سمیع کاکڑ, Author at Laaltain

بلوچ مزاحمت کاروں سے ایک اپیل

سمیع کاکڑ — Mon, 19 May 2014 11:51:41 +0000

گزشتہ چند ماہ میں بلوچ عسکریت پسند تنظیموں کی جانب سے بلوچ آزادی کے لئے بلوچستان میں اور بلوچستان سے باہر عام شہریوں پر حملوں میں اضافہ ہوا ہے۔ سبی میں ٹرین بم دھماکے میں درجنوں عام آدمی بشمول خواتین اور بچے ہلاک ہوئے پھر اسلام آباد کی سبزی منڈی میں دھماکہ ہوا جس میں بھی درجنوں مزدور پیشہ آدمی شہید ہوئے۔اس گنتی میں میں وہ لوگ نہیں جو دھماکوں کے نتیجے میں زندہ بچ گئے مگر اعضاء سے محروم ہوگئے اور اب شاید ساری زندگی دوسروں کے محتاج رہیں گے۔پہلے دھماکے کی ذمہ داری یونائیٹڈ بلوچستا ن آرمی نے قبول کی جبکہ دوسرے واقعے کے تانے بانے طالبان کے مذاکرات مخالف تنظیموں سے جوڑے جا رہے تھے کہ اسکی ذمہ داری بھی یوبی اے )یونائٹڈ بلوچستان آرمی (نے اپنے سر لے لی۔ کچھ عرصہ پہلے سائینس کالج کوئٹہ کے سامنے ایک دھماکہ ہوا تھا جس کی ذمہ داری احرار الہند اور یو بی اے نے بیک وقت قبول کی تھی۔ بلکہ یو بی اے نے تو خبردار کیاکہ انکی حریت پسند کاروائیوں کا کریڈٹ دو سری تنظیمیں نہ لیں۔خود کو آزادی اور حریت کا علم بردار کہلانے والے بھی عام آدمی کے خون کے پیاسے ہو گئے۔ یہ نام نہاد آزادی پسند خود کو کامریڈ صفت کہلانے والے بھی طالبان کی فہرست میں رضاکارانہ طور پر شامل ہو گئے۔
بلوچ آزادی کی بات کرنے والے نوجوانوں سے تربت میں چی گویرا پر کتابیں برآمدہوئی تھی، مگر ان کتابوں میں تو عوام کو اپنی طاقت گردانا گیا تھا نہ کہ عوام کو آسان ہدف جانتے ہوئے، ریاست پر دباو ڈالنے کے لئے ان کے خون سے ہولی کھیلنے کا سبق۔ان کتابوں میں تو سامراجیت کے خلاف جدوجہدکی بات ہے اور ان کے فلسفے میں مظلوم کی آواز اور ڈھال بننے کے گر سکھائے گئے تھے۔ مگر اب شاید ان آذادی پسندوں کی ترجیحات بدل گئی ہیں اور وہ اب سامراج کے آلہء کار بنتے نظر آرہے ہیں، ان کے ہاتھ بھی اسی خون سے رنگے ہیں جس کے دھبے ریاست اور سامراج کی آستینوں پر ہیں۔استحصال کرنے والوں کی طاقت عام آدمی کے ذہن میں بھوک، محرومی اور موت کا خوف پیدا کرنے سے ہے، بلوچ قوم پرست اسی خوف کی علامت بنتے جا رہے ہیں۔

عام لوگوں پر حملوں اور شہری تنصیبات کے خلاف کاروائیوں سے اگربلوچ مسلح تحریکوں کے مقصد کو تقویت مل رہی ہے تو وہ مقصد آزادی کی لڑائی اور حقوق کی جنگ ہرگز نہیں ہو سکتی بلکہ کچھ اور ہے۔ ڈاکٹر اللہ نذر اور براہمدغ اگر اس طریقے سے اپنے مقصد کی تکمیل کو جائز مانتے ہیں تو پھر انکا ایجنڈا بھی بلوچستان کے حقوق نہیں ہوگا، کوئی انسان دوست تحریک کسی انسان کی اس کی قومیت یا شناخت کی وجہ سے دشمن نہیں ہو سکتی۔

یو بی اے کی طرف سے ان دھماکوں کے قبول کرنے کے دعووں کے بعد اب وہ لوگ بھی منہ چھپا رہے ہیں جو اپنے سرمچاروں کی مظلومیت، آدرش پسندی، اور حریت پسندی کی مثالیں دیتے تھے۔ یہاں تک کے نواب خیر بخش مری کے سپوت اور سرمچاروں کے سرخیلوں میں سے ایک، حیربیار مری کو بھی کہنا پڑا کہ وہ ایسی ہر قسم کی کاروائی کے خلاف ہیں چاہے فورسز کی طرف سے ہو یا سرمچاروں کی طرف سے کہ جن میں عام آدمی نشانہ بنتا ہو۔
سوال یہ ہے کہ ایسی کاروائیوں میں مرنے عالے عام لوگوں کا قصور کیا ہے؟ کیا انھوں نے ان آزادی کے علمبرداروں کے مفادات کو کبھی کوئی نقصان پہنچایا ؟ یا پھر انکا گناہ یہ تھا کہ یہ ریاست کے نظام کے تحت چلنے والی ریل گاڑی میں سفر کر رہے تھے اور انکے خریدے گئے ٹکٹوں سے ریاست کا فائدہ ہوا؟ یا پھر یہ کہ وہ کسی سرکاری زمین پر قائم سبزی منڈی میں مزدوری کا حق نہیں رکھتے تھے۔ ان بیچاروں کو تو شاید وسائل اور استحصال کے معنی بھی نہیں معلوم تھے۔
عام لوگوں پر حملوں اور شہری تنصیبات کے خلاف کاروائیوں سے اگربلوچ مسلح تحریکوں کے مقصد کو تقویت مل رہی ہے تو وہ مقصد آزادی کی لڑائی اور حقوق کی جنگ ہرگز نہیں ہو سکتی بلکہ کچھ اور ہے۔ ڈاکٹر اللہ نذر اور براہمدغ اگر اس طریقے سے اپنے مقصد کی تکمیل کو جائز مانتے ہیں تو پھر انکا ایجنڈا بھی بلوچستان کے حقوق نہیں ہوگا، کوئی انسان دوست تحریک کسی انسان کی اس کی قومیت یا شناخت کی وجہ سے دشمن نہیں ہو سکتی۔ اور اگر ایسا نہیں ہے تو تمام بلوچ رہنماوں کو حربیار مری کی طرح واضح الفاظ میں ایسی کاروائیوں کی مذمت کرنی ہوگی جو بلوچ یا غیر بلوچ عوام کے مفادات کو نقصان پہنچائیں ۔

The post بلوچ مزاحمت کاروں سے ایک اپیل appeared first on Laaltain.

سوالاًجواباً: جفعر خان اچکزئی کی یاد میں

سمیع کاکڑ — Tue, 25 Mar 2014 11:29:03 +0000

عام آدمی کے خاص زاویے سے،
کھوٹے سوالوں کے کھرے جواب،
بلوچستان کے معروف لکھاری جعفر خان اچکزئی مرحوم کی یاد میں۔

سوال: بلوچستان سے آپ کو کیا یاد آتا ہے؟
جواب: وہ سب بہت غریب ہیں۔

سوال: خیبرپشتونخوا سے کیا مراد لیتے ہیں؟
جواب: عمران خان۔

سوال: پنجاب میں کیا ہوتا ہے؟
جواب: میلے، بسنت، ورلڈ ریکارڈ، موٹروے۔۔

سوال: لاہوری اور پشاوری میں فرق؟
جواب: اتنا ہی جتنا آرمی اور ایف سی میں ہے۔
سوال: منور حسن کون ہے؟
جواب: وزیرستان کا ناظم اعلی۔

سوال: طالبان کون لوگ ہیں؟
جواب: ہمارے کرموں کا پھل۔

سوال: ماما قدیر سے آپ کے ذہن میں کیا آتا ہے؟
جواب: ناٹو، آذادی، بے بسی۔

سوال: کوئٹہ کہاں ہے؟
جواب: ایبٹ آباد میں،

سوال: روس کو کس نے شکست دی؟
جواب: سٹنگر میزائیل نے۔۔

سوال: قائداعظم ریزیڈنسی کو کیوں جلایا گیا؟
جواب: یہ کہاں ہے؟

سوال: آپ تفریح کے لئے زیارت جانا پسند فرمائیں گے؟
جواب: میں ذیادہ مذہبی نہیں ہوں بس ایک دو دفعہ داتا دربار گیا ہوں۔

سوال: ماما قدیر کے بارے میں کچھ تو بتائیں؟
جواب: پتہ نہیں، شاید کسی مطالبے کے لئے بھوک ہڑتال کر رہے ہیں۔

سوال: وزیرستان سے لوگ نقل مکانی کیوں کر رہے ہیں؟
جواب: پتہ نہیں لیکن ہم بہت پریشان ہیں۔

سوال: وہ کیوں؟
جواب: وہ پنجاب اور سندھ کے پرامن شہروں کو خراب نہ کر دیں۔

سوال: کراچی سے کیا مراد ہے؟
جواب: الطاف بھائی۔

سوال: کیا آپ عبدالستار ایدھی کو جانتے ہیں؟
جواب: جی ہاں۔ وہ ایمبولنس چلاتا ہے۔

سوال: شیخ رشید کون ہے؟
جواب: مشرف کی پارٹی کا صدر۔

سوال: چوہدری شجاعت کو آپ جانتے ہیں؟
جواب: میرے خیال میں چوہدری افتخار اور چوہدری اعتزاز کا بھائی ہے۔

سوال: عمران خان کیوں وزیر اعظم نہیں بن سکے؟
جواب: کیونکہ لوگوں کو پتہ نہیں تھا کہ اس نے ورلڈ کپ جیتا۔

سوال: لاہوری اور پشاوری میں فرق؟
جواب: اتنا ہی جتنا آرمی اور ایف سی میں ہے۔

سوال: منور حسن کون ہے؟
جواب: وزیرستان کا ناظم اعلی۔

سوال: انڈیا کا پنجاب ذیادہ زرخیز ہے یا پاکستان کا؟
جواب: تو کیا دونوں میں کوئی فرق ہے؟

سوال: سندھ مدرستہ اسلام اور قائد اعظم میں کیا تعلق ہے؟
جواب: معاف کیجیئے گا۔ قائداعظم مدرسہ میں نہیں پڑھے ہیں۔

سوال: ڈرون حملے کب بند ہوں گے؟
جواب: جب شریعت آئے گی!

سوال: بلوچستان کیوں پسماندہ ہے؟
جواب: ہم کو آذادی دو!

سوال: کامریڈ کسے کہتے ہیں؟
جواب: کافروں کے ساتھی کو۔

سوال: ڈرون حملے کب بند ہوں گے؟
جواب: جب شریعت آئے گی!

سوال: خبرناک کیا چیز ہے؟
جواب: پنجاب ثقافتی پروگرام۔

سوال: زاہد حامد کون ہے؟
جواب: ڈرائینگ روم کا مجاہد۔

سوال: شہید کسے کہتے ہیں؟
جواب: گھر کی حفاظت کرتے ہوئے اگر کتا مر جائے تو اسے شہید کہتے ہیں۔

سوال: ثنا بُچہ کون ہے؟
جواب: بچہ ثُقہ کی بہن شاید۔۔۔

سوال: آج کل کے نعت آپ کو کیسے لگتے ہیں؟
جواب: آج کل کے اسلامی گانے بہت سریلے ہوتے ہیں۔

سوال: طاہرالقادری کیسے آدمی ہیں؟
جواب: ان کو اکیڈمی ایوارڈ دیا جانا چاہیئے۔

سوال: اسفندیار ولی غفار خان کے جرّی پوتے ہیں؟
جواب: جّری غفارخان کے پوتے ہیں۔

سوال: ایزی لوڈ کسے کہتے ہیں؟
جواب: سرخ پوش پرچارک۔

سوال: اسلم رئیسانی اور ہیروینچی میں کیا فرق ہے؟
جواب: رئیسانی صاحب زرداری کے بلوچستان کے وزیراعلی تھے۔

سوال: نواب اور سردار میں فرق واضح کیجئے؟
جواب: گورا آقا اور کالا آقا۔

سوال: آپ کو انگریز اچھے لگتے ہیں یا امریکی؟
جواب: سعودی۔

سوال: پشتون سبز چائے کیوں پسند کرتا ہے؟
جواب: کیونکہ سبز باغ میں حوریں ذیادہ ہوتی ہیں۔

سوال: رحمان ملک پسند ہیں یا ان کا ہئیرکٹ؟
جواب: اُن کی اُردو۔

سوال: وفاقی کابینہ میں پنجاب کی ذیادہ نمائندگی کی کوئی خاص وجہ؟
جواب: مشرقی پاکستان کی نمائندگی کم ہوا کرتی تھی اس لیے وہ تڑی پار ہو گئے۔ لوگوں نے سوچا دوبارہ یہ نہ ہو اس لیے۔

سوال: غیر ملکی کرکٹ ٹیم پاکستان آنے کو تیار نہیں، اس کے پیچھے کس کی سازش ہے؟
جواب: کیا پاکستان کی ٹیم فاٹا یا بلوچستان جانے کو تیار ہے؟

سوال: سعادت حسن منٹو کو آپ جانتے ہیں؟
جواب: زندیق فحش نگار۔

سوال: دھوم فلم آپ نے دیکھی ہے؟
جواب: دوبار، کترینا نے کمال رقص کیا ہے۔

سوال: بلاول زرداری ہے یا بھٹو؟
جواب: ایک شرط پے کھیلوں گی پیا پیار کی بازی، جیتوں تو تجھے پاؤں ہاروں تو پیا تیری۔

سوال: کوئٹہ میں بے گناہ ہزارہ کو کیوں قتل کیا جا رہا ہے؟
جواب: آپ کی بات سے عرب اور فارس کے پیٹرول کی بو آرہی ہے۔

سوال: ذوالفقار مرزا جانباز ہے یا جیالا؟
جواب: حافظ قران۔

سوال: مولانا فضل الّرحمٰن کو کیک ذیادہ پسند ہے یا حلوہ؟
جواب: دونوں بشرطیکہ کرسی پر بیٹھ کر کھانے کو ملے۔۔۔

سوال: جنرل ضیاء الحق اور جنرل مشرف میں کیا فرق ہے؟
جواب: پہلا مرد مجاہد اور دوسرا کسی سے ڈرتا ورتا نہیں۔

سوال: پاکستان کے پشتون کبھی کبھی خود کو افغان بھی کہتے ہیں، ایسا کیوں؟
جواب: وہ ایسے جیسے رنجیت سنگھ سکھ بھی تھا اور پنجابی بھی۔

The post سوالاًجواباً: جفعر خان اچکزئی کی یاد میں appeared first on Laaltain.