کوئلا

صحرائے تھر کا کوئلا
ہیرا نہیں بن سکا تو
اس میں سے
ہماری زندگی تخلیق کر دی گئی
کوئلے سے بنا آدمی بھی
ہیرے کی ابتدائی شکل ہوتا ہے
وہ
ہر قیمت پر ہیر ے چاہتے ہیں
ہم
کوئلے کی دنیا میں رہتے ہوئے
کوئلے کی طرح دکھائی دیتے ہیں
زمین تنگ ہونے لگے تو
لوگ خواب میں چلے جاتے ہیں
ہمارے خواب اور خوشیاں بھی
کوئلے سے لکھی جاتی ہیں
مرنے کے بعد بھی ‏
ہمارے حصے میں زمین نہیں آتی
ہمارے آبا و اجداد کی ہڈیاں بھی
انھوں نے کھود کر گم کر دی ہیں
تا کہ ثابت کر سکیں
ہم گوشت پوست کے انسان نہیں
ہمیشہ سے ایسے ہی ہیں
ہم
اپنے آنسوؤں سے
پوری دنیا کو غرق کر سکتے تھے
مگر ہماری آنکھوں سے
کوئلے کے ٹکڑے نکلتے رہتے ہیں
ہم سلگتے ہوئے
جل اٹھتے ہیں تو
وہ
ہماری روشنی چرا کر لے جاتے ہیں
ہمارے پاس صرف دھواں
کوئلے سے رستے تیزابی پانی کا ایک ڈیم رہ جاتا ہے
اس ڈیم میں چھلانگ لگا کر
ہمیں
مرجانے کی سہولت مہیا کی گئی ہے