کروں کیا

میں اس خامشی کا کروں کیا
جو مجھ سے سدا بات کرتی ہے، کرتی ہی رہتی ہے
اور آنسوؤں کا
جو ہنستے ہوئے بھی
مری آنکھ میں تیرتے ہیں

چکا چوند کا،
جو اندھیرے کی صورت
رگوں میں بھری ہے

میں مصروفیت کا کروں کیا
کہ جس میں
فراغت کی نا مختتم بے دلی ہے

کروں کیا میں اس بے گھری کا۔۔۔۔۔۔
جو میرے تعاقب میں ۔۔۔۔۔۔۔روز ازل سے چلی آ رہی ہے

میں اس خالی پن کا۔۔۔۔۔
جو کھانے کو آتا ہے۔۔۔۔۔
اس شور کا۔۔۔۔۔
جس کے باطن میں
گہری خموشی کی ہیبت چھپی ہے

تمہارا کروں کیا؟
ادھیڑے چلے جا رہے ہو مجھے۔۔۔۔۔۔۔۔

کروں کیا میں اس بے نہایت محبت کا۔۔۔۔۔۔
۔وارفتگی سے جو بڑھتی ہے، مجھ سے لپٹنے کی خاطر

تو مونھ موڑ کر ۔۔۔۔
.میں کہیں جا نکلتا ہوں
ویران ٹیلوں کے پیچھے۔۔۔۔۔۔۔۔
ٹرپتی ہوئی ریت میں
چیخنے کے لیے

Image: Naikos