شہزاد نیّر, Author at Laaltain

دل ہی تو ہے

شہزاد نیّر — Thu, 29 May 2025 14:49:22 +0000

اردو شعر و ادب میں “دل” ایک ہمہ گیر استعارہ ھے۔ جسم کے اس عضوِ رئیس کو عہدِ قدیم سے وہم و خیال کا منبع و ماخذ اور جذبات و احساسات کا مرکز و محور سمجھا جاتا ھے۔ ہم سب نے یہ جملہ بھی سن رکھا ھے “میرے ذہن میں ایک خیال آیا ہے۔” لیکن اس سے کہیں زیادہ ہمیں یہ سننے پڑھنے کو ملتا ہے “میرے دل میں ایک خیال آیا۔” اسی طرح “میرا دل پریشان ہے، یہ بات میرے دل کو نہیں لگی، فلاں دل کا صاف ہے، اس کے دل میں وسوسہ پیدا ہوا” جیسے درجنوں فقرے ہمیں اس بات پر قائل کرتے نظر آتے ہیں کہ ناصرف خیالات و جذبات بلکہ نیت، کردار ، ارادہ، پریشانی، دکھ اور کئی مزید انسانی اوصاف و کیفیات دل سے وابستہ ہیں۔

ہر چند میڈیکل سائنس نے بتا رکھا ہے ان سب خیالات و کیفیات کا مسکن ہمارا ذہن ہے۔ ذہن ہمارے عصبی نظام کا ہیڈکوارٹر ہے جو جملہ افعال بدن کو کنٹرول کرتا ہے۔ دل کے پاس تو معدودے چند عصبی خلیات ہی ہیں جو محض دل کی سرگرمیاں کنٹرول کرتے ہیں۔ دھڑکن کی رفتار بڑھانے یا کم کرنے کے احکام قلب کے عصبی خلیات کو دماغ ہی سے موصول ہوتے ہیں جہاں ہماری جملہ بدنی سرگرمیوں اور ضروریات کا ادراک و احساس پایا جاتا ہے۔ یہ جو خوف، تجسس یا خوشی کے عالم میں ہمارا دل تیزی سے دھڑک اٹھتا ہے (یا ورزش کے ہنگام بھی) تو اس کا سبب یہی ہے کہ خوف، تجسس وغیرہ کا ادراک کر کے ذہن دل کو تیز دھڑکنے کا حکم جاری کرتا ہے تاکہ بدن کو خون کی ترسیل (نتیجتاً توانائی) بڑھ سکے جو آنے والے ممکنہ خطرے میں کام آئے۔

یہیں سے لوگوں نے سمجھا کہ شاید سوچنے سمجھنے کی صلاحیت دل میں پائی جاتی ہے۔

لیکن صاحب، سائنسی انکشافات و اکتشافات کی اپنی دنیا ہے اور زبان و شعر وادب کا اپنا ہی عالم۔ زبان کے قدیمی اظہارات بھلا جمعہ جمعہ آٹھ دن کی سائنسی دریافتوں سے بدل سکتے ہیں! ہرگز نہیں جناب۔

سائنس کچھ بھی کہہ لے، ہمارا محبوب دل میں ہی بسے گا، ذہن میں نہیں۔ محبت کا مرکز دل ہی ہے۔ دل لینا، دل دینا یونہی رہیں گے۔ محبوب سے ملاقات کے لیے کوئے ملامت کو جانے پر دل ہی اکسائے گا وہ بھی پندار کا صنم کدہ ویراں کیے ہوئے۔ محبوب دلبر و دلدار کہلاتا رہے گا۔ اس کی جدائی میں دل بھر آئے گا اور اس کی جفا پر ہم دل گرفتہ ہوں گے نہ کہ ذہن گرفتہ یا دماغ گرفتہ۔ دراصل زبان کے بہت گہرے اور قدیم روابط تہذیب و ثقافت اور فکریات سے ہوتے ہیں۔ جب پیار محبت سمیت سبھی جذبات و احساسات کا مسکن دل ہی کو مانا گیا ہے تو ایسا ہی چلے گا۔ دوسری جانب عقل، خرد، دانش اور تفکر کو ذہن سے منسوب تو کیا گیا لیکن تفوق دل کو حاصل رہا جو عشق کا مسکن ہے اور عقل تو ابھی لب بام، محو تماشا ہے۔ ایسے میں یہ بالکل اہم نہیں رہ جاتا کہ دیگر اعضائے جسمانی کی طرح دل بھی ایک عضو ہے جس کا کام خون کو دھکا دینا ہے۔

ویسے بھی تو گھروں میں اب برقی الات سے روشنی ہوتی ہے لیکن شاعری میں اور مزاروں پر چراغ ہی جلتے ہیں۔ سامانِ حرب میں سے تیر و تلوار نکل چکے لیکن غزلوں میں موجود۔ اب بھلا بندوق، پستول، توپ، بم غزل میں اچھے لگیں گے!

تو صاحبو، زمانہ چاہے قیامت کی چال چل جائے، زبانیں اپنی چال چلتی ہیں۔

دل ہی تو ہے نہ سنگ و خشت، درد سے بھر نہ آئے کیوں

روئیں گے ہم ہزار بار کوئی ہمیں ستائے کیوں

مجھے نہیں لگتا کہ کسی بھی زبان کی شاعری دل کے ذکر سے خالی ہو گی۔

دل بدست آرد کہ حج اکبر است۔

از دل خیزد بر دل ریزد

دل دریا سمندروں ڈونگھے کون دلاں دیاں جانے ہو

۔ ۔ ۔ ۔ ۔ ۔ ۔ ۔ ۔

سوال: جدید حسیت، جدیدیت، مابعد جدیدیت، ساختیات و پس ساختیات اور ساخت شکنی کے ذکر اذکار میں کیا کہیں یہ امکان موجود ہے کہ زبان کامل سائنسی منہاج پر قائم ہو جائے اور جدید سائنسی اکتشافات کی روشنی میں زبانوں میں پائے جانے والے خلافِ عقل و حقیقت محاورات و استعارات متروک ہو جائیں یا پھر ایسا نہیں ہو گا؟

The post دل ہی تو ہے appeared first on Laaltain.

بدن کی حمایت میں

شہزاد نیّر — Sat, 15 Jul 2017 06:50:15 +0000

بہت ہو چکی تن کی نِندا
بہت لوگ کرتے رہے ہیں بدن کی مذمت
مری گل بدن
آج تیرے لبوں سے بدن کا قصیدہ جو پھوٹا
مشیت کے ٹانکے ادھڑنے لگے ہیں
ندامت کے پرزے بکھرنے لگے ہیں
اچنبھا! اچنبھا
لبِ تشنہ خو سےبدن کی حمایت میں بھیگے ہوۓ لفظ گرنے لگے ہیں

مری لالہ رخ! میں تو کہتا رہا
آنکھ پر بے یقینی کہاں تک چلے گی
تجھے دیکھتا ہوں تو تیرا بدن ہی نظر کو سجاتا ہے
اے سرو قامت!نظر کے ورق پر ترے انگ کا رنگ ہے
کوئی رنگیں فسانہ نہیں
یہ ترے جسم کا سچا سچ ہے
تخیل کی بیمار صنعت سے نکلا خیالی سراپا نہیں ہے
کہ جو سوچنے کو حسیں ہے، چھوؤ تو نہیں ہے
یہی ہے، یہی ہے، حقیقت یہی ہے
کہ جو دیکھتا ہوں میں وہ دیکھتا ہوں
فلک کی سکونت کسے چاہئیے ہے
انھی گنبدوں کو ذرا دائیں بائیں کرو
درمیاں کچھ جگہ ہے
یہیں میں سکونت کروں گا

مہک اے گلِ خوب رو!
آ! مری چھاتیوں پر پڑا رہ
مرے تن کے باغوں میں رہ لے
مہک لے بہک لے
کہاں جائے گا
کچھ نہیں، کچھ نہیں
آنکھ کی کھیتیوں سے پرے کچھ نہیں ہے
ارے کچھ نہیں ہے

Image: Robin Wight

The post بدن کی حمایت میں appeared first on Laaltain.

اے میرے سوچنے والے بیٹے

شہزاد نیّر — Sun, 16 Apr 2017 13:38:36 +0000

اے میرے سوچنے والے بیٹے

وہ دانش کو پاؤں تلے روندیں گے
سوال پر گولی چلائیں گے
منطق پر پتھر اور لاٹھیاں برسائیں گے
وہ انسانیت کو لہولہان کر کے
اساطیر کی زمینوں پر انسان ذبح کریں گے
وہ قاتلوں کے قصیدے پڑھ کر
قتل کے حمایتیوں پر گل پاشی کریں گے
وہ انسان کو نجس قرار دے کر
اجتماعی خوں ریزی کو مقدس ٹھہرائیں گے۔ ۔ ۔
وہ یہ سب تمہاری آنکھوں کے سامنے کریں گے
تم نے پھر بھی مشتعل نہیں ہونا !

وہ نفاست سے ان کتابوں کی شیرازہ بندی کریں گے
جن میں زندہ بدن اُدھیڑنے کے مفصل نسخے درج ہیں
وہ تمہارے سامنے نفرت کا پورا ماسٹر پلان رکھ دیں گے
یاد رکھو !
تم نے پھر بھی اپنی سوچ کو مشتعل نہیں ہونے دینا
اگر تم نے جواب میں کچھ کہا یا سوال اٹھایا
تو وہ تمہارے ہی لفظوں کی مہریں
تمہارے قتل نامے پہ ثبت کریں گے
( اُنہیں یہ گُر صدیوں سے آتا ہے )
پھر وہ ہجوم در ہجوم آئیں گے
اور تمہارے جسم کی روئی دھنک کے رکھ دیں گے
اگر تم انسان کے شرف کی سیڑھیاں چڑھ رہے ہوئے
تو وہ تمہیں نیچے کھینچ کر قتل کردیں گے

سو میرے سوچنے والے بیٹے !
تم نے خاموش رہنا ہے
تمہاری خاموشی میں تمہاری زندگی ہے
اور زندگی ہر چیز سے مقدم ہے میرے بیٹے
لیکن افسوس ! وہ لوگ یہ بات نہیں جانتے
وہ صرف موت کو مانتے ہیں

Image: Sabir Nazar

The post اے میرے سوچنے والے بیٹے appeared first on Laaltain.

خود کُش

شہزاد نیّر — Wed, 26 Oct 2016 07:32:30 +0000

[vc_row full_width=”” parallax=”” parallax_image=“”][vc_column width=“2/3”][vc_column_text]

خود کُش

[/vc_column_text][vc_column_text]

آج پھر رُخ پہ مری اپنی شباہت لے کر
موت رستے میں چلی آئی ہے
راہ میں خلق کے چہرے تو دکھائی دیں گے
موت کا روپ جدا رخ میں نظر آئے گا
آنکھ پھٹتے ہوئے پیکر پہ ٹھہر جائے گی اور سوچے گی
کیا مری اس سے شناسائی تھی؟

آج بھی خون کی ندّی میں نہایا سورج
آج پھر اس کی شعاعوں میں لہو کاری ھے
رنگ سب ایک ہی کایا میں ڈھلے جاتے ہیں
دشت و دل ایک سے منظر میں چلے جاتے ہیں
کُنجِ لالہ ہو کہ ہو سینہء ابنائے وطن
ہر جگہ ایک سی گُل کاری ہے
آنکھ پر دید بہت بھاری ہے

رنگ اب پیڑ کے سائے اُترے
سوکھتے حلق، ٹپکتی بوندیں
سُرخ دانوں سی ٹپکتی بوندیں
پیاس کا حقِّ نمک اور بڑھا دیتی ہیں
گل کی پوشاک ہو یا پھول سے تن کی پوشاک
ہر جگہ ایک سی گل کاری ہے

ساتھیو! کوئی تو آواز ملے
پیاس کو حلق میں ٹپکاتے ہوئے ہاتھ رُکیں
ایک آواز مری اپنی شباہت لے کر
جَل کو جلتے ہوئے ہونٹوں سے لگانے والی
مجھ کو بچوں سے ملانے والی
دُور کے صحن سے آئے مری اپنی آواز۔۔۔۔
آنکھ میں صرف اندھیرے ہیں، سماعت کی طرح
دور تک آتی نظر آتی نہیں ہے آواز
دور تک شور کا سنّاٹا ہے

[/vc_column_text][/vc_column][vc_column width=“1/3”][vc_column_text]
[/vc_column_text][/vc_column][/vc_row][vc_row][vc_column][vc_column_text]

[/vc_column_text][/vc_column][/vc_row]

The post خود کُش appeared first on Laaltain.

رستہ سہل نہیں ہے

شہزاد نیّر — Wed, 03 Aug 2016 09:56:56 +0000

[vc_row full_width=”” parallax=”” parallax_image=“”][vc_column width=“2/3”][vc_column_text]

رستہ سہل نہیں ہے

[/vc_column_text][vc_column_text]

شور مچاتی روشنیوں سے آنکھ بچا کر
خدشوں کی گلیوں سے ہوتے
دل میں کتنے موڑ مڑا ہوں
تجھ سے ملنے نکل پڑا ہوں
ہر دروازہ دیکھ رہا ہے
کون نگر میں نیک رہا ہے
ہرے دریچے، لال جھروکےاونچا اونچا بول رہے ہیں
نیلے پیلے پس منظر میں رنگ بھی جھوٹے ہوجاتے ہیں
عجلت ماری ان گھڑیوں میں کون سحر تک چپ رہتا ہے
سب کہتا ہے

میں چپکے سے قدم دھروں تو رستے بولنے لگ جاتے ہیں
گلی کی روشن قندیلیں بھی ایک شرارت سے تکتی ہیں
جلتے بجھتے سائن بورڈ تو یوں آنکھیں جھپکاتے ہیں .…
جیسے وہ سب سے کہہ دیں گے

اپنے من کے اندر چھپ کر جب بھی تجھ سے ملنے نکلوں
باتیں کرتی ہوا سے مل کر شاخیں شور مچاتی ہیں
سڑکوں کی دو رویہ آنکھیں روشن ہوتی جاتی ہیں !!

Image: Achraf Baznani
[/vc_column_text][/vc_column][vc_column width=“1/3”][vc_column_text]
[/vc_column_text][/vc_column][/vc_row][vc_row][vc_column][vc_column_text]

[/vc_column_text][/vc_column][/vc_row]

The post رستہ سہل نہیں ہے appeared first on Laaltain.

Surrogation

شہزاد نیّر — Wed, 27 Jul 2016 07:12:20 +0000

[vc_row full_width=”” parallax=”” parallax_image=“”][vc_column width=“2/3”][vc_column_text]

Surrogation

[/vc_column_text][vc_column_text]

بیج آتے ہیں، رکتے نہیں
تُند ریلے میں بہ جاتے ہیں
اووری” گہرا دکھ ہے جہاں سے کبھی سکھ کا بیضہ نہ پھوٹا”
جو دھیرے چلے
معتدل منطقے میں رکے، بارور ہو
مسرت میں گھومے پھرے
اون گولا بنی دھرتی ماتا چھوئے
ریشمیں انگلیوں سے وہ مضبوط پکڑے کہ۔۔۔دھنسنے لگے
روح کی آنکھ سے جو اندھیرے میں کھلتی ہے
اس کا نویلا دہن دیکھ لوں
قطرہ قطرہ میں خود کو انڈیلوں
شکَم قوسِ محراب ہو
آسماں گول گنبد بنے، میرے اندر تنے
جس کو دیکھوں تو آنکھیں تقدس جھپکنے لگیں
منتظر آنکھ سے خطِّ زیبا کھنچے، عکس رنگین ہو
عالمِ خواب میں اس کی کوری سماعت کی انگنائی میں
میری آواز اترے تو پہچان لے
میری پہچان بدلے۔۔۔۔مگر
اووری گہرا دکھ ہے جہاں سکھ کا بیضہ نہیں

خواہشیں جنگلوں میں اگے پیڑ ہیں
تیرے جسمی حقائق گھنی خواہشوں کی جڑیں کاٹتے ہیں
گلِ خشک کو کون تازہ کرے؟
بیضہ دانی کے خلیوں کی پہنائی میں
طاقتِ بیضہ سازی نہاں امر سے سَلب کر لی گئی
کیسے خواہش کو جسمِ حقیقت ملے؟

جستجو کا سفر بانجھ خواہش کے پَھلنے کی منزل پہ ہے
خواہشوں سے بہت ہی زیادہ تھے
بیضے جو بے کار بہتے رہے
ایک سر سبز بیضہ کسی کا
ترے خانہء نامرادی میں پیوند کر دیں گے
جو بارور ہو کے،تیرے بدن سے بدن کو کشیدے گا
تیری طرف ہاتھ پھیلائے گا
تیرا کہلائے گا
تُو بھی چہرے پہ اُجلے تقدس کی کرنیں لیے
دودھیا روشنی کے مقدس کٹوروں سے سیراب کرتے ہوئے
سبز خواہش سے زردی کو دھونے لگے گی
کہ اس عہد کا عہد نامہ ہرا ہے

Surrogation
جدید تولیدی طب کا وہ طریقہ ہےجس میں غیر زرخیز بانجھ عورت کے رحم میں کسی دوسری زرخیز عورت کا بیضہ رکھ کر باروری کا حصول کیا جاتا ہے یوں بیضہ پیدا کرنے کی صلاحیت سے محروم خواتین بھی اولاد کا سکھ پا سکتی ہیں

Image: Ira Repey
[/vc_column_text][/vc_column][vc_column width=“1/3”][vc_column_text]
[/vc_column_text][/vc_column][/vc_row][vc_row][vc_column][vc_column_text]

[/vc_column_text][/vc_column][/vc_row]

The post Surrogation appeared first on Laaltain.

(غیرتِ ایمانی (مختصر افسانہ

شہزاد نیّر — Sat, 07 Mar 2015 15:54:06 +0000

غلام رسول تھیٹر سے نکلا تو ٹھٹک کر رہ گیا۔
وہ ڈرامہ ختم ہونے سے پہلے کبھی ہال سے نہ نکلتا اگر پیشاب نے اسے تنگ نہ کر رکھا ہوتا۔ وہ بہت دیر تک ضبط کر کے اس لیے بیٹھا رہا تھا کہ کہیں ایسا نہ ہو ادھر وہ ٹائلٹ جائے اور اُدھر نرگس کا ڈانس شروع ہو جائے اور اسی ڈانس کی خاطر ہی وہ تیسری بار یہ کھیل دیکھنے آیا تھا۔ناچ کے دوران ردھم میں سیٹی بجانے کا اسے بہت مزا آتا تھا۔ یوں وہ جانتا تھا کہ نرگس کے بھڑکیلے ناچ کے بعد جلد ہی سٹیج شو ختم ہو جائے گا ۔ وہ پیشاب دبائے بیٹھا رہا تاکہ ایک ہی بار باہر جائے۔

چنانچہ جونہی نرگس کا بوٹی بوٹی تھرکتا بدن پردے کے پیچھے اوجھل ہوا، وہ تیز تیز قدم اٹھاتا ہال سے باہر آیا اور سیدھا ٹائلٹ میں گھس گیا۔ فارغ ہو کر باہر نکلا تو اُسے اپنی آنکھوں پر اعتبار نہ آیا۔ ایک لٹھ بردار ہجوم تھیٹر کی عمارت کے باہر جمع تھا۔ ڈرامے کے جو پوسٹر ان کی لاٹھیوں کی پہنچ میں تھے وہ پہلے ہی ٹوٹ کر حملہ آوروں کے پاؤں میں بکھرے ہوئے تھے۔ جو ذرا اونچے تھے ان پر پتھر برسائے جا رہے تھے۔ خوبصورت فنکاروں کے کٹے پھٹے چہرے جوتوں کے نیچے تھے!

لمبی داڑھی والا ایک موٹا سا شخص ، جس کی شلوار ٹخنوں سے بہت اوپر تھی اور سر پر سیاہ ٹوپی ، باریش ہجوم سے نعروں کے انداز میں مخاطب تھا۔ غلام رسول ایک طرف کھڑا ہو گیااور فحاشی کے خلاف تقریر سننے لگا۔ دوسری طرف کچھ لوگ ٹکٹ گھر توڑ رہے تھے۔ ٹکٹ بیچنے والا شاید بھاگ چکا تھا۔

اسی اثنا میں ڈرامہ ختم ہو گیا اور تماشائی ہال سے باہر آنے لگے۔ باریش حملہ آوروں میں سے کسی نے ایک پتھر تھیٹر سے نکلتے ہوئے تماشائیوں پر اچھال دیا۔ دیکھتے ہی دیکھتے کئی پتھر پوسٹروں کے بجائے تماشائیوں پر برسنے لگے۔ تماشائی سراسیمہ ہو کر ادھر اُدھر بکھرنے لگے تو ہجوم نے نعرے بلند کیے اور پتھروں کی بارش تیز کردی۔ کئی تماشائی زخمی ہو کر گر گئے۔ لمبی ڈاڑھی والا بدستور لوگوں کی غیرتِ ایمانی کو آوازیں دے رہا تھا۔ غلام رسول میں ایک عجیب سا جوش بھر گیا۔ اُسے لگا جیسے جذبات کا ایک مرغولہ اس کے پیٹ سے اُٹھ کر سر کی طرف بڑھ رہا ہو۔ اُس نے جھٹ سے ایک پتھر اُٹھایا اور تماشائیوں پر پھینک دیا۔ ۔ ۔ ۔ ۔ پھر وہ پتھر مارتا چلا گیا۔
۔ ۔ ۔ ۔ ۔ ۔ ۔ ۔ ۔ ۔

The post (غیرتِ ایمانی (مختصر افسانہ appeared first on Laaltain.

سیاہ تر حاشیے

شہزاد نیّر — Thu, 16 Jan 2014 11:12:24 +0000

شہزادنیر

بہادر شمشیر زن

جامع مسجد نمازیوں سے کھچا کھچ بھری ہوئی تھی۔ مولانا کا خطبہ جاری تھا۔ الفاظ بجلی کے کوڑوں کی طرح برس رہے تھے۔ نمازیوں میں جوش اُبل رہا تھا۔ اہلِ ایمان اور اہلِ کُفرکے جنگی معرکوں کا تذکرہ تھا۔ سامعین کی آنکھوں کے سامنے تلواریں چمک رہی تھیں۔ سر تن سے جدا ہو کر ہوا میں اُڑ رہے تھے۔ بھاگتے گھوڑوں سے نیزے بلند ہوتےسب کو صاف نظر آتے تھے۔ خون کی پھواروں کے بیچ نعرے بلند ہو رہے تھے۔ کشتوں کے پُشتے لگ رہے تھے۔ فتح و نصرت کے شادیانے تھے۔ مولانا کی آنکھ میں سپاہیانہ چمک بھر گئی تھی۔ وہ آنکھیں نکال نکال کر کفار کی بزدلی اور مجاہدینِ خدا کی بہادری کے قصے سنا رہے تھے۔ اُن کے گلے کی رگیں اور نتھنے باربار پھول رہے تھے۔ یوں لگتا تھا جیسے وہ خُود بہادر شمشیر زن ہوں اور گھوڑھے پر بیٹھ کر گردنیں اُڑا رہے ہوں۔
ایک دم قیامت آگئی۔ خود کش حملہ آور نے نعرہ تکبیر بلند کیااور دروازے پر آکر پھٹ گیا۔ دھماکے کی شدت سے مولانامنبر سے اُڑے اور محراب کی دیوار سے ٹکرا کر فرش پر آرہے۔ اُنہوں نے ڈرتے ڈرتے آنکھیں کھولیں۔ مسجد کی چٹائیوں پر خون نظر آیا۔ کئی نمازی بے حس وحرکت پڑے تھےاور کئی کی درد شدت سے چیخ رہے تھے۔ مولانا نے خوف سے کانپتے ہوئے اپنا جسم ٹٹول کر اس کے صحیح وسالم ہونے کا اطمینان کیا اور پھر آنکھیں کھولیں۔ سامنے کی دیوار پر ایک انسانی گوشت کا ایک بڑا سا لوتھڑا چپکا ہوا تھا جس سے قطرہ قطرہ خون ٹپک کر ایک نمازی کی مردہ آنکھوں پر گر رہا تھا۔ مولانا پر خوف کی کپکپی طاری ہو گئی تھی۔۔۔ کانپتے کانپتے اُنہیں ایک بھریری آئی۔۔۔اچانک اُن کا جسم پھڑکا اور ٹھنڈا ہوگیا۔

دوہزار بندے

اُستاد بندے علی خان آنکھیں بند کیے سُر سمندر میں ڈوبے ہوئے تھے۔ مالکونس میں ٹھمری کی تانیں حاضرین پر سحر طاری کر رہی تھیں۔ واہ واہ! سبحان اللہ کے نعرے بلند ہو رہے تھے۔ سازندوں نے جیسے اپنے اپنے سازوں میں جادو بھر لیے تھے۔ وہ استاد بندے علی خان کی طرف دیکھتے ہوئے انگلیوں کو سُروں کی رفاقت میں جُنبش دے رہے تھے۔ رات کے سناٹے میں ماحول بندھا ہوا تھا۔ اچانک سٹیج کی پچھلی قنات کے پیچھے سے کُھسر پھسر کی آوازیں آنے لگیں۔ ایک نعرہ تکبیر بلند ہوا اور قنات کھل کر سٹیج پر آگری۔ اُس پر پاوں رکھتے ہوئے کئی آدمی سٹیج پر آگئے۔ اُن کے سروں پر ٹوپیاں اور ہاتھوں میں ڈنڈے تھے۔ سب سے اگلے لمبی داڑھی والے نےاستاد بندے علی خان کے منہ کے سامنے والے مائیک کو زور سے ڈنڈا مارا جس کی آواز پورے پنڈال میں گونج گئی۔ تماشائیوں میں کھلبلی مچ گئی اور وہ سراسیمہ ہو کر اُٹھنے اور نکلنے لگ گئے۔
اُدھر سٹیج پر عجیب دھما چوکڑی مچی۔ طبلہ نواز نے پہلے تو طبلے کے پیچھے چھپنا چاہا پھر اس اوٹ کو ناکافی سمجھ کر ہاتھوں اور گھٹنوں پر چلتا ہوا سٹیج سے نیچے لڑھک گیا قراقلی ٹوپی والے نے ستار کے اوپر ڈنڈا مارا جو پھسلتا ہوا ستار نواز کے گھٹنے پر لگا۔ اُس کی چیخ بلند ہوئی اور وہ سٹیج پر ہی لوٹ پوٹ ہونے لگا۔ ہارمونیم والا پہلے ہی ہارمونیم چھوڑ، گری ہوئی قنات والے رستے سے فرار ہوچکا تھا۔ سرمئی ٹوپی اور ہلکی داڑھی والے ایک نوجوان نے ہارمونیم اُٹھا کر سامعین کی طرف اُچھال دیا۔ اُستاد بندے علی خان پہلے تو سکتے میں بیٹھے رہے، پھر پیرانہ سالی کے باوجود سرعت سے اُٹھے اور سٹیج سے اتر کر اندھیرے میں غائب ہو گئے۔ بانسری نواز اور طنبورہ نواز بھی بھاگ گئے۔ ایک لٹھ بردار نے سارنگی نواز کی گود سے سارنگی نوچ کر سٹیج پر دے ماری۔ وہ اُٹھ بھی نہیں سکا۔ اُسے گنٹھیا کا مرض تھا اور عین وقت پر اُس کے جوڑ جواب دے گئے تھے۔ حملہ آور اب سٹیج سے اُتر کر پنڈال میں گُھس آئے۔ کرسیاں پرے اُچھال دیں، میزیں توڑڈالیں اور گلدستے نوچ کر پھول زمین پر بکھیر دئیے۔ پھر وہ نعرے لگاتے ہوئے چلے گئے۔
کچھ دیر بعد تقریب کا منتظم تھانے میں رپورٹ لکھوارہا تھا:
“کتنے لوگوں نے حملہ کیا؟” تھانیدار نے پوچھا۔
“بیس پچیس بندے ہوں گے جناب!” منتظم نے جواب دیا۔
“اور حاضرین کی تعداد کیاتھی؟”
“دوہزار بندے!” منتظم نے مختصر جواب دیا۔

غیرتِ ایمانی

غلام رسول جب تھیٹر سے نکلا تو ٹھٹھک کر رہ گیا!
وہ کھیل ختم ہونے سے پہلے کبھی ہال سے نہ نکلتا اگر اُسے پیشاب نے تنگ نہ کر رکھا ہوتا۔ وہ بہت دیر تک ضبط کر کے بیٹھا رہاتھا کیونکہ عین ممکن تھا اِدھر وہ ٹائلٹ جاتا، اُدھر نرگس کا رقص شروع ہو جاتا اور وہ اس رقص کی خاطر ہی تیسری بار یہ کھیل دیکھنے آیا تھا۔ سو وہ جانتا تھا کہ نرگس کے بھڑکیلے ناچ کے بعد جلد ہی ڈرامہ ختم ہو جائے گا۔ وہ پیشاب دبائے بیٹھا رہا تاکہ ایک ہی بار باہر جائے۔
چنانچہ جونہی نرگس کا بوٹی بوٹی تھرکتا بدن پردے کے پیچھے اوجھل ہوا، وہ تیز تیز قدم اُٹھاتا ہال سے باہر آیا اور سیدھا ٹائلٹ میں گُھس گیا۔ فارغ ہو کر باہر آیا تو اُسے اپنی آنکھوں پر اعتبار نہ آیا۔ لاٹھیاں پکڑے ایک ہجوم تھیٹر کی دیوار سے لگے پوسٹروں پر پتھر برسا رہا تھا۔ ڈرامے کے جو پوسٹر اُن کی لاٹھیوں کی پہنچ میں تھے وہ پہلے ہی ٹوٹ کر ہجوم کے قدموں میں بکھرے ہوئے تھے۔ فنکاروں کے کٹے پھٹے چہرےجوتوں تلے آئے ہوئے تھے۔ لمبی داڑھی والا ایک صحت مند شخص، جس کی شلوار ٹخنوں سے بہت اوپر تھی اور اسکے سر پر سفید ٹوپی تھی، ہجوم سے نعروں کے انداز میں مخاطب تھا۔ غلام رسول ایک طرف کھڑا ہوگیا۔ لمبی داڑھی والا فحاشی اور عریانی کے خلاف آوازیں لگاتا رہا۔ ایک طرف چند آدمی ٹکٹ گھر کو توڑ رہے تھے۔ ٹکٹ بیچنے والا شائد بھاگ چکا تھا۔
اسی اثنا میں ڈرامہ ختم ہو گیا اور تماشائی ہال سے باہر آنے لگے۔ باریش ہجوم میں سے کسی نے ایک پتھر تھیٹر سے نکلتے ہوئے تماشائیوں پر اُچھال دیا۔ دیکھتے ہی دیکھتے کئی پتھر پوسٹروں کی بجائے تماشائیوں پر برسنے لگے۔ تماشائی سراسیمہ ہو کر اِدھر اُدھر بکھرنے لگے۔ باریش ہجوم نے نعرے بلند کئے اور پتھروں کی بارش تیز کر دی۔ کئی تماشائی زخمی ہو کر گر گئے۔ لمبی داڑھی والا بدستور ہجوم کی غیرتِ ایمانی کو للکار رہا تھا۔ غلام رسول نے آو دیکھا نہ تاو، ایک پتھر اُٹھا کر تماشائیوں پر دے مارا۔۔۔ پھر وہ پتھر پھینکتا چلا گیا۔

صلہ رحمی

گل زیب نے بکرے کی ایک اگلی اور ایک پچھلی ٹانگ پکڑ لی اور اُسے زور سے دھکا دیا۔بکرا دھم کی آواز سے پتھروں پر جا گرا۔ پھر اُس نے اپنا ایک گُھٹنا بکرے کی گردن پر رکھ کر زور سے دبا دیا اور دونوں ہاتھوں سے اگلی اور پچھلی ٹانگیں رسی سے کس کر آپس میں باندھ دیں۔ اب اُس نے جیب سے اُسترا نکالا اور بکرے کے خصیوں کے سامنے اُکڑوں بیٹھ گیا۔ اُس نے احتیاط سے ایک خصیے کو ہاتھ میں پکڑ کر کھینچا۔ اس سے خصیے کی تھیلی کی اوپری جلد میں تناو پیدا ہوگیا۔ گل زیب نے کھینچی ہوئی جلد پر اوپر کی جانب اُسترے سے لمبا کٹ لگایا۔ بکرے نے ٹانگیں چلانے کی ناکام کوشش کی۔ خصیے کی تھیلی میں ایک شگاف بن گیا تھا۔ گل زیب نے ہاتھ کو مٹھی کی شکل دے کر خصیے کو اوپر دھکیلا۔ خصیہ پھسل کر شگاف سے باہر آکر لٹک گیا۔ اُس نے خصیے کی نالی کاٹ ڈالی اور خصیہ دور پھینک دیا۔ گل زیب نے اسی طرح دوسرا خصیہ بھی کاٹ کر دور پھینکا۔ اب گرے ہوئے بکرے کے پیٹ پر دو پچکی ہوئی تھیلیاں تھیں جن کے کٹے ہوئے شگافوں پر خون جمنے لگا تھا۔ اُس نے اُسترا ایک طرف رکھ کر دونوں ہاتھوں کی اُنگلیوں کی مدد سے تھیلیوں کو اوپر کی طرف گولائی میں لپیٹنا شروع کر دیا۔ جب تھیلیاں لپٹتے لپٹتے اپنے اپنے شگافوں کے اوپر آگئیں تو اُس نے میلے سے کپڑے کی دو انگل چوڑی پٹی اُس تہ در تہ جلد کے ڈھیلے کے اوپر باندھ کر گرہ لگا دی۔
جب اُس نے بکرے کی ٹانگوں سے رسیاں کھول دیں تو وہ فورآ اُٹھ کر کھڑا نہیں ہوا بلکہ کافی دیر تک پتھروں پر لیٹا ہانپتا رہا۔
بکرا خصی ہو چکا تھا۔ اب گل زیب جلدی جلدی مسجد کی طرف چل پڑا جہاں تبلیغی جماعت ٹھہری ہوئی تھی اور گل زیب نے امیر صاحب کے حکم پر آج صلہ رحمی کے موضوع پر وعظ کرنا تھا۔

اینٹ اور مسجد

بازار میں شانِ رسالت کا جلوس نکل رہا تھا۔ سبزے جھنڈے اُٹھا ئے رنگ برنگی پگڑیوں والے سینکڑوں لوگ ہاتھ اُٹھااُٹھا کر نعرے لگا رہے تھے۔ کئی ٹولیوں کے پاس میگا فون تھے اور ان میں خوش الحان بچے منقبتیں گا رہے تھے۔ بیچ بیچ میں نعرے بلند ہونے لگتے اور جلوس آگےروانہ ہو جاتا۔
چلتے چلتے جب جلوس ایک بڑی جامع مسجد کے سامنے پہنچا تو اندر سے امام صاحب اور کئی افراد گلاب کے ہار لے کر نکلے اور جلوس کے رہنماوں کو پہنادئیے۔ ایک ہار امام صاحب نے اپنے گلے میں ڈالا اور ہراول دستے میں شامل ہوکر آگے آگے چلنے لگتے۔
پیچھے ایک ٹولی نے شربت فروش کی ریڑھی پر ہلہ بول دیا۔ ٹوپیوں اور پگڑیوں والے نوجوان خود ہی گلاس بھر بھر کر شربت پینے لگے۔ چھینا جھپٹی میں کئی گلاس ٹوٹے اور شربت زمین پر گرتا رہا۔ جلوس روانہ ہوا تو دکانداروں نے لُوٹ اور پتھراو کے ڈر سے دُکانیں بند کر دیں۔
تھوڑی دور چل کر جلوس ایک دوسری مسجد کے سامنے رک گیا۔ نعرے اچانک فلک شگاف ہوگئے۔ جلوس کے شرکاء میں نیا جوش بھر گیا۔ پہلی مسجد کے امام صاحب نے دوسری مسجد کے طرف ہاتھوں کے اشارے کرکر کے منکرینِ شانِ رسالت کے خلاف خوب نعرے لگوائے۔ اچانک اُس مسجد کا لاوڈ سپیکر آن ہونے کی آواز آئی اور ایک کرخت آواز گونجی “یہ جلوس والے آگے چلے جائیں، ہماری نماز کا وقت ہونے والا ہے”۔ اِس پر جلوس نے مزید جوش وخروش سے نعرے لگانے شروع کر دئیے۔ کچھ جذباتی نوجوان، جن کی پہلی پہلی داڑھیاں نکلی ہوئی تھیں، مسجد کے دروازے پر پہنچ گئے اور بند دروازے کودھکے دینے لگے۔ دروازہ بہت مضبوط تھا، نہ کھُلا نہ ٹوٹا۔ نوجوانوں نے مسجد کا بورڈ اتار کر توڑ دیا اور چندے والی صندوقچی اُکھاڑ لی۔ ایک نوجوان صندوقچی سر سے بلند کر کے نعرے لگانے لگا۔ اسی دوران مسجد کے اندر سے چند پتھر اور اینٹیں آ کر جلوس پر گریں۔ جلوس کے شرکاء نے بھی اینٹ کا جواب پتھر سے دیااور سینکڑوں پتھر مسجد کے اندر گرنے لگے۔
پھر پولیس کی گاڑیوں کے سائرن کی آواز آنے لگی۔ جلوس آرام سے نعرے لگاتا ہوا آگے بڑھ گیا اور پولیس نے ایک فاصلے سے جلوس کے آگے آگے چلنا شروع کردیا۔

معمول

شمس اللہ نے چادر اوڑھ رکھی تھی جس کے نیچے اُس نے تاریں اور فیوز چھپائے ہوئے تھے۔ نوراللہ اور ضیاءاللہ اُس کے پیچھے چل رہے تھے۔ دونوں کے ہاتھوں میں کپڑے کے تھیلے تھے جن میں آر ڈی ایکس بھرا تھا۔ وہ تینوں خاموشی سے چلتے ہوئے اندھیری گلیاں پار کرنے لگے۔ رات کا تیسرا پہر تھا اور گلیاں سنسان۔
ایک جگہ رُک کر شمس اللہ نے ایک طرف انگلی سے اشارہ کرک کہا ” وہ سکول ہے” ۔ مکانوں سے ذرا ہٹ کر کھیتوں کے قریب پرائمری سکول کے تین پختہ کمرے اندھیرے میں بھی نظر آرہے تھے۔ ضیاءاللہ ذرا سا لرز گیا۔ اُس نے تھوک نگل کر گلا تر کیا اور دھیمی آواز میں نوراللہ کو مخاطب کیا “اسی سکول سے میں نے پانچویں پاس کی تھی!”
شمس اللہ نے یہ سرگوشی سُن لی اور وہ پیچھے مڑا۔ وہ اپنا منہ ضیاءاللہ کے کان کے قریب لایا اور سخت لہجے میں کہا“پھر؟”
“پھر میں ابا کے ساتھ کوئلوں والی انگھیٹیاں بنانے لگ گیا”۔
شمس اللہ نے اور بھی سخت اور سرد لہجے میں کہا ” تم نے اس سکول سے پڑھا تو پھر کیا ہوا۔ امیر صاحب کا حکم ہے کہ یہ سکول بچوں کو ناپاک دنیاوی تعلیم دیتے ہیں جو اُن کو کفر کی طرف لے جاتی ہے۔ صرف دین کا علم پاک علم ہے ۔” ضیاءاللہ نے ہلکا سا سر ہلایا۔ شمس اللہ نے پھر کہا ” تمہیں اور مجھے فیوز جوڑنے اور آرڈی ایکس لگانے کی تربیت اس لئے دی گئی ہے کہ جہاں امیر صاحب حکم کریں، دھماکہ کر دینا ہے۔باقی امیر صاحب پر چھوڑنا ہے۔ انہوں نے خود، تمہارے سامنے ہمیں دعا دے کر بھیجا ہے”۔
تینوں نے مل کر آرڈی ایکس، فیوز اور تاریں بچھادیں ۔ شمس اللہ ایک لمبی سی تار بچھاتا ہواسکول سے دور لے آیا۔ پھر اُس نے وہ تار ایک بیٹری سے لگائی، بٹن جوڑااور ہلکی آواز میں نعرہ تکبیر کہہ کر بٹن دبا دیا۔
گاوں والوں نے ایک اور دھماکہ سُنا اور کروٹ بدل کر سو گئے۔

The post سیاہ تر حاشیے appeared first on Laaltain.