پاکستانی نظام تعلیم اقلیتوں اور پسماندہ طبقات کے لئے کس قدر تنگ نظر اور ناقابل برداشت ہے ،اس کا اندازہ رواں برس پنجاب یونیورسٹی کی طرف سے بی –اے سالانہ امتحانات میں لیا جانے والا اخلاقیات کا پرچہ دیکھ کر بخوبی کیا جا سکتا ہے۔ میں لالٹین کے توسط سے اربابِ اختیار کی توجہ پنجاب یونیورسٹی لاہور کی طرف سے سالانہ امتحان 2014 کے دوران ،11اپریل کو لئے جانے والے اخلاقیات کے پرچہ کے سوالات کی جانب مبذول کرانا چاہتا ہوں۔ پرچے میں پوچھے گئے سوالات میں سے بعض سوالات ایسے تھے جن کا غیر مسلم طلبہ سے پوچھا جانا سراسر ناانصافی ہے۔ پرچے میں ایک سوال کا تعلق پیغمبر اسلام صلی اللہ علیہ وآلہ وسلم کی احادیث سے ہے جب کہ ایک دوسرے سوال میں اقلیتوں سے متعلق اسلامی تعلیمات سے متعلق پوچھا گیا ہے۔ پرچہ ترتیب دیتے ہوئے یقیناً اس بات کو نظر انداز کیا گیا ہے کہ غیر مسلم طلبہ کو اسلامی عقائد سے متعلق پوچھے گئے سوالات پر کیا تحفظات ہو سکتے ہیں۔ اخلاقیات کے پرچہ میں متنازعہ سوالات کی موجودگی اقلیتی حقوق کی اس ضمانت کی نفی ہے جو اسلام اور آئین پاکستان تمام اقلیتوں کو فراہم کرتا ہے۔

پاکستان میں اقلیتوں کے لئے اسلامیات کے لازمی مضمون کی جگہ اخلاقیات کا مضمون موجود ہے، لیکن امتحانات میں ایسے سوالات جن کا تعلق اسلامی عقائد سے ہے نہ صرف نامناسب ہے بلکہ اشتعال کا باعث بھی بن سکتے ہیں۔ اخلاقیات کے مضمون کا مقصد چوں کہ غیر مسلم طلبہ کی شناخت اور مذہبی عقائد کا احترام کرتے ہوئے انہیں ان کے اپنے مذاہب کی اخلاقی تعلیمات سے آگاہ کرنا ہے اس لئےاس پرچے میں اسلامی عقائد سے متعلق سوالات پوچھاجانا کسی بھی طرح مناسب نہیں۔اخلاقیات کے مضمون میں صرف کسی ایک مذہب سے متعلق سوال پوچھا جانا مناسب نہیں چاہے اس مذہب کے ماننے والے اقلیت میں ہوں یا اکثریت میں۔ جیسے 2014کے پرچے میں ہندو مت کے اخلاقی تصورات سے متعلق سوال پوچھتے ہوئے ہندو مت کے علاوہ دیگر مذاہب کے طلبہ کے احساسات کو نظر انداز کیا گیا ہے۔
اس مسئلے کا ایک اور اہم پہلو ان سوالات کے جواب دینے کے دوران غیر مسلم طلبہ کی جانب سے کسی بھی غیر ارادی غلطی یا کوتاہی پر مسلمانوں کی ممکنہ دل آزاری بھی ہے۔ غیر مسلم طلبہ چوں کہ اسلام سے واقف نہیں ہوتے اس لئے جواب دیتے ہوئے غلطی کا امکان موجود ہے۔
لازمی کتب جیسے مطالعہ پاکستان اور میٹرک کی سطح تک اردو اور انگریزی سمیت اختیاری کتب میں بھی اسلامی عقائد سے متعلق مواد بے حد زیادہ ہے ۔ اسلام اور مسلم عقائد و شخصیات سے عقیدت اور ان کا احترام اپنی جگہ لیکن نصاب اور امتحانات کا نظام تمام پاکستانی شہریوں کے لئے یکساں طور پر قابل قبول اور مذہبی، مسلکی اور صوبائی تعصبات سے پاک ہونا چاہئے۔

مسلم عقائداور شخصیات کا تذکرہ بلا شبہ نیک نیتی اور مختلف عقائڈ کے حامل افراد کے درمیان ہم آہنگی کے لئے کیا جاتا ہے لیکن ایسی صورت میں نصاب تعلیم میں پاکستان میں بسنے والی اقلیتوں اور مختلف مسالک کی نمائندگی نہ ہونا سراسر بد نیتی اور ناانصافی ہے۔ میں لالٹین کے توسط سے پاکستانی نظام تعلیم میں موجود مذہبی اسباق پر نظرِثانی کی تجویز بھی حکام تک پہنچانا چاہتا ہوں۔ میرے خیال میں مذہبی شخصیات اور مذہبی عقائد کا تذکرہ کسی بھی تنازعہ یا اشتعال انگیزی کا باعث بن سکتا ہے اور کسی ایک مذہبی فکر کے پروان چڑھانے یا اسے نظام تعلیم کا حصہ بنانے کا مطلب یہ ہے کہ پاکستان ریاستی سطے پر Diversity اور تکثیریت کی نفی کرتا ہے جو کسی بھی طرح سے نہ اسلام کا پیغام ہے اور نہ مقدس ہستیوں کا۔
امید ہے حکام اس سلسلے میں اقلیتوں کے تحفظات دور کرنے کی کوشش کریں گے۔