وادھو پیٹ

جمن توں لے کے مرن تک
عورت صرف اک پیٹ ہوندی اے
اوہدا کوئی دل دماغ نہیں ہوندا
ماں پے آکھن
جو کوئی ایہنوں پال سکے
اوہ لے جاوے
جو کوئی ایہنوں کج کے رکھے
لے جاوے
تے سوہرے لبھن ایسا پیٹ
جیہڑا اپنی روٹی آپ کماوے
اوہناں دیاں نسلاں اگے ودھاوے
تے جے فیر کوئی کملی نمانی
ایہہ دسن دا آہر کرے
کہ اوہدا دل دماغ وی اے
تے کہندے
پیو دی لج نہیں رہ گئی
سوہریاں دے سر پگ نہیں رہ گئی
فیر ایسے پیٹ دے جمے بال
بڈھے وارے ہس کے پُچھن
توں تاں بس اک وادھو پیٹ ہیں
ماں تیرے تاں پیر ہی کوئی نہیں
جنت کتھے رکھی رب نے؟؟؟