شام سے پہلے
واپسی کی آرزو کو
آنکھوں میں مٹی بھر کر بے نور کر دیتا ہے
اور پھر پوچھتا ہے
کیا سورج غروب ہو چکا ہے؟
کیا تم بھی یہیں کے ہو؟
جہاں منظر کو مزید پرسوز بنانے کے لیے
ہر ایک نے اپنی صلیب اٹھا رکھی ہے
نہیں تو۔۔۔ تم ضرور ہنسو گے اور پکڑے جاؤ گے !

لوگ انہیں ریت کے ٹیلے کی طرح نظر آتے ہیں
اور وہ اس میں دفن ہونے کے ڈر سے دور بھاگتے ہیں
روشنی چیل کی طرح دکھتی ہے
جو ان کی آنکھیں نوچ لے گی
اور ہوائیں گدھ جیسی محسوس ہوتی ہیں
جسے وہ اپنے جسم پر بیٹھنے نہیں دیتے !

آواز کو وہ فاختہ سمجھ کر پکڑتے ہیں
اور تہہ خانے میں ڈال دیتے ہیں
کل ہی تو انہوں نے
خوشبو کو کتاب سمجھ کر پھاڑ ڈالا
جو صفحات کے سطروں سے نکل کر شور کر رہی تھی!

The post کیا سورج غروب ہو چکا ہے؟ (ایچ-بی-بلوچ) appeared first on Laaltain.

یہ ہماری بھٹی میں بنی تلوار ہے
غیر کی دھرتی پر
اس سے اپنی نسیں کاٹو
اور موسیقی سنو!
کپاس کے ڈھیلے میں بند سوت جیسی لڑکیوں کی
اور مت بھولنا
آپ بیتی میں آخر تک زندہ رہنا پڑتا ہے !

یہ ڈھال ہے
اس پر بھنے ہوئے گوشت
اور شراب کی پیالی رکھنے کی گنجائش پیدا کی گئی ہے
تم اس پر اپنی آنکھیں پھیلا کر جاگو!
اور دوسروں کے خوابوں پر نقب لگاؤ
یہ الگ بات ہے
کہ پرندے اپنی دنیا میں جاکر سوتے ہیں !

یہ آہنی نعل ہیں
بے شک ہم انہیں
تجارت کی فراوانی کے لیے
اپنے دروازوں پر لگا کر رکھیں گے
مگر معاف کرنا
یہ ہماری گلی کا نکڑ ہے !
یہاں گھوڑے باندھنے کی کوئی جگہ نہیں !

The post آپ بیتی میں آخر تک زندہ رہنا پڑتا ہے! (ایچ-بی-بلوچ) appeared first on Laaltain.

ضرور کوئی ستارہ نیچے آ رہا ہے!
گھاٹیوں کی طرف
تہہ کی طرف رواں
اور بہتے اندھے سیال سے نبرد آزما ہونے
کہکشاں کی رگ
میں نے ہر آتے مہمان کے ہونٹوں سے پھڑکتے دیکھی ہے
منڈیروں پر
فاختاؤں کی چونچ سے کاسنی پھول کے رنگ دمکتے دیکھے ہیں
اب تک ہر دیوار زیر لب مسکرا رہی ہے !

ضرور کوئی پھول
خوشبو کی شدت سے پھٹنے والا ہے
اک تتلی شام سے بے وجہ شرما رہی ہے !
ضرور ہوا کے رخ پر کشتیوں کے رخ بدلنے والے ہیں
گلیوں کی باتیں کرتے گھروں کو لوٹتے ملاح
سمندر کی باتیں کر رہے ہیں!

ضرور عشق میں جادو
اور انتظار میں دلفریبی ہے
سرد موسم میں
پتھر کی بنچ پر بیٹھنے کا خوف بھلا بیٹھا ہوں!
اور پانچویں کپ میں مسلسل
چائے سے بھاپ بننے کے عمل سے گزر رہا ہوں!!

The post ضرور کوئی ستارہ نیچے آ رہا ہے! (ایچ۔ بی۔ بلوچ) appeared first on Laaltain.

گزرے لمحات کی قبر میں مدفون اے میری راحت!
میں تصور بھی نہیں کر سکتا
کہ میں نے تجھے کبھی چوما تھا !

میں اکیلائی کے جسم پر
مجوزہ منصوبوں کی وارداتیں لکھتا ہوں
شاید
تنہائی لاجوردی شام کی ایجاد
اور نظر انداز کئے گئے پرندوں کی بدعا ہے!

میں عجلت میں
فیصلہ کرنے کی قوت سے محروم ہوں
اور سوچ کے سلسلے میں
ہر اس آواز کو شامل کر لیتا ہوں
جس نے مجھے کبھی
ریتیلے کنویں کے عذاب سے
محتاط رہنے کی آگاہی نہیں دی

لیکن اب کے
چاند نکلنے سے پہلے
میں ستاروں کے دامن سے
ایک صدا کی بازگشت کھینچوں گا
اور اسے فضا کی بصیرت میں پھیلا دوں گا
اور پھر تم
سویرے کی دہلیز سے
صبح کی ڈور بیل پہ ہاتھ رکھ کر بھول جانا!

The post لہروں پر جھومتا چاند! (ایچ-بی-بلوچ) appeared first on Laaltain.

ان خوش گوار بولیوں
اور گول چوک پر نصب سائن بورڈ پر
ماڈل کی پلکوں کی یکسانیت کے اندر
جس میں موت جیسے لفظ کی کوئی گنجائش نہیں ہے

جب ہم
اپنائیت کی لذت آشنائی سے منور کر دیئے جائیں گے
جب تک ہمیں
کھیت پکانے کے لیے ادھاری آگ کی ضرورت نہیں پڑے گی
کسی طور پر ہم
جسم کی قید کے دورانیے کو طویل کر سکتے ہیں

جب تک خون کا رنگ لال
اور ہمارے دل احساس کی چبھن سے آگاہ رہیں گے
ہم ان سیٹیوں کے آگے لیٹ جائیں گے
جو ہمیں
ملانے اور جدا کرنے کے لیے ایندھن کھپاتی ہیں
جو ایک بار کو دوسرے اسٹیشن
اور ایک مرض کو دوسری جگہ منتقل کر دیتی ہیں

جب تک ہم زندہ رہیں گے
خواہش موت کی أنکھوں میں مکڑی کے جال بنتی
اور سنگینوں کی نوک کو گدگداتی رہے گی

ہم زندہ رہیں گے
مجھے یقین ہے کہ ہم زندہ رہیں گے
تنگ اور تاریک گلیوں میں
تمباکو چباتے لوگ اس لیے زندہ ہیں
کہ وہ جانتے ہیں
سرہانے کھڑا مسیحا اور زندگی
کبھی بھی ایک موقع ہاتھ سے جانے نہیں دیتی!
Image: Sukhpal Grewal

The post ہم زندہ رہیں گے! — ایچ- بی- بلوچ appeared first on Laaltain.

وسیع تر
کائناتوں کے قیام کے بعد
ہم اپنے خول میں بے مصرف ہو گئے

پکار اٹھی۔۔۔۔
کوئی ہے جو
ہمیں اپنے چھوٹے چھوٹے گھروں سے نکالے!!

دعا قبول ہوئی
ہم ایک نئی سرزمین پر اترے
جو بہت حسین تھی
پھر ہمیں ایک خدا
اور شیطان کی ضرورت محسوس ہوئی!

ہمارے قدموں کے درمیان
جہاں پر پودے پانی پی کر خوش ہوتے تھے
اور پھر آہستہ آہستہ
انہوں نے لوگوں کا خون پینا شروع کر دیا

یہ تب ہوا
جب ہم
زمین کے حصے کا پانی
خدا کا حصہ سمجھ کر پی گئے!
۔۔۔۔۔۔۔۔۔۔۔۔۔۔۔۔۔۔۔۔۔۔۔
ایک موت کی وضاحت
دور بہت دور
حدِ نگاہ تک
جہاں زمین اور آسمان باہم ملتے ہیں

وہاں کہیں باہم ربط کو
میں نے وصالِ عشق کی علامت بنایا ہوا ہے
اب زمانہ چاہے بھی تو
اپنی نظر سے
اس منظر کو الگ نہیں کر سکتا

لوگ اپنی ناکامی پر کہہ سکتے ہیں کہ
میں مر چکا ہوں
اس طرح جیسے
دور بہت دور
حدِ نگاہ تک
زمین نے آدھے آسمان کو نگلا ہوا ہے!
۔۔۔۔۔۔۔۔۔۔۔۔۔۔۔۔۔۔۔۔۔۔۔
تم نے مجھے ایک جنگ کے بعد جیتا!
میں جو دیکھ سکتا ہوں
وہ دیکھتا ہوں
جو میں سن سکتا ہوں
سنتا ہوں
جہاں تک میں سوچ سکتا ہوں
سوچتا ہوں

تم نے مجھے اپنے مقابل دیکھنا چاہا
جب میں میدان میں تھا
تم نے مجھے ایک جنگ کے بعد جیتا!
لیکن
میری ہار کا یقین میرے اداس ہونے تک ہے

تم پہاڑوں کے دامن میں
مجھے تھوہر بنا دیتے ہو
میں تمہاری آنکھوں سے کانٹے بن کر نکلتا ہوں

جب تم مجھے بادل سمجھنے لگتے ہو
تو میں برس پڑتا ہوں
جب تم مجھے اپنے مطلب سے لکھنا چاہتے ہو
تو میں ناقابلِ تحریر سوچ بن جاتا ہوں

اپنی مرضی سے
مجھے زندہ رکھنے کے لیے
جلانے سے پہلے جان لو

بے جان اشیا جیسے آگ اور موم
اپنی ضرورتوں کا ادراک رکھ نہیں پاتیں
اس لیے وہ اپنی صفات میں
ہمیشہ سے آزاد ہیں!
۔۔۔۔۔۔۔۔۔۔۔۔۔۔۔۔۔۔۔۔۔۔۔
دنیا کی ردی میں؎
دنیا کی ردی میں
اتنے پتھر جمع ہو گئے ہیں
جن سے لاتعداد گھر بن جائیں

جن سے سیڑھیاں بنائی جا سکتی ہیں
جو ہمارے دل تک پہنچ جائیں
اور آنکھوں سے راستے بن کر نکلیں

یہاں اتنے لوگ جمع ہو گئے ہیں
جن کو پگھلا کر ٹینک بنائے جاتے ہیں
جن کو گرما کر جنگ بنائی جاتی ہے

جن کو چن کر دیواریں اٹھائی جاتی ہیں
جو ہمارے خوابوں کو
ہماری خوشیوں سے الگ کر دیتی ہیں
ہمیں بیساکھیوں میں زندہ کر دیا جاتا ہے
اور قدموں میں مار دیا جاتا ہے

یہاں پر اتنے
رنگ بہ رنگی پرندے جمع ہوگئے ہیں
جن کو وہ ملکوں کے نام سے بناتے ہیں
اور گولیوں سے اڑا دیتے ہیں.!
۔۔۔۔۔۔۔۔۔۔۔۔۔۔۔۔۔۔۔۔۔۔۔
محبت
محبت
اور عشق کے احاطے میں
آنے سے احتیاط کرو
یہاں پر سنگلاخ چٹانیں ہیں
جو کبھی کبھی
بھیڑیے کا روپ دھار لیتی ہیں

اس خطرناک ارادے سے پہلے
کبھی واپس بھی چلے جایا کرو
اس سناٹے میں
جو سکون بخش پناہوں کی صورت لے لیتا ہے

اگر تمہیں آنا ہے
تو اس دیوار کو پکڑ کر چلو
جو کبھی واپس نہیں جاتی

لیکن اگر تمہیں
خود کو مجھ سے الگ رکھنا ہے
تو ہمیں خاموشی سے
ایک تصویر بنانی ہوگی
جو کیلوں کے بغیر ہتھوڑے برداشت کر سکے!
Image: Daehyun Kim

The post خدا کا حصہ! اور دیگر نظمیں (ایچ-بی-بلوچ) appeared first on Laaltain.

نشیب میں اتر کر دیکھو

تو تمہیں عجیب نہیں لگے گا

کہ پانی کا بہاؤ ہمیشہ

نشیبی ہموار میدانوں اور راستوں کو کیوں اترتا ہے

میدان اور میدانی راستے

اچھے لوگوں کی طرح

سیدھے خستہ اور خنک رہتے ہیں

سیدھے لوگوں اور سیدھے میدانوں پر

صرف جنگ کے لیئے پڑاؤ نہیں ڈالا جاتا

ان سے راستے بنائے جا سکتے ہیں

ان پر پودے اگائے اور پھول کھلائے جا سکتے ہیں

ان پر قبضہ بھی کیا جا سکتا ہے

مچلھیاں اور سیدھے لوگ

آخری دن کی اندیشگی نہیں پالتے

انہیں کسی بھی وقت

کنڈے سے لٹکایا جا سکتا ہے

Image: Abdullah Murad

The post سیدھے لوگ آخری دن کی اندیشگی نہیں پالتے appeared first on Laaltain.

The post ایک پتھر خواب کا المیہ appeared first on Laaltain.

The post ہم سورج سے زیادہ معصوم ہیں appeared first on Laaltain.