لکی مروت؛ ڈیڑھ سو سکول چاردیواری سے محروم

صوبائی حکومت کی جانب سے تمام سکولوں کو سیکیورٹی کی فراہمی کے دعووں کے باوجود لکی مروت کے ڈیڑھ سو سکول تاحال چاردیواری سے محروم ہیں۔ 12 جنوری کو موسم سرما کی تعطیلات کے خاتمے کے بعد سکولوں میں تدریس کے آغاز کے لیے چار دیورای، کلوزسرکٹ کیمروں، مسلح محافظوں اور سکول عملہ کا ریکارڈ رکھنے کی شرط عائد کی گئی تھی تاہم لکی مروت کے بیشتر سکول مناسب سیکیورٹی اقدامات کیے بغیر کھول دیے گئے ہیں جس کے باعث ان سکولوں کے طلبہ اور اساتذہ کی سلامتی کو شدید خطرات لاحق ہیں۔

12 جنوری کو سکول کھلنے کے بعد بعض سکولوں کے سربراہان نے اپنے طور پر دیوروں پر شیشے کے ٹکڑے لگانے، اساتذہ کو سیکیورٹی انچارج بنانے اور درجہ چہارم کے ملازمین کو داخلی دروازوں پر تعینات کرنے جیسے ناکافی اقدامات کیے ہیں تاہم علاقے کے زیادہ تر سکول مناسب سیکیورٹی سے محروم ہیں۔ لکی مروت کے ایک مقامی استاد رحیم گل کے مطابق صوبائی حکومت کی جانب سے تاحال فنڈز موصول نہیں ہو سکے جس کے باعث سیکیورٹی کے مناسب انتظامات نہیں کیے جا سکے۔
محکمہ تعلیم کے ذرائع کے مطابق لکی مروت کے 3 ہائی سکول، 12مڈل سکول جبکہ 136 پرائمری سکول چار دیواری سے محروم ہیں سب کے لیے چھ کروڑ سے زائد رقم کی ضرورت ہے۔ لکی مروت کے چارسو کے قریب سکولوں کی چار دیواری بلند کرنے کے لیے بھی نو کروڑ سے زائد کے فنڈز درکار ہیں۔ ان چار سو سکولوں میں 8ہائیر سیکنڈری، 52 ہائی سکول،39 مڈل سکول اور 298 پرائمری سکول شامل ہیں۔ محکمہ تعلیم کے ایک اہلکار نے نام نہ بتانے کی شرط پر ذرائع ابلاغ کو آگاہ کیا ہے کہ صوبائی حکومت کی جانب سے تاحال مطلوبہ رقم فراہم نہ کیے جانے کے باعث سیکیورٹی کے لیے چار دیواری کی تعمیر اور توسیع کا کام نہیں کیا جاسکا۔