عقل کہتی ہے : چُپ ہی بہتر ہے
دل یہ کہتا ہے : کوئی بات کروں
چار سُو پھیلتے اندھیروں کو
حرفِ شعلہ صفت سے مات کروں

عقل کہتی ہے : یہ جنوں خیزی
تیرے اپنے لیے ہی مہلک ہے
تیرے دستِ تپاں کی بے تابی
سنگ و آہن کے سلسلوں میں فقط
اک بُنِ مُو سے کچھ زیادہ نہیں

دل یہ کہتا ہے: خوف کیسا ہے
جو بھی لکّھا ہے لوحِ ہستی پر
وہ تو ہونا ہے’ ہو کے رہتا ہے
اس جہانِ سفر میں ہر لمحہ
آگ میں کوئی پھول کھلتا ہے

عقل کہتی ہے : یہ سبھی باتیں
بے حقیقت ہیں’ بے نتیجہ ہیں
صرف بے کار خواہشوں کے اسیر
اپنی کم مایگی چُھپانے کو
ایسے قصّے تراش لیتے ہیں

عقل کہتی ہے : مصلَحت کوشی
کام یابی ہزار دیتی ہے
چند لمحوں کی خامشی اکثر
زندگی کو سنوار دیتی ہے

زندگی کی بساطِ پے چیدہ
دستِ شاطر ہی کھول سکتا ہے
آستیں میں چھپا ہوا خنجر
وقت آنے پہ بول سکتا ہے

شخصِ عیّار کی فسوں کاری
شہر یاروں کو رام کرتی ہے
چشمِ ناوک فگن کی طرّاری
دل کا قصّہ تمام کرتی ہے

ہم کو اس وقت کے سمُندر میں
موج کے ساتھ ساتھ چلنا ہے
ہر نفَس اپنی سَمت بہنا ہے
ہر قدم اپنے ہاتھ چلنا ہے

عقل کی لن ترانیاں سُن کر
دل کی دھڑکن کُچھ اور تیز ہوئی
حِرزِ جاں تھے جو درد کے لمحے
آگ بن کر لہو میں پھیل گئے
سُرمئی آنکھ کے ستاروں میں
جوشِ خُوں ناب کی چمک اُبھری
وَحشتیں پور پور سے پھوٹیں
لفظ پھر موجِ تُند کی صورت
غارِ حلقوم سے اُبلنے لگے

عقل کیا ہے حواس کا پَرتَو
ایک مخبر : جسے نہیں معلوم
لا سے لا تک کا یہ سفر کیا ہے
موت کیا ہے حیات کیا شے ہے
آسمانوں کی دُھند میں لپٹی
بے کراں کائنات کیا شے ہے

کون اس کارگاہِ ہستی میں
نقرئی دن کو رات کرتا ہے
کیسے گردِ ممات سے آگے
ایک نقشِ ابد اُبھرتا ہے

رقص میں کائنات ہے کیوں کر
ہر نفَس بے ثبات ہے کیوں کر
ماوراے حواس یہ دُنیا
آخرش کس ڈگر پہ چلتی ہے
کیسے نُطقِ شعورِ بے پایاں
حرفِ وِجدان میں سِمٹتا ہے
وقت اپنی روانیاں کھو کر
کس طرح ایک پَل میں ڈھلتا ہے
آبرُوے یار کے اشارے پر
کیوں جہاں پیرہَن بدلتا ہے

عقل کیا ہے کتابِ سادہ پر
طفلِ مکتب کی نقش پردازی
علمِ ظاہر کے چند پیمانے
چشمِ عیّار کی فسوں سازی

عقل :-

عقلِ آدم کو خام کہہ دینا
یوں تو اہلِ جنوں کی عادت ہے
لیکن اتنا تو مانتے ہیں سبھی
عقل انسان کی ضرورت ہے

کس نے اس خار و خَس کی دُنیا کو
حُسن و خوبی میں بے مثال کیا
آدمی خُوگرِ جہالت تھا
کس نے شائستۂ جمال کیا

کس نے اِس لالہ زارِ ہستی کی
ایک مدت سے کی نگہ بانی
کیسے اوجِ کمال کو پہنچی
چشمِ اہلِ ہنر کی تابانی

کس نے پھینکی کمند تاروں پر
ماہ و انجم شکار کس نے کئے
ریگ زاروں کے خَشمگیں چہرے
کار گاہِ بہار کس نے کئے؟؟

کیسے یہ ابر و باد کے موسم
دستِ آئینہ گر میں آٹھہرے
ہفت افلاک سر نگوں ہو کر
کیوں مرے بال و پر میں آٹھہرے

تُو کہ وارفتگی کا مارا ہوا
جانِ عالم پہ طنز کرتا ہے
تُو کہ ان دل فریب رنگوں میں
دشتِ وَحشت کی خاک بھرتا ہے

دل :-

تُو نے سب مُوشگافیاں کر لیں
اب مری بات غور سے سُن لے
میری وارفتگی’ مِرا ورثہ
چاک دامانیاں مرا زیور

میں نے اس رنگ و بُو کی دنیا کو
چشمِ بازیچہ گر سے دیکھا ہے
رقص کرتے دیارِ خُوباں کو
گھومتے بام و در سے دیکھا ہے
دشتِ افلاک سے پرے جا کر
خُوے بالیدہ تر سے دیکھا ہے
تُو نے اپنی نظر سے دیکھآ ہے
میں نے اپنی نظر سے دیکھا ہے

تُو نے کوتاہیِ نظر کو ہی
رہنماے حیات سمجھا تھا
بزمِ لیل و نہار کو تُو نے
معرضِ حادثات سمجھا تھا

تجھ کو آغاز کی خبر ہی نہ تھی
تجھ کو انجام کی خبر کیا ہو
تیری مُٹھی میں ریت کے ذرّے
تجھ میں تخلیق کا ہنر کیا ہو

تُو تو اس ریگ زارِ ہستی میں
جل بجھی راکھ کا قرینہ ہے
وقت کے بے کراں سمُندر میں
عقل بے بادباں سفینہ ہے

آگہی ورطۂ سفر میں ہے
بے یقینی دل و نظر میں ہے
آہوے تیز محوِ رقص نہیں
جست اندیشۂ دِگر میں ہے

خُوب اُڑنے کی آرزو ہے’ مگر
کُچھ خرابی سی بال و پر میں ہے
آنکھ میں دُھند ہے زمانوں کی
تیرگی پردۂ سحَر میں ہے
رازِ ہستی عیاں نہیں تجھ پر
تُو ابھی دستِ کوزہ گر میں ہے

رازِ ہستی کو جاننے کے لیے
علم و عرفان کی ضرورت ہے
موجِ الہام کے شناور کو
چشمِ وِجدان کی ضرورت ہے
نغمہ ہاے جنوں کی شورش کو
چاک دامان کی ضرورت ہے
رہ نوَردِ طلب کے سینے میں
ایک طُوفان کی ضرورت ہے

ECSTASY:

زینہ ہاے فلک کے بالِیں پر
پھر کوئی روشنی اُبھرتی ہے
دل میں اک ساعتِ فسوں پرور
کُنجِ آفاق سے اُترتی ہے
سوز و سازِ درُوں کی بے تابی
نغمۂ ماوراؑ سے بڑھتی ہے

پردۂ ہست و بُود اُٹھتا ہے
یا درِ خواب کوئی کُھلتا ہے
قریہِ دید کے دریچوں میں
ایک شعلہ سا رقص کرتا ہے

————

میرے رنجِ سفر کی قندیلیں
چشمِ شبنم فشاں میں روشن ہیں
میرے زخمی بدن کی خُوش بُو سے
غنچہ ہاے دوام مہکے ہیں
میرے حرفِ جُنوں کے سندیسے
بزمِ آفاق سے اُبھرتے ہیں
اور میں نغمہِ جنوں لے کر
پھر کسی جُستجو میں نکلا ہوں

گُلِ تمنّا بکھر چکا ہے
یہ شہر لاشوں سے بھر چکا ہے
دریدہ جسموں کی باس سے پُر ہَوا کی پا کوب وَحشتوں نے
گلی گلی میں دُہائی دی ہے
جلے مکانوں کی راکھ ہر سُو دکھائی دی ہے
مَیں اپنے حصّے کی راکھ چُن کر تری گلی تک تو آ گیا ہوں
مگر یہاں بھی
نہ تُو’ نہ تیرے لبوں پہ پھیلا ہُوا تبسُّم
یہاں وہاں دُشمنوں کی گھاتیں
کٹے پھٹے بے یقین چہرے
لہو میں ڈوبی ہوئی تمنّا۔۔۔۔ سراب منزل
بدن کو دو لخت کرکے پھیلی مہیب ساعت۔۔۔
نہ آگے بڑھنے کا کوئی یارا’ نہ لَوٹ آنے کی کوئی مہلت۔۔۔۔
کڑکتی بجلی کمند پھینکے تو آسماں سَٹپٹا کے اپنی جہات بدلے
میں بچ نکلنے کی راہ ڈھونڈوں۔۔۔ غنیم چُپکے سے گھات بدلے
شکستہ دیوار و در میں آٹکے کِواڑ دَھم سے گری فصیلوں پہ نوحہ خواں ہیں
جلے دریچوں کے بیچ اب بھی سُلگتی چلمن کی دھجّیاں ہیں
کسی کی چُرمُر کلائی میں ٹوٹی چُوڑیاں ہیں
دریدہ جسموں کے اَدھ جلے ڈھیر میں ابھی تک ترے تبسُّم کی قوس شاید
َاجل کے بوسے کی مُنتظِر ہے
ہزار َاسوَد سرشت لمحے نگارِ خُوباں کے پیچ و خم میں جَڑے ہوئے ہیں
ہم اپنے حصّے کے گھاو لے کر نکل پڑے ہیں

بسیط دشت و دَمن میں ہر سُو دراز دَستوں کی سلطنت ہے
ہم اپنی بے محملی میں باندھی شکست کی گٹھڑیاں اُٹھائے
خود اپنی دھرتی پہ بے وطن ہیں
لہو کی چادر نے ڈھانپ لی ہے’ ہمارے زخموں کی بے نوائی
ہماری آنکھوں میں نقش بے منزلی ہزاروں سراب بُن کر
کوئی تو منزل تلاش لے گی
ہماری ہجرت نئے سِرے سے کوئی کہانی تراش لے گی
مگر غلامی کی یہ صلیبیں ہمارے بوجھل سَروں کو اِتنا جھکا رہی ہیں
کہ ہم فقط زخم دیکھ پائیں
دراز دستوں کی سلطنت میں جِدھر بھی جائیں
نظر اُٹھائیں تو سر کٹائیں
خُود اپنی مجبوریوں کے ہاتھوں فریب کھائیں
ہمارے رختِ سفر میں باندھی گئی ہے صدیوں کی بے قراری
ہمیں تو ایندھن سمَجھ کے جھونکے ہے یہ شکاری

نظامِ زر سے فروغ پاتی دراز دستی ہزار حیلوں سے
ہم نحیفوں کو نوچ کھانے کی منتظِر ہے
طلب رسد کے حصار میں رُک کے سانس لیتے تمدُّنوں کو
ضرورتوں نے جکڑ لیا ہے
لباسِ آتِش پہَن کے نکلے یہ لاو لشکر ہمارے خِرمن جلا رہے ہیں
ہماری ہستی مٹا رہے ہیں
نحیف لوگوں کے قافلے بھی ٹھہر کے سوچیں
کہ ظُلم سہنے کی آخری حد کہاں تلک ہے؟

نیل گوں آگ پہ شیشے کی صراحی رکھ کر
دستِ پژ مُردہ پہ پھیلا دی ہے بُھوبل اُس نے!
آہنی تار کو شہ رگ میں پرو کر آخر
شعبدہ باز نے زنبیل سے ساغر مانگا
جیبِ زنبیل سے اک کانچ کا ساغر لپکا
جس کے ہر سَمت منقّش تھی شباہت دل کی
خُوں چکاں زخم کے اُمڈے ہوئے فوّاروں سے
اُس نے جی کھول کے خُوناب کے ساغر کھینچے

دستِ پژ مُردہ میں جینے کی تمنّا جاگی
نیل گوں آگ پہ شیشے کی صراحی ٹُوٹی
جیبِ زنبیل سے پھر کانچ کا ساغر لپکا
جس کے ہر سمت منقّش تھی شباہت دل کی

شعبدہ باز کے اِس کھیل تماشے سے الگ
ہم بھی انگشت بَہ دنداں ہیں کہ اب کیا ہو گا؟
معرکہ ہوگا کوئی شہر کے بازاروں میں
یا در و بام پہ آسیب کا پہرہ ہو گا؟
جبر کا ہاتھ دبوچے گا ہر اک گردن کو
یا کہ اس جنگ میں جمہُور کا غلبہ ہو گا؟

سُرمئی شام کے بڑھتے ہوئے سنّاٹوں میں
دف کی آواز پہ اک شور بپا ہوتا ہے
پھیلتا جاتا ہے آسیب گُذرگاہوں پر
آگ کا شعلہ سرِ شام رہا ہوتا ہے
مشعلیں لے کے نکل آئے ہیں بستی والے
دیکھیے رات کی آغوش میں کیا ہوتا ہے؟

دوسری سمت فلک بُوس محلاّت کے بیچ
مسندِ زر پہ فرَو کش ہے وہ فرمان روا
جس کے برُوے خمیدہ کی ذرا سی جنبش
کج کلاہوں کو بھی لب بستہ و لرزاں کر دے
جس کے اطوار میں شامل ہے وہ نخوت کہ اُسے
قیصر و کَے کے مقابل بھی نمایاں کر دے
جس کے بس ایک اِشارے پہ کمر بستہ ہیں
خُود پہ اِتراتے جوانوں کے توانا لشکر
جس کی سطوت سے سراسَیمہ غلاموں کی قطار
سارے دربار کے اطراف میں استادہ ہے
تخت سے چند قدم دُور ذرا نیچے کئی حلقہ بَہ گوش
منتظر ہیں کہ اُنیں اِذنِ تکلُّم تو مِلے
پاس ہی اطلس و کمخاب کی چِلمن کے اُدھر
دائرہ باندھ کے بیٹھی ہیں کنیزیں ساری
جانے کس اینٹھتے لمحے کی طلب گیر صدا
جسم کی خواہشِ بے تاب کی سرکش ساعت
حُجلہء شب میں سُلگتے ہوئے چندن کا فسوں
خُود کو زربفت کے بستر پہ ہوَیدا کر دے
وصل کی رات کی لذّات کی سرگوشی ہی
ایک باندی کو شہَنشاہ کی ملکہ کر دے!

دوڑتے بھاگتے ہرکاروں کی سُرعت کے سبب
شاہی فرمان کی ترسیل میں تیزی آئے
اپنے ہی لوگوں سے لڑتے ہوئے لشکر کا قدم
پَے بَہ پَے یورش و یلغار سے اُکھڑا جائے
دف کی آواز پہ بڑھتا ہوا بے خوف ہجوم
اب کسی طور ’ کسی پَل بھی نہ روکا جائے
شورشِ شہر کا انداز بدلتا جائے۔

دف کی آواز ہو’ نقّارہ ہو یا چیخ کوئی
جوق دَر جوق نکل آتے ہیں بستی والے
درد کے رشتوں نے یوں باندھ دیا ہے سب کو
ایک آواز پہ کُھلتے ہیں دریچے سارے
ظُلم جب حد سے گُزر جائے تو اک پارہء خَس
جبر کی چشمِ بَلا خیز سے لڑ جاتا ہے
قافلہ محملِ جاناں کا اشارہ پا کر
بے خطَر آگ کے دریا میں اُتر جاتا ہے
زخم گو سینے کی پاتال سے بھی گہرا ہو
چَین آجائے تو اک رات میں بھر جاتا ہے
بوڑھے سالار نے ہارے ہوئے لشکر سے کہا
لوگ یوں بِپھریں تو سُلطان کا سر جاتا ہے

آخری منظر

شہرِ دربند میں انفاس کی بُو پھیلی ہے
حجلہء ناز کے رخشندہ کلَس ٹُوٹے ہیں
راکھ کا ڈھیر ہوئے جاتے ہیں سب رنگ محَل
دف کی آواز پہ اُمڈا ہوا بے خوف ہجوم
ساحرِ وقت کے ایوان پہ آ پہنچا ہے
دستِ پژ مُردہ بھی جینے کی تمنّا لے کر
قیصر و کَے کے گریبان پہ آ پہنچا ہے