افسانے کی یہ سطور بھی قابلِ توجہ ہیں۔

’’ہُونہہ۔‘‘ ڈاکٹر ہنکارا بھر کر آفتاب سے مخاطب ہُوا۔ ’’تم غروبِ آفتاب دیکھنے کے اِتنے شائق کیوں ہو؟ کسی سے ملنا نہیں چاہتے؟‘‘ پھر یاد آنے پر بولا۔ ’’اوہ، تم تو پاکستانی ہو۔ ماں، باپ، بہن، بھائی یا کسی اَور سے سکائپ پر تمھاری بات کروا دیں تو کیسا رہے گا؟‘‘
’’ڈاکٹر، میں اُنھیں بہت یاد کرتا ہُوں۔ لیکن مجھے اِس حال میں دیکھ کر وہ بے حد دُکھی ہَوں گے۔ یہاں پھیلنے والی اِس وبا کی خبریں یقینا اُن تک پہنچ گئی ہَوں گی اور وہ میرے لیے خاصے پریشان ہَوں گے۔ میں اُنھیں مزید دُکھ میں مبتلا نہیں کرنا چاہتا۔‘‘
“۔ ۔ ۔ ’’میں ڈاکٹر لیو سے کہاں مل سکتا ہُوں؟‘‘ ۔ ۔ ۔ “’’تم اُن سے نہیں مل سکتے۔ COVID-19 کا نتیجہ مثبت آنے پر وہ پچھلے چند روز سے آئیسولیشن میں ہیں۔‘‘
“۔ … ہسپتال کے تمام عملے کو پیپلز لبریشن آرمی کا چاک و چوبند دستہ سلامی دے رہا تھا، جن میں یقینا ڈاکٹر لیو شامل نہیں تھا۔ اُس کے دُکھ میں اضافہ ہو گیا۔ ”

اپنے دکھ کو فراموش کرکے دوسروں کے مصائب پر دکھی ہونا یقیناً ایک عظیم جذبہ ہے۔ مصنف نے بہت خوبصورتی سے پیش کیا ہے۔

وبا سے متعلق (خاص کر طبی )جذئیات حسن منظر نے اپنے ناول “وبا” میں بھی بیان کی ہیں۔ ناول ہونے کی وجہ سے قابل قبول ہوگئیں۔ لیکن اس نے اس افسانے کو طویل کرنے کے ساتھ قاری کے ذہن پر بوجھ بھی ڈالا ہے. اس کی وجہ یہ بھی ہوسکتی ہے کہ حالیہ وبا کے آغاز سے اب تک اتنا کچھ خالص یا ناقص مواد پڑھنے ، سنے اور دیکھنے کو ملا ہے کہ اب تو دل اس موضوع سے بیزار ہی ہوگیا ہے.