Tag: وفاقی حکومت

محترم مدیر
گلگت بلتستان کے عوام جب بھی اپنے حقوق کی بات کرتے ہیں تو انہیں نظرانداز کیا جاتا ہے، ان سے ناروا سلوک کیا جاتا ہےاور ظلم کا نشانہ بنایا جاتا ہے۔ ہماری تنظیم بالاورستان فرنٹ ہمیشہ سے گلگت بلتستان کے عوام کے حقوق کی فراہمی اور مسائل کے حل کے لیے کوشاں رہی ہے۔ آپ کے موقر جریدے کے ذریعے ہم عوام الناس کو مطلع کرنا چاہتے ہیں کہ مسئلہ کشمیر سے وابستہ گلگت بلتستان کے عوام جب بھی اپنی آزادی، خودمختاری اور آئینی حقوق کی بات کرتے ہیں تو انہیں وفاقی حکومت کے نمائندے اورگلگت بلتستان میں موجود ان کے مقامی گماشتے ہمیں خاموش کرانے کے لیے طرح طرح کے ہتھکنڈے اور ریاستی طاقت استعمال کرتے ہیں۔ ہمارے کئی سیاسی کارکن اور انسانی حقوق کے لیے جدوجہد کرنے والے ساتھی ریاستی اداروں کی حراست میں ہیں۔ نوبت یہاں تک آپہنچی ہے کہ اپنے حقوق کی بات کرنے کی پاداش میں سینکٹروں سیاسی کارکن اور رہنما پچھلے 5 ماہ سے گلگت بلتستان کی مختلف جیلوں میں پابند سلاسل ہیں۔

تفصیلات کے مطابق 7 جون 2015 کو جب فاتح گلگت بلتستان کرنل مرزا حسن خان (مرحوم) کے فرزند کرنل ریٹائرڈ نادر حسن خان، بالاورستان کے اہم رہنما صفدر علی، افتخار حسین، مدثر، وسیم، افتخار پالے اور دیگر کارکنان پاک چین اقتصادی راہداری پراپنے تحفظات کا اظہار کرنے کے لیے گلگت میں یونائیٹڈ نیشن ملٹری گروپ برائے انڈیا اینڈ پاکستان کے ذیلی دفتر جوٹیال گلگت پہنچے۔ یہ افراد اس اقتصادی منصوبے پر اپنے تحفظات عالمی اداروں تک پہنچانا چاہتے تھے لیکن انہیں ریاستی اداروں نے روک کر زدوکوب کیااور گرفتار کر لیا۔ اپنا آئینی، قانونی اور سیاسی حق استعمال کرنے والے یہ سیاسی کارکن تاحال جیل کی سلاخوں کے پیچھے ہیں۔ ان سیاسی کارکنوں کو قانونی معاونت بھی فراہم نہیں کی جارہی جو بین الاقوامی قوانین اور اقوام متحدہ کے چارٹر کے مطابق ان کا حق ہے۔پچھلے پانچ ماہ کے دوران نہ تو انہیں کسی عدالت سے ضمانت حاصل کرنے دی گئی ہے اور نہ ہی کوئی واضح مقدمہ قائم کیا جارہا ہے ۔ لہٰذا اس سلسلے میں ہم پاکستانی حکمرانوں کے ساتھ ساتھ اعلیٰ عالمی اداروں سے پرزور مطالبہ کرتے ہیں کہ وہ گلگت بلتستان میں اسیر سیاسی رہنماوں کو فی الفور رہائی کے لیے اقدامات کریں۔ ہم یہ بھی مطالبہ کرتے ہیں کہ ان پر لگائے گئے جھوٹے اور بے بنیاد الزامات سے انہیں بری الزمہ قرار دیا جائے۔ ہم اس حوالے سے حکمرانوں کو انتباہ کرتے ہیں وہ گلگت بلتستان کے سیاسی اسیران کے حوالے سے نوٹس لے۔ ایسا نہ کرنے کی صورت میں وقت گزرنے کے ساتھ ساتھ گلگت بلتستان کے بیس لاکھ مظلوم و محکوم عوام اپنے حقوق کے لیے پوری قوت سے اٹھ کھڑے ہوں گے جنہیں سنبھالنا موجودہ حکومت کے لیے مشکل ہو جائے گا۔
فقط
اراکین بالاورستان نیشنل فرنٹ

وفاقی حکومت ایک بار پھر گھر والوں سے پوچھے بغیر گھر کے نیچے سے کوہل بنانے (ندی) بنانےجارہی ہے، کہا جارہا ہے کہ اس کوہل کی تعمیر کے نتیجے میں ملک کے”آئینی صوبے” سیراب ہوں گے مگراس کی تعمیر سے گلگت بلتستان کی معاشی اور اقتصادی ترقی پر کیامنفی یا مثبت اثر پڑے گا اس حوالے سے کوئی بحث نہیں کی گئی۔یہ بھی کہا جارہا ہے کہ اس منصوبے کی تکمیل کی صورت میں نہ صرف پاکستان میں خوش حالی آئے گی بلکہ چین ، جنوبی ایشیا اور وسط ایشیا ء کے تقریباً تین ارب افراد کو فائدہ پہنچے گا۔ یعنی اس منصوبے کے ذریعے مخصوص تجارتی رہداریوں کی تعمیر سے بر اعظم ایشیا ء کی تقریباََ نصف آبادی پر مثبت اثرات مرتب ہوں گے۔ اقتصادی ماہرین کے مطابق یہ معاہدہ پاکستان اور چین کے اقتصادی تعاون کی تاریخ کا سب سے اہم معاہدہ ہے جس کے تحت گوادر کی بندرگاہ کو ہائی ویز، ریلوے اور پائپ لائنوں کے ذریعے چین کے جنو ب مغربی علاقے شن جیانگ (سنکیانگ) سے مربوط کیا جا ئے گا۔ ان پائپ لائنوں کے ذریعے تیل اور گیس دونوں ملکوں کے درمیان منتقل ہوں گے یہی وجہ ہے کہ چین اور پاکستان کی اعلیٰ قیادتیں اس منصوبے کی تکمیل میں ذاتی دلچسپی لے رہی ہیں۔

گلگت بلتستان کے باشندے کی حیثیت سے میں یہ اعتراض کرنے کا حق رکھتا ہوں کہ ایک طرف پاکستان بین الاقوامی قوانین کی روشنی میں گلگت بلتستان کو اپنا آئینی حصہ ماننے سے انکار کرتا ہے اور دوسری طرف اقتصادی راہداری منصوبے کی تکمیل کے لیے گلگت بلتستان کی سرزمین کو استعمال بھی کررہا ہے۔ پاکستان اور چین کی جانب سے گلگت بلتستان کی سرزمین استعمال کرنے کے حوالے سے واضح پالیسی سامنے نہ آنے کی وجہ سے مقامی آبادی میں شکوک و شبہات پیدا ہو رہے ہیں کیونکہ وفاق ایک طرف گلگت بلتستان کی سرزمین کواس راہداری کیلئے استعمال کرنے کی تیاریوں میں مصروف ہے تو دوسری طرف اس خطے کے عوام کو پاکستانی شہریت دینے سے بھی گریزاں ہے۔ اس دانستہ بے رخی سے ظاہر ہوتا ہے کہ پاکستان گلگت بلتستان کو صرف اپنے مفادات کی خاطر اپنا حصہ قرار دیتا ہے لیکن جب بات یہاں کی بیس لاکھ آبادی کے حقوق کی آتی ہے تو وہاں مقامی آبادی کو مکمل نظر انداز کر دیا جاتا ہے۔
اس اہم منصوبے پر اس خطے کے عوام کو اعتماد میں نہ لینے کی وجہ سے یہاں کے عوام میں بے چینی نظر آرہی ہے یہی وجہ ہے کہ عوامی ایکشن کمیٹی کے پلیٹ فارم سےجسے تمام مذہبی اور قومی جماعتوں کی حمایت حاصل ہے،ایک میثاق مطالبات خطے کے عوام کی طرف سے حکومت کو پیش کیاگیا ہے۔ اس میثاق میں واضح طور پر مطالبہ کیا گیا ہے کہ گلگت بلتستان کے عوام کو اعتماد میں لیا جائے اور اس منصوبے کا مرکزی ٹرمینل گلگت بلتستان میں بنایا جائے جو کہ یہاں کے عوام کا حق ہے۔ گلگت بلتستان کی تمام قومی سیاسی جماعتوں کو بھی اس بات کا احساس کرنا ہوگا کہ اب وقت ہے کہ خطے کے مفاد کیلئےآوازاٹھائی جائے۔ وفاق کے کٹھ پتلی سیاسی مہروں کی وجہ سے آج تک پاکستانی حکومت اس خطے کے مسائل پر توجہ دینے کی بجائے ہمیشہ وفاقی مفادات کو ترجیح دیتی رہی ہے۔

گلگت بلتستان کی متازعہ حیثیت کو ملحوظ خاطر رکھتے ہوئے یہاں بھی کشمیر کی طرز پر سیاسی نظام تشکیل دینا ہوگا اور علاقے کو اندرونی خود مختاری کا خصوصی درجہ دینا ہوگا۔ گلگت بلتستان کی متنازعہ حیثیت کے باوجود پاکستان اس علاقے کو خود سے الگ نہیں سمجھتا کیونکہ گلگت بلتستان دفاعی، جعرافیائی، سیاحتی اور تجارتی حوالے سے پاکستان کی ایک اہم ضرورت ہے یہ الگ بات ہے کہ یہاں کے باشندے آج تک اپنی حیثیت کے مطابق حقوق حاصل نہیں کر سکے ۔بلکہ یوں کہا جاسکتا ہے کہ ریاستی حکمت عملی کے تحت اس خطے کے عوام کومحض وفاق کے مفادات کے لیے استعمال کیا جاتا رہا ہے۔ اس خطے کی تمام تر اہمیت اورمقامی لوگوں کی خدمات کے باجودیہاں جب تعلیمی اداروں، صحت کی سہولیات اور ترقیاتی منصوبوں کی بات آتی ہے تو متنازعہ علاقہ قرار دے کر ٹال دیا جاتا ہے۔ وسائل پر سبسڈی دینے کی بات آتی ہے تو گندم دینے کا احسان جتایا جاتا ہے۔اس علاقے کے تمام سرکاری اداروں کا انتظامی ڈھانچہ اس لیے تباہ حالی کا شکار ہے کیونکہ یہ خطہ آئین پاکستان کے دائرے میں نہیں آتا لیکن جہاں کہیں اسلام آباد کو مفادنظر آئے اس علاقے کی متنازعہ عالمی حیثیت کو نظرانداز کرتے ہوئے یہاں کے وسائل کا بے دریغ استعمال کیا جاتا ہے۔ جس کی تازہ مثال اقتصادی راہداری کا معاہدہ ہے ۔ وفاق ایک بار پھر منافقانہ رویہ اپناتے ہوئے گلگت بلتستان کی سرزمین کو یہاں کے عوامی کی مرضی کے بغیر استعمال کرنے کی بات کر رہا ہے جسے مقامی آبادی اپنے ساتھ کھلی زیادتی تصور کرتی ہے ۔
مقامی آبادی پہلے ہی سرکاری محکموں میں مقامی لوگوں کی بجائے غیر مقامی افراد کو بھرتی کرنے پر احساس محرومی کا شکار ہے ایسے میں اس راہداری کی تکمیل کے بعد گلگت بلتستان غیر مقامی اور غیر ملکی افراد کا مسکن بن جائے گااور مقامی آبادی ہمیشہ کی طرح غیروں کی خدمت گزاری پر مجبور ہوجائےگی۔ لہٰذا حکومت پاکستان کو چاہئے کہ گلگت بلتستان کے عوام کی پاکستان کیلئے دی جانی والی قربانیوں کا صلہ دیتے ہوئے اس اہم منصوبے کی تکمیل سے پہلے اس خطے کی آئینی حیثیت کو واضح کرے اور اس منصوبے کی فیصلہ سازی میں مقامی افراد کو بھی شامل کرے۔ میں سمجھتا ہوں کہ اس حوالے سے مقامی حکومت کو گلگت بلتستان کے عوام کا موقف پہلے ہی واضح کردینا چاہیے تھا مگر بدقسمتی مقامی قانون ساز اسمبلی کادائرہ اختیار چندمراعات کی منظوری سے بڑھ کر کچھ نہیں ۔مقامی قانون ساز اسمبلی جیسے بے اختیار ادارے کے ہوتے مقامی آبادی کے تحفظات وفاقی حکومت تک پہنچانا اور اس حوالے سے دباو ڈالنا تقریباً ناممکن ہے۔ ماضی میں بھی اس اسمبلی کی منظور کردہ درجنوں قرادادیں کشمیر افیئرز کے کسی نہ کسی سیکریٹری کی ایما پرردی کی ٹوکری کی نذر ہو چکی ہیں۔ آج تک گلگت بلتستان اسمبلی کے اختیارات کو پاوں تلے روندا گیا ہے۔ قوم پرست رہنماوں کی جانب سے بھی اس بے اختیار اسمبلی میں شمولیت پر آمادگی سے وفاقی حکومت کے غیر منصفانہ فیصلوں کے خلاف مزاحمت کے عمل کو نقصان پہنچا ہے۔ ہونا تو یہ چاہیے تھا کہ تمام قوم پرست رہنما اس نام نہاد نظام سے دور رہ کر خطے کے ساتھ ہونے والی زیادتیوں کے حوالے سے عوام کو شعور دیتے اور حکومت پر بین الاقوامی قوانین کی روشنی میں گلگت بلتستان کی مستقبل کا فیصلہ کرنے کےلیے دباو ڈالتے لیکن افسوس کی بات ہے کہ ایک طرف قوم پرست اس نظام کو غیر آئینی سمجھتے ہیں تو دوسری طرف اسی نظام کا حصہ بننے کےلیے بے چین ہیں۔ جب ہمارے قومی رہنمامنزل کے تعین میں تذبذب کا شکار ہیں تواس طرح کے اہم منصوبوں میں گلگت بلتستان کا نظرانداز ہونا کوئی بڑی بات نہیں کیونکہ وفاق کو معلوم ہے کہ یہاں ہر کوئی اقتدار کا بھوکاہے جنہیں معمولی مراعاتی اسکیموں اور امدادی رقوم سے لبھایا جاسکتا ہے۔ آج بھی اگر ہم مراعاتی اسکیموں کو صوبہ اورگندم کو حقوق کا متبادل سمجھ کر خوشیاں مناتے رہے تو عین ممکن ہے کہ اس اہم منصوبے میں شراکت داری سے بھی ہاتھ دھوبیٹھیں لہٰذاپانی سر سے اونچا ہونے سے پہلے گلگت بلتستان کی تمام وفاقی اور قومی جماعتوں کو اس اہم مسئلے کے حوالے سے اہم فیصلے کرنے ہوں گے۔