جنگ: ایک کولاژ

مورچے کھودنے کا کفارہ دینے کو
قبریں جسموں سے پر کرنی پڑتی ہیں

---------------------

بوڑھی کمریں بیٹوں کے دفنانے کو جھکتی ہیں
سیدھی نہیں ہوتیں

----------------

قبروں پر جو پانی چھڑکا جاتا ہے
چکھ کر دیکھو
اس میں نمک ہے

-------------

پائینتی لگ کر آپ ہی آپ سلگنے والی اس عورت نے
جنگ چھڑنے سے خوابوں کے دفنانے تک
خوشبو نہیں پہنی

-----------

سرہانے پر ہاتھ پھیرتی ماں سے پوچھو
جیتا کون

---------------

تمغے جس سونے سے ڈھالے جاتے ہیں
اس میں سے نیت کا کھوٹ علیحدہ کرنا ناممکن ہے