یومِ پاکستان پر حکمرانوں سے

قائد اعظم کے پاکستان کو
تم نے دیوارِ شکستہ کر دیا
پہلے خوابوں کو نچایا شہر میں
پھر اُنہیں عہد گزشتہ کر دیا

تم نے ہر گھر سے ستارے نوچ کر
تیرگی کا آئینہ صیقل کیا
بے حسی کو عام کرنے کے لیے
اہل دل کو بھی وہاں پاگل کیا

تم نےکوٹھے پر بٹھا کر حُرمتیں
شیشہ ء تقدیر دھندلاکر دیا
اس طرح انسانیت کی در بدر
آدمی کو اور رسوا کر دیا

ہدیہ ءتبریک دوں کس کو اگر
"خوار ہوں صناع من جملہ جمیل”
اکثریت میں ہوں جس میں بھیڑیے
ہو نہ جینے کی جہاں کوئی سبیل