“نقصان طلبہ کا ہے انتظامیہ کا نہیں”

بی بی آصفہ ڈینٹل کالج لاڑکانہ کے ڈیڑھ سو طلبہ کے امتحانات 23 فروری سے التوا کا شکار ہیں۔ اطلاعات کے مطابق کالج کے تین بیچوں کے طلبہ کے امتحانات 23 فروری کو شروع ہونا تھے تاہم ڈینٹل کالج کے اساتذہ کی جانب سے امتحانی سوالات کی تشکیل میں تاخیر باعث تاحال ان امتحانات کا انعقاد ممکن نہیں بنایا جا سکا۔ کنٹرولر امتحانات کے مطابق اساتذہ کی جانب سے امتحانی سوالات موصول نہ ہونے کے باعث امتحانات کے انعقاد میں تاخیر ہو رہی ہے،”جنوری سے ہم اساتذہ کو یاددہانی کرارہے ہیں لیکن رضامندی ظاہر کرنے کے باوجود اساتذہ امتحانی سوالات جمع نہیں کرارہے ۔امتحانی سوالات کی عدم موجودگی میں امتحانات کا انعقاد ممکن نہیں ۔” کنٹرولر امتحانات شہید محترمہ بینظیر بھٹو یونیورسٹی ڈاکٹر اکبر بھٹو کا کہنا تھا۔

“یونیورسٹی اور کالج انتظامیہ کے درمیان انتظامی معاملات پر غیر ضروری تاخیر کے باعث داخلے،امتحانات اور نتائج اکثر تاخیر کا شکار رہتے ہیں۔ ” ایک طالبہ نے نام ظاہر نہ کرنے کی شرط پر ذرائع ابلاغ سے بات کرتے ہوئے کہا۔ ان کا کہنا تھا کہ انتظامی تاخیر محض انتظامی سست روی کا نتیجہ ہے،”کالج کے معاملات چلانے میں کوئی سنجیدہ نہیں اسی لیے ایسی غیر ضروری تاخیر کا سامنا کرنا پڑتا ہے، اس سب کا نقصان تو بالآخر طلبہ کو ہی ہوگا۔انتظامیہ کو کوئی فرق نہیں پڑتا۔”