وہ گول مٹول ہے
سانولا سا ہے
نقوش پیارے ہیں
تین سال کا ہے
بڑی بڑی آنکھوں سے
بغیر خوف کھائے
مجھے دیکھتا ہے
ندیدہ بھی نہیں
میری دی ہوئی
کھانے کی چیزیں
آدھی کھاتا ہے
اس کے کپڑے بھی
صاف ستھرے ہیں
جوتے بھی ٹھیک ہیں
پر اعتماد ہے
جیسے کہ اسے
بہت پیار ملا ہے
صوفے پر ٹیک لگائے
ایسے بیٹھا ہے
جیسے کہ ایسے صوفوں پر
روز بیٹھتا ہو
بہت دنوں سے
میں نے کسی بچے کو
گود میں نہیں اٹھایا
اک شدید خواہش
میرے اندر اٹھتی ہے
اسے گود میں لے کر
بے تحاشہ پیار کرنے کی
لیکن میں خود کو روک لیتی ہوں
ایسا نہیں ہے
کہ وہ ایسا کرنے سے
گھبرا کر رونے لگے گا
بلکہ ایسا ہے
کہ ایک نوکرانی کے بچے کو
گود میں لے کربے تحاشہ پیار کرنا
نامناسب ہے
