپ کے ذہن میں کیا آتا ہے؟
جواب: ناٹو، آذادی، بے بسی۔

سوال: کوئٹہ کہاں ہے؟
جواب: ایبٹ آباد میں،

سوال: روس کو کس نے شکست دی؟
جواب: سٹنگر میزائیل نے۔۔

سوال: قائداعظم ریزیڈنسی کو کیوں جلایا گیا؟
جواب: یہ کہاں ہے؟

سوال: آپ تفریح کے لئے زیارت جانا پسند فرمائیں گے؟
جواب: میں ذیادہ مذہبی نہیں ہوں بس ایک دو دفعہ داتا دربار گیا ہوں۔

سوال: ماما قدیر کے بارے میں کچھ تو بتائیں؟
جواب: پتہ نہیں، شاید کسی مطالبے کے لئے بھوک ہڑتال کر رہے ہیں۔

سوال: وزیرستان سے لوگ نقل مکانی کیوں کر رہے ہیں؟
جواب: پتہ نہیں لیکن ہم بہت پریشان ہیں۔

سوال: وہ کیوں؟
جواب: وہ پنجاب اور سندھ کے پرامن شہروں کو خراب نہ کر دیں۔

سوال: کراچی سے کیا مراد ہے؟
جواب: الطاف بھائی۔

سوال: کیا آپ عبدالستار ایدھی کو جانتے ہیں؟
جواب: جی ہاں۔ وہ ایمبولنس چلاتا ہے۔

سوال: شیخ رشید کون ہے؟
جواب: مشرف کی پارٹی کا صدر۔

سوال: چوہدری شجاعت کو آپ جانتے ہیں؟
جواب: میرے خیال میں چوہدری افتخار اور چوہدری اعتزاز کا بھائی ہے۔

سوال: عمران خان کیوں وزیر اعظم نہیں بن سکے؟
جواب: کیونکہ لوگوں کو پتہ نہیں تھا کہ اس نے ورلڈ کپ جیتا۔

سوال: لاہوری اور پشاوری میں فرق؟
جواب: اتنا ہی جتنا آرمی اور ایف سی میں ہے۔

سوال: منور حسن کون ہے؟
جواب: وزیرستان کا ناظم اعلی۔

سوال: انڈیا کا پنجاب ذیادہ زرخیز ہے یا پاکستان کا؟
جواب: تو کیا دونوں میں کوئی فرق ہے؟

سوال: سندھ مدرستہ اسلام اور قائد اعظم میں کیا تعلق ہے؟
جواب: معاف کیجیئے گا۔ قائداعظم مدرسہ میں نہیں پڑھے ہیں۔

سوال: ڈرون حملے کب بند ہوں گے؟
جواب: جب شریعت آئے گی!

سوال: بلوچستان کیوں پسماندہ ہے؟
جواب: ہم کو آذادی دو!

سوال: کامریڈ کسے کہتے ہیں؟
جواب: کافروں کے ساتھی کو۔

سوال: خبرناک کیا چیز ہے؟
جواب: پنجاب ثقافتی پروگرام۔

سوال: زاہد حامد کون ہے؟
جواب: ڈرائینگ روم کا مجاہد۔

سوال: شہید کسے کہتے ہیں؟
جواب: گھر کی حفاظت کرتے ہوئے اگر کتا مر جائے تو اسے شہید کہتے ہیں۔

سوال: ثنا بُچہ کون ہے؟
جواب: بچہ ثُقہ کی بہن شاید۔۔۔

سوال: آج کل کے نعت آپ کو کیسے لگتے ہیں؟
جواب: آج کل کے اسلامی گانے بہت سریلے ہوتے ہیں۔

سوال: طاہرالقادری کیسے آدمی ہیں؟
جواب: ان کو اکیڈمی ایوارڈ دیا جانا چاہیئے۔

سوال: اسفندیار ولی غفار خان کے جرّی پوتے ہیں؟
جواب: جّری غفارخان کے پوتے ہیں۔

سوال: ایزی لوڈ کسے کہتے ہیں؟
جواب: سرخ پوش پرچارک۔

سوال: اسلم رئیسانی اور ہیروینچی میں کیا فرق ہے؟
جواب: رئیسانی صاحب زرداری کے بلوچستان کے وزیراعلی تھے۔

سوال: نواب اور سردار میں فرق واضح کیجئے؟
جواب: گورا آقا اور کالا آقا۔

سوال: آپ کو انگریز اچھے لگتے ہیں یا امریکی؟
جواب: سعودی۔

سوال: پشتون سبز چائے کیوں پسند کرتا ہے؟
جواب: کیونکہ سبز باغ میں حوریں ذیادہ ہوتی ہیں۔

سوال: رحمان ملک پسند ہیں یا ان کا ہئیرکٹ؟
جواب: اُن کی اُردو۔

سوال: وفاقی کابینہ میں پنجاب کی ذیادہ نمائندگی کی کوئی خاص وجہ؟
جواب: مشرقی پاکستان کی نمائندگی کم ہوا کرتی تھی اس لیے وہ تڑی پار ہو گئے۔ لوگوں نے سوچا دوبارہ یہ نہ ہو اس لیے۔

سوال: غیر ملکی کرکٹ ٹیم پاکستان آنے کو تیار نہیں، اس کے پیچھے کس کی سازش ہے؟
جواب: کیا پاکستان کی ٹیم فاٹا یا بلوچستان جانے کو تیار ہے؟

سوال: سعادت حسن منٹو کو آپ جانتے ہیں؟
جواب: زندیق فحش نگار۔

سوال: دھوم فلم آپ نے دیکھی ہے؟
جواب: دوبار، کترینا نے کمال رقص کیا ہے۔

سوال: بلاول زرداری ہے یا بھٹو؟
جواب: ایک شرط پے کھیلوں گی پیا پیار کی بازی، جیتوں تو تجھے پاؤں ہاروں تو پیا تیری۔

سوال: ذوالفقار مرزا جانباز ہے یا جیالا؟
جواب: حافظ قران۔

سوال: مولانا فضل الّرحمٰن کو کیک ذیادہ پسند ہے یا حلوہ؟
جواب: دونوں بشرطیکہ کرسی پر بیٹھ کر کھانے کو ملے۔۔۔

سوال: جنرل ضیاء الحق اور جنرل مشرف میں کیا فرق ہے؟
جواب: پہلا مرد مجاہد اور دوسرا کسی سے ڈرتا ورتا نہیں۔

سوال: کوئٹہ میں بے گناہ ہزارہ کو کیوں قتل کیا جا رہا ہے؟
جواب: آپ کی بات سے عرب اور فارس کے پیٹرول کی بو آرہی ہے۔

سوال: پاکستان کے پشتون کبھی کبھی خود کو افغان بھی کہتے ہیں، ایسا کیوں؟
جواب: وہ ایسے جیسے رنجیت سنگھ سکھ بھی تھا اور پنجابی بھی۔