چَکّی گھومتی ہے

شہر کے وَسطی چوک میں
برکت اللہ کی چکّی گھومتی رہتی ہے
لیکن جسموں کی گندُم پِس کر
جنموں بھوکے خوابوں کا رزق نہیں بن پاتی

رات کی مُٹّھی سے گِر کر چاند بکھر جاتا ہے
سورج کی زردی میں ڈھل کر دن کا رنگ اتر جاتا ہے
گھر سے نکلے قدموں کی مدّھم آوازیں
روزانہ امّید کے ٹرمینل پر رکتی ہیں
اور دفتر کی گدلاہٹ دھونے جاتی ہیں
پروموشن کے بے معنی وعدوں کا شور
ٹوٹی میز کی درزیں سنتی رہتی ہیں
الماری میں رکّھی
خواہش کی فائل پر مٹّی جمتی رہتی ہے
لیکن جسموں کی گندُم پِس کر
جنموں بھوکے خوابوں کا رزق نہیں بن پاتی

لڑکی اپنے نازُک جسم سے
ریشم چُنتے چنتے عورت بن جاتی ہے
رات کی بجھتی سرحد پر
گیلی موم کی شکنوں میں آوازیں سنتی رہتی ہے
وقت کی شور آلود گلی سے
بسر کیے جذبوں کے چِھلکے چنتی رہتی ہے
اور ہم اپنے انکار کی چھت سے تیز ہَوا میں بہتے ہیں
اور جنگل میں لَمس کی خوش بُو چننے جاتے ہیں
گزری خزاں کے مُرجھائے رشتوں پر آری چلنے لگتی ہے
متلاشی روحوں کی چنگاری برف میں ڈھلنے لگتی ہے
لیکن جسموں کی گندم پس کر
جنموں بھوکے خوابوں کا رزق نہیں بن پاتی

دو پاٹوں کے بیچ حیاتی
بھوک کا صدمہ سہتی ہے
شہر کے وَسطی چوک میں
برکت اللہ کی چَکّی گھومتی ہے