خون آلود کیچڑ میں اکڑوں بیٹھے
ہم تماشے پر نگاہ جمائے رکھتے ہیں
مبادا اٹھیں تو تاریک آسمان تلے پھسل کر
اپنی ریڑھ نہ تڑوا لیں

The post خون آلود پنڈال اور تاریک آسمان (حسین عابد) appeared first on Laaltain.

میں اس پگڈنڈی سے نہیں گزرتا
جہاں میں نے
تمہارے نام کی سرگوشی کی
اور پیڑ جھومنے لگے
ان گنت کلیاں ایک ساتھ چٹک گئیں
اور جگنو بھرے دن میں جھاڑیوں سے نکل آئے
میں ان لوگوں سے نہیں ملتا
جنہیں میں نے تمہاری بابت بتایا
تو ان کے چہرے یوں دمک اٹھے
جیسے حُسن ان پر پہلی بار منکشف ہوا ہو
میں اس گیت سے چھُپتا ہوں
جس کے کھرج پنچم ہم تھے
اور سپتک سپتک اُڑتے تھے
وہ پھول اب بھی کھلتے ہیں
لیکن پگڈنڈی کافور کی مہک سے سنسناتی ہے
وہ لوگ مجھے ڈھونڈتے ہیں
لیکن ان کے چہروں کی دمک
میرا دل تاریک کردیتی ہے
میں اب کہیں نہیں جاسکتا
باہر آسمان سے رنگ برنگے
پرندے گر رہے ہیں

[divider]باسی محبت کا مخمور[/divider]

باسی محبت کا مخمور
گدلی آنکھوں سے نظم کی راہ دیکھتا ہے
نظم اس راہ پر نہیں آتی
جو اپنی ہی تھکن کی گرد سے اٹی
پڑے پڑے ہانپ رہی ہو
وہ اس سوکھی جھاڑی سے دامن بچاتی ہے
جس پر تم پلاسٹک کے پھول ٹانک رہے ہو
وہ اس ندی پر
اپنا عکس دیکھنے کو نہیں جھکتی
جو چار دن کی دھوپ سے ہوا ہوگئی
اور آب دیدہ کنارے
ایک دوسرے کی بانہوں میں آ گرے
شاعری کی دیوی
جعلی پجاری کو دور سے پہچان لیتی ہے
تم بوسیدہ لفظوں کی دھجیاں جوڑ کر
اپنے دل کے مزار پر جھنڈے گاڑتے رہو
نظم ان خطوں کا رخ نہیں کرتی
جہاں تازہ محبت کے پھول نہ کھلے ہوں

[divider]نظم[/divider]

ہم پُلوں پر کھڑے چیلوں میں گوشت بانٹتے رہے
دریا گدلے ہوتے ہوتے جوہڑ بن گئے
مسجد میں زباں دراز نے نقب لگائی
چوکیدار نے ڈنڈا بھی پکڑا دیا
گھر سے پڑھنے گئے بچے
گلی میں جفتی کرتے کتوں کا جشن دیکھتے دن گزار آئے
ذلت بھرے دن کا مقابلہ کرنے نکلا جوان
شام کو سفید بالوں سے بھرا لوٹا
دیمک اور چیونٹیاں مل کر دہلیز چاٹ رہی ہیں
شہتیر ٹوٹنے کی کڑکڑاہٹ پریڈ کی گڑگڑاہٹ میں دب جاتی ہے
سحری کا وقت ہے
پرانے بابے اس گھڑی پُل پر بمب کیچ کیا کرتے تھے

The post کافور کی مہک اور دیگر نظمیں (حسین عابد) appeared first on Laaltain.

لفظ مجھ سے روٹھ گئے ہیں
یا وہ معنی کی تلاش میں چلے گئے ہیں
روٹھا ہوا لفظ زیادہ دور نہیں جا سکتا
معنی کا حمل سنبھالے
اس کی سانس پھول سکتی ہے
وہ کہیں بھی بیٹھ سکتا ہے
کسی نیم تاریک گلی کے موڑ پر
دن کے صور سے متوحش
دفتروں، کارخانوں، عبادت گاہوں میں
پناہ لیتی خلقت کے بیچوں بیچ
بچے کھُچے کھیتوں کے پار
معدوم ہوتے دریا سے پہلے
آخری پیڑ کے نیچے
معنی سے لبریز ہانپتے لفظ کو
کوئی بھی اغوا کر سکتا ہے
دنیا بے معنی لوگوں سے بھری پڑی ہے
مجھے فوراً اس کی تلاش میں نکل جانا چاہیے
مگر میں خوفزدہ ہوں
اگر میرے لفظ معنی کی تلاش میں گئے ہیں
تو کیا واپسی پر وہ مجھے ڈھونڈ پائیں گے؟

خوشی کا گیت

خوش ہوں بھی
تو خوشی کا گیت
ہم سے نہیں گایا جاتا
آدمی خوشی سے چوکنا رہتا ہے
وہ کسی بھی لمحے گم سکتی ہے
دکھ کہیں بھی مل سکتا ہے
ڈھونڈے بغیر
دیر تک ساتھ چلنے کے لیے
دکھی گیت کیسی فرحت دیتے ہیں
جیسے ہم اجتماعی غم کا حصہ ہوں
خوشی
کمینے محبوب کی طرح
منظرکے عقب سے جھانکتی ہے
ہمیں ہر لمحہ چوکنا رہنا پڑتا ہے
خوشی کا گیت
ہم نہیں گا سکتے

درخت اور لائٹ ہاوس

ستارے آسمان پر ہیں
زمین پر پانی
بیچ میں رات تنی ہے
میرے جزیرے سے
تمہارے جزیرے تک
یہاں ایک پیڑ ہے
جس سے میں ٹیک لگائے بیٹھا ہوں
اور جسے کشتی بنانے کے منصوبے باندھتا ہوں
لیکن وہ دن میں گم ہو جاتا ہے
دن میں مجھے اپنی پشت پر
دیمک کا ڈھیر ملتا ہے
محبوب عورت
کیا تم اپنے دل کے لائٹ ہاوس کی
ایک مضبوط شعاع
اِدھر مرکوز رکھ سکتی ہو
تاکہ میں رات میں کشتی بنا سکوں؟

ذلتوں کے مارے لوگ

ہمارے گُردے بیچ کر جدید اسلحہ خریدا گیا
دور دراز کے ملکوں میں بنگلے
دور دراز کے سمندروں میں جزیرے
اور متروک اسلحے کی بھٹی میں پکائی
باسی ڈبل روٹیاں ہمارے آگے پھینک دی گئیں
ہمیں اُبکائی آتی ہے
تو وہ آسمان کی جانب اٹھی ہماری مقعدوں پر
ٹھوکر مار کر دھاڑتے ہیں
“غدارو، نمک حراموں، کفرانِ نعمت کرتے ہو؟”
معصوم اعضائے تناسل کے چیتھڑوں پر پلے
خدا کے دلال
ہماری ابکائیوں سے لتھڑی ڈبل روٹیاں بھی کھا جاتے ہیں
وہ مقدس جھنڈوں کی طرح پھڑپھڑاتی داڑھیوں سے
آسمان تاریک کردیتے ہیں
ان کے پالتو کتے
ہماری کھوپڑیاں پھاڑ کر ہمارے بھیجے کھا رہے ہیں
ہماری چیخیں لاوارث لاشوں کی طرح
تپتی ریت میں دبا دی جاتی ہیں
بھوک، ذلت اور تاریکی کے غار میں
اپنے وجود کے چیتھڑے ڈھونڈتے
ہمیں یاد تک نہیں رہا کہ
ہم انسان ہیں
انہی انسانوں جیسے
جنہوں نے بندوقوں پر مقدس جھاڑ جنکار لپیٹ کر
ان کے مالکوں کی مقعدوں میں گھسیڑ دیا
اور تاریک آسمان کو پھاڑ کر
اپنی دھرتی کا سورج نکال لائے

غلام نبی بٹ کی تنہائی

چچا کہتا ہے
تم میرے سگے بیٹے ہو
تم میرے ساتھ رہوگے
تایا کہتا ہے
تم میری اولاد ہو
میں تمہیں کبھی بچھڑنے نہ دوں گا
میرا باپ میری پیدائش پر مرگیا
ماں پاگل ہوگئی
میں نہیں جانتا سگا کون ہے
میں اپنے ہی گھر میں یرغمال ہوں
چچا تایا روز لڑتے ہیں
دیوانوں کی طرح
میرے برتن ٹوٹ گئے
میری چارپائی ٹوٹ گئی
ان کی لڑائی میں میری ناک ٹوٹ گئی
ایک آنکھ میں سوراخ ہوگیا
میرا خون بہہ رہا ہے
ہمسایہ ابہے نندن کہتا ہے
تم نمک حرام ہو
جس زمین کا کھاتے ہو
اسے ہی اپنے خون سے داغدار کرتے ہو
میں نے سنا ہے
زمین بہت بڑی ہے
مہاپُرشوں سے بھری
میرے گھر کوئی نہیں آتا
چچا تایا کے سوا

فتح محمد کا اقرارنامہ

ہم اتنی بار فتح ہو چکے ہیں
کہ ہم میں سے ہر ایک کا نام مفتوح ہے
مفت میں پیدا ہو جانے والی نسلوں پر یہی نام جچتا ہے
یوں بھی
مفتوح کو مقتول کرنے میں
تین حرف بھی نہیں لگتے
ہمیں اپنے فاتحین سے عقیدت ہے
خوف کو عقیدت میں بدل لینا
ہمارا وراثتی ہنر ہے
ہم کاغذات میں
بچوں کے فرضی نام لکھوا دیتے ہیں
کہ سرکار کے کان
ایک ہی نام سنتے پک نہ جائیں

قومی دن

ہمارے کیلنڈر کے ہر خانے پر
سیاہی پھری ہے
کہیں کہیں یہ سیاہی
سرخی مائل ہوجاتی ہے
جہاں لہو کا رنگ سیاہی ڈھانپ لیتا ہے
ہم جان جاتے ہیں
سال بھر کے آنسو بہانے کا دن آ گیا

کوئی ہونا چاہیے

آوازوں کے غبارے پھٹتے ہوں جب
چاروں جانب
لایعنیت شفاف زیر جامے میں
ٹھمکے لگاتی، ہونٹ پچکاتی، قہقہہ زن ہو گلی گلی
کوئی ہونا چاہیے
جسے یاد ہو کوئل کی کُوک
سنگ زنی سے گھائل دن
جب آن گرے سروں اور کندھوں پر
ٹکرا جائیں زم زم سے دُھلی پیشانیاں
فاحشہ رات کی متعفن لاش سے
کوئی ہونا چاہیے
جسے یاد ہو چنبیلی کا چٹکنا
ہجوم بن جائے جب بے ہئیت جانور
بے بصارت، بے سمت
اک سیال دیوانگی سے گھروں
دفتروں، کارخانوں، عبادت گاہوں کو ڈبوتا
کوئی ہونا چاہیے
جسے یاد ہو بچے کی پہلی کھلکھلاہٹ
اور آن پہنچیں جب ہم
تاریک سرنگ کے آخر پر
وقت کے ایک نئے قطعے پر
چندھیائے ہوئے، ہکا بکا
کوئی ہونا چاہیے جو پکار اٹھے
“یہ روشنی ہے”

لاٹھی کی آواز

ہم وہ پیڑ خون سے سیراب کرتے ہیں
جس کی شاخیں کاٹ کاٹ کر وہ لاٹھیاں بناتے ہیں
خون کی کمی سے ہماری سانس پھولی رہتی ہے
کچھ بھی سوچنے پر چکر آتے ہیں
لیکن اپنی پیٹھ ننگی کرنے میں
ہم کوتاہی نہیں کرتے
تاکہ ان لاٹھیوں کی مضبوطی آزمائی جاسکے
جو وہ ہماری حفاظت کے لیے تانے رکھتے ہیں
برستی لاٹھیوں کی شائیں شائیں
خون کی حرارت پر ہمارا ایمان مضبوط رکھتی ہے
بس ہماری کٹی رگوں سے بہتا خون
کچھ دیر کے لیے حیرت سے جم جاتا ہے
جب وہ کسی خدا کا ذکر کرتے ہیں
جو ان سے بھی بڑا ہے
اور جس کی لاٹھی بے آواز ہے

نئے کیلنڈر کی پیشانی

میں کیلنڈر سے خوفزدہ ہوں
اس کے خانے دانتوں کی طرح
میری زندگی میں پیوست ہیں
لیکن سال کا بدلنا ایک مبارک واقعہ ہے
پرانے کیلنڈر کو ردی کی ٹوکری میں پھینکتے
اور نیا دیوار پر آویزاں کرتے
میں پڑھتا ہوں اس کی پیشانی
اور دیکھتا ہوں
وقت کی سرد سِل میں پیوست
اپنے دانتوں میں ایک اور کا اضافہ
اور خوشی سے چِر جاتی ہیں میری باچھیں
نئے سال کا جام بلند کرتے ہوئے

یک رنگی کا خواب

میں چاہتا تھا
تمہیں زرد لباس میں دیکھوں
میرے پاس ایک ہی پھول تھا
زرد
تم نے اتنے رنگ بدلے
پھول مرجھا گیا
اب میں اسے نگل چکا ہوں
اس کے زرد ذرات
میرے خون میں تیرتے ہیں

The post بے لفظی کا خوف اور دیگر نظمیں (حسین عابد) appeared first on Laaltain.

Image: Bhupen Khakhar

The post نمبردارکی حویلی — حسین عابد appeared first on Laaltain.

سانس
اکھڑ سکتی ہے
انکاری دل کی دہلیز پر
پس سکتی ہے آخری دانے کی طرح
روزمرہ کی چکی میں
ضبط ہو سکتی ہے ہیرے کی طرح
بحقِ سرکار
چھلنی ہوسکتی ہے
سستے مذاق کی طرح
امپورٹڈ مشین گن کے قہقہے سے

سوچ
بدل سکتی ہے
صحن میں گرتی پکی جامنیں، آم کا بُور، شام کی بارش، چھاتی میں اڑتی تازہ محبت کی تتلیاں، شانے اور گردن کے بیچ دہکتا بوسہ، رانوں میں مہکتا نمو کا بیج، رنگوں سے اٹے بازار، اینٹ سیمنٹ کا عہدِ وفا، بھٹی میں ڈھلے فولاد کا غرور۔۔۔۔۔۔۔۔۔۔۔۔
نظر کے واہمے میں
سرائے میں، امتحان گاہ میں، حیات بعد از موت کی تیاری کے اکھاڑے میں
خدا کے جوتے کی نوک پر دھرے ذرے میں

وحشت
اس فرق کی موت ہے
اور موت کی زندگی
Image: Gustav Klimt

The post فرق کی موت (حسین عابد) appeared first on Laaltain.

وقت کی دھڑکتی تھیلی میں پڑا
ابدی مسرت کا لمحہ
جو سارے مساموں سے پھوٹ نکلے

ایک گہرے دوست جیسا
جو کبھی جدا نہ ہو
ایک جگنو جیسا
جو گھمبیر رات میں چلتے
اچانک تمہارے سامنے آنکلے
ایک لمحہ کافی ہے

The post ایک لمحہ کافی ہے (حسین عابد) appeared first on Laaltain.

The post سیدھی بارش میں کھڑا آدمی (حسین عابد) appeared first on Laaltain.

The post آسان رستے کا مسافر appeared first on Laaltain.

دروازوں، رستوں اور پرندوں نے
مجھ سے ایسی باتیں کیں
جو مسحور آپس میں کرتے ہیں

دوکانیں، دفتر اور کارخانے
مجھے گونگوں کی طرح تکتے رہے
شاعری میں نے
انہیں گویائی دینے کے لیے شروع کی
Image: Duy Huynh

The post شاعر appeared first on Laaltain.

The post امن کا پرندہ appeared first on Laaltain.