احمد شاملو کی نظم

(فارسی سے ترجمہ)

__________________

تجھے کیا پتہ بڑے پن کی چنگھاڑ کیا ہے،

وہ کیا پہاڑ ہے،

جو توڑ کر بکھیر دینے والے شکنجے میں بھی روتا تک نہیں

تجھے کیا پتہ جب خوف کی حاکم آنکھ اندھی ہو جائے

تو محکوم کی بے جھپک آنکھوں کا اطمینان،

کیسا دریا ہوتا ہے!

تجھے کیا خبر کہ مرنا کیا ہے،

جب آدمی نے موت کو ہرایا ہے،

تو کیسا ہوتا ہے جینا

تجھے کیا پتہ کہ جینا کیا ہوتا ہے، جیتنا کیا ہے،

تجھے کیا پتہ کہ ایرانی کون ہوتا ہے!

تجھے کیا پتہ

جس وقت تو نے مٹی کی کھال اور پکی اینٹوں کی ہڈیوں سے

اس کی قبر کو پُر کیا

اور تیرے ہونٹوں پر سکون بھری ہنسی آئی

اور ایک قہقہے کے دھماکے نے تیرا گلا پھاڑ دیا

جس وقت تو نے سمجھا کہ اس کی زندگی کا گوشت

اس کے تن کی ہڈیوں سے الگ ہو چکا،

کیسے اس کی زندگی کا سرخ ڈھول گونج اٹھا تھا،

زمین کے نیچے بہتی کاریزوں کی رگوں سے،

شہرِ آبادان کے سینے سے

اور اس کے طوفانی رزمیے نے نظم کہنی شروع کی

تین منہ سے، سو منہ سے، ہزار منہ سے

تیس ہزار منہ سے

خون کے قافیے سے

انسان کے لفظ سے، حرکت کے لفظ سے، تیز چلنے کے لفظ سے

آنے والے کل کی اس تھاپ پر

جو چلتی رہتی ہے

جو گرتی ہے پھر اٹھتی ہے

جو اٹھتی ہے، اٹھ جاتی ہے، گر پڑتی ہے

جو اٹھتی ہے، اٹھ جاتی ہے،

جس کی چال

رگوں سے پھوٹ نکلنے والے لہو کی سی تیز ہے

جو تاریخ کی پگڈنڈی پر ڈگ بھرتی ہے

چین میں،

ایران میں، یونان میں

انساں، انساں، انساں، انساں ہا

اور جو دوڑتی ہے لہو کی طرح، تیز ڈگ سے

تاریخ کی رگ میں، ویتنام کی رگ میں، آبادان (2) کی رگ میں

انساں، انساں، انساں، انساں، انساں ہا!

اور ایسے سیلاب کی مانند جو

اپنی تاریخ کے عظیم مصرعوں میں دیوار کے اوپر سے گزر جاتا ہے

ہزاروں قافیوں کی دیوار سے:

چوری چھپنے کا قافیہ

اندھیرے کا قافیہ

اوجھل ہو نے کا قافیہ

جرم کا قافیہ

انسان کے برابر میں زندان کا قافیہ

اور قافیہ جسے چھوڑ دیا وہ ہے،

ایڈولف رضا خان کا قافیہ

اور ہر مصرعے کے آخر پہ وہی “نون”

ایک چپکتا ہوا قافیہ

قافیۂ خون!

اور سیلاب کی تھاپ

جو ہزاروں خونی قافیوں کی دیوار پر سے گزر گئی:

خوں، انساں، خوں، انساں

انساں، خوں، انساں۔۔۔

اور ہر انسان سے خون کا ایک سیلاب

اور ہر قطرے سے ہزاروں انسانوں کا سیلاب:

امَر انسان

ماہِ بہمن (1) والا انسان

پولیتزر (3) والا انسان

ژاک دوکور (4) والا انسان

چِین والا انسان

انسانیت والا انسان

ہر دل کا انسان

کہ اس دل میں، ہر خون

کہ اس لہو میں، ہر قطرہ

قطرہ قطرہ آدمی

کہ اس قطرے کے دم سے، ہر تپش

کہ اس تپش کے دم سے، ہر زندگی

مطلق انسانیت ہے

اور ہر انسان کی زندگی کی نظم

جو ایک خون کے لال قافیے پر ختم ہو

ایک تاریخ میں تا ابد سُولی پہ لٹکا ہوا ایک مسیح ہوتی ہے

اور وہ انسان جو بیڑیوں میں بندھے پَیروں کے ساتھ

اپنے لہو کے ڈھول کی تھاپ پر اپنی تاریخ گاتے ہیں

ایک ہی دین کے عالمگیر اصحاب ہیں

اور ہر پھانسی کے منہ سے اگلتی ہر خون کی قے سے

کسی تاناشاہ کی مرضی مرجھا جاتی ہے

ایک جنت کے دروازے پہ اُگے کنیر کے پودے کے پاس ہی۔۔۔

اور میرے برابر کھڑے ہر انسان کے ہر خون کا قطرہ قطرہ

ایک سیلاب ہے

جو تاریخ کے تیز بھاگتے ہووں کے عقب میں

ایک پُل کو توڑتا رہتا ہے

اور ہر جسم پر گولی کا ہر چھید

ایک ایسا دروازہ ہے کہ تین بندے، سو بندے، ہزار بندے

کہ تیس لاکھ بندے

آنے والے کل کے زمردی بُرج کی جانب رواں

اس میں سے گزر جاتے ہیں

اور ماس سے آر پار ہر گولی کی گزرگاہ

ایک ایسے کتے کا منہ ہوتی ہے

جو کسی بادشاہ کے دبدبے کو

کسی معذور خانے میں پڑا چبا جائے

ہر وہ جس کے پاس کچھ نہیں،

اس کے جنازے کے کھلے منہ کا لقمہ ہے۔۔۔ بادشاہ

رضا خان

یہ ہے ایک بادشاہ کا شرف

جس کے پاس کچھ بھی تو نہیں

اور وہ جس کے ایک قبا تن پہ ہے اور تین صندوق میں

اور وہ جس کے ایک نوالہ منہ میں ہے اور تین روٹیاں ہتھیلی پر

اور وہ جس کے ایک گھر شہر میں ہے اور تین گھر گاؤں میں

تاریخ کی قبا، روٹی، اور گھر کے ساتھ کیا ایسے کیا جاتا ہے

جیسا کہ تو نے کیا رضا خان

اسے انسان مت کہو

نہیں، اسے انسان مت کہو، انسان نہیں وہ

مجھے نہیں پتہ وہ کیا ہے

سوائے ایک سلطان کے۔۔۔

البتہ ایرانی کے خون سے ایک سر سبز بہار

اور معذور خانے کے کتے کے منہ میں شرمندگی کی ہڈی!

اور اس کی زندگی کی نظم، اس کے خون کے قافیے کے ساتھ

اور میری نظم کی زندگی

اس کے قافیے کے خون کے ساتھ

اور کتنا ہی زیادہ

ان کی زندگیوں کی نظموں کی بیاضوں کا گردپوش

ایک خون کے لال کفن سے مجلّد ہوا

اور کتنا ہی زیادہ

ان کی یرغمال زندگیاں لی گئیں

تاکہ ان کی سرداری کی تاریخ جنم لے سکے

موت کے ایک ساز کے ساتھ، ایک لورکا (5) کے گٹار کے ساتھ

انہوں نے اپنی زندگیوں کی نظم یوں گائی

جیسے وہ میری طرح شاعر ہی تھے

اور نظم ان کی زندگیوں سے الگ نہیں تھی

اور انہوں نے اپنی سرخ نظموں کے رزم ناموں میں

ایسی تاریخ گائی

کہ جس میں

دنیا کے بادشاہ

کسی گھوڑے کی ہوَنق سی ہنہناہٹ کے ساتھ

تخت پر نہیں آن بیٹھے

اور وہ کہ جنہوں نے انسانوں کو

اپنے انصاف کے ترازو کی کنڈی سے پھانسی پہ لٹکایا

اور منصف کہلائے

ان کی نظم ان کی زندگی سے الگ نہ تھی

اور اس میں کوئی دوسرا قافیہ نہ تھا

ماسوائے انسان کے

اور جس وقت ان سے ان کی زندگیاں چھینی گئیں

ان کی نظموں کا رزمیہ پہلے سے بڑھ کر طوفانی ہو رہا

خون کے قافیے میں

ایک نظم تین منہ سے، سو منہ سے، ہزار منہ سے

تیس ہزار منہ سے

ایک نظم خون کے قافیے والی

انسان کے لفظ والی

آنے والے کل کے مارچ کی دھمک کے ساتھ

ایک نظم جو چلتی ہے، گر پڑتی ہے، اٹھتی ہے، اٹھ دوڑتی ہے

زندگی کے ایک لحظے میں ایک نبض کے دھماکے کی سی تیزی کے ساتھ

تاریخ کی ڈگر پر چلتی رہتی ہے، انڈونیشیا میں، ایران میں

اور خون کی طرح پھڑکتی اور دھڑکتی ہے

تاریخ کے دل میں، آبادان کے دل میں

انساں انساں انساں انساں۔۔۔ انساں ہا۔۔۔

اور ان سارے لفظوں، اور اس ساری زندگی کے کاروان سے پرے

تیرا معذور خانے والا کتا دم توڑ دیتا ہے

شرمندگی کی ہڈی منہ میں لیے

حرص کی ہڈی لیے

تن کی ایک قبا اور بکسے کی تین قباؤں کی ہڈی لیے

منہ کے ایک نوالے اور بغل کے تین نوالوں کی ہڈی لیے

شہر میں ایک گھر اور جہنم میں تین گھروں کی ہڈی لیے

بے تاریخ ہونے کی ہڈی لیے

__________________

(1) ماہِ بہمن: ایرانی تقویم کا گیارہواں مہینہ۔ ایرانی سال 1357 شمسی میں اس ماہ کی بائیس تاریخ کو ایران کی عوامی طاقت نے شاہِ ایران کا تختہ الٹا۔ جو بعد میں ایران کا اسلامی انقلاب 1979ء کہلایا۔

(2) آبادان: ایران کا مشہور صنعتی شہر۔ انقلابِ بہمن کے دوران یہ تیل کی صنعت کا مرکز ہونے کے ساتھ ساتھ مزدور تحریکوں کا گڑھ شمار ہوتا تھا۔

(3) پولیتزر: یورپی انقلابی، مادی فلسفہ و نفسیات کا مفکر جارجی پولیتزر۔ (1903 – 1942)

(4) ژاک دوکور: (1896–1975) فرانسیسی انقلابی سیاستدان۔

(5) لورکا: ہسپانوی شاعر ڈرامہ نگار، اور مصور فریدریکو گارسیا لورکا (1898 – 1936)

The post قصیدہ ماہِ بہمن کے انسان کا appeared first on Laaltain.

ایک عجیب خواب سے جاگ جاگ جاتا ہوں
آئینوں کے گھر میں، آئینوں کے شہر میں
اپنے نام کا اک آئینہ جو پاتا ہوں
یہ عکس سارے میرے ہیں یا میں بھی ایک عکس ہوں
سایہ ہوں، خیال ہوں یا میں دوسرا ہی شخص ہوں
دِکھ رہے ہیں ایک سے سارے اور ایک ہی منظر دکھا رہے ہیں
یہ سارے ایک سمت کیوں دوڑے جا رہے ہیں
ہنس رہے ہیں دیکھو سارے ایک ہی بات پر
چونک چونک اٹھتے ہیں ہر نئی آہٹ پر
یہ منظر بھر رہا ہے کون، کون آئینہ خانہ چلا رہا ہے
آئینے میں جو خیال اُبھرا ہے یہ خیال کون بنا رہا ہے
کون آوازیں بُن رہا ہے کون بازگشت بنا رہا ہے
یہ نیا ٹرینڈ کون چلا رہا ہے، اس کے پیچھے کون چلا آ رہا ہے
یہ بوڑھا سوداگر جو قصہ سُنا رہا ہے
اس میں کچھ نیا رہا ہے؟
یہ دانش گرد راہ بھی کوئی دکھا رہا ہے یا صرف پٹاری ہلا رہا ہے
ٹرینڈ جب چلائے گا دانش کہاں سے لائے گا
نمبر ہی بڑھائے گا
آئینوں کے شہر میں یہ آئینہ دکھائے گا؟
سایوں کی دنیا ہے نمبروں سے چلتی ہے
لائیکس اور کمنٹس کا خون پی کے پلتی ہے
ہم آئینوں میں جب اپنا چہرہ صاف کرتے ہیں کچھ پیٹرن سے بنتے ہیں
یہ پیٹرن ہی بکتے ہیں، یہ پیٹرن ہی چلتے ہیں
سمجھتے ہیں ہم نے پا لی آزادی
خیال کی آزادی ہے خیالی آزادی
زبان کسی اور کی بیان کسی اور کا
منہ ہی چلا رہے ہیں
اس جگالی کی ہم نے بنا لی آزادی
ہم کنزیومر اپنے وجود کے ہیں جو وجود صرف شہود کے ہیں
آئینوں میں جانے ہم کیسی مارکیٹنگ کرتے ہیں
ہم میں کچھ تو سپیکر ہیں جو آواز کسی اور کی سناتے ہیں
باقی سب وولیم ہی بڑھاتے ہیں
کیا کوئی نتشے آئے گا مژدہ سنائے گا اور دُکھ سے مر جائے گا
انسان مرچکا ہے اور ہم نے اس کی فوٹو کاپیاں کروا لی ہیں
ان آئینوں پہ پہلا پتھر کون اٹھائے گا
یہ پتھر کہاں سے آئے گا
یہ شہرِِ سحر کون مٹائے گا
کب مارکیٹ میں اس سے بڑا جن آئے گا
آئینوں کی دنیا سے باہر نکل بھی پائیں گے
یہ نظام ہم کبھی بدل بھی پائیں گے
میری اس نظم پر آخر کتنے لائکس آئیں گے

[divider]ایک پلیٹ فارم کا خواب !![/divider]

اونگھتا جھولتا پیلٹ فارم
ایک پھوڑے کی طرح نیند میں بہہ نکلا ہے
جس میں خواب ٹیس کی صورت اٹھتے ہیں
جو افق کی کسی کہکشاں سے اترتے ہیں
اور منظر بننے سے قبل زیرِزمین کھو جاتے ہیں
معانقے کی خواہش لیے پٹڑیاں کبڑی ہوئی چلی جاتی ہیں
پٹڑیوں کے درمیان ایک نامعلوم سا تار
جس پہ ابُھر آتے ہیں ہزارہا صدیوں کے خواب
کتنی نسلوں کے کتنی انواع کے جیون جس تار سے لپٹے ہیں
اسی تار سے موصول ہوتے ہیں سارے دھندلے خواب
شکاری کئی جنموں سے اسی تعاقب میں چلا آتا ہے
اک جست بھری ہے خواب نے وحشت سے
شکار بھی چھپتا ہوا آ نکلا ہے
خواب پناہ گاہ ہیں دہشت سے
ایک پٹڑی پہ ہے دہشت اتری ایک نے وحشت پائی
یہ چنگھاڑتا ہے غراتا ہے
وہ روتی ہے کُرلاتی ہے
کوکھ پلیٹ فارم کی پھٹتی چلی جاتی ہے
ریل کی سیٹی بجتی چلی جاتی ہے
انہیں ڈوروں کو سلجھاتا ہوں ڈھونڈ نہیں پاتا ہوں
اپنے حصے کا خواب
زنگ خوردہ خواہشیں ہولے سے کسمساتی ہیں
میں اپنی وحشت کو سنبھالوں کہ دہشت سے نکالوں تجھ کو
مرد و زن کی اس تفریق میں کس سمت میں ڈالوں تجھ کو
تھرتھرانے لگی خواب کی زمیں، انجن نے انگڑائی بھری
گارڈ نے جھنڈی ہلا دی ہے، اسٹیشن بوائے نے ندا دی ہے
اسٹیشن ماسٹر ابھی کھولے بیٹھا ہے صدیوں کا حساب
آرٹسٹ تو محض قُلی ہے جو سارے ڈبوں کی طرف لپکا ہے
کاندھے پہ دھرے موہوم خوابوں کا حساب
وہ کیا جانے کہاں کس کا ٹھکانہ ہے
خوابوں نے ابھی بہت نیچے تلک جانا ہے

The post دو نظمیں (اسد رضا) appeared first on Laaltain.

کپ غصے کا گواہ ہو سکتا ہے یا نفرت کا؟
کپ خاموش کیوں ہے؟
گواہی گمراہی نہیں ہے

چائے اپنے آنسو فرش کے چہرے پر مل رہی ہے
فرش کو اس سے ہمدردی ہے پر اسے پتہ نہیں چل پا رہا کہ یہ خوشی کے آنسو ہیں یا غم کے؟
اگرچہ اسے معلوم ہے کہ خوشی میں زیادہ اور غم میں کم آنسو نہیں بہائے جا سکتے

شاید چائے خفا ہو کہ اسے کپ نے اپنے سینے سے نکال دیا ہے جیسے کہ درد کے دوران منہ سے کسی آہ کو نکال پھینکا جاتا ہے
یا
شاید وہ خوش ہو کہ اسے بہہ جانے کا تجربہ بھی ہو گیا ہے اور اصل زندگی تو بہنا ہی ہے
بہنا گمراہی نہیں ہے
آنسووں کو بہنے دو
لہو کو بہنے دو
پھر اس کے بعد آنکھیں اور زخم ایک دوسرے کو حیرت سے دیکھیں گے کہ بہنا ان کی خوشی کا اظہار ہے یا غم کا
مگر یہ بات تو واضح ہے کہ بہنا گمراہی نہیں ہے
کپ خاموش رہے

[divider]شاعر، شاعری اور نقاد[/divider]

نظم کو نیند سے جگانے والا پنچهی اسے آسمانوں کی سیر پر لے جاتا ہے
تخیل اڑن کھٹولا ہے
ملکی وے کی ساری رنگینیاں لے کر وہ اسے خلا کے حوالے کرتا ہے
تکمیل یہی سے شروع ہوتی ہے
نظم آہستہ آہستہ عروج کی طرف قدم بڑھاتی ہوئی
کشش ثقل کے بانہوں میں پہنچ جاتی ہے

شاعر کی آنکھ کھلتی ہے
اور وہ خود کو زندہ پاکر خوشی سے پاگل ہونے لگتا ہے
خواب کی تعبیر شاعر کے حق میں نکلتی ہے
اور نقاد کا منہ کسی بلیک ہول کی طرح کھلے کا کھلا رہ جاتا ہے

[divider]میں نرگس ہوں[/divider]

انار کلی دیوار سے نکل آئی ہے
دیوار میرے سینے میں داخل ہورہی ہے
کھورہی ہے

انارکلی! نرگس میری آنکھیں چوم رہی ہے
زمیں جھوم رہی ہے
خلا پانی پانی ہوگیا ہے
میں نرگس میں بدل رہا ہوں

افروڈائٹی (Aphrodite)مجھے گلے لگانا چاہتی ہے
حق جتانا چاہتی ہے
انار کلی! دیوار میں واپس جاکر دیوار میرے سینے سے باہر پھینک دے
میری دھڑکن رکتی جارہی ہے
اور رقص ہنوز جاری ہے۔

[divider]میر تقی میر کے نام[/divider]

فطرت میری سگی نہیں ہے
زمیں مجھ سے نفرت کرتی ہے
دن مجھ پر فقرے کستا ہے
دن بھر مجھے ذلیل کرتا ہے
میری نظموں کو مکروہ گردانتا ہے
میرے بارے میں سب کچھ جانتا ہے؟

خلا میرا بھائی ہے
آسمان مجھے پسند کرتا ہے
رات مجھے نہیں گھورتی
اور ستارے مجھے آنکھ مارتے ہیں
آنکھ مارنے والے لڑکے رات بھر میری بانہوں میں ہوتے ہیں
(خواب مجھے سے کوئی نہیں چھین سکتا)
اورستاروں کے چھپتے ہی میر اور میں پھر سے اپنی تنہائیوں میں خود کو چھپا لیتے ہیں

[divider]نیوٹن دامن پھیلائے کھڑا ہے[/divider]

نیوٹن دامن پھیلائے کھڑا ہے

اور سیب نہیں گر رہا
ایک پنچھی آکر اس کے سر پر ہگتا ہے
کشش ثقل اسے شاہی تاج پہناتی ہے

نظم جس کا IQ لیول میری طرح کم ہے
جیلس ہوتی ہے
اور میں پہاڑ کے دامن میں پتھروں کی بارش کا انتظار کرنے لگ جاتا ہوں
ردعمل ضرور ہو گا

The post چائے کے لیے ایک نظم اور دیگر نظمیں (نسیم خان) appeared first on Laaltain.

آمدنی اخراجات کو دعوتِ گناہ دیتی ہوٸی آتی ہے
“ہم مہذب نہیں مذہبی ہیں”
اس جملے کی روشنی میں
مالتھس کا نظریہ ضبط تولید کفر قرار دیا جا چکا ہے
ہمارے کسان
اپنی کھیتی میں
دن رات ہل جوتتے ہیں
میزاٸل نما بیج بوتے ہیں
ہم مقروض پیدا کرنے کی مشینیں ہیں
ڈالر اپنی مرضی سے مباشرت کرتا ہے
ہمارا تعلیمی بجٹ محبوبہ کے تل سے چھوٹا ہے
خجل داری نظامِ معیشت راٸج ہے
(خ سے خوف)
(ج سے جہالت)
(ل سے لالچ)
بجٹ کے گوشوارے کی جگالی کرنا منع ہے
ہمارا ماٸی باپ
آٸی ایم ایف
(آٸی ایم فادر)کے اشارے پر
غربت کی لکیر
مزید گہری اور بڑی کر دی گٸ
تاکہ
ہمارے مقعد تک پہنچ سکے

تعزیت نامہ

ایک شاعر مر رہا ہے
اس کی ادھوری نظمیں
جھاگ بن کے منہ سے نکل رہی ہیں
واہ واہ کرنے والے واہ واہ کر رہے ہیں
کچھ دیر میں
واہ واہ آہ آہ میں تبدیل ہو جائے گی
ایک ڈرامہ نگار مر رہا ہے
جسے رد کر دیا گیا
وہ اپنے لکھے ہوئے الفاظ کا کفن بنا لیتا ہے
لوگ سمجھتے ہیں
نیا ڈرامہ رچا رہا ہے
ایک افسانہ نگار مر رہا ہے
کچھ دیر میں افسانوی کردار میں ڈھل جائے گا
ایک ناول نگار مر رہا ہے
اس کے کردار رو رہے ہیں
کیوں کہ
وہ زندہ رہیں گے
ایک فنکار مر رہا ہے
تماش بین تالیاں ٹھونک رہے ہیں
تعزیت نامہ لکھنے والے
سنہرے قلم میں سرخ روشنائی بھر ریے ہیں

دیوار

میں چڑیا دیکھتے دیکھتے چڑیا بن جاتا
تمہاری چھت پر اڑتا
زمین کی کشش سے دور نکل جاتا
مگر ڈر گیا
تمہارے سونے کے پنجرے سے
میں درخت دیکھتے دیکھتے درخت بن جاتا
درخت تعصب پسند ہوتے ہیں
رات میں کاربن ڈائی آکسائیڈ خارج کرتے ہیں
اپنے سائے میں
کسی اور کو پنپنے نہیں دیتے
پیتل کی کلہاڑی سے ڈرا دیا
میں سمندر دیکھتے دیکھتے سمندر بن جاتا
مگرشارک مچھلیوں کی ہڑتال نے روک دیا
میں بادل دیکھتے دیکھتے بادل بن جاتا
تم پر برستا
مگر تمہیں برہنہ دیکھ کے ارادہ ترک کر دیا
میں کچھ نہیں بن سکا
دیوار دیکھتے دیکھتے دیوار بن گیا

The post تعزیت نامہ اور دیگر نظمیں (وجیہہ وارثی) appeared first on Laaltain.

میں ننھے بچوں کے ماتھے نہیں چومتی
کہیں میری وحشت ان میں منتقل نہ ہو جائے
میں ہاتھوں سے کرنے والے کاموں سے پہلے سہ بار ہاتھ دھوتی ہوں اپنی پوریں رگڑتی ہوں
میری وحشت کہیں کسی کے اندر منتقل نہ ہو جائے
میں زور زور سے قہقہے لگانا چھوڑ چکی ہوں
کہیں اس قہقہے میں دبی چیخ ہوا میں رہ جائے
اور کسی کو چھو جائے اور وہ اداس ہو جائے
میں چلتے ہوئے قدم تیزی سے اٹھاتی ہوں
کہیں میری وحشتوں کا کوئی سایہ زمین پر پڑا رہ جائے
اور کسی کے پاؤں پڑ جائے
میری وحشتیں میری غیرت ہیں
میں عظیم اداسیوں میں گھلا ایک وحشت ذدہ گمنام سایہ ہوں
مجھے چاہ اور آہ کی طلب نہیں _

The post وحشت کا سایہ (عظمیٰ طور) appeared first on Laaltain.

The post سمندر خالی ہو گئے؟ (رضی حیدر) appeared first on Laaltain.

آپ کے سونے جیسے ہاتھ سائیں
ہمارے ہونٹوں کی کالک سے
نیلے پڑ جاتے ہیں

آپ کے چاندی جیسے پیر سائیں
ہماری گناہ گارپیشانیوں سے
داغدار ہو گئے

آپ کے سفید سوٹ سائیں
ہمارے کفنوں کو خدا غارت کرے
ان کی برابری کا سوچتے ہیں

آپ کے اونچے شملے سائیں
ہمارے جھونپڑوں کا تاج ہیں

آپ کے حکم کے صدقے سائیں
ہماری نمازیں
پچھلی صفوں میں مری پڑی ہیں

آپ کی اوطاق سائیں
ہماری اوقات کا پیمائشی فیتہ ہے

آپ کی مسہریاں سائیں
ہماری عورتوں کی گندمی مہک سے
بھری ہوئی ہیں

آپ کے مزار سائیں
ہمارے جسم کے چراغوں سے
روشن رہتے ہیں

آپ کا حسب نسب سائیں
شاہوں اور سیدوں کی لڑیوں کا
سنہری پھول

اور ۔۔
ہم سائیں
آپ کی پاک زمینوں پر بندھے ہوئے
حرام زادے۔۔!!

۔۔۔۔۔۔۔۔۔۔۔۔۔۔۔۔۔۔۔۔۔۔

عورت ایک ایبسٹریکٹ پینٹگ ہے

عورت کی ہنسی کے سو رنگ ہوتے ہیں
اور آنسوؤں کا ایک بھی نہیں
عورت کی آنکھیں
کسی بادشاہ کے محل کی بارہ دری جیسی ہیں
ایک دروازے سے کئی دروازے نکلتے ہیں
(یا پھر کئی مرد)
جیسے ایک ٹہنی سے کئی پھول
عورت کی محبت بھی
کسی مرد کی محبت جیسی ہے
اتنی ہی شدید، پوزیسو اور بے وفا
مرد عورت کے بارے میں
اپنے پیروں سے سوچتا ہے
عورت مرد کے بارے میں
اپنی بے زبانی سے
بھلا کوئی رات کے کاغذ پر اپنے آپ کو
بارش جیسی باتیں لکھ کر روتا ہے
ہاں ۔۔ ایک عورت
خود سے محبت کے دنوں میں
خودکشی پر نظمیں لکھتا ہے
ہاں۔۔۔عورت
کوئی خوشبودار لکڑی سے گڑیا بنا کر
اسے ماچس سے بیاہتا ہے
ہاں۔۔
ایک عورت

۔۔۔۔۔۔۔۔۔۔۔۔۔۔۔۔۔۔۔۔۔۔

قبر ہمارا قومی پھول ہے

کیا تمہیں ایک ایسا ملک چاہئے تھا؟
جس پر اپنے جوتے صاف کرنے کے بعد
تم ایک خوب صورت چھٹی منا سکتے
اپنی محبوبہ کے ہونٹوں سے سرخ رنگ چنتے ہوئے
تمہیں کبھی وہ پھول یاد آئے ہیں
جو ایک نابالغ ماں کی قبر تک نہیں پہنچے
تم نے 5 فروری کا کاغذ پھاڑ کر
اپنے بیٹے کے لئے جہاز بنایا
اور ہمارے لئے ایک جھنجھنا
تمہاری آواز بہت بد صورت ہے
بالکل کسی زنجیر کی طرح
جب بھی گلیوں سے بھونکنے کی آواز آتی ہے
ہم مسجدوں میں اعلان کرتے ہیں
کہ۔۔۔ ہما ری بیٹیاں مر گئیں
ہماری مائیں اپنے دوپٹے پھاڑ کر
دروازے اور کھڑکیاں بناتی ہیں
ہمارے باپ دادا ایسے تہہ خانے
جہاں حرام زادوں کی قلقاریاں
تھوکی نہ جاسکیں!!

۔۔۔۔۔۔۔۔۔۔۔۔۔۔۔۔۔۔۔۔۔۔

بایاں ہاتھ اور ماچس کا گیت

فساد فی الارض کا اعلان ہوتے ہی
ترازو والوں نے ایک پلڑے میں
ذلت۔۔
اور دوسرے میں خود کو رکھا
ان کا پلڑا جھک گیا
یہ بائیں ہاتھ والے ہیں

زمین نے اپنا گریبان پھاڑ ڈالا
اور سیاہ چہروں والے
ایک ایک کفن کا حساب دیتے
پہاڑ کے مانند ریزہ ریزہ ہو گئے
یہ دوزخ خریدنے والے ہیں

جب تابوتوں پر جوتے برسائے جارہے تھے
قیامت اپنے آپ میں غرق ہو گئی
آنسو ۔۔ بہت سارے آنسو
خدا کے پیروں سے لپٹ گئے
جیسے ٹانگ سے محرومی کے بعد
ہاتھ میں بیساکھی آ جاتی ہے
ایسے رحم کے چھن جانے پر
آگ کے پاؤں دیے جاتے ہیں
یہ آگ والے ہیں

۔۔۔۔۔۔۔۔۔۔۔۔۔۔۔۔۔۔۔۔۔۔

میں تمہاری آواز کی تصویر کھینچ سکتا ہوں؟

میں اپنی کلہاڑی کے دستے سے
تمہارے لئے
ایک بنسری بنانا چاہوں گا
تم وہ سارے پہاڑی گیت
اونچی حویلی کی خوابگاہ سے
باہر انڈیل دینا
جو تمہاری ریشمی آواز کو
دیمک کی طرح چاٹ گئے

میں اپنے ڈول سے تمہارے لئے
ایک کشتی بنانا چاہوں گا
تم اپنی سبز آنکھوں میں بہہ کر
کسی دروازے کو اپنا رازداں بنا لینا
میں دریا کی چوکھٹ پر
تمہارا منتظر رہوں گا

میں جولاہا ہوں
تمہارے لئے وطن کا ایک ٹکڑا
کاشت نہیں کر سکتا
تمہیں میری زمین پر رہنا ہوگا
کسی درخت،پھول
یا پھر کسی پہاڑ کا حصہ بن کر

میں تمہارے لئے
اپنی سانسیں ادھیڑ کر
ایک چراغ بُننا چاہوں گا
جس کی حدت سے
تمہارے ہونٹوں کے سرد پتھر
آگ ہو جائیں
اور میں۔۔۔
تمہاری آواز کا ریشم چرا سکوں

۔۔۔۔۔۔۔۔۔۔۔۔۔۔۔۔۔۔۔۔۔۔

بے وطن عورت کا مارچ(1)

۔۔۔۔
کوئی رنگ سفیدی کے علاوہ؟
پانی ۔۔ آنسوؤں کے سوا
سرخی ۔۔۔ لہو سے الگ تھلگ
چوڑیاں ۔۔۔ جن میں بیڑیوں سی کھنک نہ ہو
پازیبیں ۔۔ جن کی صورت زنجیروں سے علیحدہ
ایک آزادی میرے کاجل کے لئے
ایک نعرہ میری زندگی کے لئے
ایک دیوار ایسی ہو
جس پر میری مرضی کی سانسیں ٹنگی ہوں
کوئی ایسی زمین
جس پرمیں اپنی مرضی کا وقت کاشت کر سکوں
میرے لیے کوئی بینر
جس پر میرے وطن کا نقشہ ہو
کوئی سڑک
جو میرے ملک کو جاتی ہو
اور راستے میں کوئی قبرستان نہ پڑے

۔۔۔۔۔۔۔۔۔۔۔۔۔۔۔۔۔۔۔۔۔۔

بے وطن عورت کا مارچ(2)

میرے بیٹے
کچھ دیر کے لئے
کیا تو مرنا موخر نہیں کرسکتا تھا
کرتے کا آخری بٹن ٹانکنا باقی تھا
ایسی بھی کیا ناراضی
تو بغیر بٹنوں والا ان سلا لباس پہن کر آگیا
ارے اس میں تو کوئی جیب بھی نہیں ہے
میں یہ چاروں قل والا تعویذ کہاں رکھوں
تیری حفاظت کے لئے جو پانی دم کیا تھا
تیرا باپ بالٹی میں انڈیل کر لے گیا
بیری کے پتے
اور وہ تختہ
جس پر بیٹھ کر تو آزادی کے نعرے لکھا کرتا تھا
میرے لعل
ذرا ٹھہر میں طاق میں سے عطر اٹھا لاؤں
یہ کافور بھی کوئی لگانے کی چیز ہے
دیکھ باورچی خانے میں چولہا جل رہا ہے
کہیں میری سانسیں تو نہیں جل رہیں
یہ میرا دوپٹہ بھیگتا کیوں جارہا ہے
میرے چاند
تیرے ماتھے پر سرخ پھول کھلا ہوا ہے
مجھے اس کی خوشبو سونگھنے دے

۔۔۔۔۔۔۔۔۔۔۔۔۔۔۔۔۔۔۔۔۔۔

بے وطن عورت کا مارچ(3)

مٹی خارش کی طرح
میرے جسم سے چمٹی ہوئی ہے
آزادی کی سرخ چیونٹیاں
میری آنکھوں میں بل بناتے ہوئے
آٹے کی بوریوں پر نعرے لکھتی ہیں
“ایک عورت کے بدلے ،وطن کی ایک اینٹ”
نہیں، نہیں
وطن عورتوں کا متبادل نہیں ہوتے
عورتیں تو غنمیت کی لاٹھیوں سے ہانک کر
کتوں کی شکار گاہ میں لائی جاتی ہیں
اور بدن سونگھنے والے
مٹی کو کھجلی میں بدل دیتے ہیں
دوسری عورتوں کو
سورہ نور والے مرد ملتے ہیں
اور ہمیں
خارش زدہ کتے

۔۔۔۔۔۔۔۔۔۔۔۔۔۔۔۔۔۔۔۔۔۔

بے وطن عورت کا مارچ(4)

میں زوجہ فلاں ابن فلاں
تمہاری وردیوں کے لئے حلال نہیں ہو سکتی
میرا خاوند
تمہارے بوٹوں کے نیچے آ کر مر گیا
لیکن میں اس کا جنازہ لینے سے انکاری ہوں
نکاح نامے سے بیوگی کاخانہ پھاڑ کر
میں تمہاری لئے پھانسی کا پھندہ بناؤں گی
یہ میرا بیٹا ایک درخت ہے
اس کی لکڑی ایک دن تختہ دار میں بدل جائے گی
اور میں تمہاری وردیوں سے
اپنے خاوند کے پھٹے پرانے جوتے صاف کرتے ہوئے
تمہاری ماں بہنوں کو گالیوں جیسی بددعائیں دوں گی
میں زوجہ فلاں شہید ابن شہیدابن شہید

۔۔۔۔۔۔۔۔۔۔۔۔۔۔۔۔۔۔۔۔۔۔

وَاَنْ لَّيْسَ لِلْاِنْسَانِ اِلَّا مَا سَعٰىۙ

بجھاؤ۔۔یہ موم بتیاں
اور اس آگ سے اپنے چولہے آباد کرو
اٹھاؤ! ۔۔۔ پھولوں کی چادریں
اور اپنے بدن کی نالیاں ڈھانپ لو
سمیٹو!۔۔۔ خیرات کی تھالیاں
بھوک کے رنگوں سے جسم کی دیواروں پر
عزت کی روٹیاں پینٹ کرو
پھینکو!۔۔پیروں سے سلی ہوئی قمیضیں
اپنی برہنگی پر رقص کرو
ناچو!۔۔۔موت کی مسجدوں میں
جھومو!۔۔۔کلیسا کے سرد خانوں میں
گاؤ۔۔۔مندروں کے اسٹریچرز پر
خدا کے گیت
موت کے قفل توڑ کر
پھلانگو ۔۔ زندگی کی دیواریں
اپنی زبانوں سے پرچم بناؤ
اپنی آوازوں سے ایک سمندر
جو ان ساری مچھلیوں کو پھاڑ کھائے
جو تمہارے یونس نگل گئیں

The post بے وطن عورت کا مارچ اور دیگر نظمیں — سدرہ سحر عمران appeared first on Laaltain.

ہر آنکھ میں مردہ خوابوں کی لاشیں تیرتی رہتی ہیں
جو فاتحہ کی امید پہ اکثر آنکھوں سے ٹکراتی رہتی ہیں
انہیں ہر دن رشتوں کے گدھوں کی خوراک بننا ہے

لڑکیاں جو شادیوں کی بھینٹ چڑھیں گی
موٹر سائیکلوں کی چیختی ہڈیوں کی آواز پہ جوانوں کے قہقہے میرا مذاق اڑاتے ہیں

آج میں سڑک کے تارکول سے لپٹ کر خوب رویا
اور میری آنکھوں کی سیاہی سڑک میں اپنا تیزاب پلاتی گئی

شہر کی ہر دکان میرا منہ چڑاتی ہے

لوگ اپنے خوابوں کا قتل کر کے نئے کرتے خریدتے ہیں
اور اس پہ اپنے ارمانوں کے کفن پہنتے ہیں

ہماری اناوں کے کتوں کو لڑتے دیکھ کر ہمارے وعدے سہمے بیٹھے ہیں
میں نے بھی تمہارے لیے اک دکان سے لباس چرانے کا سوچا ہے
مگر دکاندار کو مالک کی پڑھنے والی گالیوں کا تصور میرے ارادوں کا گلہ گھونٹتا ہے
گو عید پہ تمہارے جسم میری انگلیوں سے مس کیے لیے لباس کی راہ تکے گا
تکنے دو
مجھ سے جڑی ہر چیز کے حصے میں انتظار ہی لکھا ہے

The post چاند رات (عادل یوسف) appeared first on Laaltain.

اگرچہ بیس منٹ کوئی اتنا کم وقت بھی نہیں ہوتا___ خاص طور پر جب آپ بغیر برساتی کے سٹاپ پہ اپنے مطلوبہ نمبر کے روٹ کے انتظار میں کھڑے ہوں___
___یا جب___

دفتر جانے کے لیے آپ کی آنکھ دیر سے کھلے اور پتہ چلے کہ رات آپ صبح کا لباس پریس کرنا بھول گئے تھے

بیس منٹ میں آدمی دفتر سے چھٹی کی درخواست لکھ سکتا ہے مگر اپنی محبوبہ کے نام خط لکھنے کے لیے یہ وقت بہت کم ہے
بیس منٹ کافی ہوتے ہیں/ چائے پینے، ٹائی باندھنے اور ایک زوردار قہقہہ لگانے کے لیے___ مگر کسی بات پر رونے کے لیے 20 منٹ کم پڑ سکتے ہیں
بیس منٹ سوچنے کے لیے کافی ہوتے ہیں
آپ سوچ سکتے ہیں /کوئی کتاب پڑھنے
کسی دوست کو ٹیلی فون کرنے___ ناخن تراشنے یا کسی اُدھوری نظم کو پورا کرنے کے بارے میں
آپ بیس منٹ میں کسی دوست کو منانے کے بارے میں سوچ سکتے ہیں
مگر روٹھے ہوئے کو منانے کے لیے ۲۰ منٹ بہت کم ہوتے ہیں

اگر کچھ برس پہلے اس دن میں ریلوے سٹیشن ۲۰منٹ لیٹ پہنچا ہوتا تو میری اس سے ملاقات ہی نہ ہوئی ہوتی___
کاش اس صبح دودھ والے نے پڑوسی کے فلیٹ پر ۲۰ منٹ لیٹ دستک دی ہوتی
Image: Richard Odabashian

The post دودھ والے وقت کے بہت پابند ہوتے ہیں (ساحر شفیق) appeared first on Laaltain.

سرحدوں پہ تعینات فوجیوں پر امام کی تقریریں بے اثر جاتی ہیں
وطن سے محبت اور شہید کا رتبہ
تمہارے خطوں سے افضل نہیں ہو سکتا

تمہارے خط
کچی مہندی اور کنواری رانوں کے مدھ بھرے سندیسے
امیدوں بھری صبحوں کی انگڑایوں اور بدن کاٹتی راتوں کی کروٹوں کے ملبے
نور محمد کو سونے نہیں دیتے

نور محمد
ایک فرض شناس ڈاکیہ
جو لفافوں کو تھوک اور انسانوں کو ملاوٹ سے پہچانتا ہے
جس کی رسوئی میں اناج کی بوریاں گل جاتی ہیں ختم نہیں ہوتی
سو نہیں سکتا

سنتالیس برسوں سے
چھتیس گاؤں اس کی ایمانداری اور نیک سیرتی کی قسمیں کھاتے آئے ہیں

روایتوں میں آتا ہے
نور محمد آخری کنوارہ ڈاکیہ تھا
جسے سلانے کو خود فرشتے آئے

جوابی حملوں میں جوانوں نے اپنے دل داغے
اور کفن میں پرچم کی جگہ تمہاری خوشبو پسند کی

The post پھول تمہیں دیکھنے کو کھلتے ہیں (صدیق شاہد) appeared first on Laaltain.