میں کسی جزیرے پر نہیں جانا چاہتا

اس سرد شام میں
دنیا کتنی مصروف ہے
باتیں کرنے میں
تیز تیز چلنے میں
خوشیاں ڈھونے میں
غم دھونے میں
سرد ہاتھوں سے کوئی
غم کیسے دھو سکتا ہے؟
مجھے سارتر اور غالب سے کچھ کہنا سننا نہیں
تارکووسکی، اولیور سٹون
اور تلخ چاند کے خالق پولانسکی کو
میں کمرے سے نکال چکا ہوں
کاسترو مر چکا ہے
میں کسی جزیرے پر نہیں جانا چاہتا
میں کہیں نہیں جانا چاہتا
تمہاری طلب کی انگیٹھی پر
ہاتھ تاپتے
میں کہاں جا سکتا ہوں
دنیا کتنی مصروف ہے
تیز تیز چلنے میں
خوشیاں ڈھونے میں
غم دھونے میں
سرد ہاتھوں سے کوئی
غم کیسے دھو سکتا ہے؟