دل خالی ہوجائے
تو وجود شل ہو جاتا ہے
روشنی کی رفتار سے اڑتا آدمی
گر جاتا ہے
لکھنے کی میز
اور تنہائی کے بستر کے بیچ
تین قدم کے بلیک ہول میں
محبت تمہیں اپنے ہزار رنگوں سے
پریشان رکھتی ہے
تم یکجائی کے نشے میں
خود کو پرزہ پرزہ کرتے ہو
اور تمہاری چھاتی بھر جاتی ہے تصویروں سے
تین قدم کے بلیک ہول سے
رنگ نہیں رِستے
خون نہیں رِستا
کورے کینوس اڑتے ہیں خواب گاہ میں
لوگ ان پر کھینچ لیتے ہیں
اپنی قسمت کی لکیریں
تمہارے دل کے سوراخ کی
بولی لگاتے
Image: Lilya Kouhan
